ကမ္ဘာ့သတင်းများ  17/07/2012

 

နိုင်ငံတကာသတင်း 

 

ရင်းနှီးမြှုပ်နှံရေး စိန်ခေါ်မှုများစွာရှိဟု အမေရိကန် ပြော


မြန်မာနိုင်ငံတွင် ရင်းနှီးမြှုပ်နှံမှုများပြုလုပ်ရန် အခြေခံအဆောက်အဦ လိုအပ်ချက်နှင့် ပြင်ဆင်ရမည့် စိန်ခေါ်မှုများစွာရှိနေကြောင်း အမေရိကန်-အာဆီယံ စီးပွားရေးကောင်စီ၊ Public Relations ASEAN ၏ တွဲဖက် ညွှန်ကြားရေးမှူး Mr. Anthony Nelson ကပြောဆိုလိုက်သည်။
ရန်ကုန်မြို့ ဆီဒိုနားဟိုတယ်တွင် မနေ့က ကျင်းပပြုလုပ်သည့် အမေရိကန် ရင်းနှီးမြုပ်နှံမှုဆိုင်ရာ သတင်းစာရှင်းလင်းပွဲတွင် ၄င်းကအထက်ပါအတိုင်း ပြောဆိုလိုက်ခြင်းဖြစ်သည်။
နှစ်ပေါင်း ၂၀ ကျော် သက်တမ်းရှိသော အမေရိကန်-အာဆီယံ စီးပွားရေးကောင်စီသည် အမေရိကန် ထိပ်တန်းစီးပွားရေး ကုမ္ပဏီ ၃၈ ခုကို ခေါ်ဆောင်ပြီး မြန်မာနိုင်ငံသို့ ပထမဆုံး လာရောက်လေ့လာ နေကြောင်း၊ မြန်မာနိုင်ငံတွင် ရင်းနှီးမြှုပ်နှံရန် အခြေခံလိုအပ်ချက်များစွာ ရှိနေကြောင်း ၄င်းက ဆိုသည်။
“မြန်မာနိုင်ငံက အမေရိကန်ကုမ္ပဏီတွေအတွက် ပတ်ဝန်းကျင်အသစ်ပါ။ လေ့လာရမှာတွေက အများကြီးရှိပါတယ်။ အမေရိကန် ကုမ္ပဏီတွေအနေနဲ့ မြန်မာနိုင်ငံမှာ ရင်းနှီးမြှုပ်နှံဖို့ လမ်းပန်းဆက်သွယ်ရေး အပါအ၀င် အခြေခံအဆောက်အဦ လိုအပ်ချက် စိန်ခေါ်မှုတွေ ရှိနေပါတယ်။ ဒီလိုပြောတာက ရထားလမ်း၊ ကားလမ်း၊ ဆိပ်ကမ်း လိုမျိုး ရုပ်ဝတ္တူဆိုင်ရာ လိုအပ်ချက်တွေကို ပြောတာမဟုတ်ဘဲ သတင်းအချက်တွေကို လျင်လျင်မြန်မြန် ရယူနိုင်တဲ့ ခေတ်ပေါ် ICT နည်းပညာ ဖွံ့ဖြိုးတိုးတက်ဖို့ လိုအပ်ချက်တွေလည်း ပါဝင်ပါတယ်။ ဒါတွေက စိန်ခေါ်မှုတွေပါပဲ။ ဒါ့အပြင် နိုင်ငံတကာ ငွေကြေးအဖွဲ့အစည်းတွေကို ပြည်တွင်းမှာ ရင်းနှီးမြှုပ်နှံခွင့်ပြုပြီး လူတွေ ငွေကြေးကို အလွယ်တကူ သယ်ဆောင်သွားလို့ရတဲ့ အကြွေးကတ်၊ ဘဏ်ကတ်တွေကိုလည်း အသုံးပြုခွင့်ပေးဖို့ လိုပါတယ်။ ရင်းနှီးမြှုပ်နှံမှုလုပ်ဖို့ ဘဏ်စနစ်နဲ့ ငွေကြေးပိုင်းဆိုင်ရာတွေမှာလည်း စိန်ခေါ်မှုတွေ အများကြီးရှိနေပါတယ်။ စီးပွားရေး ပြုပြင်ပြောင်းလဲမှုတွေ စလုပ်နေပြီဆိုပေမယ့် လုပ်စရာတွေ အများကြီးရှိသေးတယ်လို့ ထင်ပါတယ်။ နိုင်ငံခြား ရင်းနှီးမြှုပ်နှံမှုတွေအတွက် မြန်မာနိုင်ငံအနေနဲ့ ပြင်ဆင်စရာတွေ အများကြီး ရှိပါသေးတယ်” ဟု Mr. Anthony Nelson က ပြောသည်။
အမေရိကန်ကုမ္ပဏီများ၏ မြန်မာခရီးစဉ်အတွင်း အစိုးရအပြင် ပြည်တွင်းပြည်ပ အဖွဲ့အစည်းပေါင်းစုံနှင့် တွေ့ဆုံပြီး တာဝန်သိသောရင်းနှီးမြှုပ်နှံမှုများ ပြုလုပ်သွားမည်ဖြစ်ကြောင်း ၄င်းက ဆိုသည်။
“ကျနော်တို့ အနေနဲ့ အမေရိကန်အစိုးရ၊ မြန်မာအစိုးရ၊ မြန်မာစီးပွားရေး အသိုင်းအ၀ိုင်း၊ အပြည်ပြည်ဆိုင်ရာ အဖွဲ့အစည်းတွေ၊လူမှုအခြေပြု အဖွဲ့အစည်းတွေ၊ လွှတ်တော်ကိုယ်စားလှယ်တွေ ဆုံပြီး သူတို့ရဲ့အမြင်နဲ့ သုံးသပ်ချက်တွေကို ရယူနေပါတယ်။ အဲဒါတွေအပေါ်မှာ မူတည်ပြီးတော့ အနာဂတ်မှာ ဘာတွေစလုပ်နိုင်မယ်၊ ဘယ်လိုအပ်ချက်တွေ ရှိတယ်ဆိုတာ သုံးသပ်ပြီးရင်းနှီးမြှုပ်နှံမှု လုပ်ငန်းစဉ်တွေကို စတင်ပါမယ်။ ကျနော်တို့ အမေရိကန် ကုမ္ပဏီတွေအနေနဲ့ ချက်ချင်း မြန်မြန်ဆန်ဆန်ကြီး ရင်းနှီးမြှုပ်နှံမှာ မဟုတ်ဘဲ ရေရှည်သုံးသပ်ပြီး ရင်းနှီးမြှုပ်နှံမှုလုပ်ငန်း လုပ်သွားမယ်။ လောလောဆယ်တော့ မြန်မာနိုင်ငံကို လေ့လာနေဆဲဖြစ်ပါတယ်” ဟု Mr. Anthony Nelson က ရှင်းပြသည်။
လတ်တလောတွင် အမေရိကန် General Electric (GE) ကုမ္ပဏီအနေနှင့် ဆေးရုံသုံးပစ္စည်းတချို့ အရောင်းအ၀ယ် စတင်နေပြီး ကိုကာကိုလာ ကုမ္ပဏီအနေနှင့် ရင်းနှီးမြှုပ်နှံမှုလုပ်ဆောင်ရန် ဆွေးနွေးမှုများရှိနေပြီဟု သိရှိရသည်။စီးပွားရေး ပိတ်ဆို့အရေးယူမှု၊ ကန့်သတ်ချက် စသည်တို့ စပ်လျဉ်း၍ Mr. Anthony Nelson က “စီးပွားရေး ပိတ်ဆို့မှုက ခေတ္တဆိုင်းငံ့ရုံပဲ ရှိပါသေးတယ်။ မရုပ်သိမ်းသေးပါဘူး။ ရင်းနှီးမြှုပ်နှံမှုနဲ့ ပတ်သက်လို့ ကန့်သတ်ထားတွေ ရှိနေပါသေးတယ်။ ရေနံနှင့် သဘာဝဓာတ်ငွေ့ကဏ္ဍ ဆိုတာလည်း အမေရိကန်တွေ ရင်းနှီးမြှုပ်နှံဖို့ စဉ်းစားနေတဲ့ကဏ္ဍလည်း ဖြစ်ပါတယ်။ ဒါပေမယ့် ရေနံနှင့် သဘာဝဓာတ်ငွေ့ကဏ္ဍဆိုတာက ရင်းနှီးမြှုပ်နှံမှုကြီးပြီးတော့ အချိန်ယူရပြီးတော့ ရေရည် ရင်းနှီးမြှုပ်နှံရတာပါ။ နေ့ချင်းညချင်း လုပ်လို့မရပါဘူး” ဟု ဆိုသည်။
မြန်မာနိုင်ငံသို့ လာရောက်သည့် အမေရိကန် စီးပွားရေးကုမ္ပဏီများတွင် ငွေကြေးဆိုင်ရာ ကုမ္ပဏီများ၊ စွမ်းအင်ကုမ္ပဏီ၊ အတိုင်ပင်ခံကုမ္ပဏီ၊ ထုတ်လုပ်ရေးကုမ္ပဏီ၊ လေကြောင်းကုမ္ပဏီ၊ မော်တော်ကားကုမ္ပဏီများ ပါဝင်ကြောင်း သိရှိရသည်။ကမ္ဘောဒီးယားနိုင်ငံတွင် ကျင်းပသော အာဆီယံ စီးပွားရေး ညီလာခံ၌ အမေရိကန်နိုင်ငံခြားရေး ၀န်ကြီး မစ္စ ဟီလာရီ ကလင်တန်နှင့် သမ္မတ ဦးသိန်းစိန်တို့ ဇူလိုင်လ ၁၃ ရက်နေ့က တွေ့ဆုံခဲ့ကြသည်။ ထို့အပြင် သမ္မတ ဦးသိန်းစိန်သည် မစ္စ ကလင်တန်နှင့် အတူ ကိုကာကိုလာ၊ Ford Motor Co., General Electric, General Motors, Goldman Sachs နှင့် Google အပါအဝင် အမေရိကန် စီးပွားရေးလုပ်ငန်းများနှင့် တွေ့ဆုံခဲ့သည်။အမေရိကန်ပြည်ထောင်စုက ဇူလိုင်လ ၁ ရက်နေ့တွင် မြန်မာနိုင်ငံ၌ အမေရိကန်ကုမ္ပဏီများ ရင်းနှီးမြှုပ်နှံခွင့် ပြုလိုက်ခြင်းဖြင့်စီးပွားရေးပိတ်ဆို့မှုတချို့ကို ရုပ်သိမ်းပေးခဲ့သည်။

အမေရိကန် အဆင့်အမြင့်ဆုံး စီးပွားရေးနဲ့ကုန်သွယ်ရေးကိုယ်စားလှယ်အဖွဲ့ မြန်မာနိုင်ငံရောက်

