ရခိုင် သတင်းများ သြဂုတ် ၂၈၊ ၂၀၁၂
ရခိုင်ပဋိပက္ခ စုံစမ်းရေး ကော်မရှင် စက်တင်ဘာတွင် လုပ်ငန်းစမည်
ရခိုင်ပြည်နယ်အတွင်း ပြီးခဲ့သည့် မေလနှင့်ဇွန်လ အတွင်းက ဖြစ်ပွားခဲ့သော ပဋိပက္ခများနှင့် ဥပဒေမဲ့ လုပ်ဆောင်မှုများ ဖြစ်စဉ်အမှန် ပေါ်ပေါက်ရေး အတွက် လွတ်လပ်သော စုံစမ်းစစ်ဆေးရေး ကော်မရှင်တရပ်ကို သမ္မတ ဦးသိန်းစိန်က သြဂုတ်လ ၁၇ ရက်နေ့တွင် ဖွဲ့စည်းပေးခဲ့ပြီး အဖွဲ့ဝင် ၂၇ ဦးပါဝင်ကြောင်း၊ ယင်းအဖွဲ့အနေဖြင့် လာမည့် စက်တင်ဘာလအတွင်း အခင်းဖြစ်ပွားခဲ့သော ရခိုင်ပြည်နယ်ဒေသများအထိ သွားရောက်ပြီး ပဋိပက္ခဖြစ်စဉ်များကို လေ့လာစုံစမ်းမည်ဖြစ်ကြောင်း၊ ယင်းသို့ စုံစမ်းစစ်ဆေးရာတွင် သက်ဆိုင်ရာ အာဏာပိုင်များကိုသာမက ဖြစ်ပွားခဲ့သော မြေပြင်အခြေအနေ အားလုံးအထိ မေးမြန်းစုံစမ်းမှု များပြုလုပ်သွားရန်ရှိကြောင်း သိရှိရသည်။
“အခင်းဖြစ်ပွားတဲ့ မြေပြင်အထိ ဆင်းပြီးတော့ စုံစမ်းစစ်ဆေးမှုတွေ စတင်မယ်။ ဒါက ပထမဆုံးစပြီး စုံစမ်းစစ်ဆေးရေး လုပ်တာလို့လည်း ပြောလို့ရနိုင်တယ်။ ကနဦးလေ့လာမှုတွေ လုပ်မယ်။ သတင်းအချက်အလက်တွေ စတင်ပြီး စုဆောင်းတာပေါ့” ဟု ဒေါက်တာအေးမောင်က ဆိုသည်။
အဖွဲ့ဝင် ၂၇ ဦးပါဝင်သော ရခိုင်ပြည်နယ်ပဋိပက္ခ စုံစမ်းစစ်ဆေးရေး ကော်မရှင်သည် သီးခြားလွတ်လပ်သော စုံစမ်းစစ်ဆေးရေး ကော်မရှင် ဖြစ်ပြီး ခေါင်းစဉ် ၈ ခုအောက်တွင် အဖွဲ့ခွဲ ၈ ဖွဲ့ ဖွဲ့စည်းပြီး တာဝန်ခွဲဝေ ဆောင်ရွက်သွားမည်ဖြစ်ကြောင်း သိရှိရသည်။
အဖွဲ့ခွဲ ၈ ခုသည် တည်ငြိမ်အေးချမ်းမှု ပျက်ပြားစေသော ပဋိပက္ခဖြစ်ပွားရသည့် အကြောင်းရင်းများ၊ ပဋိပက္ခဖြစ်ပွား မှုကြောင့် သေဆုံးဒဏ်ရာရမှုများ၊ ပျက်စီးဆုံးရှုံးမှုများနှင့် တခြားထိခိုက်မှုများ၊ တည်ငြိမ်အေးချမ်းမှု ရရှိစေရန်အတွက် ဥပဒေစိုးမိုးရေး ဆောင်ရွက်မှု၊ ကယ်ဆယ်ရေးလုပ်ငန်းများနှင့် ပြန်လည်ထူထောင်ရေး လုပ်ငန်းများ ဆောင်ရွက်ပေးနိုင်မှု၊ ကယ်ဆယ်ရေးလုပ်ငန်းများနှင့် ပြန်လည်ထူထောင်ရေး လုပ်ငန်းများကို ဆောင်ရွက်ပေးနိုင်မှု၊ ပဋိပက္ခ ချုပ်ငြိမ်းရေး အတွက် ရေတို၊ ရေရှည် ဆောင်ရွက်သင့်သည့် အချက်များ၊ ကွဲပြားသော ဘာသာအယူဝါဒရှိသူ မတူညီသည့် လူမျိုးစုများအကြား ငြိမ်းချမ်းစွာ အတူယှဉ်တွဲနေထိုင်နိုင်မည့် နည်းလမ်းများ၊ ဥပဒေစိုးမိုးရေး အကြံပြုချက်များ၊ စီးပွားရေးနှင့် လူမှုရေးဖွံ့ဖြိုးတိုးတက်မှုဆိုင်ရာ အကြံပြုချက်များကို တဖွဲ့ချင်းစီအလိုက် တာဝန်ယူဆောင်ရွက်ကြမည် ဖြစ်သည်။
စုံစမ်းစစ်ဆေးရေး ကော်မရှင်၏ အစီရင်ခံစာအတွက် လိုအပ်သော သတင်းအချက်အလက်များကို စနစ်တကျ ကောက်ယူနိုင်ရေးအတွက် ကျွမ်းကျင်သော သုတေသနပညာရှင်များ ပါဝင်သည့် သုတေသနအဖွဲ့ ဖွဲ့စည်းသွားမည် ဖြစ်သည့်အပြင် စုံစမ်းစစ်ဆေးကော်ရှင်၏ အစီရင်ခံစာအား သမ္မတထံသို့ နိုဝင်ဘာလ ၁၆ ရက်နေ့တွင် တင်ပြသွားရန် ရည်ရွယ်ထားသော်လည်း သတ်မှတ် ရက်ထက် ကျော်လွန်လုပ် ဆောင်ရန် လိုအပ်ပါကလည်း ဆက်လက် လုပ်ဆောင်သွားမည်ဟု ကော်မရှင်၏ သြဂုတ်လ ၂၅ ရက်နေ့ သတင်းထုတ်ပြန်ချက်တွင် ဖော်ပြပါရှိသည်။
ရခိုင်ပြည်နယ်အရေး စုံစမ်းစစ်ဆေးမှု ပြုလုပ်ရာတွင် လိုအပ်သော သတင်းအချက်အလက်များအတွက် အင်တာဗျူးများ၊ စစ်တမ်းများ ပြုလုပ်ခြင်းနှင့်အတူ ပြည်တွင်းပြည်ပရှိ စာကြည့်တိုက်များ၊ မော်ကွန်းတိုက်များမှ ဆီလျော်သော သုတတေသန စာတမ်းများမှ သတင်းအချက်အလက်များ ကောက်ယူသွားမည့်အပြင် ပြည်သူများအနေဖြင့်လည်း စုံစမ်းစစ်ဆေးရေး ကော်မရှင်ထံသို့ ပဋိပက္ခများနှင့်ပတ်သက်ပြီး သတင်းအချက်အလက်များ ပေးပါက လက်ခံသွားမည်ဖြစ်ကြောင်း သိရှိရသည်။
ထို့အပြင် ကော်မရှင်အဖွဲ့၏ ရုံးခန်းကိုလည်း မကြာမီ ဖွင့်လှစ်သွားမည်ဖြစ်ကြောင်း ကော်မရှင်အတွင်းရေးမှူး ဒေါက်တာ ကျော်ရင်လှိုင်၏ အဆိုအရ သိရှိရသည်။
