ကမ္ဘာ့သတင်းများ 28/03/2012
နိုင်ငံတကာသတင်း
ဆီးရီးယားလုပ်ရပ် နိုင်ငံတကာစောင့်ကြည့်
ဆီးရီးယားနိုင်ငံက အစိုးရတပ်တွေနဲ့ သူပုန်တပ်ဖွဲ့တွေကြား လက်ဘနွမ်နယ်စပ်နားမှာ တိုက်ပွဲတွေ ဆက်လက် ဖြစ်ပွားနေတာနဲ့အမျှ အပစ်အခတ် ရပ်စဲဖို့ အပါအဝင် နိုင်ငံတကာ သံတမန် Kofi Annan ရဲ့ ငြိမ်းချမ်းရေး အဆိုပြုချက်ကို အစိုးရက လက်ခံကြောင်း ပြောဆိုထားတဲ့အပေါ် အနောက်နိုင်ငံ သံတမန်တွေနဲ့ ဆီးရီးယား အတိုက်အခံခေါင်းဆောင်တွေထံက ဝေဖန်သံတွေ ထွက်ပေါ်လာပါတယ်။
အတိုက်အခံ အင်အားစုတွေကတော့ ငြိမ်းချမ်းရေး အစီအစဉ်ကို လက်ခံလိုက်တဲ့ ရည်ရွယ်ချက်ဟာ အုံကြွမှုတွေကို စစ်တပ်က ချေမှုန်းနိုင်အောင် အချိန်ဆွဲတဲ့ လုပ်ရပ်သာ ဖြစ်တယ်လို့ စွပ်စွဲခဲ့ကြတာပါ။ အမေရိကန် ပြည်ထောင်စုကတော့ ဆီးရီးယား သမ္မတ Bashar al-Assad အနေနဲ့ ကတိတွေ ပေးသလောက် အကောင်အထည်မဖော်တဲ့ အစဉ်အလာတွေ ရှိခဲ့ဖူးတာမို့ ငြိမ်းချမ်းရေး အစီအစဉ်ကို သဘောတူလိုက်တဲ့အပေါ် ရိုးသားမှု ရှိမရှိ လုပ်ရပ်တွေနဲ့ ဆုံးဖြတ်သွားမှာ ဖြစ်တယ်လို့ ပြောလိုက်ပါတယ်။ ဆီးရီးယား သမ္မတရဲ့ ကတိပေး ပြောဆိုချက်တွေအတိုင်း လက်တွေ့ လုပ်ရပ်တွေနဲ့ ပြသရလိမ့်မယ်လို့ အမေရိကန် နိုင်ငံခြားရေးဝန်ကြီး ဟီလာရီ ကလင်တန်က ပြောလိုက်တာပါ။
လူနေထူထပ်တဲ့ အရပ်ဒေသတွေမှာ စစ်တပ်က ပစ်ခတ်နေတာတွေ ရပ်တန့်ဖို့နဲ့ တပ်တွေကို ပြန်လည် ရုပ်သိမ်းဖို့လည်း ဆီးရီးယားသမ္မတကို တောင်းဆိုသွားပါတယ်။ တချိန်တည်းမှာပဲ ဆီးရီးယားနိုင်ငံ အနောက်မြောက်ပိုင်းက Idlib ပြည်နယ်၊ ဒမတ်စကတ်မြို့တော် ဆင်ခြေဖုံးနဲ့ အလယ်ပိုင်း Homs မြို့တွေ အပါအဝင် နိုင်ငံတဝှမ်းမှာ အစိုးရတပ်တွေက အရပ်သားတွေကို ပစ်ခတ်တာတွေ၊ သူပုန်တွေကို နှိမ်နင်းတာတွေ လုပ်ရာက လူ ၁ဝ ဦးထက်မနည်း သေဆုံးခဲ့ရကြောင်း ဗြိတိန်နိုင်ငံ အခြေစိုက် ဆီးရီးယား လူ့အခွင့်အရေး စောင့်ကြည့် အကဲခတ်နေတဲ့အဖွဲ့က ပြောလိုက်ပါတယ်။
ကုလကိုယ်စားလှယ်အဖွဲ့ ရွေးကောက်ပွဲစောင့်ကြည့်ဖို့ စေလွှတ်မည်