အမေရိကန်ပြည်ထောင်စုရဲ့ စီးပွားရေးဖွံ့ဖြိုးမှု၊ စွမ်းအင်နဲ့ သဘာဝပတ်ဝန်းကျင်ဆိုင်ရာ လက်ထောက်နိုင် ငံခြားရေးဝန်ကြီး ရောဘတ် ဟောမက်တ်စ် (Robert Hormats) ဟာ မြန်မာနိုင်ငံ၊ ရန်ကုန်မြို့နဲ့ နေပြည်တော် တို့ကို ဇူလိုင်လ (၁၄)နဲ့ (၁၅) ရက်နေ့တွေမှာ သွားရောက်ခဲ့တယ်လို့ အမေရိကန် နိုင်ငံခြားရေးဝန်ကြီး ဌာနက ဇူလိုင်လ(၁၆)ရက် နေ့က သတင်းထုတ်ပြန်ခဲ့ပါတယ်။
လက်ထောက်ဝန်ကြီး ဟောမက်တ်စ် ဟာ အမေရိကန်ပြည်ထောင်စုရဲ့ နိုင်ငံတကာ ကုန်သွယ်ရေးဆိုင်ရာ ဒုလက်ထောက်ဝန်ကြီး ဖရန်စစ္စကိုဆန်းချက်(ဇ်) (Francisco Sanchez) ၊ အရှေ့အာရှနဲ့ ပစိဖိတ်ဒေသ ဒုလက်ထောက်နိုင်ငံခြားရေးဝန်ကြီး ဂျိုးဇက် ယွန်း (Joseph Yun)၊ ဒီမိုကရေစီ၊ လူ့အခွင့်အရေးနဲ့ အလုပ် သမားရေး ဒုလက်ထောက်ဝန်ကြီး ဒယ်န်နီရယ်လ် ဘား (Daniel baer) နဲ့ မြန်မာနိုင်ငံဆိုင်ရာ အမေရိကန် သံအမတ်ကြီး ဒဲရက်ခ် မစ်ချယ်လ် (Derek Mitchell)တို့နဲ့ အတူ နေပြည်တော်မှာ မြန်မာခေါင်းဆောင်တွေ နဲ့ တွေ့ဆုံခဲ့ပါတယ်။
ဒါဟာ (၂၅) နှစ်ကျော်ကာလအတွင်း အမေရိကန်ရဲ့ အဆင့်အမြင့်ဆုံး စီးပွားရေးနဲ့ကူးသန်းရောင်းဝယ်ရေး ဆိုင်ရာ ကိုယ်စားလှယ်အဖွဲ့ မြန်မာနိုင်ငံကို သွားရောက်ခဲ့ တာဖြစ်တယ်လို့ အမေရိကန် နိုင်ငံခြားရေး ၀န်ကြီး ဌာနရဲ့ သတင်းမှာ ဖော်ပြထားပါတယ်။
မကြာသေးခင်က သမ္မတအိုဘားမား ထုတ်ပြန် ကြေညာခဲ့တဲ့ မြန်မာနိုင်ငံအပေါ် ချမှတ်ထားတဲ့ အရေးယူ ပိတ်ဆို့ဒဏ်ခတ်မှုတွေ လျှော့ချပြီး မြန်မာနိုင်ငံမှာ အမေရိကန်ကုမ္ပဏီတွေ သွားရောက် ရင်းနှီးမြှုပ်နှံခွင့်ပြု ခဲ့တာ၊ ဇူလိုင် လ (၁၃) ရက်နေ့က အမေရိကန်နိုင်ငံခြားရေးဝန်ကြီး ဟီလာရီကလင်တန် (Hilary Clinton) နဲ့ မြန်မာသမ္မတ ဦးသိန်းစိန်တို့ ကမ္ဘောဒီးယားနိုင်ငံ အာရှဒေသ ARF ညီလာခံအတွင်း သီးသန့်တွေ့ ဆုံဆွေးနွေးခဲ့တာနဲ့ မနှစ်က ၀န်ကြီး ကလင်တန် မြန်မာနိုင်ငံကို သွားရောက်ခဲ့စဉ်က မြန်မာခေါင်းဆောင်တွေ နဲ့ တွေ့ဆုံ ဆွေးနွေးခဲ့တာတွေကို အခြေခံပြီး အမေရိကန်နဲ့ မြန်မာ စီးပွားရေးနဲ့ ကူးသန်း ရောင်းဝယ်ရေးတို့ကို ချဲ့ထွင်နိုင်ရေး၊ လက်ထောက်ဝန်ကြီး ဟောမက်တ်စ်နဲ့အဖွဲ့က ဦးစားပေးဆွေးနွေးခဲ့တယ်လို့ အမေရိကန် နိုင်ငံခြားရေးဝန်ကြီးဌာနက ဆိုပါတယ်။
လက်ထောက်ဝန်ကြီး ဟောမက်တ်စ်နဲ့ အဖွဲ့ဟာ အမျိုးသားဒီမိုကရေစီ အဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်နဲ့ တွ့ဆုံခဲ့သလို  ပြည်သူ့လွှတ်တော် ဥက္ကဋ္ဌ သူရဦးရွှေမန်း၊ စက်မှုဝန်ကြီး ဦးစိုးသိန်း၊ ဗဟိုဘဏ်ဥက္ကဋ္ဌ ဦးသန်းငြိမ်း၊ စီးပွားရေးနဲ့ ကူးသန်းရောင်းဝယ်ရေး ဒုတိယ၀န်ကြီးဦးပွင့်ဆန်းတို့နဲ့လည်း တွေ့ဆုံခဲ့တယ်လို့ အမေရိကန် နိုင်ငံခြားရေးဝန်ကြီးဌာနရဲ့ သတင်းမှာ ဖော်ပြထားပါတယ်