ရခိုင်ပြည်နယ် အရေးအခင်းတွင် ပဋိပက္ခများကြောင့် လူ ၇၀ ထက်မနည်း သေဆုံးခဲ့ပြီး အနည်းဆုံး ၈ သောင်းကျော် အိုးမဲ့အိမ်မဲ့ဖြစ်ခဲ့ရကြောင်း အစိုးရ၏ တရားဝင် သတင်းထုတ်ပြန်ချက်များအရ သိရသည်။
ရခိုင်ပြည်နယ်ပဋိပက္ခ စုံစမ်းရေးကော်မရှင်တွင် သာသနာရေးဝန်ကြီးဌာနမှ အငြိမ်းစားညွှန်ကြားရေးမှူးချုပ် ဒေါက်တာမျိုးမြင့်က ဥက္ကဋ္ဌအဖြစ် ဆောင်ရွက်ပြီး ဒေါက်တာ ကျော်ရင်လှိုင်က အတွင်းရေးမှူးအဖြစ် တာဝန်ယူကာ ဦးခွန်ထွန်းဦး၊ ဇာဂနာ၊ သတင်းစာဆရာ မောင်ဝံသ၊ ၈၈ ကျောင်းသားခေါင်းဆောင် ဦးကိုကိုကြီး အပါအ၀င် ဘာသာရေး၊ လူမှုရေး၊ စီးပွားရေးနှင့် နိုင်ငံရေးနယ်ပယ်မှ ပုဂ္ဂိုလ် ၂၇ ဦး ပါဝင်သည်။
ကုလ ၀န်ထမ်း ၃ ဦးကို ထောင်ဒဏ်စီရင်ချက်ချ
အခုလို ထောင်ဒဏ် စီရင်ချက်ချမှတ်ရတဲ့ အကြောင်းရင်းနဲ့ ပတ်သက်လို့ မိမိတို့ အသေးစိတ် မသိရှိရသေးဘူးလို့ ရန်ကုန် ကုလသမဂ္ဂ ပြန်ကြားရေး တာဝန်ခံ ဦးအေးဝင်းက ပြောပါတယ်။
"ကျွန်တော်တို့ အဲတာကိုတော့ အတိအကျ မသိပါဘူးခင်ဗျ။ အဲဒီတရားရုံး ကြားနာတဲ့ အချိန်မှာလည်း UN က ဘယ်သူမှ မရှိတဲ့ အတွက် ကျွန်တော်တို့လည်း ဒီဟာကို အတိအကျမသိပါဘူး။ ဒီဟာအတွက်ကိုပဲ သက်ဆိုင်ရာကို ကျွန်တော်တို့ ပိုပြီး သတင်းသိရအောင် ကျွန်တော်တို့ မေးထားပါတယ်ခင်ဗျ။ ပြီးခဲ့တဲ့ အပတ်လောက်ကပေါ့၊ ကုလသမဂ္ဂ ဝန်ထမ်းတွေရော INGO ဝန်ထမ်းတွေရော တချို့လွှတ်ပေးလိုက်တဲ့ အတွက်ပေါ့လေ။ ကျွန်တော်တို့ဆီက Mr Ashok Nigam ကကြိုဆိုတဲ့ အကြောင်း ပြောသွားပါတယ်။ ကြေညာချက် ထုတ်ပါတယ်။ အလားတူပဲပေါ့နော်၊ ထိန်းသိမ်းဆဲ ရှိနေတဲ့ ဝန်ထမ်းတွေကိုလည်း ဒီလိုပဲ စဉ်းစားပေးဖို့ မေတ္တာရပ်ခံထားပါတယ်"
အခုပြစ်ဒဏ် ချမှတ်ခံရတဲ့ သူတွေကတော့ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး UNHCR က ၀န်ထမ်း ၂ ဦးနဲ့ ကမ္ဘာ့စားနပ် ရိက္ခာအဖွဲ့ WFP က ၀န်ထမ်း ၁ ဦးတို့ ဖြစ်ပြီး ၃ ဦးစလုံးဟာ ရခိုင်ပြည်နယ်က ဖြစ်ပါတယ်။