မြန်မာနိုင်ငံမှာ ရှေ့တပတ်ထဲ ကျင်းပမယ့် လွှတ်တော် ကြားဖြတ်ရွေးကောက်ပွဲကို စောင့်ကြည့် အကဲခတ်ဖို့အတွက် ကိုယ်စားလှယ် အဖွဲ့တခု စေလွှတ်မယ်လို့ ကုလသမဂ္ဂက ပြောလိုက်ပါတယ်။ ကုလသမဂ္ဂရုံးချုပ်ရှိရာ နယူးယောက်က ကိုယ်စားလှယ် အဖွဲ့တဖွဲ့ကို စေလွှတ်မှာဖြစ်ပြီး လေ့လာတွေ့ရှိချက်တွေကိုတော့ ခရီးစဉ်အပြီး အတွင်းရေးမှူးချုပ် ဘန်ကီမွန်းထံ အစီရင်ခံသွားမှာ ဖြစ်တယ်လို့လည်း Inner City Press သတင်းဌာနကို အတွင်းရေးမှူးချုပ်ရုံး တာဝန်ရှိသူတွေက အင်္ဂါနေ့မှာ ပြောလိုက်တာပါ။
မြန်မာအစိုးရကတော့ ကြားဖြတ်ရွေးကောက်ပွဲတွေကို စောင့်ကြည့် အကဲခတ်ဖို့ အမေရိကန် ပြည်ထောင်စု၊ ဥရောပသမဂ္ဂနဲ့ အရှေ့တောင်အာရှ နိုင်ငံများအသင်း (Asean) တို့လို နိုင်ငံတကာ အသိုင်းအဝိုင်းက ကိုယ်စားလှယ်တွေကို လက်ခံမယ်လို့ ပြီးခဲ့တဲ့ သီတင်းပတ်ထဲမှာပဲ ကြေညာထားတာ ဖြစ်ပါတယ်။
ဥပဒေပြု အမတ်တွေနဲ့ သတင်းသမားတွေပါ ပါဝင်မယ့် အကဲခတ်အဖွဲ့တွေကို လက်ခံသွားမယ်လို့ ပြောဆိုခဲ့တာပါ။ ဧပြီလ ၁ ရက်နေ့ ကျင်းပမယ့် ကြားဖြတ် ရွေးကောက်ပွဲတွေဟာ မြန်မာအစိုးရရဲ့ ပြုပြင်ပြောင်းလဲရေး လုပ်ဆောင်မယ်လို့ ကတိပေးထားတာတွေကို စမ်းသပ်ချက် တခုဖြစ်မယ်လို့ ကုလသမဂ္ဂ အပါအဝင် နိုင်ငံတကာ အသိုင်းအဝိုင်းက သတိပေးထားတာ ဖြစ်ပါတယ်။
ပြီးခဲ့တဲ့နှစ် မတ်လထဲမှာ တက်လာတဲ့ အစိုးရသစ် ကတော့ ရွေးကောက်ပွဲတွေဟာ လွတ်လပ် မျှတမှု ရှိမှာ ဖြစ်တယ်လို့ ပြောဆိုထားတာပါ။ ဒါပေမဲ့လည်း အဓိက နိုင်ငံရေး ပါတီတခုဖြစ်တဲ့ အမျိုးသား ဒီမိုကရေစီ အဖွဲ့ချုပ် (NLD) အပါအဝင် ဒီမိုကရေစီ လိုလားတဲ့ နိုင်ငံရေး အင်အားစုတွေကတော့ ရွေးကောက်ပွဲအတွက် မဲစာရင်းတွေမှာ မမှန်မကန် ထည့်သွင်းထားတာတွေ၊ ရွေးကောက်ပွဲအကြို မဲဆွယ် စည်းရုံးလှုပ်ရှားမှုတွေမှာ မမျှတတာတွေလို လုပ်ရပ်မျိုးတွေ ရှိနေတယ်ဆိုပြီး ထောက်ပြ ဝေဖန်နေကြတာလည်း ဖြစ်ပါတယ်။
ရွေးကောက်ပွဲတွေအပြီး ဧပြီလ နှောင်းပိုင်းမှာတော့ ကုလသမဂ္ဂ အတွင်းရေးမှူးချုပ် ဘန်ကီမွန်း ကိုယ်တိုင်လည်း မြန်မာနိုင်ငံကို သွားရောက်ဖို့ စီစဉ်ထားတာ ဖြစ်ပါတယ်။
ဗီယက်နမ်က ခရစ်ယာန်ဘုန်းတော်ကြီး ထောင် ၁၁ နှစ်ကျ
ဗီယက်နမ်နိုင်ငံမှာ အမျိုးသားစည်းလုံးညီညွတ်မှုကို နှောင့်ယှက်ခဲ့တယ်ဆိုတဲ့ စွပ်စွဲချက်နဲ့ Mennonite ခရစ်ယာန်ဘုရားကျောင်း၊ တရားဟောဆရာတယောက်ကို ဗီယက်နမ်တရားရုံးက ထောင်ဒဏ် ၁၁ နှစ် ပြစ်ဒဏ်ချမှတ်လိုက်ပါတယ်။