အခြေခံလူ့အခွင့်အရေး လေးစားလိုက်နာဖို့ အမေရိကန်တိုက်တွန်း

မြန်မာအစိုးရ အနေနဲ့ ထင်သာမြင်သာရှိပြီး အခြေခံ လူ့အခွင့်အရေးတွေကို လေးစားလိုက်နာဖို့ အမေရိကန် ပြည်ထောင်စုက မနေ့က တိုက်တွန်းလိုက်ပါတယ်။မြန်မာနိုင်ငံမှာ စီးပွားရေး အကွက်အကွင်းရှာဖို့ ပြီးခဲ့တဲ့ ရက်ပိုင်းက အမေရိကန် ကုမ္ပဏီတွေ ရှားရှားပါးပါး သွားရောက် လည်ပတ်ခဲ့ပြီးတဲ့နောက် အဲဒီလို တိုက်တွန်းလိုက်တာပါ။
အမေရိကန် နိုင်ငံခြားရေး ၀န်ကြီးဌာန စီးပွားရေးရာ လက်ထောက်ဝန်ကြီး Robert Hormats ဟာ အမေရိကန် ကုမ္ပဏီ ၃၈ ခုက အရာရှိတွေနဲ့ အတူ မြန်မာနိုင်ငံကို သွားရောက်ပြီး အစိုးရ တာဝန်ရှိသူတွေအပြင် ဒေါ်အောင်ဆန်းစုကြည်နဲ့ပါ တွေ့ဆုံ ဆွေးနွေးပါတယ်။အမေရိကန်-မြန်မာ ဆက်ဆံရေးဟာ အလုပ်သမား အခွင့်အရေး မြှင့်တင်တာ၊ တိုင်းရင်းသား လူနည်းစုတွေ အခွင့်အရေးကို ကာကွယ် စောင့်ရှောက်တာနဲ့ ကျန်နေသေးတဲ့ နိုင်ငံရေး အကျဉ်းသားတွေ လွှတ်ပေးတာ အပါအ၀င် လူ့အခွင့်အရေး လေးစားလိုက်နာမှုအပေါ် မူတည်မယ်လို့ Mr Hormats က ပြောပါတယ်။
အစိုးရပိုင် ရေနံနဲ့ သဘာဝ ဓာတ်ငွေ့လုပ်ငန်းတွေလို လုပ်ငန်းတွေမှာ ထင်သာ မြင်သာရှိရှိ အဂတိလိုက်စားမှုကင်းကင်း လုပ်ကိုင်တဲ့ စံချိန်စံညွှန်းတွေနဲ့ ကိုက်ညီတဲ့ နိုင်ငံတကာ သဘောတူညီချက်မှာ ပါဝင် လက်မှတ်ရေးထိုးဖို့ Mr Hormats က မြန်မာ အစိုးရကို တိုက်တွန်းခဲ့ပါတယ်။ဗြိတိန် ၀န်ကြီးချုပ်ဟောင်း တိုနီဘလဲက လွန်ခဲ့တဲ့ ၁၀ နှစ်က ရေးဆွဲခဲ့တဲ့ အဲဒီ သဘောတူညီချက်ကို စိတ်ဝင်စားတယ်လို့ မြန်မာ အစိုးရပိုင်းက လေသံထွက်လာတဲ့နောက် ဒီ သဘောတူညီချက် ဆိုင်ရာ နိုင်ငံတကာ လုပ်ငန်းအဖွဲ့ အကြီးအကဲ Jonas Moberg ဟာ မြန်မာနိုင်ငံကို ဒီ သီတင်းပတ်အတွင်း သီးခြားခရီးစဉ်အဖြစ် သွားရောက်ဖို့ ပြင်ဆင်နေပါတယ်။

