မြန်မာသတင်းများ ဧပြီလ ၂၁ ရက် ၂၀၁၂ ခုနှစ်


NLD အမတ်များ လွှတ်တော်တက်ရန် မသေချာသေး

အမျိုးသားဒီမိုကရေစီ အဖွဲ့ချုပ် (NLD) က တောင်းဆိုထားသည့် ဖွဲ့စည်းပုံအခြေခံဥပဒေကို ထိန်းသိမ်းကာကွယ် စောင့်ရှောက်ပါမည်ဆိုသော ကျမ်းကျိန် စကားလုံးအစား လေးစားလိုက်နာပါမည်ဆိုသော စကားလုံးပြောင်းလဲပေးရန် မဖြစ်နိုင်ကြောင်း နိုင်ငံတော်ဖွဲ့စည်းပုံ အခြေခံဥပဒေဆိုင်ရာ ခုံရုံးက ပြောဆိုလိုက်ကြောင်း၊ ထို့ကြောင့် ယင်းကိစ္စ ပြေလည်အောင် ဖြေရှင်းမည်ဖြစ်၍ လာမည့် ၂၃ ရက်နေ့တွင် ပြန်လည်စတင်မည့် လွှတ်တော်အစည်းအဝေးသို့ NLD လွှတ်တော်အမတ်များ မတက်ရောက်ရန် ရာခိုင်နှုန်းများနေကြောင်း NLD ပြောခွင့်ရပုဂ္ဂိုလ် ဦးဉာဏ်ဝင်းက မီဒီယာများသို့ ယနေ့တွင် ပြောဆိုလိုက်သည်။

ရှေ့တပတ် လွှတ်တော်အစည်းအဝေး NLD မတက်သေး


နိုင်ငံတော် ဖွဲ့စည်းပုံ အခြေခံဥပဒေ ခုံရုံးက ကျမ်းကျိန်လွှာတွင် စကား အသုံးအနှုန်း ပြင်ဆင်ပေးရန် အခြေအနေ မရှိသေးဟု ဆိုသဖြင့် အမျိုးသား ဒီမိုကရေစီ အဖွဲ့ချုပ် (NLD) အမတ်များအနေဖြင့် ဧပြီ ၂၃ ရက်နေ့တွင် ကျင်းပမည့် လွှတ်တော် အစည်းအဝေး များသို့ မတက်ရောက်ရန် ရာခိုင်နှုန်း များနေကြောင်း သိရှိရသည်။

NLD လွှတ်တော် မတက်ခြင်းအပေါ် အမြင်မတူ

အမျိုးသား ဒီမိုကရေစီ အဖွဲ့ချုပ်(NLD)ပါတီ ကိုယ်စားလှယ်များ လာမည့် ၂၃ ရက်နေ့တွင် ကျင်းပမည့် လွှတ်တော် အစည်း အဝေးများသို့ မတက်ရောက်ခြင်း အပေါ် အမြင်အမျိုးမျိုးကွဲနေသည်။
လွှတ်တော်ကိုယ်စားလှယ်တိုင်း ကျမ်းသစ္စာ ကျိန်ဆိုရာတွင် “အခြေခံဥပဒေကို ထိန်းသိမ်းကာကွယ် စောင့်ရှောက် ပါမည်” ဆိုသည့် စကားရပ်နေရာတွင်“အခြေခံဥပဒေကို လေးစားလိုက်နာပါမည်”ဆိုသော စကားရပ်နှင့် အစားထိုး ပြင်ဆင်ပေးရန် NLD က တင်ပြခြင်းကို နိုင်ငံတော် ဖွဲ့စည်းပုံအခြေခံဥပဒေ ဆိုင်ရာ ခုံရုံးက ပြင်ဆင်စရာမလိုကြောင်း အကြောင်းပြန်ခဲ့သည်။
ထို့ကြောင့် NLD ကိုယ်စားလှယ်များ လာမည့် ၂၃ ရက် လွှတ်တော်အစည်းအဝေးသို့ တက်ရောက်နိုင်ခြေမရှိသေးကြောင်း NLD ပြောခွင့်ရ ဦးဉာဏ်ဝင်းက ယနေ့ ပြောဆိုလိုက်သည့်အပေါ် တုံ့ပြန်ကြခြင်းဖြစ်သည်။
ယင်းသို့ NLD က လွှတ်တော် မတက်နိုင်သေးခြင်းနှင့်ပတ်သက်ပြီး ယခုပြဿနာသည် စကားလုံး အသုံးအနှုန်း ပြဿနာ သို့မဟုတ် အခြေခံ ဥပဒေဆိုင်ရာပြဿနာလော ဆိုသည်ကို NLD ဥပဒေ ပညာရှင်များအနေဖြင့် သဲကွဲစွာသိရန် လိုကြောင်း သင်္ဃန်းကျွန်းမြို့နယ် ပြည်သူ့လွှတ်တော် ကိုယ်စားလှယ်နှင့် အမျိုးသား ဒီမိုကရေစီ ပါတီသစ် ခေါင်းဆောင် ရှေ့နေ ဦးသိန်းညွှန့်က
“ဒါဟာ အခြေခံ ဥပဒေပြဿနာဆိုရင် အခြေခံဥပဒေမှာ ပြင်ဆင်ခြင်းကို တားမြစ်ထားခြင်း မရှိဘူး။ တကယ်ဆိုရင် ဖွဲ့စည်းပုံ အခြေခံ ဥပဒေ ပြင်ဆင်ခြင်းကို အခန်း ၁၂ နှင့် အညီ ဆောင်ရွက်ပေါ့”ဟုလည်း သူက ပြောသည်။
အမျိုးသား ဒီမိုကရေစီအင်အားစု(NDF) ပါတီ ခေါင်းဆောင် တဦးဖြစ်သည့် ဦးခင်မောင်ဆွေကလည်း လွှတ်တော်တွင်းမှာရှိသော ဒီမိုကရက်တစ် နိုင်ငံရေးပါတီများက ဖွဲ့စည်းပုံ အခြေခံဥပဒေ ပြင်ဆင်ရေးအတွက် NLD ကိုယ်စား လှယ်များနှင့် အတူ လက်တွဲ လုပ်ဆောင်ရန်စောင့်မျှော်နေချိန် ဖြစ်ကြောင်း
“ကျနော့် အမြင်ကတော့ NLD ဟာ ပြည်သူလူထုထောက်ခံမှု အများဆုံးနဲ့ နိုင်သွားတဲ့ ပါတီဖြစ်တယ်။ ပြည်သူလူထုကို လေး စားတဲ့ အနေနဲ့ လွှတ်တော်ထဲကို ရောက်အောင်သွားရမယ်။ ဘယ်ပါတီမဆို ပြည်သူ့ဆန္ဒကို ခံယူပြီးတဲ့အခါ ဟိုအကြောင်း ကြောင့်၊ ဒီအကြောင်းကြောင့် မသွားနိုင်ဘူး ပြောတာဟာ ပြည်သူ့အပေါ်မှာ လေးစားရာ မရောက်ပါဘူး”ဟု ဆိုသည်။ သို့သော် NLD သည် အခွင့်အလမ်းလည်းရှိနေပြီဖြစ်၍ လွှတ်တော်တွင်းသို့ သွားမည်ဟုလည်း ယုံကြည်ကြောင်း ဦးခင်မောင်ဆွေ က ဖြည့်စွက်ပြောဆိုသည်။
အစိုးရ ပြန်ကြားရေးဝန်ကြီးဌာန ညွှန်ကြားရေးမှူးချုပ် ဦးရဲထွဋ်ကလည်း သူ၏ အင်တာနက် စာမျက်နှာတွင် ယခု အငြင်းပွားနေ မှုနှင့်ပတ်သက်ပြီး ဗြိတိန် လုပ်ထုံးလုပ်နည်းနှင့် အမေရိကန် ပြည်ထောင်စု ဖွဲ့စည်းပုံ အခြေခံ ဥပဒေတို့နှင့်နှိုင်းယှဉ်၍ ရေးသား တင်ပြထားသည်။
“မြန်မာနိုင်ငံ၏ ဖွဲ့စည်းပုံအခြေခံ ဥပဒေ အခန်း ၁၂ တွင်လည်း အခြေခံ ဥပဒေ ပြင်ဆင်ရမည့် နည်းလမ်းများကို ပြဌာန်းထားပြီး ဖြစ်သည့်အပြင် နိုင်ငံတော် သမ္မတ ကိုယ်တိုင်ကလည်း အခြေခံ ဥပဒေကို လိုအပ်ပါက ပြင်ဆင်နိုင်ရေးအတွက် လွတ်တော်တွင်း ဆွေးနွေးကြရန် မိန့်ခွန်းတွင်ထည့်သွင်းပြောကြားထားပြီးဖြစ်သည်”ဟု ဦးရဲထွဋ်က ရေးထားသည်။
အမည်မဖော်လိုသူ ပြည်သူ့လွှတ်တော် ကိုယ်စားလှယ် တဦးကလည်း NLD ၏ ရွေးကောက်ပွဲ ၀င်ရခြင်း အဓိက အချက်များသည် တရားဥပဒေစိုးမိုးရေး၊ ဖွဲ့စည်းပုံအခြေခံ ဥပဒေ ပြင်ဆင်ရေး၊ ပြည်တွင်းငြိမ်းချမ်းရေး တို့လုပ်ဆောင်မည်ဟု ဆိုထားသည့် အတိုင်း ဖွဲ့စည်းပုံအခြေခံ ဥပဒေ ပြင်ဆင်ရန် လွှတ်တော်တံခါးဝကို ရောက်နေချိန်ဖြစ်ကြောင်း ပြောသည်။
လွှတ်တော်ကိုယ်စားလှယ်များ ကျမ်းသစ္စာကျိန်ဆိုခြင်းဆိုင်ရာ စကားရပ်နှင့် ပါတီ မှတ်ပုံတင်ခြင်း ဆိုင်ရာ အခြေခံဥပဒေနှင့် ပတ်သက်၍ စကားရပ်တို့သည် လိုက်လျောညီထွေမှု မရှိဘဲ အငြင်းပွားဖွယ်အဖြစ် တွေ့ရ ကြောင်း၊ ရွေးကောက်ပွဲ မကျင်းပမီ ကတည်းက တပြေးညီ လိုက်လျောညီထွေမှု ရှိစေရန် အကြေအလည် ပြတ်ပြတ်သားသား ဆွေးနွေးပြီးမှ ရွေးကောက်ပွဲ ၀င် သင့်ကြောင်း သူက ဆက်ပြောသည်။
ဒေါ်အောင်ဆန်းစုကြည်နှင့် သမ္မတ ဦးသိန်းစိန်တို့ ပထမ အကြိမ် နေပြည်တော်တွင် တွေ့ဆုံပြီးနောက် NLD ရွေးကောက်ပွဲ ၀င်နိုင်ရန်နှင့် မှတ်ပုံတင်နိုင်ရေးအတွက် ဦးသိန်းစိန်က အုပ်ချုပ်ရေး လုပ်ပိုင်ခွင့်အရ ပါတီမှတ်ပုံတင်ခြင်း ဆိုင်ရာတွင် အခြေခံ ဥပဒေနှင့်ပတ်သက်၍  “ဖွဲ့စည်းပုံ အခြေခံ ဥပဒေကို လေးစားလိုက်နာပါမည်”ဟု စကားရပ်ကို ပြင်ဆင်ပေးခဲ့သည်။
NLD က ထပ်မံ တင်ပြသည်မှာ လွှတ်တော်ကိုယ်စားလှယ်များ၏ ကျမ်းကျိန်မှု ဆိုင်ရာတွင်လည်း အဆိုပါ စကားရပ်ကို ပြင်ပေး ရန် ဖြစ်သည်။ သို့သော် အခြေခံ ဥပဒေ ခုံရုံးက ပြင်ဆင်ရန် ငြင်းဆိုခဲ့သည်။
စကားရပ်ပြင်ရေးနှင့် ပတ်သက်၍ NLD ပါတီက နိုင်ငံတော် သမ္မတရုံး၊ အမျိုးသား လွှတ်တော်၊ ပြည်သူ့ လွှတ်တော်တို့ နှင့် ဖွဲ့စည်းပုံ အခြေခံ ဥပဒေ ရုံးများသို့ စာဖြင့် ဆက်လက် တင်ပြသွားမည်ဟု NLD က ယနေ့ သတင်းစာရှင်းလင်းပွဲတွင် ဦးဉာဏ်ဝင်းက ပြောသည်။
သို့သော် ယနေ့ သတင်းစာရှင်းလင်းပွဲတွင် ပါတီ ဥက္ကဌ ဒေါ်အောင်ဆန်းစုကြည်က နိုင်ငံရေး အကျပ်အတည်း တခု အသွင်မျိုး ဖြစ်မလာရေး ကြိုးစားလုပ်ဆောင်သွားမည်ဟု သတင်းထောက်များကို ပြောခဲ့သည့်အတွက် NLD ပါတီ ကိုယ်စားလှယ်များ ကျမ်းသစ္စာ ကျိန်ဆိုရေး မကြာမီပြေလည်ဖွယ်ရှိကြောင်းနှင့် လာမည့် သတင်းပတ် စတင်ကျင်းပမည့် လွှတ်တော် အစည်းအဝေးတွင် ယင်းကိစ္စ အပေါ် ဆွေးနွေးဖွယ်ရှိကြောင်း လေ့လာသူများက ဆိုသည်။