UNHCR ၀န်ထမ်း မောင်ခင်မောင်နဲ့ WFP ၀န်ထမ်း မောင်ခင်ဆွေတို့ဟာ ညီအစ်ကိုတွေဖြစ်ပြီး သူတို့ကို တရားရုံး ထုတ်စစ်ဆေးရာမှာ မိမိတို့ဘက်က အကျိုးဆောင်ရှေ့နေ လိုက်ပါဆောင်ရွက်ခွင့် မရခဲ့ဘူးလို့ ညီဖြစ်သူ မောင်ခင်ဝင်းက ပြောပါတယ်။
"မိသားစုဝင်လည်း တက်ရောက်ခွင့်မရှိခဲ့ဘူး။ ကျွန်တော်တရားရုံးရဲ့ ဟိုပြူတင်းပေါက်နားကို သွားခဲ့ပါတယ်။ အဲဒီပြူတင်းပေါက်နားက အဲဒီတရားရုံးက လူတွေက ဖယ်ပေးပါဦး၊ နောက်ဆုတ်ပေးပါဦး ဆိုပြီးတော့ ကျွန်တော့်ကို နောက်ဆုတ်ခိုင်းပါတယ်။ အဲတာကြောင့် ကျွန်တော် ကြားလို့ မရခဲ့ပါ။ နောက်ပြီးတော့ ကျွန်တော့်မှာ ရှေ့နေလည်းမရှိခဲ့ပါ"
စီရင်ချက်ချခဲ့တဲ့ ပုဒ်မတွေကို အတိအကျ မသိရသေးပေမယ့် စွပ်စွဲခဲ့တဲ့ ပုဒ်မတွေကတော့ ဆူပူသွေးထိုး လှုံ့ဆော်မှု ၅၀၅ (ဂ)၊ ဓားလက်နက် ကိုင်ဆိုင်မှု ၁၅၃ (က) နဲ့ တရားမ၀င် ငွေကိုင်ဆောင်မှု ၂၄/၁ ဖြစ်တယ်လို့ မောင်ခင်ဝင်းကပြောပါတယ်။ ဒီစွပ်စွဲချက် ပုဒ်မတွေနဲ့ ပတ်သက်လို့ ခိုင်မာတဲ့ သက်သေအထောက်အထား မရှိပဲ မတရား အစွပ်စွဲခံခဲ့ရတယ်လို့ ဆိုပါတယ်။
ရခိုင်ပြည်နယ်မှာ ဖြစ်ပွားခဲ့တဲ့ အကြမ်းဖက် ပဋိပက္ခတွေအတွင်း ဖမ်းဆီးထိန်းသိမ်းခံခဲ့ရတဲ့ ကုလသမဂ္ဂ ၀န်ထမ်း စုစုပေါင်း ၁၂ ဦးအနက် ၆ ဦးကို ပြီးခဲ့တဲ့ သီတင်းပတ်အတွင်းက အာဏာပိုင်တွေက ပြန်လွှတ်ပေးခဲ့ပါတယ်။
ကုလဝန်ထမ်းတွေ ပြစ်ဒဏ်စီရင်မှုအပေါ် ကင်တားနားဝေဖန်
ရခိုင်ပြည်နယ်မှာဖြစ်ခဲ့တဲ့ အဓိကရုဏ်းတွေကို သွေးထိုးလှုံ့ဆော်တာမှာ ပါဝင်ပတ်သက်တယ်ဆိုတဲ့ စွဲချက်တွေနဲ့ အဲဒီ ၀န်ထမ်း သုံးဦးအပေါ် ထောင်ဒဏ်နှစ်နှစ်ကနေ ခြောက်နှစ်အထိ သောကြာနေ့က အသီးသီးချမှတ်ခဲ့တာပါ။ အခုလို ထောင်ဒဏ်တွေ ချမှတ်လိုက်တဲ့အပေါ် ပြစ်တင်ဝေဖန်ပြီး သူတို့ကို အမြန်ဆုံး ပြန်လွှတ်ပေးဖို့ မစ္စတာကင်တားနားက တောင်းဆိုပါတယ်။