ပြည်ပသတင်းစာများ မြန်မာ့သတင်း ဖော်ပြမှု များပြားလာ

မြန်မာနိုင်ငံရဲ့ ဒီမိုကရေစီိရေး အပြောင်းအလဲတွေကြောင့် ပြည်ပ သတင်းစာတွေမှာ မြန်မာနိုင်ငံနဲ့ ပတ်သက်တဲ့ သတင်းတွေ တနေ့ထက်တနေ့ ပိုပိုပြီး ဖော်ပြလာတာ တွေ့ရပါတယ်။မနေ့က တရက်တည်းမှာပဲ အမေရိကန်၊ ထိုင်း ၊ ပါကစ္စတန်နဲ့ ဘင်္ဂလာဒေ့ရှ် သတင်းစာတွေမှာ မြန်မာနဲ့ ပတ်သက်ပြီး သတင်းဆောင်းပါးတွေ ရေးသားထားတာ တွေ့မြင်ရပါတယ်။အမေရိကန်ပြည်ထောင်စုက သတင်းစာကြီး တစောင်ဖြစ်တဲ့ Washington Post သတင်းစာမှာ မြန်မာနိုင်ငံမှာ ဒီမိုကရေစီရေး ဦးတည်တဲ့ အပြောင်းအလဲတွေ ပေါ်ထွက်လာတာနဲ့ အမျှ အမေရိကန်အစိုးရက ချမှတ်ထားတဲ့ တင်းကျပ်မှုတွေ ပိတ်ဆို့မှုတွေကို တဆင့်ချင်း လျှော့ပေါ့ပေးသွားမယ်လို့ ပြောထားခဲ့ပြီး အခုပြီးခဲ့တဲ့ ရက်ပိုင်းက အမေရိကန် ကုမ္ပဏီကြီးတွေ အနေနဲ့ မြန်မာ့ စွမ်းအင်ကဏ္ဍမှာ ပါဝင်ရင်းနှီးခွင့် ပြုလိုက်ပြီဆိုတာဟာ သိပ်ပြီး မမြန်လွန်းဘူးလားလို့  မေးခွန်းထုတ်လိုက်ပါတယ်။
ထိုင်းနိုင်ငံထုတ် The Nation သတင်းစာကတော့ အမေရိကန် ကုမ္ပဏီကြီးတွေ မြန်မာနိုင်ငံကို သွားရောက် ရင်းနှီးမြှုပ်နှံခွင့် ရရှိပြီ ဆိုပေမယ့် မြန်မာနိုင်ငံတွင်း အပြောင်းအလဲ လုပ်စရာတွေ အများကြီး ကျန်ရှိနေသေးတဲ့အတွက် သတိကြီးကြီးထားဖို့ လိုအပ်ကြောင်း၊ အထူးသဖြင့် အဂတိလိုက်စားမှုတွေ၊ လူ့အခွင့်အရေး ချိုးဖောက်မှုတွေကြောင့် ပြည်သူတွေရဲ့ အခြေအနေ မတည်ငြိမ်သေးတာကို ဂရုပြုရမှာ ဖြစ်ကြောင်း၊ ဆုံးရှုံးမှု အန္တရာယ်တွေ အများကြီး ရှိကြောင်း ရေးသားထားပါတယ်။
Pakistan နိုင်ငံထုတ် The Dawn သတင်းစာကတော့ အခုအခါ ဘင်္ဂါလီ ရိုဟင်ဂျာတွေ ထောင်နဲ့ သောင်းနဲ့ ချီပြီး စခန်းတွေမှာ စုပြုံထားရှိတာဟာ လူမှုရေး ပြဿနာကြီး တရပ်ကို ဖိတ်ခေါ်နေရာ ရောက်ကြောင်း၊ အရင်လက ဖြစ်ပွားခဲ့တဲ့ ရခိုင်ပြည်နယ် အရေးအခင်း နောက်ပိုင်းမှာ မွတ်စလင် ရိုဟင်ဂျာတွေ ထောင်နဲ့ချီပြီး အစာ အာဟာရ ချို့တဲ့ ပြတ်လပ်မှုတွေ ကြုံတွေ့နေရပြီလို့ လူမှုကယ်ဆယ်ရေး အဖွဲ့တွေက သတိပေးနေကြောင်း၊ အစားအစာမရှိ၊ ဆေးဝါးအကူအညီလည်း မရှိတဲ့အတွက် အခုအတိုင်း ဆက်သွားရင် ကြောက်မက်ဖွယ် အခြေအနေနဲ့ ရင်ဆိုင်ရမှာ ဖြစ်ကြောင်း ဖော်ပြထားပါတယ်။
Bangladesh နိုင်ငံထုတ် The Daily Star သတင်းစာကတော့ သမ္မတ ဦးသိန်းစိန် ပြောသလို ဘင်္ဂါလီ ရိုဟင်ဂျာတွေကို မောင်းနှင်ထုတ်ဖို့ ဆိုတာ ခုတွေ့နေရတဲ့ ပြဿနာရဲ့ အဖြေ မဟုတ်ကြောင်း၊ အဲဒီလူတွေရဲ့ ပြဿနာဟာ မိမိတို့ နိုင်ငံအတွက်လည်း ပြဿနာ ဖြစ်ကြောင်း၊ ဦးသိန်းစိန်ရဲ့ အမြင်သဘောထားကို ကြည့်ရင် ဒီပြဿနာကို နိုင်ငံတကာက လက်ပိုက်ကြည့်နေလို့ မဖြစ်တော့တာ သိသာကြောင်း ရေးသားထားပါတယ်။

