၈၈ နှင့် ABSDF သတင်းများ  စက်တင်ဘာ ၀၆၂၀၁၂

နိုင်ငံကူးလက်မှတ်ကို ၈၈ အဖွဲ့အတွင်း ခွဲခြား ထုတ်ပေး


နိုင်ငံရေးအကျဉ်းသားဟောင်းများအား နိုင်ငံကူးလက်မှတ် ထုတ်ပေးရာတွင် တပြေးညီ သတ်မှတ်ချက် မရှိခြင်းနှင့် ပတ်သက်၍ ပြည်ထောင်စု ၀န်ကြီးများကို ၈၈ မျိုးဆက် ကျောင်းသားခေါင်းဆောင်များက တင်ပြထားကြောင်း သတင်းရရှိသည်။
“တယောက်ချင်း ပေးနေတဲ့ ပုံစံမျိုးထက်ကို လွတ်လာတဲ့ နိုင်ငံရေး အကျဉ်းသားဟောင်းတွေ အားလုံးကို တပြေးညီ ပုံစံတခု သတ်သတ်မှတ်မှတ် ရှိသင့်တယ်ဆိုတာကို ပြည်ထောင်စုအဆင့် ၀န်ကြီးများကို ပြောထားပါတယ်” ဟု ၈၈ မျိုးဆက် ကျောင်းသားခေါင်းဆောင် ဦးကိုကိုကြီးက ပြောသည်။
ယင်းကိစ္စနှင့် ပတ်သက်၍ သမ္မတရုံး ဝန်ကြီးများဖြစ်သော ဦးအောင်မင်းနှင့် ဦးစိုသိန်းတို့ တင်ပြထားခြင်း ဖြစ်ကြောင်း သိရသည်။
ယခုအခါ ၈၈ မျိုးဆက် ကျောင်းသားခေါင်းဆောင် ဦးမင်းကိုနိုင်၊ ဦးကိုကိုကြီး၊ ဦးမြအေးတို့အား နိုင်ငံကူးလက်မှတ် ရရှိပြီဖြစ်ကြောင်း အကြောင်းကြားခဲ့ကြောင်း၊ နာမည်ကြီး၊ လူသိများသည့် ခေါင်းဆောင်များကိုသာ နိုင်ငံကူးလက်မှတ် ထုတ်ပေးပြီး နိုင်ငံရေး အကျဉ်းသားဟောင်း သာမန် ကျောင်းသားလူငယ်များကို မပေးဘဲ ချန်လှပ်ထားခြင်းသည် သဘာဝ မကျ၍ သွားရောက်ထုတ်ယူခြင်း မရှိသေးကြောင်း သူက ဆက်ပြောသည်။
ဦးမင်းကိုနိုင်သည် ယခု လာမည့် စက်တင်ဘာလ ၁၄၊ ၁၅ ရက်နေ့တွင် ၀ါရှင်တန် အခြေစိုက် National Endownment for Democracy (NED) က ပေးအပ်သည့် Democracy Award ဆုကို တက်ရောက်ယူရန်အတွက် ဖိတ်ကြားထားခြင်း ခံရသူဖြစ်သည်။