ကျမ်းကျိန်ဆိုရမည့် စာသား သဘောတူညီချက် မရသေး

 

ဖွဲ့စည်းပုံအခြေခံ ဥပဒေနဲ့ ပတ်သက်ပြီး လွှတ်တော်မှာ ကျမ်းကျိန်ဆိုရမယ့် စာသားနဲ့ ပတ်သက်လို့ သက်ဆိုင်ရာနဲ့ သဘောတူညီချက် မရသေးတဲ့အတွက် အမျိုးသား ဒီမိုကရေစီအဖွဲ့ချုပ် လွှတ်တော် ကိုယ်စားလှယ်တွေ အနေနဲ့ ဧပြီလ ၂၃ ရက်နေ့မှာ ပြုလုပ်မဲ့ လွှတ်တော်ပုံမှန် အစည်းအဝေးတွေကို တက်ရောက်ဖို့ မသေချာတော့ကြောင်း NLD က ဒီကနေ့ ထုတ်ဖော် ပြောကြားလိုက်ပါတယ်။

နိုင်ငံရေး အကျဉ်းသားအားလုံး လွှတ်ရင် အီးယူ ပိတ်ဆို့မှု လုံးဝ ရုပ်သိမ်းနိုင်မည်

မြန်မာအစိုးရ အနေနဲ့ ကျန်ရှိနေသေးတဲ့ နိုင်ငံရေး အကျဉ်းသားအားလုံး ပြန်လွှတ်ပေးမယ်ဆိုရင် အီးယူအနေနဲ့ မြန်မာအပေါ် ပိတ်ဆို့ အရေးယူမှုတွေကို လွတ်လွတ်ကျွတ်ကျွတ် ရုပ်သိမ်းပေးနိုင်တယ်လို့ ပိုလန် နိုင်ငံခြားရေး ၀န်ကြီးက ပြောလိုက်ပါတယ်။
လာမယ့် ဧပြီလ (၂၃) ရက်နေ့ လူဇင်ဘတ်နိုင်ငံမှာ ကျင်းပမယ့် အီးယူ နိုင်ငံခြားရေးဝန်ကြီးများ ဆွေးနွေးပွဲမှာ မြန်မာအပေါ် ပိတ်ဆို့ အရေးယူမှု အများစုကို တစ်နှစ်တိတိ ယာယီ ဆိုင်းငံ့ပေးဖို့ အီးယူအဖွဲ့ဝင်နိုင်ငံတွေ သဘောတူညီထားကြကြောင်း ကြေညာအပြီးမှာ ပိုလန် နိုင်ငံခြားရေးဝန်ကြီး မစ္စတာ Radoslaw Sikorski က ပြောဆိုခဲ့တာပါ။
နိုင်ငံရေး အကျဉ်းသားအားလုံး လွတ်မြောက်ပြီး၊ မြန်မာပြည် နောက်ပြန်မလှည့်နိုင်တဲ့ ဒီမိုကရေစီ လမ်းကြောင်းပေါ် ရောက်ပြီဆိုရင် ယာယီ ဆိုင်းငံ့ထားတဲ့ အီးယူ ပိတ်ဆို့မှုတွေ အားလုံးဟာ လုံးဝ ပွင့်သွားနိုင်ပါတယ်လို့ ၀ါဆောမြို့မှာ သတင်းထောက်တွေကို ပြောလိုက်ပါတယ်။
အီးယူက ဆိုင်းငံ့ထားမယ့် ပိတ်ဆို့မှုတွေထဲမှာ သစ်လုပ်ငန်း၊ သစ်အချောထည်လုပ်ငန်းနဲ့ သတ္တုတူးဖော်ရေး လုပ်ငန်းတွေမှာ ပါဝင်ကြတဲ့ ကုမ္ပဏီ (၈၀၀) ကျော်နဲ့ ကုန်သွယ်ခွင့်၊ ရင်းနှီးမြှုပ်နှံခွင့်၊ မြန်မာစစ်အစိုးရ ထိန်းချုပ်ထားတဲ့ ကုမ္ပဏီ ( ၅၂) ခုမှာ ရင်းနှီးမြှုပ်နှံခွင့်၊ စစ်အစိုးရအဖွဲ့ဝင်တွေနဲ့ သူတို့နဲ့ နီးစပ်သူ ပုဂ္ဂိုလ် စုစုပေါင်း (၄၉၁) ယောက်အပေါ် ဥရောပ၀င်ခွင့် ဗီဇာပိတ်ပင်ထားတာတွေ ပါဝင်ပါတယ်။
ဒါပေမဲ့ ယာယီ ဆိုင်းငံ့ထားမယ့် ပိတ်ဆို့မှုတွေထဲမှာ စစ်လက်နက်ပစ္စည်း ရောင်းချမှု မပါဝင်ပါဘူး။ မြန်မာအပေါ် ပိတ်ဆို့မှု (၁၂) လတိတိ ယာယီ ဆိုင်းငံ့ထားစဉ်အတွင်း အခြေအနေ တိုးတက်မှုရှိမရှိကို အီးယူက အနီးကပ် အသေအချာ စောင့်ကြည့်နေမှာဖြစ်ပြီး အောက်တိုဘာလမှာ ပြန်လည်သုံးသပ်မှာ ဖြစ်ကြောင်း အီးယူ အကြီးတန်း အရာရှိတစ်ဦးက ပြောပါတယ်။
ဒါအပြင် သမ္မတ ဦးသိန်းစိန်ဟာ လက်ရှိ ပြုပြင်ပြောင်းလဲရေး လမ်းကြောင်းပေါ်မှာ ဆက်လက် လျှောက်လှမ်းနေတယ်ဆိုရင် (၁၂) လ မတိုင်ခင်အတွင်း အီးယူအနေနဲ့ ပိတ်ဆို့မှုတွေ ပြန်လည် ရုပ်သိမ်းသွားနိုင်တယ်လို့ ဆိုပါတယ်။
ပိုလန် နိုင်ငံခြားရေးဝန်ကြီးကလည်း ပိုလန်နိုင်ငံဟာလည်း စစ်အစိုးရလက်အောက် ကျရောက်ခဲ့ရဖူးပါတယ်။ အသွင်ကူးပြောင်းရေး ဆောင်ရွက်လိုက်လို့ ပိုလန်ဟာ နောင်တမရတဲ့အပြင် စံနမူနာ ယူစရာတောင် ဖြစ်လာခဲ့ပါတယ်။ မြန်မာ စစ်ဗိုလ်ချုပ်များ အတွက်လည်း နမူနာယူစရာပါလို့ ပြောဆိုပါတယ်။

ဒုသမ္မတ ဒေါက်တာ စိုင်းမောက်ခမ်းကို ဦးခွန်ထွန်းဦး ဝေဖန်

ရှမ်းအမျိုးသား တဦးဖြစ်သည့် ဒုသမ္မတ ဒေါက်တာ စိုင်းမောက်ခမ်းသည် အစိုးရအဖွဲ့တွင် လူမှုရေးလုပ်ငန်းများသာ လုပ်ကိုင်နေရသည့် ရုပ်သေးသမ္မတ တဦးဖြစ်ကြောင်း ရှမ်းအမျိုးသားများဒီမိုကရေစီအဖွဲ့ချုပ် (SNLD) ဥက္ကဋ္ဌ ဦးခွန်ထွန်းဦးက ဝေဖန်လိုက်သည်။
“(ဒေါက်တာ) စိုင်းမောက်ခမ်းရဲ့ အဆင့်ကဘာလဲ၊ သာရေးနာရေး သမ္မတပဲ။ ဘာလုပ်ရလို့လဲ၊ မီးလောင်ရင်သွားရတယ်” ဟုပြောကြားခဲ့သည်။
အစိုးရသစ်လက်ထက် ဒု သမ္မတရာထူးကို ရှမ်းအမျိုးသားတဦးအား ပေးအပ်ထားခြင်း၊ ကျားဖြူပါတီဟု လူသိများသည့် ရှမ်းတိုင်းရင်းသားများ ဒီမိုကရက်တစ်ပါတီ (SNDP) တို့ လွှတ်တော်သို့ တက်ရောက်ခွင့် ရရှိခြင်းတို့ကိုကြည့်၍ တိုင်းရင်းသားအခွင့်အရေး အပြည့်အ၀ ပေးထားသည်ဟု ပြောဆို၍ မရကြောင်းလည်း ဦးခွန်ထွန်းဦးက ဆက်လက်ပြောသည်။ ဒု သမ္မတ ဒေါက်တာ စိုင်းမောက်ခမ်း၊ ကျားဖြူပါတီ ဒု ဥက္ကဋ္ဌ ဦးစိုင်းဆောင်ဆီတို့သည် ဦးခွန်ထွန်းဦးနှင့်အတူ ရှမ်းပြည်အတိုင်ပင်ခံကောင်စီဖွဲ့စည်းစဉ်က ပါဝင်ခဲ့ကြသူများဖြစ်သည်။
ထိုသို့ ရှမ်းပြည်အတိုင်ပင်ခံကောင်စီ ဖွဲ့စည်းခဲ့သည့်အတွက် ဦးခွန်ထွန်းဦသည် တခြားသော ရှမ်းခေါင်းဆောင် ၈ ဦးနှင့်အတူ အမျိုးသားညီလာခံကို ဖျက်လိုဖျက်ဆီး ပြုလုပ်မှု၊ နိုင်ငံတော်ပုန်ကန်မှုတို့ဖြင့် ၂၀၀၅ ခုနှစ် ဖေဖော်ဝါရီလတွင် ထောင်ဒဏ် ၉၃ နှစ် ချမှတ်ခံခဲ့ရသည်။ ယခုနှစ် ဇန်နဝါရီလတွင် သမ္မတ၏ လွတ်ငြိမ်းချမ်းသာခွင့်ဖြင့် တောင်ငူအကျဉ်းထောင်မှ လွတ်မြောက်လာခဲ့သည်။ SNLD ပါတီသည် လာမည့် ၂၀၁၅ ခုနှစ် ရွေးကောက်ပွဲတွင် ၀င်ရောက်ယှဉ်ပြိုင်ရန်အတွက် ပြီးခဲ့သည့် မတ်လအတွင်းက ပြည်ထောင်စု ရွေးကောက်ပွဲ ကော်မရှင်တွင် မှတ်ပုံတင်ခဲ့သည်။
“တန်းတူအခွင့်အရေး၊ ကိုယ်ပိုင်အုပ်ချုပ်ခွင့် ပြဋ္ဌာန်းရေး၊ စစ်မှန်တဲ့ ဖက်ဒရယ်ရဖို့အတွက်က ပါလီမန်ထဲဝင်ပြောရမယ်” ဟု ဦးခွန် ထွန်းဦးက ဆိုသည်။