မြန်မာရေနံနဲ့သဘာဝဓါတ်ငွေ့လုပ်ငန်း IMF ကျင့်ဝတ်များ လိုက်နာဖို့လိုအပ်

အမေရိကန်ပြည်ထောင်စုရဲ့ မြန်မာနိုင်ငံအပေါ် ပိတ်ဆို့အရေးယူမှုအချို့ကို သမတလုပ်ပိုင်ခွင့်နဲ့ လျှော့ပေါ့ပေးခဲ့ရာမှာ၊ နိုင်ငံတကာရင်းနှီးမြုပ်နှံမှုနဲ့ပတ်သက်လို့ နိုင်ငံတကာက သတ်မှတ်ထားတဲ့ လုပ်ထုံးလုပ်နည်းတွေကို မြန်မာဖက်က လိုက်နာဖို့ ပိုပြီး အဓိကထား ဖိအားပေးရေး အမေရိကန်အစိုးရဖက်က ပျက်ကွက်ခဲ့တယ်လို့ ဝေဖန်မှုတွေရှိနေပါတယ်။
မြန်မာနိုင်ငံထဲ ရင်းနှီးမြုပ်နှံမှုသစ်တွေ လုပ်ခွင့်ပြုလိုက်တဲ့အပေါ် မြန်မာနဲ့ပတ်သက်လို့ မူဝါဒပြောင်းလဲမှုတွေ မြန်လွန်းတယ်ဆိုပြီး အမေရိကန်နိုင်ငံတွင်းမှာတင် ဝေဖန်မှုတွေရှိနေပါတယ်။ အထူးသဖြင့် မြန်မာနိုင်ငံထဲ ပြုပြင်ပြောင်းလဲမှုတွေဟာ အချိန်မရွေးနောက်ကြောင်းပြန်လှည့်သွားနိုင်တယ်ဆိုတဲ့ အခြေအနေကို သိနေတဲ့အပြင်၊ ဒေါ်အောင်ဆန်းစုကြည်ကိုယ်တိုင်က သတိပေးထားလျက်နဲ့ ပွင့်လင်းမြင်သာမှုမရှိသေးတဲ့ ရေနံနဲ့သဘာဝဓါတ်ငွေ့လုပ်ငန်းတွေမှာ ရင်းနှီးမြုပ်နှံခွင့်ပေးလိုက်တဲ့အပေါ် ဝေဖန်နေကြပါတယ်။
ဂျော့တောင်းတက္ကသိုလ်က မြန်မာ့အရေးကျွမ်းကျင်သူ ဒေါက်တာမိုက်ကယ် ဂရင်းကလည်း ၀ါရှင်တန်ပိုစ်သတင်းစာမှာ သမတအိုဘားမားအစိုးရရဲ့ ဒီဆုံးဖြတ်ချက်ကို ဝေဖန်ရေးသားခဲ့ပါတယ်။ အဓိကအချက်ကတော့ မြန်မာရေနံနဲ့သဘာဝဓါတ်ငွေ့လုပ်ငန်း (MOGE) အနေနဲ့ IMF နိုင်ငံတကာငွေကြေးရံပုံငွေအဖွဲ့ရဲ့ ရင်းနှီးမြုပ်နှံမှုဆိုင်ရာကျင့်ဝတ်သဘောတူညီချက်ကို လိုက်နာပါမယ်ဆိုတာကို ဖိအားပေးတာမျိုးအရင်မလုပ်ပဲနဲ့ MOGE နဲ့ လုပ်ကိုင်ခွင့်ပေးလိုက်တဲ့ ဆုံးဖြတ်ချက်ဟာ စောလွန်းတယ် မြန်ဆန်လွန်းတယ်လို့ သမတအိုဘားမား အစိုးရကို ဝေဖန်ထားတာပါ။
နယူးယောက်အခြေစိုက် HRW လူ့အခွင့်အရေးစောင့်ကြည့်မှုအဖွဲ့ကလည်း ဒီအချက်ကို ထောက်ပြပါတယ်။ အခုလို အမေရိကန်အစိုးရရဲ့ အလျင်စလို ဆုံးဖြတ်ချက်ကြောင့် မြန်မာနိုင်ငံအပြောင်းအလဲဖြစ်စေဖို့ အရေးကြီးတဲ့ အခွင့်အလမ်းတရပ်ဆုံးရှုံးရတယ်လို့ HRW ရဲ့ စီးပွားရေးနဲ့လူ့အခွင့်အရေးဆိုင်ရာ ညွန်ကြားရေးမှုး Arvind Ganesan က ဝေဖန်ပါတယ်။
“ MOGE မြန်မာ့ရေနံနဲ့သဘာဝဓါတ်ငွေ့လုပ်ငန်းဟာ အများပြည်သူပိုင်ဘဏ္ဍာတွေ ဘယ်လိုသုံးစွဲနေတယ်ဆိုတာကို အပြည့်အ၀ ထုတ်ဖော် အသိပေးခြင်းမရှိပါဘူး။ ဒီနေရာမှာ သဘာဝဓါတ်ငွေ့ကရတဲ့ ၀င်ငွေတွေကို မြန်မာအစိုးရက ပြည်သူ့ဘဏ္ဍာထဲ မထည့်ခဲ့ပါဘူး။ ပြည်သူ့ဘဏ္ဍာထဲထည့်ဖို့က လုပ်ဆောင်ရမယ့် တာဝန်ပါ။ မလုပ်တဲ့အတွက် ပြည်သူတွေဖက်က ဒီ ၀င်ငွေတွေ ဘယ်လောက်ရှိမှန်းမသိရပါဘူး။ ဘယ်လို ခွဲဝေသုံးစွဲသလဲဆိုတာကို သက်ဆိုင်ရာကို မေးခွန်းမထုတ်နိုင်ကြပါဘူး။ ရှယ်ဗရွန်၊ တိုတယ် နဲ့ ထိုင်း PTTE တို့ဟာ ဒီစီမံကိန်းတွေမှာ မြန်မာအစိုးရနဲ့ ဖက်စပ်လုပ်ကိုင်ခဲ့တဲ့အတွက်၊ နောက်ပြီး MOGE လို ထင်သာမြင်သာမရှိတဲ့ လုပ်ငန်းနဲ့ တွဲဖက်လုပ်နေသရွှေ့ သိက္ခာကျတဲ့အခြေအနေဖြစ်နေပါတယ်။ နိုင်ငံပိုင်ငွေတွေကို MOGE အနေနဲ့ ထုတ်ပြန်ကြေညာပေးတာမလုပ်တော့ ဒီကုမ္ပဏီတွေလည်း ကြံရာပါ ဖြစ်နေပါတယ်။ ဒါကြောင့် MOGE အနေနဲ့ အခုအခါမှာ ထင်သာမြင်သာရှိဖို့လိုပါတယ်။ IMF ရဲ့ ကျင့်ဝတ်ဆိုင်တွေကို လိုက်နာဖို့ အရင် သဘောတူညီမှုကို ရယူသင့်ပါတယ်။ အမေရိကန်အစိုးရက ဒါကို အရင်မလုပ်တော့ အရေးကြီးတဲ့ အခွင့်အလမ်းတရပ် ဆုံးရှုံးသွားတယ်လို့ ကျနော်ပြောရမှာပါ။”
နိုင်ငံခြားရင်းနှီးမြုပ်နှံမှုတွေ မလုပ်ခင်မှာ မြန်မာအစိုးရအနေနဲ့ IMF ရဲ့ စီးပွားရေးလုပ်ငန်းဆိုင်ရာကျင့်ဝတ်တွေကို အရင်ဆုံး သဘောတူလက်ခံဖို့ အရေးကြီးတယ်လို့လည်း Arvind Ganesan က ပြောပါတယ်။
“ IMF က လွန်ခဲ့တဲ့နှစ်အနည်းငယ်က ဘဏ္ဍာရေးနဲ့ပတ်သက်လို့ သဘာဝသယံဇာတ လုပ်ငန်းတွေ လုပ်ကိုင်ရာမှာ ထင်သာမြင်သာရှိဖို့ လိုက်နာရမယ့် ကျင့်ဝတ်စည်းကမ်းကို သတ်မှတ်ပေးခဲ့ပါတယ်။ အခြေခံအားဖြင့် MOGE လို နိုင်ငံပိုင်ကုမ္ပဏီတွေက သူတို့ဝင်ငွေဘယ်လောက်ရလဲ ထုတ်ပြန်ကြေညာပေးဖို့လိုသလို၊ ဘယ်လို သုံးစွဲသလဲ တာဝန်သိသိ သုံးမသုံး သိနိုင်ဖို့ စာရင်းစစ်တွေရဲ့ စစ်ဆေးမှုကို ခံရပါတယ်။ ဒါမှလည်း ၀င်ငွေကို မှန်မှန်ကန်ကန်သုံးစွဲတယ်ဆိုတာ အသေအချာ သိနိုင်မှာပါ။ ဒါဟာ ပြည်သူ့ဘဏ္ဍာငွေဖြစ်လို့ပါ။ ဒါကြောင့် မြန်မာအစိုးရက အခု IMF ကမ္ဘာဘဏ်အပြင် အခြားအစိုးရတွေနဲ့ လုပ်ကိုင်ရာမှာ ဒီ CODE OF CONDUCT ကို အရင် လိုက်နာဖို့လိုပါတယ်။ အခြားနိုင်ငံတွေက လာပြီး ရင်းနှီးမြုပ်နှံမှုမလုပ်ခင် ဒါကို အရင်လုပ်ဖို့လိုပါတယ်။ အကြောင်းကတော့ မြန်မာအစိုးရရဲ့ နောက်ကြောင်းရာဇ၀တ်က စိတ်မချရလို့ပါ။”
မကြာခင်က မြန်မာနိုင်ငံကို သွားရောက်ခဲ့တဲ့ အမေရိကန်နိုင်ငံခြားရေးဌာန စီးပွားရေးဖွံဖြိုးမှု စွမ်းအင်နဲ့ ပတ်ဝန်းကျင်ရေးရာ လက်ထောက်နိုင်ငံခြားရေးဝန်ကြီး Hormats ကလည်း  မြန်မာအစိုးရအနေနဲ့ ထင်သာမြင်သာရှိမှု တိုးတက်လုပ်ဆောင်ဖို့ ၊ အဂတိလိုက်စားမှု တိုက်ဖျက်ရေးကို တိုးမြင့်လုပ်ဆောင်ဖို့ တိုက်တွန်းထားပါတယ်။ အထူးသဖြင့် နိုင်ငံပိုင် ကုမ္ပဏီဖြစ်တဲ့ MOGE လို လုပ်ငန်းတွေကို ဆိုလိုပါတယ်။
လူ့အခွင့်အရေးကို ရိုသေလေးစားလိုက်နာဖို့အပြင်၊ စီးပွားရေးမှာ ထင်သာမြင်သာရှိရေး အရေးယူဆောင်ရွက်မှုဖြစ်တဲ့ EILIT နိုင်ငံတကာသဘောတူညီမှုအဖွဲ့မှာ မြန်မာအစိုးရက ပါဝင်ဖို့ကိုလည်း အလေးပေးတိုက်တွန်းထားပါတယ်။

