မြန်မာ့ စီးပွားရေး သတင်းများ  စက်တင်ဘာ   ၁၇၊ ၂၀၁၂


မြန်မာသွင်းကုန် ကန့်သတ်ထားမှုအချို့ အမေရိကန် ရုတ်သိမ်းတော့မည် 

သမ္မတ ဦးသိန်းစိန်နှင့် အတိုက်အခံခေါင်းဆောင် ဒေါ်အောင်ဆန်းစုကြည်တို့ကို ချီးမြှင့်သည့် အနေဖြင့် အမေရိကန် အစိုးရက မြန်မာနိုင်ငံမှ သွင်းကုန် အချို့အပေါ် တားမြစ် ကန့်သတ်ထားချက်များ ရုတ်သိမ်းကြောင်း ကြေညာရန် စီစဉ်နေသည်ဟု သတင်းများအရ သိရသည်။


၁၀၀% လာရောက် ရင်းနှီးမြှုပ်နှံလိုသူများနှင့် ပြည်တွင်း လုပ်ငန်းရှင်များ စိုးရိမ်ချက် 

မြန်မာနိုင်ငံတွင် ရင်းနှီးမြှုပ်နှံရန် စိတ်ဝင်စားနေသည့် နိုင်ငံခြားရင်း နှီးမြှုပ်နှံသူများသည် ရာနှုန်းပြည့် ရင်းနှီးမြှုပ်နှံခွင့် ရရှိရန် မျှော်လင့်နေကြောင်း ပြည်ပလုပ်ငန်းရှင်များက ပြောသည်။
နိုင်ငံခြား ရင်းနှီးမြှုပ်နှံသူ အများစုမှာ ဘဏ်လုပ်ငန်း၊ ရေနံ၊ သဘာဝဓါတ်ငွေ့၊ စွမ်းအင်နှင့် ခရီးသွားကဏ္ဍများကို အများဆုံး စိတ်ဝင်စားလျက်ရှိကြပြီး ယင်းလုပ်ငန်းများတွင် ရာနှုန်းပြည့် လုပ်ကိုင်ခွင့် ရရှိလိုကြောင်း မြန်မာနိုင်ငံတွင် ဖက်စပ်လုပ်ကိုင်နေသော Yoma Strategic Holdings မှာ အမှုဆောင်ဥက္ကဋ္ဌ Mr. Serge Pun ကနေပြည်တော်ရှိ မြန်မာ အပြည်ပြည်ဆိုင်ရာ ကွန်ဗားရှင်း စင်တာတွင် ကျင်းပခဲ့သည့် Myanmar Global Investment Forum တွင် ထည့်သွင်း ဆွေးနွေးခဲ့သည်။
ထို့ပြင် နိုင်ငံခြားရင်းနှီးမြှုပ်နှံလိုသူများအား ပြည်တွင်းလုပ်ငန်းများနှင့် ချိတ်ဆက် အကြံပေးခြင်းတို့ကို ဆောင်ရွက်နေသော Thura Swiss ကုမ္ပဏီမှ အမှုဆောင်အရာရှိ ဦးအောင်သူရ ကလည်း “နိုင်ငံခြား ရင်းနှီးမြှုပ်နှံလိုသူတွေက ပြည်တွင်း လုပ်ငန်းရှင်တွေနဲ့ ပူးပေါင်းလုပ်ကိုင်မယ်ဆိုရင်လည်း အနည်းဆုံး ၅၁ ရာခိုင်နှုန်း လိုချင်တယ်။ ဒါက သူတို့ အနေနဲ့ လုပ်ပိုင်ခွင့်နဲ့ ဆုံးဖြတ်ပိုင်ခွင့်တွေကို ရရှိလိုတာကြောင့်ပါ” ဟု ပြောဆိုသွားသည်။သို့မဟုတ်ဘဲ ရင်းနှီးမြှုပ်နှံခွင့်ကို ၄၉ ရာခိုင်နှုန်းအထိသာ ထည့်ဝင်ခွင့် ရမည်ဆိုပါက ၎င်းတို့အနေဖြင့် ဆုံးဖြတ်ပိုင်ခွင့် လျော့နည်းမည်ကို စိုးရိမ်ကြောင်းလည်း စက်တင်ဘာလ ၁၂ ရက်နှင့် ၁၃ ရက်နေ့များက ကျင်းပသည့် အဆိုပါအစည်းအဝေးတွင် ထည့်သွင်း ပြောကြားသွားသည်။


ငွေကြေးဆိုင်ရာ မူဝါဒသစ် ကျင့်သုံးရန် စီစဉ်

 

မြန်မာနိုင်ငံတွင်း ရင်းနှီးမြှုပ်နှံမှုများနှင့် ငွေတန်ဖိုး တည်ငြိမ်ရေးအတွက် လွတ်လပ်သည့် ငွေကြေးဆိုင်ရာ မူဝါဒ ကျင့်သုံးရန် မြန်မာနိုင်ငံ ဗဟိုဘဏ်က စီစဉ်နေကြောင်း သတင်းရသည်။ လာမည့် နှစ်ဝက်ခန့်တွင် စတင်သွားမည်ဖြစ်ပြီး ငွေကြေးဖောင်းပွမှုနှင့် နိုင်ငံခြားငွေ လဲလှယ်ရေး ဈေးကွက်ကို အဓိကထားသည်ဟု ဗဟိုဘဏ် ဒုတိယအကြီးအကဲ ဦးမောင်မောင်ဝင်း က ပြောဆိုကြောင်း ဘန်ကောက်ပို့စ် သတင်း၌ ပါရှိသည်။ ထို့အတွက် နိုင်ငံတကာ ငွေကြေး ရန်ပုံငွေအဖွဲ့(IMF) နှင့် သင်တန်းများ ပေးနေသည်မှာ ပြီး စီး တော့မည်ဟုလည်း ဆိုသည်။

ဘီလူးချောင်းနှင့် သူဌေး ရေအားလျှပ်စစ် ချေးငွေဆိုင်ရာ သဘောတူ လက်မှတ်ထိုး


တရုတ်အမျိုးသား ကွန်ဂရက် အမြဲတမ်းကော်မတီ ဥက္ကဌ မစ္စတာ ၀ူဘန်းကို နှင့် သမ္မတ ဦးသိန်းစိန်တို့ စက်တင်ဘာ ၁၄ ရက်က ဘီလူးချောင်း ရေအားလျှပ်စစ်နှင့် သူဌေး ရေအား လျှပ်စစ် စီမံကိန်းများအတွက် ချေးငွေ ဆိုင်ရာ သဘောတူ လက်မှတ်ရေးထိုး သည်။ ၂၀၁၃ ခုတွင် မြန်မာနိုင်ငံ၌ ကျင်းပမည့် ၂၇ ကြိမ်မြောက် ဆီးဂိမ်း အထောက်အပံ့၊ ဆေးပညာနှင့် ပညာရေး ကဏ္ဍများအတွက် အကူအညီပေးရေး နားလည်မှု စာချွန်လွှာ စသည်တို့ကို လက်မှတ်ထိုးခြင်းများလည်း ပါဝင်ကြောင်း အစိုးရ သတင်းစာများတွင် ဖော်ပြ ထားသည်။ မစ္စတာ ၀ူဘန်းကို နှင့် ကိုယ်စားလှယ်အဖွဲ့သည် မြန်မာနိုင်ငံသို့ စက်တင်ဘာ ၁၂ ရက်က ၁၆ ရက်အထိ လာ ရောက် ခဲ့သည်။


ဟံသာဝတီလေဆိပ် တည်ဆောက်ရန် အကြိုအရည်အချင်းစစ်ဆေးသည့် လျှောက်လွှာအား နိုင်ငံ ၁၂ နိုင်ငံမှ ကုမ္ပဏီ၂၁ ခု လျှောက်ထားရာတွင် မြန်မာကုမ္ပဏီတစ်ခုသာ ပါဝင်