မြန်မာ့ ပြုပြင်ပြောင်းလဲမှုတွေကြောင့် ခရီးသွားတွေ များပြားလာ



တစ်ချိန်က စစ်အာဏာရှင် စိုးမိုးအုပ်ချုပ်ပြီး နိုင်ငံတကာရဲ့ ပိတ်ဆို့ အရေးယူခံခဲ့ရတဲ့ မြန်မာနိုင်ငံဟာ အခုအခါ ကမ္ဘာလှည့်ခရီးသွားတွေ စုပြုံဝင်ရောက်နေတဲ့ နေရာတစ်ခု ဖြစ်လာနေပါတယ်။ မနှစ်က ခရီးသွားဧည့်သည် (၄) သိန်းကျော် လာရောက်ခဲ့ပြီး ဒီနှစ်မှာတော့ အရေအတွက် နှစ်ဆတိုးလိမ့်မယ်လို့ မျှော်လင့်ရကြောင်း Euro News က ဖော်ပြပါတယ်။
Khiri Travel Group ရဲ့ အထွေထွေ မန်နေဂျာ မစ္စတာ Edwin Briels ကတော့ - ဟိုတုန်းကတော့ မြန်မာနိုင်ငံကို စီးပွားရေးပိတ်ဆို့ အရေးယူထားတော့ မသွားကောင်းတဲ့အရပ်လို့ ခရီးသွားတွေက မှတ်ယူခဲ့ကြတယ်။ အခုတော့ သွားကောင်းတဲ့အရပ် ဖြစ်သွားပါပြီ။ အတော်များများကတော့ စူးစမ်းချင်လို့ လာကြတာပါ။ ဒီကိုရောက်လာတဲ့ နိုင်ငံခြားသားတွေထဲမှာ ရိုးရိုးခရီးသွားတွေထက် အခွင့်အလမ်း လာရှာတဲ့ စီးပွားရေးသမားတွေက ပိုပြီးများတယ်လို့ ပြောဆိုပါတယ်။
မြန်မာပြည်မှာ သာယာလှပတဲ့ ရှုမြင်ကွင်းတွေ၊ ရှေးဟောင်း စေတီပုထိုး ဘုရားကျောင်းကန်တွေ ရှိသလို တစ်ဘက်မှာလည်း ပြည်သူအများစုကြီးရဲ့ လူနေမှုဘ၀ အခြေအနေက နိမ့်ကျနေဆဲ၊ လူ့အခွင့်အရေး အခြေအနေတွေက စိုးရိမ်စရာ ကောင်းဆဲ ဖြစ်ပါတယ်။
ဒါပေမဲ့ တပြိုင်တည်းမှာ အကောင်းဘက်ကို မျှော်လင့်နိုင်တဲ့ အခြေအနေလည်း ဖြစ်ပါတယ်။ အတိုက်အခံဘက်ကလည်း အစိုးရ လက်ဝေခံတွေရဲ့ လက်ထဲရောက်သွားမယ့် ခရီးသွား အစီအစဉ်တွေထက် ပြည်သူတွေ အကျိုးရှိမယ့် ခရီးသွားလုပ်ငန်းမျိုး ထွန်းကားဖို့ ပိုပြီး အားပေးချင်တာကို တွေ့ရပါတယ်လို့ Euro News က ရေးသားဖော်ပြပါတယ်။

သမ္မတဦးသိန်းစိန် ဂျပန်ရင်းနှီးမြှုပ်နှံမှု ဖိတ်ခေါ်ကြိုဆို

မြန်မာသမ္မတဦးသိန်းစိန် ဂျပန်နိုင်ငံ၊ မဲခေါင်ဒေသတွင်း ပူးပေါင်းဆောင်ရွက်ရေး ထိပ်သီးညီလာခံတက်ရောက်ဖို့အတွက် ခရီးစတင်ထွက်ခွာခဲ့ပြီးတော့ တိုကျိုမြို့ကို ရောက်နေပါပြီ။ ခရီးရောက်မဆိုက်မှာပဲ မြန်မာနိုင်ငံမှာ ပြုပြင်ပြောင်းလဲရေးတွေ ဆောင်ရွက်နေတာမို့ စီးပွားရေးအခွင့်အလမ်းတွေ ပွင့်လာပြီလို့ အခုလို ပြောခဲ့ပါတယ်။
"ယခုအခါ မြန်မာနိုင်ငံမှာ နိုင်ငံရေးစနစ် ပြောင်းလဲလာပြီ။ စီးပွားရေးနဲ့ပတ်သက်ပြီးတော့လည်း ပွင့်လင်းမြင်သာမှုတွေ ရှိလာပြီ ဖြစ်ပါတယ်။ မြန်မာနိုင်ငံမှာ အထူးစီးပွားရေးဇုန်တွေ တည်ဆောက် အကောင်အထည်ဖော်လျှက် ရှိနေပါပြီ။ ဂျပန်နိုင်ငံက စီးပွားရေးလုပ်ငန်းများအနေနဲ့ ရင်းနှီးမြှုပ်နှံမှုများ လာရောက်လုပ်ကိုင်ဖို့ ကြိုဆို ဖိတ်ခေါ်အပ်ပါတယ်" ဂျပန်နိုင်ငံကို ရောက်ရှိပြီးတော့ မကြာခင်မှာပဲ သမ္မတက ပြောဆိုခဲ့တာ ဖြစ်ပါတယ်။

ဂျပန် ဧကရာဇ်လက်ဘက်ရည်ပွဲ သမ္မတဦးသိန်းစိန်တက်ရောက်

မြန်မာသမ္မတဦးသိန်းစိန်ဟာ သမိုင်းဝင် ဂျပန်နိုင်င်ံကို ငါးရက်ကြာ ဒီခရီးစဉ်မှာ ဒေသတွင်း ပူးပေါင်း ဆောင်ရွက်ရေးဆိုင်ရာ ထိပ်သီး အစည်းအဝေးတခုနဲ့အတူ ဂျပန် ၀န်ကြီးချုပ်နဲ့ နှစ်နိုင်ငံအရေး သီးခြား ဆွေးနွေးတာ တွေကိုလည်း လုပ်ဖို့ရှိပါတယ်။ ဒီခရီးစဉ်တခုလုံးမှာ အဓိကအကျဆုံး ဖြစ်နိုင်စရာ ကိစ္စကတော့ မြန်မာနိုင်ငံကနေ ဂျပန်နိုင်ငံကို ပြန်ဆပ်ဖို့ရှိတဲ့ ကြွေးမြီတွေကိစ္စနဲ့ အကူအညီ အထောက်အပံ့တွေ ပြန်ရဖို့ကိစ္စတွေပဲဖြစ်ပါတယ်။

မြန်မာနိုင်ငံရဲ့ နိုင်ငံအကြီးအကဲတယောက်အနေနဲ့ ၂၈ နှစ်အတွင်း ဂျပန်နိုင်ငံ ပထမဆုံးခရီးစဉ်ကို ဒီကနေ့မှာပဲ သမ္မတ ဦးသိန်းစိန်က စတင် လိုက်တာပါ။ မြန်မာသမ္မတရဲ့ ဒီကနေ့ ဂျပန်နိုင်ငံက အစီအစဉ်တွေ အပါအ၀င် နောက်ရက်တွေရဲ့ အစီအစဉ် တွေကိုတော့ ဂျပန်နိုင်ငံခြားရေးဌာန၊ ဒုတိယပြောရေးဆိုခွင့်ရှိသူ မစ္စတာ မဆရု ဆတို့ (Masaru Sato) က အခုလို ရှင်းပြပါတယ်။

“ဒီကနေ့မှာ ထူးခြားတဲ့အစီအစဉ်တော့ မရှိပါဘူး။ ဘုရင့်နန်းတော်မှာ လက်ဘက်ရည်ပွဲနဲ့ တည်ခင်း ဧည့်ခံတာရှိပါတယ်။ ဒီညနေပိုင်းမှာ ဂျပန် ၀န်ကြီးချုပ် နိုဒ (Yoshihiko Noda) ရဲ့ ကြိုဆိုပွဲ အခမ်းအနား ရှိပါမယ်။ ဂျပန်-မဲခေါင် ထိပ်သီး အစည်းအဝေးကို မနက်ဖြန်မနက်ပိုင်းမှာ ကျင်းပပါမယ်။ ပြီးတဲ့နောက် ပူးတွဲသတင်း ထုတ်ပြန်ချက် ထွက်ဖို့ ရှိပါ တယ်။ နေ့လည်ပိုင်းမှာတော့ ဂျပန်-မြန်မာ နှစ်နိုင်ငံ ထိပ်သီး အစည်းအဝေးနဲ့အတူ လက်မှတ်ထိုးအခမ်းအနားရှိပါတယ်။ အဲဒီ နောက်မှာ ပူးတွဲသတင်း ထုတ်ပြန်ချက် တရပ် ထုတ်ပြန်မှာဖြစ်ပြီး ညပိုင်းမှာတော့ ဂျပန် ၀န်ကြီးချုပ်က ညစာနဲ့ တည်ခင်း ဧည့်ခံပါ့မယ်။ အဲဒါက နှစ်နိုင်ငံကြားလုပ်ဖို့ စီစဉ်ထားတဲ့ နောက်ဆုံးအစီအစဉ်ပါပဲ။” - လို့ မစ္စတာ မဆရုက ပြောပါတယ်။

သမ္မတရဲ့ ခရီးစဉ်နဲ့ပတ်သက်ပြီး မေးမြန်းဖို့ တိုကျိုမြို့က ဂျပန်နိုင်ငံဆိုင်ရာ မြန်မာသံရုံးကို ဆက်သွယ်ခဲ့ပေမဲ့ တယ်လီဖုန်း လက်ခံ ပြီး ဖြေဆိုမယ့်သူ မရှိခဲ့ပါဘူး။ မြန်မာသမ္မတ ဂျပန်နိုင်ငံဆီ သွားမယ်ဆိုကတည်းကိုက မြန်မာက ဂျပန်ကို ပြန်ပေးဆပ်ဖို့ရှိနေတဲ့ အကြွေးကိစ္စ၊ ဂျပန်နိုင်ငံက မြန်မာနိုင်ငံအတွက် ဖွံ့ဖြိုးရေးဆိုင်ရာ ချေးငွေ၊ ထောက်ပံ့ငွေနဲ့ နည်းပညာအကူအညီတွေ ပြန်ပေးရေးကိစ္စတွေကို အဓိကထားပြီး သတင်းတွေမှာ ဖော်ပြနေကြတာပါ။ အခုရက်ပိုင်းအတွင်းမှာလည်း မြန်မာနိုင်ငံက ပြန်ပေးဆပ်ဖို့ရှိနေတဲ့ ချေးငွေ အမေရိကန် ဒေါ်လာ သန်းပေါင်း ၃,၇၀၀ နီးပါးကို လျှော်ပေးဖို့ မြန်မာသမ္မတက ကြိုးစားမှာဖြစ်သလို ဂျပန်နိုင်ငံဘက် ကလည်း စဉ်းစားနေ တယ်ဆိုတဲ့သတင်းတွေ ဂျပန်သတင်းမီဒီယာတွေမှာ တွေ့နေရပါတယ်။