အမေရိကန်၏ ထုတ်ဖော်ချက်များ လုံလောက်မှု မရှိသေးဟု ERI ဆို

အမေရိကန် ကုမ္ပဏီများ အနေဖြင့် မြန်မာ အစိုးရပိုင် မြန်မာ့ရေနံနှင့် သဘာဝဓာတ်ငွေ့ လုပ်ငန်း (MOGE) တွင် ယခုအခါ ရင်းနှီးမြှုပ်နှံမှုများ ပြုလုပ်နိုင်ပြီဟု အမေရိကန် အစိုးရက ကြေညာခဲ့စဉ်တွင် လူ့အခွင့်အရေးနှင့် သဘာဝပတ်ဝန်းကျင် ထိန်းသိမ်းရေး အဖွဲ့ဖြစ်သည့် EarthRights International (ERI) က မြန်မာ့
ရေနံနှင့် သဘာဝဓာတ်ငွေ့ကဏ္ဍနှင့် တိုင်းရင်းသားလူနည်းစု ဒေသများရှိ နိုင်ငံခြား ရင်းနှီးမြှုပ်နှံမှုများသည် ခြစားမှုများ၊ လူ့အခွင့်အရေး ချိုးဖောက်မှုများ၊ သဘာဝ ပတ်ဝန်းကျင် ပျက်စီးမှုများနှင့် အတင်းအကြပ် ပြောင်းရွှေ့ခိုင်းမှုများနှင့် ဆက်စပ်လျက် ရှိနေဆဲပင်ဖြစ်ကြောင်း ထောက်ပြ ပြောဆိုလိုက်သည်။