ယခုအခါဦးမင်းကိုနိုင်အပါအ၀င်၈၈မျိုးဆက်ကျောင်းသားများ၊ နိုင်ငံရေးအကျဉ်းသားဟောင်းများ၊ နိုင်ငံရေးအကျဉ်းသားဖြစ်ဖူးသည့် ကျောင်းသား လူငယ်များကို နိုင်ငံတကာက ဖိတ်ကြားထားမှုများရှိကြောင်း၊ အားလုံးပါဝင်သည့် နိုင်ငံရေးဖြစ်စဉ်၊ ပြုပြင်ပြောင်းလဲရေး ဖြစ်စဉ် ဆောင်ရွက်ရန်အတွက် သီးခြား ကန့်ထားခြင်းများ မဖြစ်သင့်တော့ကြောင်း ဦးကိုကိုကြီးက ဆိုသည်။
“အဲဒါက  နိုင်ငံကူးလက်မှတ် ထုတ်မပေးတဲ့အတွက်ကြောင့် နိုင်ငံအတွက် အရေးပါတဲ့ လူသားအရင်းအမြစ်တွေ ဖွံ့ဖြိုးတိုးတက်အောင် လုပ်တာ အားလုံးမှာ ထိခိုက်နစ်နာနေတယ်လို့ ကျနော်တို့မြင်တယ်” ဟု သူက ဆိုသည်။
သမ္မတ ဦးသိန်းစိန် အစိုးရလက်ထက်တွင် နာမည်ပျက်စာရင်းမှမှ ပယ်ဖျက်ပေးပြီး ပြည်ပမှ နာမည်ကြီး အတိုက်အခံတချို့ကိုလည်း ပြည်ဝင်ခွင့်များပေး၍ ပြုပြင်ပြောင်းလဲမှုများ လုပ်ဆောင်နေချိန်တွင် ပြည်တွင်း အင်အားစုများကိုလည်း နိုင်ငံတကာ အတွေ့အကြုံ ရစေရေးအတွက် နိုင်ငံကူးလက်မှတ် ထုတ်ပေးသင့်ကြောင်း ဦးကိုကိုကြီးက ဆက်ပြောသည်။
တိုင်းပြည် ပြန်လည်ထူထောင်ရေးတွင် အဓိက လိုအပ်နေသည့် လူသား အရင်းအမြစ်ဆိုင်ရာ ဖွံ့ဖြိုးရေးအဖြစ် ပြည်ပ လေ့လာရေးခရီးများ၊ သင်တန်းများ တက်နိုင်ရန် နိုင်ငံကူးလက်မှတ်ကို အားလုံး တပြေးညီ သတ်မှတ်ပေးသင့်ကြောင်း၊ ပထမအသုတ်အဖြစ် လူစာရင်း ၂၀ ကို တင်ပြထားကြောင်း၊ ထို့အပြင် အကျဉ်းထောင်များမှ ပြန်လွတ်လာပြီး ဆက်လက် ပညာသင်ခွင့် မရသေးသူများအတွက်လည်း လုပ်ဆောင် သွားမည်ဖြစ်ကြောင်း သိရသည်။
မြန်မာနိုင်ငံတွင် သာမန်နိုင်ငံသား တဦးအနေဖြင့် နိုင်ငံကူးလက်မှတ် လျှောက်ထားလျှင် အချိန်ကာလအားဖြင့် ရက်သတ္တ ၃ ပတ် ကြာမြင့်သော်လည်း နိုင်ငံရေး အကျဉ်းသားဟောင်းများမှာမူ အနည်းဆုံး ၆ လနီးပါး ကြာမြင့်ကြောင်း၊ လျှောက်ထားရာတွင်လည်း တခြားနိုင်ငံသားများနှင့် မတူဘဲ သီးခြား အပိုလုပ်ဆောင်ရမှုများ ရှိကြောင်း သိရှိရသည်။