ဒါပေမဲ့လည်း မစ္စတာမဆရုကတော့ ဒါနဲ့ပတ်သက်ပြီး ရှင်းရှင်းလင်းလင်းပြောဖို့ ငြင်းပါတယ်။

“ချေးငွေကိစ္စနဲ့ ပတ်သက်ပြီး ပြီးပြည့်စုံတဲ့ အစီအစဉ်တရပ်ကိုချမှတ်ဖို့ ကျနော်တို့ ပြင်ဆင်နေတာတွေ နောက်ဆုံးအဆင့် ရောက်နေပါပြီ။ ပြီးပြည့်စုံ ပြီး ကျယ်ပြန့်တဲ့ ဖြေရှင်းမှုမျိုးရဖို့ဖြစ်ပါတယ်။ ဒါပေမဲ့လည်း ကြေညာဖို့ ကျနော်တို့ အဆင်သင့် မဖြစ်သေးတဲ့အတွက် အသေးစိတ် တွေကိုတော့ ကျနော် မပြောနိုင်သေး ပါဘူး။ အစီအစဉ်အပြည့်အစုံကို မနက်ဖြန်ထုတ်ပြန်မယ့် ပူးတွဲထုတ်ပြန်ချက်ထဲမှာ ကြေညာမှာ ဖြစ်ပါတယ်။” - လို့ မဆရု ဆတို့က ပြောပါတယ်။
နောက်ထပ် ချေးငွေတွေ ထပ်ပေးဖို့အတွက် လက်ရှိကျန်နေသေးတဲ့ အကြွေးကိစ္စ ပြေလည်ရေးက အရေးကြီး သလို ပြုပြင် ပြောင်းလဲရေးတွေ လုပ်နေတဲ့ မြန်မာနိုင်ငံမှာ လူထုအနေနဲ့ အပြောင်းအလဲတွေကို အစစ်အမှန် ခံစားနိုင်ရေးအတွက် ODA လို့ ခေါ်တဲ့ ပင်လယ်ရပ်ခြား ဖွံ့ဖြိုး တိုးတက်ရေးဆိုင်ရာ အထောက်အပံ့တွေ ပြန်ပေးဖို့ကလည်း အရေးကြီးပါတယ်လို့ မဆရု ဆတို့က ဗွီအိုအေကို ပြောထားပါတယ်။

မြန်မာနိုင်ငံက အပြောင်းအလဲတွေ နောက်ပြန်မလှည့်ဘဲ ရှေ့ဆက်သွားအောင် အားပေးဖို့ ဂျပန်အစိုးရ ဘက်က မြန်မာသမ္မတကို ပြောလိမ့်မယ်လို့ ယူဆသူကတော့ မြန်မာစကားရေလည်စွာပြောတတ်တဲ့ ဂျပန်နိုင်ငံသား ၀ါရင့်သတင်းစာဆရာ ဟောင်းကြီးတဦး ဖြစ်သူ ဦးရွှေဘ ခေါ် မစ္စတာ ဟိဆအို့ တနဘဲ့ (Hisao Tanabe) ပဲ ဖြစ်ပါတယ်။
“နောက်ပြန်လှည့်ဖို့ မဟုတ်ဘဲနဲ့ ဒီအတိုင်းဆက်ပြီးတော့ ရှေ့ရှုသွားဖို့ဆိုတာကို အားပေးရင်းနဲ့ တကယ့် ဒီမိုကရေစီအတွက် ပြင်လာပြီဆိုရင်တော့   ဂျပန်အနေနဲ့ စီးပွားရေး အကူအညီပေးဖို့ အဆင်သင့်ဖြစ်တယ်၊ ဂျပန် လုပ်ငန်းရှင်တွေအနေနဲ့လည်း ဗမာပြည်ဈေးကွက်မှာ ရင်းနှီးမြှုပ်နှံမှု ရှိတယ်။ စီးပွားရေးလုပ်ငန်း လုပ်ချင်နေတဲ့စိတ် ပြင်းပျနေတယ်ဆိုတာမျိုးကို ဦးသိန်းစိန်ကို ဂျပန်ဘက်က ပြောပြဖို့ ရှိမယ်လို့ ကျနော် ယူဆပါတယ်။”
ဂျပန်နိုင်ငံဟာ အစဉ်အလာအားဖြင့် မြန်မာနိုင်ငံကို ထောက်ခံအားပေးပြီး အကူအညီတွေ တောက်လျှောက် ပေးလာခဲ့တဲ့ နိုင်ငံဖြစ်တဲ့အတွက် အခုလို အပြောင်း အလဲတွေ ဖြစ်နေချိန်မှာ အဲဒီအစဉ်အလာကို ဆက်ထိန်းသိမ်းပြီး အကူအညီတွေ အပြည့်အ၀ ပြန်ပေးဖို့ အဆင်သင့်ဖြစ်နေပြီ ။

ဂျပန် ရင်းနှီးမြှုပ်နှံမှုများအား ဦးသိန်းစိန် ဖိတ်ခေါ်

တိုကျိုမြို့သို့ ရောက်ရှိနေသည့် သမ္မတ ဦးသိန်းစိန်က ဂျပန်စီးပွားရေး ရင်းနှီးမြှုပ်နှံမှုများ အား မြန်မာနိုင်ငံမှ စိတ်အားထက်သန်စွာ လိုအပ်လှကြောင်း  စတုတ္ထအကြိမ်မြောက် မဲခေါင်-ဂျပန် ထိပ်သီး အစည်းအဝေးသို့ တက်ရောက်နေသည့် ဦးသိန်းစိန်က “ကျနော်တို့ အနေနဲ့ နိုင်ငံရေးနဲ့ စီးပွားရေး ပြုပြင်ပြောင်းလဲမှုတွေ လုပ်နေပါတယ်။ အထူးစီးပွားရေးဇုန်တွေလည်း တည်ဆောက်နေ ပါတယ်။ ဒီအခွင့်အရေးမှာ ဂျပန်ရင်းနှီးမြှုပ်နှံမှုတွေကို ကျနော်တို့ ကြိုဆိုပါတယ်” ဟု ဖိတ်ခေါ်လိုက်ကြောင်းအေပီသတင်းတရပ်တွင် ရေးသားထားသည်။

“ဂုဏ်သတင်းကြီးပြီး အောင်မြင်လှတဲ့ ဂျပန်ကုမ္ပဏီကြီးတွေအနေနဲ့ ကျနော်တို့ရဲ့ ဒီအားထုတ်မှုကို ကူညီကြလိမ့် မယ်လို့လည်း မျှော်လင့်ပါတယ်” ဟု ဂျပန်စီးပွားရေးတွင် သြဇာကြီးလှသည့် Keidanren အဖွဲ့ကြီးက တည်ခင်းသောနေ့လည်စာ စားပွဲတွင် မြန်မာသမ္မတ ဦးသိန်းစိန်က ပြောဆိုလိုက်ခြင်း ဖြစ်သည်။

ငါးရက်ကြာ ခရီးစဉ်အတွင်း ဦးသိန်းစိန်သည် ဂျပန်ဝန်ကြီးချုပ်နှင့်ဆွေးနွေးမည်ဖြစ်သည်။ ဂျပန် အကူအညီများ
ပြန်လည် ရရှိရန်ရှိပြီး ယခင်တင်ရှိနေသော ကြွေးမြီ ဒေါ်လာ သန်းပေါင်း ၃.၇ ထောင်အား ဂျပန်အစိုးရက
လျှော်ပစ်ဖွယ် ရှိနေသည်။ဂျပန်စီးပွားရေးကုမ္ပဏီအချို့ကလည်း မြန်မာနိုင်ငံတွင် စီမံကိန်းများ စတင်ကာ ရင်းနှီးမြှုပ်နှံကြရန် စိတ်ဝင်စားမှုများပြသနေကြသည်။

Tokyo Stock Exchange နှင့် Daiwa Securities Group တို့ကလည်း လွန်ခဲ့သည့် သီတင်းပါတ်အတွင်းက မြန်မာ့ ဗဟိုဘဏ်နှင့် ၂ဝ၁၅ ခုနှစ်တွင် စတော့ဈေးကွက် စတင်နိုင်ရန် ကူညီမည်ဟူ သဘောတူထားခဲ့ပြီး ဖြစ်သည်။

နည်းပညာကုမ္ပဏီကြီးတခုဖြစ်သည့် NTT Data Corp ကလည်း ရန်ကုန်မြို့တွင် ကုမ္ပဏီခွဲ တည်ထောင်သွားမည်ဟု ကြာသပတေးနေ့က ပြောကြားလိုက်သည်။

JETRO ခေါ် ဂျပန်ပြည်ပ ကုန်သွယ်ရေး အဖွဲ့ကြီးမှ အရာရှိတဦးဖြစ်သည့် Eitaro Kojima ကလည်း လက်ရှိ
မြန်မာနိုင်ငံ၏ အခြေအနေမှာ ဂျပန်စီးပွားရေး လုပ်ငန်းများအတွက် “ဘယ်နည်းနဲ့ကြည့်ကြည့် ဒါဟာ တကယ့် အခွင့်ကောင်းပဲ”ဟု ပြောဆိုလိုက်ပြီး လက်လီအရောင်းသမားများ၊ ထုတ်လုပ်သူများနှင့် ခရီးသွားလုပ်ငန်း ကုမ္ပဏီများ ကလည်း မြန်မာပြည်တွင် ရင်းနှီးလုပ်ကိုင်လိုကြသည်ဟု ဆိုသည်။

“နိုင်ငံရေးအရ အဟန့်အတားကတော့ ခုထိ ရှိနေဆဲပါ။ ဒါပေမယ့် ဒီအတားအဆီးဟာ ပြိုလာနေပါပြီ။ ရင်းနှီးမြှုပ်နှံမှုတွေဟာ ဒီကစပြီး တောက်လျှောက် အရှိန်မြင့်လာမယ်လို့ ကျနော် မျှော်လင့်ပါတယ်”ဟု JETRO အရာရှိက ပြော သည်။ မြန်မာအစိုးရ၏ တရားဝင်ထုတ်ပြန်ချက်များအရ ၁၉၈၈ ခုနှစ်မှ ၂ဝ၁၁ ခုနှစ် နိုဝင်္ဘာလအထိ ဂျပန်နိုင်ငံ၏ ရင်းနှီးမြှုပ်နှံမှု ပမာဏမှာ ဒေါ်လာ ၂၁၄.၉ သန်းမျှသာ ရှိခဲ့ကြောင်း သိရသည်။