ERI အနေဖြင့် ထိုကဲ့သို့ စိုးရိမ်ပူပန်မှုများ ရှိနေသော်လည်း အမေရိကန် အစိုးရ အနေဖြင့် ကုမ္ပဏီများအား စစ်ဘက်နှင့် စီးပွါးရေး လုပ်ငန်းများ မလုပ်ဆောင်ရန် တားမြစ်ခဲ့သည့် ဆောင်ရွက်ချက် အပါအဝင် ERI က အလိုရှိသော ဆောင် ရွက်ချက် အချို့ကို လုပ်ဆောင်ခဲ့ခြင်းကြောင့် အမေရိကန် အစိုးရအား ချီးကျူးခဲ့သည်။ ထို့ပြင် မြန်မာနိုင်ငံ အတွင်းခြစားမှုများ၊ စစ်အစိုးရအား ဝင်ငွေရရှိစေမှုများ၊ မြေသိမ်းမှုများ၊ အတင်းအဓမ္မ ပြောင်းရွှေ့ခိုင်းမှုများ အပါအဝင် လူ့အခွင့်အရေး ချိုးဖောက်မှုများနှင့် ပတ်သတ်နေသည့် လိုအပ်နေဆဲအချက်များ အကြောင်း သတင်းထုတ်ပြန်ခဲ့ခြင်း များအားလည်း ထောက်ခံခဲ့သည်။

သို့ရာတွင် အမေရိကန်၏ ထုတ်ဖော်ချက်များသည် မလုံလောက်သေးကြောင်း ERI က ဆိုသည်။

“လူ့အခွင့်အရေး ချိုးဖောက်မှုတွေ၊ သဘာဝပတ်ဝန်းကျင် ထိခိုက်ပျက်စီးမှုတွေထဲမှာ ပါဝင်မိသလို ဖြစ်သွားနိုင်တဲ့ အခြေအနေတွေ၊ မြန်မာ စစ်ဘက်ကို ထောက်ပံ့လိုက်သလို ဖြစ်သွားမှာတွေ ဒါမျိုးကိစ္စတွေကို မြန်မာနိုင်ငံမှာ ရင်းနှီးမြှုပ်နှံမယ့် အမေရိကန် ကုမ္ပဏီတွေ အနေနဲ့ သေချာစဉ်းစားဖို့ ကျနော်တို့ တိုက်တွန်းပါတယ်” ဟု ERI ၏ အမှုဆောင် ဒါရိုက်တာ Ka Hsaw Wa က ဆိုသည်။

“ထိုနည်းတူစွာပဲ အထွေထွေလိုင်စင် ချပေးနိုင်ဖို့ လိုအပ်တဲ့ ဆောင်ရွက်ချက်တွေ အကျိုးသက်ရောက်မှု ရှိဖို့အတွက် အမေရိကန် အစိုးရဟာ စုံစမ်းစစ်ဆေးမှုတွေကို စေ့စေ့စပ်စပ် လုပ်ဖို့နဲ့ စည်းမျဉ်းတွေ ကို လေးစားလိုက်နာ လာကြအောင် ဆောင်ရွက်ဖို့ ဆန္ဒရှိရမယ့်အပြင် ဥရောပက ပူးပေါင်းဆောင်ရွက်သူတွေ၊ မဟာမိတ် အန်ဂျီအိုတွေနဲ့ ပူးပေါင်း လုပ်ဆောင်ဖို့ လိုအပ်သလို ကုမ္ပဏီတွေ ကိုယ်တိုင်ကလည်း ကောင်းမွန်တဲ့ အလေ့အထတွေကို တိုးမြှင့်ကျင့်သုံးနိုင်ဖို့နဲ့ အသုံးဝင်မယ့် သတင်းအချက်အလက် ထုတ်ပြန်မှုတွေ တိုးတက်လာစေဖို့ ဆောင်ရွက်သင့်ပါတယ်” ဟု ဆိုသည်။

မြန်မာနိုင်ငံအတွင်းရှိ ဒေသခံ ပြည်သူများ အနေဖြင့် ကုမ္ပဏီများနှင့် အစိုးရအား ပိုမို တာဝန်ခံမှု ရှိလာစေရန် လုပ်ဆောင်ရာတွင် အထောက်အကူ ဖြစ်စေနိုင်ရန် အတွက် အထွေထွေ လိုင်စင်များနှင့် ပတ်သတ်၍ ပိုမိုသိရှိ နားလည်လာရန် လိုအပ်သောကြောင့် ထိုသို့သိရှိလာစေရန် ERI အနေဖြင့် မြန်မာနိုင်ငံအတွင်းရှိ အဖွဲ့အစည်းများ၊ အသိုင်းအဝိုင်းများနှင့် အတူတကွလုပ်ဆောင်မည် ဖြစ်ကြောင်းကိုလည်း ပြောဆိုသွားသည်။


0 comments:

Post a Comment