“ကျနော်တို့ လျှောက်လွှာတင်တဲ့ အချိန်မှာကတည်းက သီးခြား လျှောက်လွှာစာရွက်နဲ့ ဘယ်နှစ်ခုနှစ်ကနေပြီး ဘာပုဒ်မနဲ့ ထောင်ဘယ်လောက်ကျတယ်။ ဘယ်အချိန်မှာ ပြန်လွတ်တယ်၊ အားလုံးကို ထောင်ကျတဲ့ဖြစ်စဉ်ကို သီးခြား တစောင်ရေးတင်ရတယ်” ဟု ဦးကိုကိုကြီးက ဆိုသည်။
နိုင်ငံကူးလက်မှတ် ထုတ်ပေးရေးနှင့် ပတ်သက်၍ ပြည်ထဲရေး ၀န်ကြီးဌာနက နိုင်ငံရေး အကျဉ်းသားဟောင်းများကို ထုတ်ပေးရာတွင် ထောင်မှ လွတ်ပြီးနောက်ကာလမှစ၍ ၁ နှစ် ဆိုင်းငံ့ထားရန် ဌာနတွင်း ညွှန်ကြားထားခဲ့ကြောင်း သိရသည်။
မကြာသေးမီက သမ္မတရုံးမှ ထုတ်ပြန်သည့် နာမည်ပျက်စာရင်း ပယ်ဖျက်ပေးမှုတွင် ၈၈ မျိုးဆက် ကျောင်းသားများအဖွဲ့မှ ဦးဂျင်မီနှင့် ဦးပဏ္ဍိတ်ထွန်းတို့လည်း ပါဝင်လာခဲ့ရာ ၄င်းတို့အနေဖြင့်လည်း နိုင်ငံကူးလက်မှတ် ရနိုင်ပြီဟု ယူဆကြောင်း ဦးဂျင်မီက ပြောသည်။
“ကျနော်က ၂၀၀၆ ခုနှစ်ကတည်းက ပတ်စ်ပို့ လျှောက်ထားခဲ့တာ။ အဲဒီစာရင်းမှာ ပါလို့ထင်တယ်၊ မပေးခဲ့ဘူး။ အခုတော့ ရမယ့်ပုံပဲ။ ကိုမင်းကိုနိုင်ကိုတော့ စာအုပ်ရပြီပြောပေမယ့် အားလုံးတပြေးညီမဖြစ်လို့ သွားမထုတ်သေးဘူး” ဟု သူက ဆိုသည်။
နိုင်ငံရေးအကျဉ်းသားဟောင်းများ ဖြစ်ကြသည့် ရှေ့နေ ဦးအောင်သိန်း၊ အမေရိကန်က ပေးအပ်သည့် အမျိုးသမီး စွမ်းဆောင်ရှင်ဆုရှင် မဇင်မာအောင်တို့ နိုင်ငံကူး လက်မှတ်ရရှိခဲ့ပြီး မကြာသေးမီက ပြည်ပခရီးစဉ်များ သွားရောက် ခဲ့သော်လည်း မြန်မာနိုင်ငံသို့ ပြန်လည်ရောက်သည်နှင့် ၄င်းတို့၏ နိုင်ငံကူးလက်မှတ်များကို ပြန်လည် သိမ်းယူခံရကြောင်း သိရသည်။