သမ္မတ ဦးသိန်းစိန် ခေါင်းဆောင်သော မြန်မာကိုယ်စားလှယ်အဖွဲ့တွင် နိုင်ငံခြားရေးဝန်ကြီး၊ ဘဏ္ဍာရေးနှင့် အခွန် ဝန်ကြီး၊ စက်မှုဝန်ကြီး၊ စီးပွား/ကူးသန်းဝန်ကြီး၊ စီမံ/စီးပွားဝန်ကြီးတို့လည်း လိုက်ပါသွားကြောင်း သောကြာနေ့ထုတ်နိုင်ငံပိုင် ကြေးမုံသတင်းစာတွင် ဖော်ပြပါရှိသည်။

မြန်မာကိုယ်စားလှယ်အဖွဲ့အနေနှင့် ဂျပန်ဝန်ကြီးချုပ်၊ နိုင်ငံခြားရေးဝန်ကြီး၊ စီးပွားရေး ဝန်ကြီးတို့အပြင် စီးပွားရေး လုပ်ငန်းရှင်ကြီးများနှင့်လည်း တွေ့ဆုံဆွေးနွေးမည် ဖြစ်သည်။

မြန်မာလူငယ် အုပ်ချုပ်ရေးဝန်ထမ်း ဂျပန်သို့ ပညာသင်ခေါ်မည်

မြန်မာနိုင်ငံရဲ့ ဒီမိုကရေစီ ပြုပြင်ပြောင်းလဲရေး လုပ်ငန်းကို ကူညီတဲ့အနေနဲ့ ဂျပန်အစိုးရက မြန်မာလူငယ် အုပ်ချုပ်ရေး ၀န်ထမ်းတွေကို ဂျပန်နိုင်ငံမှာ လာရောက် လေ့လာဆည်းပူးဖို့ အတွက် ယန်းငွေ သန်း (၂၀၀) ထောက်ပံ့မယ်လို့ ဆုံးဖြတ်လိုက်ကြောင်း ဂျပန်အစိုးရ သတင်းရပ်ကွက်ကို ကိုးကားပြီး ယူမီယူရီ ရှင်ဘွန်း သတင်းစာက ဖော်ပြလိုက်ပါတယ်။

လွှတ်တော်ပြင်ပ ညီလာခံမှသာ ဖွဲ့စည်းပုံ ပြင်နိုင်မည်ဟု UNFC ပြော

လက်ရှိ နိုင်ငံတော်ဖွဲ့စည်းပုံ အခြေခံဥပဒေအား ပြင်ဆင်ရန်မှာ တမျိုးသားလုံးဆိုင်ရာ ညီလာခံကြီးတရပ် ကျင်းပနိုင်မှသာ ဖြစ်နိုင်မည်ဟု ညီညွတ်သော တိုင်းရင်းသား လူမျိုးများ ဖက်ဒရယ်ကောင်စီ UNFC တွဲဘက် အတွင်းရေးမှူး (၂) ဗိုလ်မှူးကြီး ခွန်ဥက္ကာက လက်ရှိ ပြည်ထောင်စုလွှတ်တော်အတွင်း အင်အားချိန်ခွင်လျှာနှင့် ဖွဲ့စည်းပုံပါပြဋ္ဌာန်းချက်များအရ လွှတ်တော်တွင်းမှ အခြေခံဥပဒေပြင်ဆင်ရေးမှာ မဖြစ်နိုင်ကြောင်း

“တမျိုးသားလုံး ညီလာခံက ဆုံးဖြတ်ချက် မဟုတ်ဘူးဆိုရင် ၂ဝဝ၈ ဖွဲ့စည်းပုံကို ပြင်လို့ မလွယ်ဘူး။ ဖွဲ့စည်းပုံကို လွှတ်တော်ထဲက ပြင်လို့ မရဘူး။ ၇၅ ရာခိုင်နုန်းဆိုတာ ခံနေတာ။ ဒါကြောင့် ဖွဲ့စည်းပုံထဲက ဖြုတ်ဖို့ ပြင်ဖို့ဆိုတာ တမျိုးသားလုံး ညီလာခံဆိုတဲ့ နိုင်ငံရေးဆုံးဖြတ်ချက်ကနေပြီးတော့ လွှမ်းမိုးနိုင်မှသာလျှင် ပြင်လို့ရမယ်။ ဒါကြောင့် ဒီညီလာခံက ၂ဝဝ၈ ကို ပြင်ဖို့အတွက် အရေးကြီးတဲ့ အလုပ်တခု ဖြစ်တယ်။ ဒါကြောင့် အဲဒါကို ဖိတ်ခေါ်ရခြင်းဖြစ်တယ်” ဟု ပြောသည်။

ကြာသာပတေးနေ့က ထိုင်းနိုင်ငံ၊ ချင်းမိုင်မြို့တွင် ပြုလုပ်သည့် UNFC ၏ သတင်းစာ ရှင်းလင်းပွဲတွင် ထိုကဲ့သို့ ‘တမျိုးသားလုံးဆိုင်ရာ ညီလာခံကြီး’ ကျင်းပနိုင်ရန် တောင်းဆိုလိုက်ကြခြင်း ဖြစ်သည်။
UNFC တွင် ပါဝင်သော ကရင်အမျိုးသားအစည်းအရုံး၊ ချင်းအမျိုးသားတပ်ဦး၊ မွန်ပြည်တစ်ပါတီ၊ ရှမ်းပြည်မြောက်ပိုင်း တပ်မတော်၊ ရှမ်းပြည်တောင်ပိုင်း တပ်မတော်၊ ကရင်ငြိမ်းချမ်းရေးကောင်စီတို့မှာ အစိုးရနှင့် အပစ်အခတ် ရပ်စဲရေး အတွက် ပြည်ထောင်စုအဆင့် ငြိမ်းချမ်းရေးအဖွဲ့နှင့် ပဏာမ သဘောတူ လက်မှတ်ရေးထူးပြီး ဖြစ်သည်။

ကချင်လွတ်လပ်ရေးအဖွဲ့နှင့် အစိုးရတပ်များအကြား တိုက်ပွဲများ ဖြစ်ပွားနေဆဲ ဖြစ်သည်။

“UNFC အဖွဲ့ဝင်တွေဟာ တချို့က အစိုးရနဲ့ ဆက်ဆံရေး ကောင်းနေတယ်။ တချို့ကလည်း သတ်ဖြတ်နေတယ်။ အဲဒီလိုဖြစ်တောက UNFC မှာ သဘောထားကွဲသွားပြီလား ထင်ကြမယ်လေ။ ကျနော်တို့ တိုင်းရင်းသားတွေက ဘယ်လိုပဲ ခြိန်းခြောက်ပါစေ။ စည်းလုံးနေတယ်။ တိုက်လည်း မကြောက်ဘူး။ ချော့လည်းပဲ မပျော့ဘူးဆိုတာပဲ”ဟု သူက ပြောသည်။UNFC ၏ တောင်းဆိုချက်များထဲတွင် ဦးစွာအားဖြင့် ရထားဝန်ကြီး ဦးအောင်မင်း ဦးဆောင်သော ပြည်ထောင်စုအဆင့် ငြိမ်းချမ်းရေး ဆွေးနွေးရေးအဖွဲ့နှင့် UNFC ငြိမ်းချမ်းရေးဆွေးနွေးရေးအဖွဲ့တို့ ‘နိုင်ငံရေးဆွေးနွေးပွဲ ပဏာမအဆင့်’အဖြစ်တွေ့ဆုံကြရန် ဖြစ်သည်။

ထို့နောက် UNFC အဖွဲ့ဝင်မဟုတ်သည့် အခြားတိုင်းရင်းသား အင်အားစုများနှင့် တွေ့ဆုံအပြီးတွင် ပြည်ထောင်စုအစိုးရ ပါဝင်သည့် တမျိုးသားလုံးဆိုင်ရာ ညီလာခံကြီးအား လွှတ်တော်ပြင်ပတွင် ကျင်းပခေါ်ယူသွားရန် တောင်းဆိုထားခြင်း ဖြစ်သည်။

တမျိုးသားလုံးဆိုင်ရာ ညီလာခံကြီးမှ အများသဘောတူချက်များအပေါ် တမျိုးသားလုံးဆိုင်ရာ သဘောတူညီချက် National accord ရရှိရန် အင်အားစုများအားလုံး ပါဝင်လက်မှတ်ရေးထိုးကြရန်နှင့် တမျိုးသားလုံးဆိုင်ရာ သဘောတူညီချက်ပါ ပြဋ္ဌာန်းချက်များအတိုင်း ဆက်လက်ဆောင်ရွက်ရန်တို့ ထုတ်ပြန်ချက်တွင် ပါရှိသည်။ UNFC အား ကိုယ်ပိုင်ပြဋ္ဌာန်းခွင့်အတွက် အစိုးရအား လက်နက်ကိုင်တိုက်ပွဲဆင်နေသည့် တိုင်းရင်းသားအဖွဲ့ ၆ ဖွဲ့၊ မဟာမိတ် ၆ ဖွဲ့တို့ဖြင့် ၂ဝ၁၁ ခုနှစ် ဖေဖေါ်ဝါရီလက စတင်ဖွဲ့စည်းခဲ့ခြင်း ဖြစ်သည်။

မြန်မာနှင့် ပြန်လည် ကုန်သွယ်ရန် ဂျင်မ် ၀က်ဘ် တိုက်တွန်း

မြန်မာနိုင်ငံ၏ ပြုပြင်ပြောင်းလဲမှုများကို အားပေးသည့်အနေနှင့် အမေရိကန်က မြန်မာနှင့် ကုန်သွယ်ရေးပြန်လည် ဖွင့်လှစ်သင့်ကြောင်း အထက်လွှတ်တော်အမတ် မစ္စတာ ဂျင်မ် ၀က်ဘ်က တိုက်တွန်း ပြောကြားသည်။ အမေရိကန်က မြန်မာအပေါ်ချမှတ်ထား သော ဘဏ္ဍာရေးဆိုင်ရာနှင့် ရင်းနှီးမြှုပ်နှံမှုဆိုင်ရာ ပိတ်ဆို့မှုများကို မကြာသေးခင်က လျှော့ချပေးခဲ့သော်လည်း မြန်မာနိုင်ငံမှ အမေရိ ကန် သို့ ကုန်ပစ္စည်း တင်သွင်းခွင့်မှာ ပိတ်ပင်ထားဆဲ ဖြစ်သည်ဟု ၎င်းကပြောကြောင်းလည်း AP သတင်းတရပ်က ဆိုသည်။ မစ္စတာ ဂျင်မ် ၀က်ဘ်သည် ယခုလဆန်းပိုင်းက မြန်မာနိုင်ငံသို့ လာရောက်ခဲ့သေးသည်။

EU ပိတ်ဆို့မှု တနှစ် ဆိုင်းငံ့မည်

မြန်မာနိုင်ငံအပေါ် ချမှတ်ထားသည့် ဥရောပ သမဂ္ဂ(EU)က ပိတ်ဆို့ အရေးယူမှုကို တနှစ် ဆိုင်းငံ့မည်ဖြစ်ကြောင်း သိရသည်။ ပိတ်ဆို့အရေးယူမှုများတွင် စစ်လက်နက် ပစ္စည်း ရောင်းဝယ်ခွင့်မှ လွဲ၍ ကျန်ပိတ်ဆို့မှုများကို ယာယီရပ်ဆိုင်းထားမည်ဖြစ်ကြောင်း AP သတင်းတွင် ရေးထားသည်။ ယင်း အစီအစဉ်ကို လူဇင်ဘတ်နိုင်ငံ၌ တနင်္လာနေ့တွင် ကျင်းပမည့် EU နိုင်ငံခြားရေး ၀န်ကြီးများ အစည်းအဝေးတွင် ဆုံးဖြတ်မည်ဖြစ်သည်ဟုလည်း ဆိုသည်။