“ကျနော့်ရဲ့ ထင်မြင်ချက်အရဆိုရင် အဲဒီ ကုလသမဂ္ဂ၀န်ထမ်းတွေအပေါ် စွပ်စွဲချက်တွေဟာ အခြေအမြစ် မရှိပါဘူး။ ဒါက ပထမပြဿနာပါ။ ဒုတိယပြဿနာကတော့ မြန်မာနိုင်ငံမှာ စနစ်ကျတဲ့ တရားစီရင်ရေးမရှိပါဘူး။ အခု အဖမ်းခံရသူ အများအပြားဟာ ရှေ့နေငှားခွင့်မရ၊ အထောက် အထားတွေနဲ့ သက်သေတွေ တင်ပြခွင့်မရဘူးဆိုတာ ကျနော်သိထားပါတယ်။ ဒါ့အပြင် တရား စီရင်ရေးဟာ ဘက်မလိုက်တဲ့ပုံ၊ သီးခြားလွတ်လပ်တဲ့ပုံ မရှိပါဘူး။ ဒီသုံးသပ်ချက်တွေ အကုန်လုံး အရ ပြောမယ် ဆိုရင် သူတို့ကို ထောင်ဒဏ်ချမှတ်လိုက်သည်ပဲဖြစ်ပါစေ၊ အစိုးရအနေနဲ့ သူတို့ အားလုံးကို ချက်ခြင်း ပြန်လွှတ်ပေးသင့်တယ် ဆိုတာ ကျနော့်အတွက်တော့ ရှင်းပါတယ်။”
မစ္စတာကင်တားနားရဲ့အမြင်နဲ့ အလားတူပဲ လူ့အခွင့်အရေးစောင့်ကြည့်လေ့လာရေးအဖွဲ့ (HRW) ရဲ့ အာရှဒေသ စည်းရုံး လှုံ့ဆော်ရေးဆိုင်ရာ ညွှန်ကြားရေးမှူး ဂျွန် ဆစ်စ်တန် (John Siston) ကလည်း မြင်ပါတယ်။
“ဒီအမှုကို စစ်ဆေး စီရင်တဲ့နှုန်းနဲ့ စွပ်စွဲချက်တွေအရဆိုရင် မျှတမှုမရှိဘူးဆိုတာ သေချာပါတယ်။ ဒါဟာဖြင့် မြန်မာအာဏာပိုင်တွေဟာ လူမျိုးစု အချင်းချင်းအကြား ဟန်ချက်ညီမှုရှိအောင် လုပ်ရမယ့် အစား ရိုဟင်ဂျာတွေကို ပစ်မှတ်ထားနေတယ်ဆိုတဲ့ နောက်ထပ် ဥပမာ တခုဖြစ်ပါတယ်။”
မစ္စတာကင်တားနားဟာ ပြီးခဲ့တဲ့ ဇူလိုင်လကုန်ပိုင်းက မြန်မာနိုင်ငံလာပြီး ရခိုင်ပြည်နယ်ဘက် သွားရောက်ခဲ့သလို ဖမ်းဆီးခံ ထားရတဲ့ ကုလသမဂ္ဂနဲ့ INGO တွေက ၀န်ထမ်းတွေနဲ့လည်း တွေ့ဆုံခဲ့ ပါသေးတယ်။ အဲဒီခရီးစဉ်အဆုံးသတ်မှာ ဖမ်းဆီးထား သူတွေကို ပြန်လွှတ်ပေးဖို့နဲ့ သီးခြား လွတ်လပ် တဲ့ နိုင်ငံတကာ စုံစမ်းစစ်ဆေးရေးကော်မရှင်တရပ် ဖွဲ့စည်းဖို့ တိုက်တွန်းခဲ့ပါတယ်။
အခု သုံးယောက်ကို စီရင်ချက်မချခင်မှာ ဖမ်းထားသူတွေထဲက အများစုကို မြန်မာ အာဏာပိုင်တွေ က ပြန်လွှတ်ပေးခဲ့ပါတယ်။ မစ္စတာကင်တားနား တိုက်တွန်းခဲ့သလို နိုင်ငံတကာကော်မရှင်တရပ် ဖွဲ့စည်းရေးဆိုတာကိုတော့ ပယ်ချပြီး ပြည်တွင်းက ထင်ရှားသူတွေပါဝင်တဲ့ ကော်မရှင်တရပ်ကို ဖွဲ့စည်းထားပါတယ်။