ကိုမြအေးနှင့် ၈၈ မျိုးဆက်များ KNPP နှင့် ငြိမ်းချမ်းရေးကိစ္စ ဆွေးနွေးမည်


၈၈ မျိုးဆက် ကျောင်းသားခေါင်းဆောင် ကိုမြအေး ဦးဆောင်တဲ့ (၆) ဦးပါအဖွဲ့ဟာ KNPP ကရင်နီ အမျိုးသား တိုးတက်ရေးပါတီနဲ့ အပစ်အခတ် ရပ်စဲရေးနဲ့ ငြိမ်းချမ်းရေးကိစ္စတွေ ဆွေးနွေးဖို့အတွက် ကယားပြည်နယ် လွိုင်ကော်မြို့ကို အခုလ (၁၀) ရက်နေ့မှာ သွားရောက်မယ်လို့ MEDIA က စုံစမ်းသိရပါတယ်။
ဒီခရီးစဉ်အတွင်း KNPP ခေါင်းဆောင်ပိုင်းနဲ့ တွေ့ဆုံဖုိ့ ရှိသလို ကရင်နီလူငယ် အဖွဲ့အစည်းတွေနဲ့လည်း ဆွေးနွေးဖို့ရှိတယ်လို့ ကိုမြအေးက MEDIA ကို ပြောပါတယ်။
"ကယားမှာ ကျွန်တော် KNPP နဲ့တွေ့ဖို့ရှိတယ်။ နောက်လူငယ် အဖွဲ့အစည်းတွေနဲ့လည်း တွေ့ဖို့ ရှိတယ်ခင်ဗျ။ အဓိကကတော့ လက်ရှိ အပစ်အခတ် ရပ်စဲထားတဲ့ အဖွဲ့အစည်းတွေရဲ့ အခြေအနေ၊ အပစ်အခတ်ရပ်စဲထားတဲ့ အပေါ်မှာ ရှိနေတဲ့ အခြေအနေ၊ နောက်အနာဂတ်အတွက်ကို တိုင်းရင်းသားတွေ တန်းတူညီမျှရေး အခွင့်အရေးတွေ ရရှိဖို့အတွက် ဘယ်လိုပူးပေါင်း ဆောင်ရွက်မလဲဆိုတဲ့ အပိုင်းပါပဲ။ ဒါတွေကျွန်တော်တို့ ဆွေးနွေးသွားမှာ ဖြစ်ပါတယ်။ တဖြေးဖြေးတော့ ကျွန်တော်တို့လိုချင်တဲ့ တိုင်းပြည်ငြိမ်းချမ်းဖို့ ပြည်ထောင်စုစစ်စစ် ဖြစ်ပေါ်လာဖို့ဆိုတဲ့ ဟာကိုတော့ အားလုံးဝိုင်းဝန်း လုပ်မှရမှာဆိုတော့ အဲဒီအခြေခံ သဘောတရားဟာကိုပဲ ဆုတ်ကိုင်ထားပြီး ဆွေးနွေးသွားမှာ ဖြစ်ပါတယ်"
ကိုမြအေးဟာ ၈၈ မျိုးဆက် ကျောင်းသားများအဖွဲ့မှာ ငြိမ်းချမ်းရေးကိစ္စတွေ ဆောင်ရွက်ဖို့ အဓိက တာဝန်ယူထားရသူဖြစ်ပြီး မကြာသေးခင်က ကချင်ဒေသကို သွားရောက်ပြီး KIO/KIA ခေါင်းဆောင်တွေနဲ့ တွေ့ဆုံခဲ့သလို၊ ကရင်ပြည်နယ်ကိုလည်း သွားရောက်ပြီး KNU ကရင်အမျိုးသား အစည်းအရုံး အရာရှိတွေနဲ့ ငြိမ်းချမ်းရေး ကိစ္စတွေ ဆွေးနွေးခဲ့ပါတယ်။
ဒီအတောအတွင်း ၈၈ မျိုးဆက် ကျောင်းသားခေါင်းဆောင် ကိုကိုကြီးဟာ ရခိုင်ပြည်နယ်က ဒုက္ခသည်တွေကို ကူညီထောက်ပံ့ရေးအတွက် စစ်တွေမြို့ကို ဒီကနေ့ ထွက်ခွာသွားတယ်လို့ သတင်းရရှိပါတယ်။

ABSDF ဥက္ကဋ္ဌဟောင်း ဦးထွန်းအောင်ကျော် မြောက်ပိုင်းဗျူရို အကျဉ်းသားဟောင်းများနှင့် တွေ့ ဆုံ