မူဆယ် ၁၀၅ မိုင်၌ ဗုံးကွဲ

ရှမ်းပြည်နယ် မြောက်ပိုင်း မူဆယ် ၁၀၅ မိုင် ကုန်သွယ်ရေး ဇုန်၌ ယနေ့ နံနက်တွင် ဗုံးပေါက်ကွဲမှု ဖြစ်ပွားခဲ့ကြောင်း သိရသည်။ အတည်မပြုနိုင်သော သတင်းများက အစိုးရ၀န်ထမ်းတဦး သေဆုံးသွားသည်ဟု ဆိုသည်။ မူဆယ်မြို့နယ် ရဲစခန်းမှ တာဝန် ရှိသူတဦး၏ အဆိုအရ ဗုံးပေါက်ကွဲမှုနှင့် ပတ်သက်၍ အသေးစိတ် မသိရှိရသေးသော်လည်း ဒဏ်ရ ရရှိသူ တဦးကို ဆေးရုံသို့ ပို့ ဆောင်ထားကြောင်း သိရသည်။

အရှင်ဂမ္ဘီရ လူဝတ်လဲ
၂၀၀၇ ရွှေဝါရောင်တော်လှန်ရေး ဦးဆောင် သံဃာ တပါးဖြစ်သော အရှင်ဂမ္ဘီရ သည် ပြီးခဲ့သည့် ဧပြီ ၁၇ ရက် နေ့က လူဝတ်လဲ လိုက်ကြောင်း သိရသည်။ အရှင်ဂမ္ဘီရ ခေါ် လူအမည် ကိုညီညီလွင်က လူဝတ်လဲပြီးနောက် မိတ္ထီလာ မြို့၌ နေထိုင်လျက်ရှိကြောင်း DVB သို့ ပြောကြားသည်။ အရှင်ဂမ္ဘီရ သည် သာသနာ့ဘောင်တွင် ၁၃ ၀ါ ရှိခဲ့ကြောင်း သိရသည်။

နော်ဝေ သံရုံး မြန်မာနိုင်ငံတွင် ဖွင့်လှစ်မည်

နော်ဝေနိုင်ငံ သံရုံးကို မြန်မာနိုင်ငံ၌ လာရောက် ဖွင့်လှစ်ရန်ရှိကြောင်း သိရသည်။ အော်စလိုမြို့သို့ မကြာသေးခင်က ရောက်ရှိခဲ့သော အစိုးရ ငြိမ်းချမ်းရေး ဖော်ဆောင်ရေးအဖွဲ့ ခေါင်းဆောင် တဦးဖြစ်သည့် မီးရထား ၀န်ကြီး ဦးအောင်မင်းက DVB အယ်ဒီတာ ချုပ် ဦးအေးချမ်းနိုင်၏ တွေ့ဆုံမေးမြန်းခန်းတွင် ထည့်သွင်း ပြောကြားသွားခြင်းဖြစ်သည်။ ဦးအောင်မင်း၏ နော်ဝေ ခရီးစဉ်သည် တိုင်းရင်းသား လက်နက်ကိုင်အဖွဲ့များနှင့် ပြုလုပ်နေသည့် ပြည်တွင်း ငြိမ်းချမ်းရေးကိစ္စလည်း အဓိက ပါဝင်ကြောင်း သိရသည်။ နော်ဝေ နိုင်ငံက မြန်မာနိုင်ငံအပေါ် ချမှတ်ထားသော ပိတ်ဆို့ဒဏ်ခတ်မှုတချို့ကို မကြာသေးခင်က လျှော့ချပေးခဲ့သည်။

AGD ဘဏ် ငွေလွှဲလုပ်ငန်း စင်ကာပူ ခွင့်မပြု


စီးပွားရေး လုပ်ငန်းရှင် ဦးတေဇပိုင် အာရှစိမ်းလန်းမှု ဖွံ့ဖြိုးရေး (AGD) ဘဏ်၏ စင်ကာပူနိုင်ငံ၌ တရားဝင် ငွေလွှဲလုပ်ငန်း လုပ်ကိုင်ရန် လျှောက်ထားမှုကို စင်ကာပူ ငွေကြေးဆိုင်ရာအာဏာပိုင်အဖွဲ့ (Monetary Authority of Singapore – MAS) က ခွင့်မပြုကြောင်း သတင်းရရှိသည်။စင်ကာပူအစိုးရအနေဖြင့် AGD ဘဏ်၏ တရားဝင် ငွေလွှဲလုပ်ငန်းလုပ်ကိုင်ရန် လျှောက်ထားမှုကို ပြီးခဲ့သည့် သီတင်းပတ်အတွင်းက ပယ်ချခဲ့ခြင်းမှာ အမေရိကန်နိုင်ငံ အပါအ၀င် အနောက်နိုင်ငံများ၏ စီးပွားရေးပိတ်ဆို့မှု ရုပ်သိမ်းခြင်းမရှိသေး၍ ဖြစ်နိုင်ကြောင်း လေ့လာသူများက ဆိုသည်။

ကြံ့ခိုင်ရေးက ဒေါ်ဖြူဖြူသင်းကို မဲမသမာမှုဖြင့် ကန့်ကွက်


ကြားဖြတ်ရွေးကောက်ပွဲတွင် ရန်ကုန်တိုင်း မင်္ဂလာတောင်ညွှန့်မြို့နယ် ပြည်သူ့လွှတ်တော် မဲဆန္ဒနယ်မှ ယှဉ်ပြိုင် အနိုင်ရခဲ့သော အမျိုးသား ဒီမိုကရေစီ အဖွဲ့ချုပ်(NLD)ကိုယ်စားလှယ် ဒေါ်ဖြူဖြူသင်းကို ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ(ကြံ့ခိုင်ရေး ပါတီ) က ပြည်ထောင်စု ရွေးကောက်ပွဲ ကော်မရှင်တွင် ကန့်ကွက်ထားကြောင်း သတင်းရရှိသည်။

မြန်မာရွှေ့ပြောင်း အလုပ်သမား ယာယီ ပတ်စ်ပို့စ် ထုတ်ပေးရေးရုံး ထိုင်းနိုင်ငံတွင် ဖွင့်လှစ်


ထိုင်းနိုင်ငံမှာ အလုပ်လုပ်ကိုင်နေတဲ့ မြန်မာရွှေ့ပြောင်း အလုပ်သမားတွေအတွက် ယာယီ ပတ်စ်ပို့စ် ထုတ်ပေးရေးရုံး (၂) ရုံးကို ဘန်ကောက်နဲ့ စမုတ်ပရာကန်တို့မှာ သက်ဆိုင်ရာက ဒီကနေ့ ဖွင့်လှစ်လိုက်ပါတယ်။
လူ့အခွင့်အရေးနဲ့ ဖွံ့ဖြိုးရေး ဖောင်ဒေးရှင်း HRDF အတိုင်ပင်ခံ မစ္စတာ ANDY Hall က -
“မြန်မာရွှေ့ပြောင်း အလုပ်သမားတွေအတွက် နိုင်ငံသားစီစစ်ရေးရုံး ၂ ရုံး ဒီလို ဖွင့်လှစ်လိုက်တာဟာ မြန်မာအလုပ်သမား ဒုဝန်ကြီး ဦးမြင့်သိန်းရဲ့ တိုက်တွန်းတောင်းဆိုမှုကြောင့် ဖွင့်ဖြစ်တာဖြစ်ပါတယ်။ ပြီးရင် တနင်္လာနေ့ မနက် (၉) နာရီမှာလည်းပဲ ချင်းမိုင်၊ စမုတ်ဆာခွန်နဲ့ ဆူရတ်ဌာနီ စင်တာ (၃) ခုကိုလည်း ထပ်မံ ဖွင့်လှစ်ဦးမှာ ဖြစ်ပါတယ်” လို့ ပြောသွားပါတယ်။
ဒီလိုဖွင့်လှစ်တာဟာ ထိုင်းနဲ့ မြန်မာအစိုးရ နှစ်ရပ်လုံးက ရွှေ့ပြောင်းအလုပ်သမားတွေနဲ့ သူတို့ရဲ့အခွင့်အရေးတွေကို အသိအမှတ်ပြုတာ ဖြစ်သလို၊ ကုန်ကျစရိတ် သက်သာစေဖို့ ဆောင်ရွက်ပေးတာ ဖြစ်တယ်လို့လည်း သူက ပြောပါတယ်။
ထိုင်းနိုင်ငံကို ရောက်ရှိနေတဲ့ မြန်မာအလုပ်သမား ဒုတိယဝန်ကြီး ဦးမြင့်သိန်းဟာ ထိုင်းအစိုးရ အာဏာပိုင်တွေအပါအ၀င် သက်ဆိုင်ရာ တာဝန်ရှိသူတွေနဲ့ ထိုင်းနိုင်ငံရောက် မြန်မာရွှေ့ပြောင်း အလုပ်သမားအရေးကို ဘန်ကောက်မြို့မှာ မနေ့က ဆွေးနွေးခဲ့တယ်လို့ အဆိုပါ ဆွေးနွေးပွဲကို တက်ရောက်ခဲ့တဲ့ NGO တစ်ခုမှ အရာရှိ ဦးစိန်ဌေးက ပြောပါတယ်။
“အဓိက သူရောက်လာတဲ့ အကြောင်းကတော့ ဒီထိုင်းနိုင်ငံမှာဖွင့်မယ့် နိုင်ငံသားစီစစ်ရေးရုံး (၅) ရုံး ထပ်ဖွင့်မယ့်ကိစ္စပေါ့။ ထိုင်းဘက်က နှောင့်နှေးနေတာကို အမြန်ဆုံး ဖွင့်လှစ်အောင် လာပြီးဆွေးနွေးတာရယ် နောက်ပြီးတော့ အခုတလောမှ ဖြစ်ပွားနေတဲ့ MOU စနစ်နဲ့ ဝင်ရောက်လာတဲ့ တရားဝင် အလုပ်သမားတွေ ဆန္ဒပြကြတဲ့ ကိစ္စပေါ့နော်။ စာချုပ် ချုပ်ထားတဲ့အတိုင်း လုပ်အားခမရတဲ့ကိစ္စ ဖြေရှင်းဖို့အတွက် သူက ဆွေးနွေးသွားတယ်ပေါ့။ အဓိက ပွိုင့် (၂) ချက်ပေါ့”
မြန်မာအစိုးရ အလုပ်သမားအရာရှိနဲ့ သံရုံးက ကိုယ်စားလှယ်တချို့ဟာ မကြာသေးခင်က ဆန္ဒပြတောင်းဆိုမှုတွေ ဖြစ်ပေါ်ခဲ့တဲ့ ဆွန်ခလာခရိုင်က ဖတ်တနာ ပင်လယ်အစားအစာ စက်ရုံကို ဒီကနေ့ သွားရောက်ပြီး မြန်မာလုပ်သားအရေး ဆွေးနွေး ဖြေရှင်းပေးနေပြီး၊ လာမယ့်တနင်္လာနေ့မှာ ဒုဝန်ကြီးနဲ့အဖွဲ့ဟာ ဆွန်ခလာကို သွားရောက်မယ်လို့လည်း သိရပါတယ်။
ထိုင်းနိုင်ငံမှာ သွားရောက် အလုပ်လုပ်ကိုင်နေတဲ့ မြန်မာနိုင်ငံသား ၂ သန်းကျော်ရှိပြီး၊ သူတို့ မြန်မာနိုင်ငံကို ပြန်လည်ပေးပို့တဲ့ငွေတွေဟာ တိုင်းပြည်စီးပွားရေး ဖွံ့ဖြိုးတိုးတက်ဖို့အတွက် အထောက်အကူဖြစ်တာကြောင့် ဒီအလုပ်သမားတွေကို ထိုင်းနိုင်ငံမှာ တရားဝင် အလုပ်သမားတွေဖြစ်အောင် ဆောင်ရွက်ပေးမှာ ဖြစ်ကြောင်းလည်း ဒုဝန်ကြီး ဦးမြင့်သိန်းက ပြောကြားခဲ့ပါတယ်။
မြန်မာအလုပ်သမား ဗီဇာခကိုလည်း ဘတ် ၂၀၀၀ ကနေ ဘတ် ၅၀၀ ကိုလျော့ချပေးပြီး နောက်ထပ် မြန်မာအလုပ်သမား ၂ သိန်းကို တရားဝင်လက်မှတ်တွေ ပြုလုပ်ပေးပြီး ထိုင်းနိုင်ငံက စက်ရုံတွေမှာ အလုပ်လုပ်ခွင့်ပြုမှာ ဖြစ်ပါတယ်။