ဟံသာဝတီလေဆိပ်တည်ဆောက်ရန် ကုမ္ပဏီများအား အကြိုအရည်ချင်းစစ်ဆေးသည့် လျှောက်လွှာအား နိုင်ငံပေါင်း ၁၂ နိုင်ငံမှ ကုမ္ပဏီ ၂၁ ခု လာရောက်လျောက်ထားခဲ့ပြီး ယင်းကုမ္ပဏီများထဲတွင် မြန်မာနိုင်ငံမှ ကုမ္ပဏီတစ်ခုသာ ပါဝင်ခဲ့ကြောင်း လေကြောင်းပို့ဆောင်ရေး ညွှန်ကြားမှုဦးစီးဌာနမှ ညွှန်ကြားရေးမှူးချုပ် ဦးတင်နိုင်ထွန်း၏ ပြောကြားချက်အရသိရပါသည်။



တရုတ်နိုင်ငံမှ မြန်မာနိုင်ငံ၏ ပို့ကုန်များအပေါ် နည်းမျိုးစုံဖြင့် ကန့်သတ်နေသော်လည်း အန္တရာယ်ရှိကုန်စည်များကို နည်းမျိုးစုံဖြင့် တင်သွင်းနေ

တရုတ်နိုင်ငံအတွင်းသို့ မြန်မာနိုင်ငံမှ တင်ပို့သည့် ကုန်စည်များဖြစ်သည့် ဆန်၊ ကျောက်စိမ်း၊ သားရေ ကုန်ကြမ်း စသည့် ကုန်စည်များနှင့် အခြားသော ကုန်စည်များအပေါ် တရုတ်နိုင်ငံမှ အဆမတန် အခွန်တိုးမြှင့်ကောက်ခံခြင်း၊ အရည်အသွေးမမီဟုဆိုကာ သွင်းကုန်များ ပိတ်ဆို့ ထားခြင်းစသည့် တားဆီးမှုများနှင့် ကြုံတွေ့နေရကြောင်း ထိုကဲ့သို့ဖြစ်ရပ်များမှာ လက်ရှိ ကာလတွင်မှ ဖြစ်ပေါ်နေခြင်း မဟုတ်ဘဲ ယခင်ကလည်း ရသာချိုစက်မှု လုပ်ငန်းမှ ထုတ်လုပ်သည့်ခေါက်ဆွဲခြောက်ကို တရုတ်နိုင်ငံမှ ကန့်သတ်ထားသည့် ပိုးပမာဏထက် ပါဝင်နေ သည်ဟုဆိုကာ ကန့်သတ်ခဲ့ခြင်း၊ ကဏန်းအရှင်များအပေါ် ပိုးပါသည်ဟုဆိုကာ တင်သွင်းခြင်း တားမြစ်ခဲ့မှုများစသည့် ဖြစ်ရပ်များ အများအပြားရှိခဲ့ကြောင်းလက်ရှိကာလတွင်လည်း မြန်မာပို့ကုန်ဖြစ်သည့် ဆန်အား အရည်အသွေးမမီဟုဆိုကာ တရားဝင် တင်ပို့ခွင့် ပိတ်ထားခြင်း၊ မြန်မာပို့ကုန်ကြမ်းဖြစ်သည့် သားရေများကို ရောဂါပိုးပါဝင်နေသည်ဟုဆိုကာ တင်ပို့ခွင့်ပိတ်ထားခြင်း၊ ရေချိုပုစွန်များတွင် ဆပ်ပြာရည်ပါဝင်သည်ဟုဆို ကာ ပြန်လည်ပေးပို့ခဲ့ခြင်းများ၊ မြန်မာ့ အသားထွက်ကုန်များတွင် ခွာနာလျှာနာပိုးရှိ၍ဆိုကာ မြန်မာနိုင်ငံမှ တင်ပို့သည့် အေးခဲအမဲသားအား တင်ပို့ခွင့်ပိတ်ဆို့ခဲ့ခြင်းများ စသည့် ဖြစ်ရပ်များနှင့် ကျောက်စိမ်းနှင့် လယ်ယာထွက်ကုန်များကို အခွန်မြင့်မားစွာ စည်းကြပ်မှုများ ပြုလုပ်နေပြီး မြန်မာပို့ကုန် လုပ်ငန်းရှင် အများစုမှာ တရားဝင်တင်ပို့နိုင်ရေး အခက်တွေ့သဖြင့် တရားမ၀င်လမ်းကြောင်းများမှ ဈေးနှိမ်ခံ၍ တင်ပို့နေရကြောင်း ပို့ကုန်လုပ်ငန်း ရှင်များထံမှ သတင်းရရှိပါသည်။