ရန်ကုန်မြို့ ကို ရောက်ရှိနေတဲ့ အမိမြေအတွက် ငြိမ်းချမ်းရေး (Peace for Motherland ) အဖွဲ့ဝင် ABSDF ကျောင်းသားတပ်မတော်ရဲ့ ပထမဆုံး ဥက္ကဋ္ဌ ဖြစ်ခဲ့သူ ဦးထွန်းအောင်ကျော်ဟာ ABSDF မြောက်ပိုင်းဗျူရိုမှာ စပိုင်ဆိုပြီး ဖမ်းဆီးခံခဲ့ရသူများနဲ့ အသတ်ခံခဲ့ရသူများရဲ့ မိသားစုဝင်တွေနဲ့ ဒီကနေ့ ရန်ကုန်မြို့  မီးရထားဟိုတယ်မှာ နံနက် ၁၀ နာရီကနေ ညနေ ၄ နာရီအထိ တွေ့ဆုံခဲ့တယ်လို့ သိရပါတယ်။
တွေ့ဆုံပွဲနဲ့ ပတ်သက်ပြီး ဦးထွန်းအောင်ကျော်က အခုလို ရှင်းပြပါတယ်။
"ဒီနေ့ ကျွန်တော်တို ABSDF မြောက်ပိုင်းက လွတ်လာတဲ့ ရဲဘော်တွေ၊ ရန်ကုန်မှာ ရှိတဲ့ရဲဘော်တွေနဲ့ အသတ်ခံရတဲ့ ရဲဘော်တွေရဲ့ မိသားစုဝင်တွေနဲ့ တွေ့တယ်။ ကျွန်တော်တစ်ယောက်ထဲနဲ့။ သူတို့အနေနဲ့ ကျွန်တော့်ရပ်တည်ချက်ကို ကျွန်တော် တရားဝင်ပြောတာ သိချင်တယ်ပေါ့ဗျာ။ နောက်ပြီးတော့ ကျွန်တော့်အနေနဲ့ ဘယ်လိုဆက်ပြီးတော့ ကူညီသွားနိုင်မလဲ၊ သိချင်တယ်ပေါ့ဗျာ"
ဖမ်းးဆီးခံရာက ပြန်လည်လွတ်မြောက်လာတဲ့ ABSDF ရဲဘော်တွေဖြစ်တဲ့ ကိုရဲလင်း၊ ကိုကျော်နိုင်ဦး၊ ကိုတိုးကြီး၊ ဘိုဘို၊ သင်းသင်းညီ၊ ပန်းချီကိုထိန်လင်းနဲ့ အသတ်ခံရတဲ့ ကိုချိုရဲ့ညီမ မသင်းသင်းတို့ အပါအဝင် စုစုပေါင်း ၁၂ ဦးခန့်  တက်ရောက်ကြတယ်လို့ သိရပါတယ်။
လာရောက်သူတွေကို ဦးထွန်းအောင်ကျော်က ABSDF ဥက္ကဋ္ဌဟောင်းအနေနဲ့ မိသားစုတွေနဲ့အတူ ထပ်တူ ဝမ်းနည်းကြေကွဲကြောင်း ပြောဆိုပါတယ်။
"ဒါတွေ မဖြစ်သင့်မဖြစ်ထိုက်ပဲနဲ့ ဖြစ်သွားရတယ်။ ABSDF ဟာ ကျွန်တော်တို့ လူ့အခွင့်အရေးကို ကာကွယ်စောင့်ရှောက်တဲ့ အဖွဲ့ဖြစ်တယ်။ ဒီမိုကရေစီရရှိရေးနဲ့ လူ့အခွင့်အရေး ရရှိရေးအတွက် တိုက်ပွဲဝင်နေတဲ့ အဖွဲ့ဝင်တွေဟာ လက်ထဲမှာ လက်နက်ရှိလာတဲ့ အခါမှာ အာဏာရူးပြီးတော့ အချင်းချင်းကို သတ်ဖြတ်တဲ့ သွေးစွန်းတဲ့အထိ ဖြစ်သွားတာဟာ အင်မတန် သမိုင်းမှာ အရုပ်ဆိုးတယ်ဆိုတဲ့ အကြောင်းပေါ့ဗျာ။ အဲဒီအတွက် ဒီအသတ်ခံရတဲ့ လူတွေရဲ့ ဂုဏ်သရေ ပြန်ဆယ်ဖို့ အဓိက ကတော့ ကိုထွန်းအောင်ကျော်၊ ဦးစိန် နောက်ပြီးတော့ ကိုချိုကြီးတို့က ရန်သူ့လူမဟုတ်ဘူး၊ သူလျှိုမဟုတ်ဘူး။ တကယ့် ဒီမိုကရေစီ တော်လှန်ရေးသမားစစ်စစ် ဖြစ်တယ်ဆိုတာကို သက်သေထူနိုင်ဖို့ လိုတယ်ဆိုတာမျိုး ကျွန်တော်ပြောဖြစ်တာ ပေါ့ဗျာ"
ABSDF မြောက်ပိုင်းဗျူရိုမှာ ဖမ်းဆီးခံခဲ့ရသူများနဲ့ သတ်ဖြတ်ခံခဲ့ရသူများရဲ့ မိသားစုဝင်တွေက လောလောဆယ် ရန်ကုန်မြို့ကို ရောက်ရှိနေတဲ့ ABSDF ဥက္ကဋ္ဌဟောင်းတွေ ဖြစ်တဲ့ ဦးထွန်းအောင်ကျော်၊ ကိုမိုးသီးဇွန်၊ ဒေါက်တာနိုင်အောင်တို့ သုံးဦးတို့ကို တပြိုင်နက် တွေ့ဆုံ ဆွေးနွေးလိုတဲ့ ဆန္ဒရှိတယ်လို့လည်း သိရပါတယ်။



LWIN PWIN
NLABR
Web-site:                   www.nlabr.com
Blog:                         http://wanna23-23.blogspot.com/
Facebook:                   Sa Maung

0 comments:

Post a Comment