ထိုင်းမှာ ရောင်းစားခံရတဲ့ မြန်မာတချို့ လွတ်မြောက်

ထိုင်းနိုင်ငံ၊ ချွန်ဘူရီ ခရိုင်မှာ လှေလုပ်သားတွေအဖြစ် အလုပ်လုပ်ဖို့ ရောင်းစားခံရတဲ့ မြန်မာနိုင်ငံက ကလေး သုံးယောက် အပါအဝင် မြန်မာ နိုင်ငံသား အယောက် ၂၀ ကို ထိုင်းနိုင်ငံမှာ သောကြာနေ့က ကယ်တင်နိုင်ခဲ့ ပါတယ်၊ ထိုင်းနိုင်ငံရောက် မြန်မာနိုင်ငံသားများအသင်းနဲ့ ထိုင်း၊ လူကုန်ကူးမှု တိုက်ဖျက်ရေးရဲတွေ ပေါင်းပြီး ကယ်တင်နိုင်ခဲ့တဲ့ ပါတယ်။ တလခွဲကြာ သတင်းအချက်အလက်တွေ စုဆောင်းခဲ့ပြီးတဲ့နောက် မြန်မာနိုင်ငံသား ၂၀ ကို အခက်အခဲတွေ ကြားက ကယ်တင်နိုင်ခဲ့တာ ဖြစ်ကြောင်း ထိုင်းနိုင်ငံရောက် မြန်မာနိုင်ငံသားများ အသင်းရဲ့တာဝန်ခံ ဦးကျော်သောင်းက ရှင်းပြပါတယ်။

“လူကုန်ကူးမှုတိုက်ဖျက်ရေး လုပ်ငန်းစဉ်မှာက အကျိုးရှိတာက ထိုင်းလူမျိုး၊ ကျွန်ပြုခံနေရ တာက ဗမာပဲ-ဆိုတော့ အကျိုးရှိနေတဲ့ထိုင်းကို တာဝန်ရှိတဲ့ ထိုင်းအာဏာပိုင်တွေက စောင့်ကြည့်အရေးယူဖို့ နေရာမှာ ကျနော်တို့ တရားမဝင် ဖွဲ့စည်းထားရတဲ့ လူမှုအဖွဲ့ သေးသေးလေးက အချိန်၊ အသက်၊ ငွေကြေး အများကြီးရင်းပြီး ပေးခဲ့ရပါတယ်။ ဥပမာတစ်ခုပြောရရင် အဲဒီအချက်အလက်တွေ ပြည့်စုံမှ သူတို့ အလုပ် လုပ်ပါတယ်။ ဒီလူက ဘယ်ရွာက၊ မိဘက ဘယ်သူဆိုတဲ့ အချက် အလက်တွေကို ကျနော်တို့နည်း၊ ကျနော်တို့ဟန်နဲ့ တိုင်ကြားတဲ့သူတွေဆီက အချက်အလက်တွေ ယူတယ်၊ အဲဒီလို အချက်အလက်တွေ အကုန်လုံးကို ဘာသာပြန်ပြီးတော့မှ သူတို့ရဲ့စားပွဲပေါ်ကို သွားတင်ရပါတယ်။”

ပထမဦးဆုံး ထွက်ပြေးလွတ်မြောက်လာတဲ့ မြန်မာနိုင်ငံသားတဦးကတော့ သူက မဲဆောက်ကနေ သားဖြစ်သူက ဘန်ကောက်က်ို တက် အလုပ် လုပ်ဖို့ ပွဲစားနဲ့ ခေါ်တာကို လိုက်လာခဲ့တာမှာ ဘန်ကောက် မရောက်ခင် မဟာချိုင်ကနေ လူပွဲစားက လှေပေါ်ကို ရောင်းစား လိုက်တာ ဖြစ်ကြောင်း ပြောပြပါတယ်။

“အောက်ပွဲစားကိုလည်း ဘတ်၂၅၀၀ ပေးခဲ့ရတယ်။ မဟာချိုင်ကို နှစ်ညအိပ်၊ သုံးရက် ကြာတော့ ရောက်လာပါတယ်။ ကျနော့်သားနဲ့လည်း ကျနော် ဖုန်းပြောရတယ်ခင်ဗျ။ အဲဒီမှာပဲ မင်းအောက်ကားခ မပြေလည်သေးဘူး-တဲ့။ ငါ့ကို ပိုက်ဆံလွှဲပေးအုံး-တဲ့။ ပွဲစားက ပြောပါတယ်ခင်ဗျ။ အဲဒီမှာ သားလုပ်တဲ့သူကလည်း ယုံပြီးတော့ လာပို့ပေးမယ် ဆိုပြီးတော့မှ ပိုက်ဆံတသောင်း လွှဲလည်း လွှဲပေးပြီးသွားရော ည ရှစ်နာရီထိုးလောက် ကျတော့ ချွန်ဘူရီက အချောင်ရွာကို ရောင်းထည့် လိုက်တာပါပဲ။ ဘယ်လောက်နဲ့  ဘယ်နည်းနဲ့ ရောင်းလိုက်တယ်တော့ မသိဘူး။ အဲဒီကနေ အချောင် ရွာကို ရောက်ခါမှပဲ လှေတွေကို မြင်ခါမှပဲ မျက်ရည်တွေကျပြီး ကျနော့်သားကို ဖုန်းခိုးပြောပါတယ်။ 'ငါ့သား-အဖေတို့တော့ လှေထဲ ရောင်းစားခံလိုက်ရပီ' - လို့"

သူကတော့ ပဲခူးတိုင်း၊ ထန်းတပင်မြို့နယ်၊ ဇလုပ်ကြီးကျေးရွာကဖြစ်ပြီး လှေပေါ်ကနေ လွတ်မြောက်ပြီး တဲ့နောက်မှာ ထိုင်းနိုင်ငံရောက် မြန်မာ နိုင်ငံသားများအသင်းကို ဆက်သွယ် အကူအညီတောင်း ခဲ့ပြီး လှေပေါ်ကလူ ၂၀ ကူညီနိုင်ဖို့အတွက် လုပ်ဆောင်ခဲ့သူတဦး ဖြစ်ပါတယ်။ ချွန်ဘူရီ ခရို်င်၊ အချေုာင် ဆိုတဲ့လှေဆိပ်မှာ သူတို့တွေဟာ အိမ်ထဲမှာပိတ်လှောင်ခံရပြီး လှေပေါ်တက် အလုပ်လုပ်လုပ်ချိန်ကျမှ ထွက်ကြရတာပါ။ လှေ ကပြန်လာတာနဲ့ ပြန်ပြီးတော့ ပိတ်လှောင်ခံထားရတယ်လို့ ဆိုပါတယ်။ သူက ကမ်ဖဲ ဆိုတဲ့နေရာမှာ ငပိတင်တဲ့အချိန် လှေကနေ ထွက်ပြေး လွတ်မြောက်လာခဲ့သူပါ။ ဒီ့နောက်မှာတော့ လှေပေါ်မှာရောင်းစားခံရသူတွေကို ကယ်တင်နိုင်ဖို့အတွက် ကြိုစားခဲ့ ပါတယ်။

အခုလို မြန်မာနိုင်ငံသားတွေကို ချွန်ဘူရီခရိုင်က ငါးဖမ်းလှေတွေမှာ အများအပြား တွေ့ခဲ့ရပေမဲ့ အချက်အလက်အထောက်အထားတွေ ပေးနိုင်တဲ့သူတွေကိုသာ ကယ်ထုတ်နိုင်ခဲ့တာလို့ ဦးကျော်သောင်းကလည်း ပြောပြပါတယ်။

“အကုန်လုံးက ရောင်းစားခံရတဲ့သူတွေချည့်ပဲ။ ၁၆ နှစ်အရွယ် ကလေး သုံးယောက်ပါတယ်။ ကျန်တာတွေကတော့ ၁၀၊ ၂၀ ဝန်းကျင်ပါပဲ။ တယောက်မှ လူကြီးတွေ မပါဘူး၊ ကလေးတွေချည့်ပဲ။ အဝတ်လဲစရာ မရှိဘူးခင်ဗျ။ ညှင်းပန်းနှိပ်စက်၊ သန့်ရှင်းရေးဘောင်းဘီနဲ့ နောက် အင်္ကျံတစ်ထည်ပဲရှိတယ်။ အဲဒီနေရာက  မြင်သမျှ လက်ညှိုးထိုး မလွဲလောက်အောင် လှေတိုင်း လှေတိုင်းက လူဝယ်ထားပြီး ခိုင်းနေတာဖြစ်တဲ့အတွက်တချို့ ရှောင်သွားတယ်။ တချို့ လူတွေအကုန်လုံးကို မမြင်ရအောင် အတွင်းထဲမှာ ဝပ်နေခိုင်းတယ်။”

ရောင်းစားခံရသူတွေဟာ ပဲခူးတိုင်း၊ ထန်းတပင်မြို့နယ် ဇလုပ်ကြီးကျေးရွာကများပြီး တခြားနေရာဒေသက လူငယ်တွေလည်း ပါဝင်ပါတယ်။ ဒီ ထဲမှာ အသက်ဆယ့်ခြောက်နှစ် အရွယ် ကုလားကြီး (ခေါ်) ဇင်ကိုနိုင်၊ အရုပ်(ခေါ်) ကရင်လေးလို့ခေါ်တဲ့ ထန်းတပင် မြို့နယ်က ကလေးတွေလည်းပါဝင်ပြီး  ဘန်ကောက်ကနေ မဟာချိုင်ကိုအလည်သွားတဲ့ ယာယီပတ်စပို့ ကိုင်ဆောင်ထားတဲ့ ကိုစိုးနို်င်ဆိုတဲ့ လူငယ်တဦးလည်း ရောင်းစားခံတဲ့ အထဲမှာ ပါဝင်တယ်။