ထားဝယ်အထူး စီးပွားရေးဇုန် စီမံကိန်း၏ မူဘောင်သဘောတူ စာချုပ် ပြန်လည်ပြင်ဆင် ချုပ်ဆိုမည် စီမံကိန်းလျင်မြန်စွာ အကောင်အထည်ဖော်နိုင်ရန် အစိုးရအချင်းချင်း ဆက်သွယ်မှုဖြင့် ပူးပေါင်းလုပ်ဆောင်မည်


ထားဝယ် အထူးစီးပွားရေးဇုန် စီမံကိန်း၏ မူဘောင် သဘောတူစာချုပ်အား ပြန်လည်ပြင်ဆင် ချုပ်ဆို သွားမည်ဖြစ်ပြီး လက်ရှိတွင် ကြန့်ကြာနေသည့် စီမံကိန်းလုပ်ငန်းများအား လျင်မြန်စွာ အကောင်အထည် ဖော်နိုင်ရန် အစိုးရအချင်းချင်း ဆက်သွယ်မှုဖြင့် ပူးပေါင်း လုပ်ဆောင်သွားမည်ဖြစ်ကြောင်း ထားဝယ် အထူးစီးပွားရေးဇုန် အထောက်အကူပြု လုပ်ငန်းအဖွဲ့ (ယာယီ)ကော်မတီမှ တာဝန်ရှိသူတစ်ဦး၏ ပြောကြားချက်အရ သိရှိရသည်။
ယခင်အစိုးရလက်ထက် ၂၀၀၈ ခုနှစ် ဇွန်လ ၁၂ ရက်နေ့တွင် ထိုင်းနိုင်ငံမှ အီတာလျံ ထိုင်းကုမ္ပဏီနှင့် မြန်မာ့ဆိပ်ကမ်း အာဏာပိုင်တို့အကြား ထားဝယ်အထူးစီးပွားရေးဇုန် စီမံကိန်းမူဘောင် သဘောတူစာချုပ်ကို  လက်မှတ်ရေးထိုးခဲ့သည်။
ယခုအသစ်ပြန်လည် ပြင်ဆင်ချုပ်ဆိုမည့် မူဘောင်သဘောတူစာချုပ်မှာ ထားဝယ် အထူးစီးပွားရေးဇုန် စီမံခန့်ခွဲမှုကော်မတီနှင့် ထိုင်းနိုင်ငံ မှ အီတာလျံထိုင်းကုမ္ပဏီတို့အကြား ချုပ်ဆိုသွားမည်ဖြစ်ကာ ယခင်စာချုပ်တွင် ပါဝင်သည့်အချက်အလက်များလည်း ပြန်လည်ပါဝင်နိုင်မည် ဖြစ်ပြီး အသစ်ထည့်သွင်းချုပ်ဆိုမည့် သဘောတူညီချက်များလည်း ပါဝင်လာနိုင်ဖွယ်ရှိကြောင်း သိရသည်။



LWIN PWIN
NLABR
Web-site:                   www.nlabr.com
Blog:                         http://wanna23-23.blogspot.com/
Facebook:                   Sa Maung

0 comments:

Post a Comment