ဗီယက်နမ် အစိုးရကို စော်ကားပြီး ပြည်တွင်းရေး အခြေအနေတွေ ပျက်ပြားအောင် နှောင့်ယှက် မှုတွေလုပ်တဲ့ စာပေတွေ ရေးသားဖြန့်ချိခဲ့တဲ့အတွက် Nguyen Cong Chinh ဟာ အပြစ်ရှိတယ်လို့ အစိုးရ သတင်းမီဒီယာတွေက အင်္ဂါနေ့မှာ ရေးသားဖော်ပြခဲ့ကြပါတယ်။ အစိုးရဆန့်ကျင်တဲ့ အုပ်စုတွေနဲ့ ပတ်သက်ဆက်နွယ်မှုရှိတယ်လို့လည်း အစိုးရသတင်းမီဒီယာက သူ့ကို စွပ်စွဲပြောဆိုခဲ့ ပါတယ်။
အထူးသဖြင့်တော့ Chinh ဟာ ဗီယက်နမ်နိုင်ငံမှာ ဘာသာရေးလွပ်လပ်ခွင့်မရှိဘဲ လူနည်းစု ဘာသာခြားတွေ အပေါ် တရားမဲ့ ဖိနှိပ်မှုတွေ လုပ်နေတယ်လို့ ပြည်ပအဖွဲ့အစည်းတွေကို တင်ပြ တိုင်ကြားခဲ့တယ်ဆိုပြီး စွပ်စွဲ အပြစ်ပေးခံရတယ်လို့ ဆိုပါတယ်။ အသက် ၄၃ နှစ်အရွယ် တရားဟောဆရာ Chinh ဟာ အလယ်ပိုင်းပြည်နယ် Gia Lai မှာ မနှစ်ကဖမ်းဆီးခံခဲ့ရတာ ဖြစ်ပါတယ်။ တနင်္လာနေ့ကတော့ တရက်တည်း တရားရုံးစစ်ဆေးမှု လုပ်ပြီး သူ့ကို ပြစ်ဒဏ် ချမှတ်ခဲ့တာပါ။
ဒီဖြစ်ရပ်ဟာ ဗီယက်နမ်နိုင်ငံအနေနဲ့ ဘာသာရေးလွပ်လပ်ခွင့်ကို မလေးစားကြောင်း သက်သေ ပြလိုက်တဲ့ နောက်ထပ်ဖြစ်ရပ်တခုပါပဲလို့ အမေရိကန်အခြေစိုက် Human Rights Watch အဖွဲ့က ပြောဆိုပါတယ်။
ဒေါ်အောင်ဆန်းစုကြည်အတွက် ဒလိုင်းလားမား ဆုတောင်းမေတ္တာပို့
ဒေါ်အောင်ဆန်းစုကြည်ရဲ့ ကျန်းမာရေး အမြန်ဆုံး ကောင်းမွန်စေဖို့ ငြိမ်းချမ်းရေး နိုဘယ်လ်ဆုရှင် တိဗက်ဘုန်းတော်ကြီး ဒလိုင်းလားမားက မနေ့က ဆုတောင်းမေတ္တာပို့တဲ့စာ ပေးပို့လိုက်ပါတယ်။ဒေါ်အောင်ဆန်းစုကြည်ဟာ ပြီးခဲ့တဲ့ ရက်ပိုင်းအတွင်းက မြိတ်ခရီးစဉ်အတွင်း ပင်ပန်းလွန်းတာကြောင့် ခရီးစဉ်တွေ ဖျက်သိမ်းရတယ်လို့ ကြားသိရတဲ့အတွက် အိန္ဒိယနိုင်ငံ ‘ဒါရမ်ဆာလာ’ ဒေသမှာ သီတင်းသုံးနေတဲ့ တိဗက်ဘုန်းတော်ကြီးက ဆုတောင်းမေတ္တာ ပေးပို့ခဲ့တာပါ။ဘုန်းတော်ကြီး ဒလိုင်းလားမားရဲ့ စာမှာ ဒေါ်အောင်ဆန်းစုကြည် ကျန်းမာရေး ကောင်းမွန်ဖို့ဟာ မြန်မာပြည်သူ ပြည်သားတွေအတွက်သာမက လွတ်လပ်မှုကို မြတ်နိုးတဲ့ တစ်ကမ္ဘာလုံးက ပြည်သူတွေအတွက် အထူးအရေးကြီးကြောင်း ဖော်ပြထားပါတယ်။တိဗက်ဘုန်းတော်ကြီး ဒလိုင်းလားမားဟာ ၁၉၈၉ ခုနှစ်အတွက် ငြိမ်းချမ်းရေး နိုဘယ်လ်ဆုရှင်ဖြစ်ပြီး ဒေါ်အောင်ဆန်းစုကြည်က ၁၉၉၁ ခုနှစ်မှာ ငြိမ်းချမ်းရေး နိုဘယ်လ်ဆု ရရှိခဲ့တာ ဖြစ်ပါတယ်။