HRW အဖွဲ့ရဲ့ ဂျွန် ဆစ်စ်တန်က အဲဒီကော်မရှင်အတွက် အကြံပြုချက်တချို့ကို ပြောခဲ့ပါတယ်။
“သူတို့ ပထမဆုံး လုပ်သင့်တာကတော့ အဖြစ်အပျက်ရဲ့ တကယ့်အခြေခံအကြောင်းကို သိနိုင်မယ့် ဘက်မလိုက်တဲ့ အချက်အလက် စူးစမ်း ရှာဖွေရေးလုပ်ငန်းတွေ လုပ်ဖို့ပါပဲ။ ဖြစ်သွားတဲ့အပေါ် ငြင်း ခုံပြောဆိုနေတာက အချိန်တွေ အလဟဿ ဖြစ်စေပါတယ်။ ရုန်းရင်းဆန်ခတ်တွေ အကြီး အကျယ်ဖြစ်ခဲ့တယ်ဆိုတာကို အသိအမှတ်ပြုပြီး ဘယ်လိုဖြစ်ရတယ်၊ ဘယ်သူတွေမှာ တာဝန်ရှိ တယ်ဆိုတာကို စုံစမ်း စစ်ဆေးဖို့လိုပါတယ်။ အဲဒီနောက်မှာ ဘယ်လိုရှေ့ဆက်သွားကြမယ်၊ အနာဂတ်မှာ ပဋိပက္ခတွေ လျော့နည်းစေပြီး လူမျိုးစုတွေကြား ဘယ်လို ဟန်ချက်ညီနေထိုင်ကြမယ် ဆိုတာကို ရှာဖွေဖို့ ဖြစ်ပါတယ်။”
HRW အဖွဲ့က ဂျွန် ဆစ်စ်တန်ပါ။
ရခိုင်ပြည်နယ်မှာဖြစ်ခဲ့တဲ့ လူမျိုးစုအချင်းချင်းကြား ရုန်းရင်းဆန်ခတ်မှုတွေအပေါ် မြန်မာတာဝန်ရှိ သူတွေသာမက လူထု ကိုယ်တိုင်ရဲ့အမြင်နဲ့ နိုင်ငံတကာက မြင်ကြတာတွေဟာ အတော်လေး ကွဲပြားနေပါတယ်။ ကုလသမဂ္ဂနဲ့ HRW အဖွဲ့တို့ဟာ မြန်မာနိုင်ငံက လူ့အခွင့်အရေးချိုးဖောက်မှုတွေ ကို တောက်လျှောက် စောင့်ကြည့်လေ့လာပြီး အစီရင်ခံစာတွေ ထုတ်ပြန်ခဲ့သလို နိုင်ငံရေး အကျဉ်းသားတွေ လွတ်မြောက်ဖို့၊ လူ့အခွင့်အရေးချိုးဖောက်မှုတွေ ရပ်ဆိုင်းဖို့ တိုက်တွန်း တောင်းဆို ခဲ့တဲ့ အဖွဲ့တွေ လည်း ဖြစ်ပါတယ်။
အခု ရခိုင်ပြည်ပဋိပက္ခမှာတော့ ကုလသမဂ္ဂအပါအ၀င် နိုင်ငံတကာ လူ့အခွင့်အရေးအဖွဲ့တွေကို သာမက သတင်းမီဒီယာတွေကို လည်း ဝေဖန် ပြစ်တင်တာတွေ ရှိလာခဲ့ပါတယ်ခင်ဗျား။
LWIN PWIN
NLABR
Web-site: www.nlabr.com
Subscribe to:
Post Comments (Atom)
0 comments:
Post a Comment