အီလက်ထရွန်နစ် ဥပဒေနဲ့ နှစ်ရှည်ထောင်ဒဏ်ချမှတ်ခံခဲ့ပြီး မကြာခင်ကမှ အကျဉ်းထောင်ကနေ လွတ်မြောက် လာခဲ့တဲ့ ဟာသသရုပ်ဆောင် လူရွှင်တော်ကိုဇာဂနာက သူ့ရဲ့ ဘလော့ဂ်ကို ဆက်လုပ်သွားမယ်လို့ ပြောလိုက် ပါတယ်။ လူရွှင်တော် ဇာဂနာ ခေါ် ကိုသူရဟာ ပြီးခဲ့တဲ့ အောက်တိုဘာ ၁၂ ရက်နေ့ကမှ သမ္မတဦးသိန်းစိန်ရဲ့ လွတ်ငြိမ်းချမ်းသာခွင့် အမိန့် နဲ့ မြစ်ကြီးနား အကျဉ်းထောင်ကနေ လွတ်မြောက်လာခဲ့တာ ဖြစ်ပါတယ်။ ၂၀၀၈ ခုနှစ် နာဂစ်မုန်တိုင်းအတွင်း သတင်းအချက်အလက်တွေကို ဖြန့်ဝေခဲ့တဲ့အတွက် အာဏာပိုင်တွေက သူ့ကို အီလက်ထရွန်နစ် ဥပဒေပုဒ်မတွေနဲ့ ထောင်ဒဏ် ၃၅ နှစ်ချမှတ်ခဲ့တာပါ။ အဲဒီလို အီလက်ထရွန်နစ် ဥပဒေတွေနဲ့ သူ့ကို နှစ်ရှည်ထောင်ဒဏ်တွေချမှတ်ခဲ့ပေမဲ့လည်း နိုင်ငံရေးအကျဉ်းသား လွတ်မြောက်ရေးကိစ္စ အပါအ၀င် တခြားလုပ်စရာ ရှိတာတွေကို ဆက်လက် လုပ်ဆောင်သွာမယ်လို့ RSF လို့ခေါ်တဲ့ ပြင်သစ် အခြေစိုက် နယ်စည်းမခြား သတင်းသမားများသမဂ္ဂ အဖွဲ့နဲ့ အင်တာဗျူးမှာ ကိုဇာဂနာကို ပြောပါတယ်။ မြန်မာအစိုးရ သမ္မတ ဦးသိန်းစိန်ရဲ့ လွတ်ငြိမ်းချမ်းသာခွင့်အမိန့်နဲ့ မြန်မာနိုင်ငံ အကျဉ်းထောင် အသီးသီးမှာ ရှိနေတဲ့ အကျဉ်းသား ၆,၀၀၀ ကျော်ကို ပြီးခဲ့တဲ့ အောက်တိုဘာလ ၁၂ ရက်နေ့က လွှတ်ပေးခဲ့ပေမဲ့ ကိုဇာဂနာ နဲ့အတူ လွတ်မြောက်လာခဲ့တဲ့ နိုင်ငံရေးအကျဉ်းသား ၂၀၀ ကျော်ပဲ ပါဝင်ခဲ့ပါတယ်။ လွတ်မြောက်လာသူတွေ ထဲမှာ ကိုမင်းကိုနိုင်၊ ကိုကိုကြီး၊ ကိုဌေးကြွယ်တို့လို ၈၈ မျိုးဆက် ကျောင်းသားခေါင်းဆောင်တွေ၊ ရွှေဝါရောင် တော်လှန်ရေးအတွင်း အဖမ်းခံခဲ့ရတဲ့ သံဃာတော်တွေ မပါဝင်သလို စာရေးဆရာ ဇော်သက်ထွေး၊ ဘလော့ဂါနေဖုန်းလတ် စတဲ့သူတွေလည်း အခုချိန်ထိ လွတ်မြောက်လာခြင်း မရှိသေးတဲ့အတွက် အဲဒီလူတွေ လွတ်မြောက်လာဖို့အတွက် ဆက်လက် ကြိုးပမ်းလုပ်ဆောင်သွားမယ်လို့ ကိုဇာဂနာက ပြောပါတယ်။
Lwin Pwin
Subscribe to:
Post Comments (Atom)
0 comments:
Post a Comment