နျူကလီးယားအကြမ်းဖက်မှု ဟန့်တားဖို့ ကမ္ဘာ့ခေါင်းဆောင်တွေ ကြိုးပမ်း
နိုင်ငံပေါင်း ၅၀ ကျော်ကခေါင်းဆောင်တွေက ကမ္ဘာကြီးမှာ အစုလိုက် အပုံလိုက် သိုလှောင်ထားတဲ့ Nuclear လက်နက်ကြီးတွေ လျှော့ချရေးအတွက် သူတို့တာဝန်ယူမှုကို ထပ်လောင်းအာမခံ လိုက်ကြပါ တယ်။ တောင်ကိုရီးယားနိုင်ငံ ဆိုးလ်မြို့မှာကျင်းပနေတဲ့ နှစ် ရက်ကြာ Nuclear လုံခြုံမှုဆိုင်ရာ ထိပ်သီးညီလာခံမှာ သမ္မတ အိုဘားမားက Nuclear လက်နက်ကြီးတွေ လျှော့ချရေးအတွက် နိုင်ငံတကာ အသိုင်းအ၀ိုင်းအနေနဲ့ အရှည်သဖြင့်အလေးအနက်ထားမဖြစ်မနေကြိုးပမ်းကြရပါလိမ့်မယ်လို့အင်္ဂါနေ့မှာတိုက်တွန်းပြောဆိုလိုက်တာပါ
၂၀၁၀ ပြည့်နှစ်တုံးက ၀ါရှင်တန်မှာ အမေရိကန်က အိမ်ရှင်အဖြစ် ကမကထ ပြု ကျင်းပခဲ့တဲ့ ပထမအကြိမ် Nuclear လုံခြုံမှုဆိုင်ရာ ထိပ်သီးညီလာခံအပြီး အခုကျင်းပတဲ့ ညီလာခံမှာ ပါဝင် တက်ရောက်တဲ့ နိုင်ငံ ၅၀ ကျော် တိုးလာတာ တွေ့ရ တယ်လို့ သမ္မတအိုဘားမားကပြောပါတယ်။
နိုင်ငံတကာ အသိုင်းအ၀ိုင်းအနေနဲ့ Nuclear စွမ်းအင်ကို စိတ်ချလုံခြုံမှုနဲ့အတူ ထိရောက်စွာ အရပ်သုံးအတွက် ထုတ်လုပ်ခွင့်ရရေးကို ဦးတည်ပြီးတော့ ဒီညီလာခံကြီးကနေ Nuclear အရေး ကြီးမားကျယ်ပြန့်တဲ့ ကမ္ဘာ့ဗိသုကာအဖြစ် ရပ်တည်နိုင်ရေးဆိုတဲ့ ရလဒ်ကို ဆောင်ကျဉ်းပေးမှာဖြစ်တယ်လို့လည်း ဆိုပါတယ်။ ဒါပေမဲ့ ဒီ ညီလာခံကြီးအပြီး ကြေညာချက်ထဲမှာတော့ ဒီရည်ရွယ်ချက် မည်မည်ရရ အထမြောက်တာ မတွေ့ရဘူးလို့ Australia သုတေသီ Martine Letts က Nuclear လုံခြုံမှုအတွက် အရေးပါတဲ့ အစိတ်အပိုင်းတခုအဖြစ်နဲ့သာ ဒီညီလာခံက ပံ့ပိုးပေးနိုင်တယ်လို့ သူက သုံးသပ် ပါတယ်။
မကြာခင်က မြောက်ကိုရီးယားကနေ Nuclear လက်နက်တင်ဆောင်နိုင်တဲ့ ဂြိုလ်တုတလုံး ရှေ့လမှာ လွှတ်တင်မယ်လို့ ကြေညာခဲ့တဲ့ ကိစ္စကတော့ ဒီထိပ်သီးညီလာခံကို အရိပ်ပမာ စိုးမိုးနေခဲ့တာဖြစ်ပါတယ်။ မြောက်ကိုရီးယားက သုတေသန ဂြိုလ်တုလို့ ပြောပေမဲ့ အနောက်နိုင်ငံတွေကတော့ ဒီဂြိုလ်တုလွှတ်တင်ရာမှာ တာဝေးပစ် ပဲ့ထိန်း ဒုံးလက်နက်ကို ထည့်သွင်း စမ်းသပ်တာဖြစ်မယ်လို့ ယူဆနေကြတာ ဖြစ်ပါတယ်။
Web-site: www.nlabr.com
Subscribe to:
Post Comments (Atom)
0 comments:
Post a Comment