ဒေါ်အောင်ဆန်းစုကြည် အောင်မြင်မှု နိုဘဲလ် ငြိမ်းချမ်းရေး ဆုရှင်များ ချီးကျူး

ဒေါ်အောင်ဆန်းစုကြည်နဲ့ NLD ပါတီကိုယ်စားလှယ်တွေ ဧပြီလ တစ်ရက်နေ့က ကျင်းပခဲ့တဲ့ ကြားဖြတ်ရွေးကောက်ပွဲမှာ အများစုကြီးအနိုင်ရပြီး လွှတ်တော်ထဲ ရောက်ရှိ သွားမယ့် အောင်မြင်မှုကို နိုဘဲလ်ဆုရှင်များနဲ့ နိုင်ငံ့ခေါင်းဆောင်ဟောင်းတွေ ပါဝင် ဖွဲ့စည်းထားတဲ့ The Elders အဖွဲ့ကြီးက ချီးကျူးဂုဏ်ပြုလိုက်ပါတယ်။ ဒေါ်အောင်ဆန်းစုကြည်နဲ့ NLD ပါတီဟာ လွှတ်တော်ရဲ့ နေရာ အနည်းစုကိုသာ ရတယ်ဆိုပေမဲ့ အတိုက်အခံပါတီတွေအဖြစ် ရှေ့လျှောက် ဒီမိုကရေစီ လမ်းစဉ်ကို ဖော်ဆောင်ရာမှာ အပြုသဘောဆောင်တဲ့ ပထမခြေလှမ်းကို လှမ်းနိုင်လိမ့်မယ် လို့လည်း သူတို့က မျှော်လင့်ကြပါတယ်။

The Elders အဖွဲ့ရဲ့သဘာပတိဖြစ်တဲ့ နိုဘဲလ်ငြိမ်းချမ်းရေးဆုရှင် ဘုန်းတော်ကြီး Desmond Tutu က ပြောဆိုရာမှာတော့ ကျနော့်အနေနဲ့ ကျနော့်ရဲ့ ညီမငယ်ဖြစ်တဲ့ ဒေါ်အောင်ဆန်းစုကြည်ကို လုံးဝလေးစားပါတယ်၊ သူ့ရဲ့လွှတ်တော် ရွေးကောက်ပွဲအနိုင်ရမှုက မြန်မာနိုင်ငံအနေနဲ့ ဒီမိုကရေစီ လမ်းစဉ်ကို ထိတွေ့ခွင့်ရတဲ့အချိန်ပဲဆိုတာကို ကမ္ဘာက ဘယ်တော့မှ မေ့တော့မှာမဟုတ်ပါဘူး။ ဒါပေမဲ့လည်း အမှန်ကတော့ ဒေါ်အောင်ဆန်းစုကြည်နဲ့ သူ့ NLD ပါတီအပြင် တခြား နိုင်ငံရေး ပါတီတွေ လိုအပ်နေတာက လွှတ်တော်ထဲမှာ အဓိပ္ပာယ်ရှိတဲ့ နေရာကနေ လှုပ်ရှားဆောင်ရွက်ခွင့် နေရာတွေ ရဖို့ပဲ ဖြစ်ပါတယ်။ တကယ်လို့ အဲဒီလိုသာ မဖြစ်ခဲ့ဘူးဆိုရင်တော့ ဒါဟာ မြန်မာနိုင်ငံသူ နိုင်ငံသားတွေ အတွက်ရော ကျနော်တို့ အားလုံးအတွက်ပါ ဒါက သိပ်ကို စိတ်ပျက်စရာ ဖြစ်လာပါလိမ့်မယ်လို့ ဘုန်းတော်ကြီးက ပြောဆိုခဲ့ပါတယ်။

မြန်မာနိုင်ငံမှာ သမ္မတ ဦးသိန်းစိန် ၂၀၁၁ ခုနှစ် မတ်လမှာ တက်လာပြီးနောက်ပိုင်း နိုင်ငံရေး အကျဉ်းသားတွေ ရာနဲ့ချီပြီး လွှတ်ပေးခဲ့တာ အပါအ၀င် အလုပ်သမားဥပဒေတွေကို ပြင်ဆင်တာ၊ မီဒီယာ တင်းကျပ်မှုတွေကို ဖြေလျှော့တာနဲ့ NLD ကို ပြန်လည် မှတ်ပုံတင်ခွင့်ပြုခဲ့တာတွေကိုလည်း The Elders အဖွဲ့က ကြိုဆိုခဲ့ပါတယ်။ ဒီလို အပြုသဘောဆောင်တဲ့ ပြုပြင်ပြောင်းလဲရေး ခြေလှမ်းတွေ ပိုအားကောင်းစေဖို့ အတွက် ကျန်နေသေးတဲ့ နိုင်ငံရေးအကျဉ်းသားတွေကိုလည်း ခြွင်းချက်မရှိ ထပ် လွှတ်ပေးဖို့နဲ့ လွှတ်ပေးထားတဲ့ နိုင်ငံရေးအကျဉ်းသားဟောင်းတွေကိုလည်း လွတ်လပ်စွာ ပြောဆို လှုပ်ရှားခွင့် ပြုဖို့တွေကိုလည်း The Elders အဖွဲ့က တိုက်တွန်းထားပါတယ်။

ဒါ့အပြင် တိုင်းရင်းသားအဖွဲ့တွေနဲ့ ငြိမ်းချမ်းရေးအတွက် ကြိုးပမ်းတဲ့လုပ်ငန်းစဉ်မှာ အမျိုးသားပြန်လည် သင့်မြတ်ရေး ပန်းတိုင်ထိ ရောက်အောင်သွားဖို့လည်း တိုက်တွန်းထားပါတယ်။
နိုင်ငံတကာကို အကြံပေးရာမှာတော့ မြန်မာအစိုးရဘက်က တိုင်းပြည် ပြန်လည်တည်ဆောက်ရေး လုပ်နေတာကို ပိုပြီး အကူအညီပေးနိုင်မယ့် နည်းလမ်းတွေရှာဖို့နဲ့ အစိုးရကို လွှတ်တော် ကိုယ်စားလှယ်တွေနဲ့ တိုက်ရိုက်ညှိနှိုင်းဆောင်ရွက်ရေး တိုက်တွန်းသွားဖို့နဲ့ ဖွံ့ဖြိုးတိုးတက်ရေးနဲ့ နည်းပညာအကူအညီအတွက် လိုအပ်ချက်တွေကို ထောက်ပံ့ပေးသွားဖို့နဲ့ နိုင်ငံမှာ လိုအပ်နေတဲ့ စာနာထောက်ပံ့ရေးတွေအတွက် အကူညီပေးသွားဖို့လည်း The Elders အဖွဲ့က အကြံပေးထားပါတယ်။

နိုဘယ်လ်ဆုရှင်များရဲ့The Elders အဖွဲ့မှ ဒေါ်အောင်ဆန်းစုကြည် အနားယူရမည်


ငြိမ်းချမ်းရေး နိုဘယ်လ်ဆုရှင်တွေ၊ ကမ္ဘာ့ခေါင်းဆောင်တွေနဲ့ စုဖွဲ့ထားတဲ့ လက်ရှိ The Elders အဖွဲ့မှာ ဂုဏ်ထူးဆောင် အဖွဲ့ဝင်တစ်ဦးဖြစ်သူ ဒေါ်အောင်ဆန်းစုကြည်ဟာ လွှတ်တော်နိုင်ငံရေးထဲ မကြာခင် ၀င်ရောက်တော့မှာ ဖြစ်တာကြောင့် The Elders အဖွဲ့ရဲ့ မူဝါဒစည်းမျဉ်းအရ အဲဒီနေရာကနေ အနားယူရတော့မှာ ဖြစ်တယ်လို့ မနေ့က ကြေညာချက် ထုတ်ပြန်လိုက်ပါတယ်။

တရုတ် ကြေးနီကုမ္ပဏီကို ရွာလုံးကျွတ် ဆန္ဒပြ


မုံရွာခရိုင်၊ ဆားလင်းကြီးမြို့နယ်၊ ဆည်တဲ ကျေးရွာမှာ မနေ့က ရွာလုံးကျွတ် ဆန္ဒပြပွဲ တစ်ရပ် ဖြစ်ပွားခဲ့တယ်လို့ သတင်းရရှိပါတယ်။ ကြေးနီစီမံကိန်းမှာ လုပ်ကိုင်နေတဲ့ တရုတ်ကုမ္ပဏီ တစ်ခုက ဆည်တဲကျေးရွာက လယ်ယာမြေတွေပေါ်မှာ စီမံကိန်း ဘေးထွက်ပစ္စည်းတွေ လာရောက် စွန့်ပစ်တဲ့အတွက် ဒေသခံ တောင်သူတွေက တားဆီး ဆန္ဒပြခဲ့ကြပါတယ်။
စွန့်ပစ်ပစ္စည်းတွေ လာရောက် စုပုံတဲ့ တရုတ်ကုမ္ပဏီ ကားကိုလည်း ဘုန်းကြီးကျောင်းထဲကို ခေါ်ယူလာပြီး ၀ိုင်းဝန်း ကန့်ကွက်ခဲ့ကြတယ်လို့ ဆည်တဲရွာသူတစ်ဦးက ပြောပါတယ်။
အဲဒီလို ဆန္ဒပြ ကန့်ကွက်နေကြစဉ်အတွင်း ဆားလင်းကြီးမြို့ နယ် ရဲစခန်းမှူးနဲ့ ရဲတပ်ဖွဲ့ဝင်တွေ ရောက်ရှိလာပြီး ပစ်ခတ် လူစုခွဲရလိမ့်မယ်လို့ ခြိမ်းခြောက်ခဲ့ကြောင်း၊ ဆည်တဲရွာကိုလည်း ရဲက ၀ိုင်းထားဆဲ ဖြစ်ကြောင်းလည်း ဆည်တဲရွာသူက နောက်ဆုံးအခြေအနေကို ပြောဆိုခဲ့ပါတယ်။ဆည်တဲရွာဟာ တရုတ်ကုမ္ပဏီတစ်ခုက ဦးဆောင်လုပ်ကိုင်နေတဲ့ စီမံကိန်းနယ်မြေထဲမှာ ပါဝင်ပြီး သက်ဆိုင်ရာက ဖိအားပေး ပြောင်းရွေ့ခိုင်းထားတဲ့ ရွာတစ်ရွာလည်း ဖြစ်ပါတယ်။ ဒါပေမဲ့ ဒေသခံတွေက သူတို့ ဘိုးစဉ်ဘောင်ဆက် လုပ်ကိုင်လာတဲ့ ယာမြေတွေကို မစွန့်ခွာတဲ့အတွက် အခုလို ကားတွေနဲ့ လယ်ယာမြေပေါ်မှာ စီမံကိန်း ဘေးထွက်ပစ္စည်းတွေ လာရောက် စုပုံနေတာဖြစ်ကြောင်း ရွာသူရွာသားတွေက ပြောဆိုပါတယ်။
အလားတူ ပြီးခဲ့တဲ့ မတ်လဆန်းပိုင်းကလည်း ဆားလင်းကြီးမြို့နယ် ဒုန်းတော၊ ဂုဏ်တောနဲ့ ရွာသာရွာက တောင်သူတွေရဲ့ စိုက်ပျိုးခင်းတွေပေါ်မှာ မြန်မာယမ်စီ ကုမ္ပဏီက ကြေးနီလုပ်ငန်း စွန့်ပစ်မြေတွေ လာရောက် စုပုံခဲ့တဲ့အတွက် သီးနှံတွေပျက်စီးခဲ့တာကြောင့် ဒေသခံတောင်သူ (၈၀) လောက်က ကုမ္ပဏီရုံးကို သွားရောက် ကန့်ကွက် ဆန္ဒပြခဲ့ကြပြီး နိုင်ငံတော် သမ္မတထံကိုလည်း စာရေးသား တိုင်ကြားခဲ့ကြပါတယ်။
တရုတ်အမျိုးသားပိုင် မြန်မာယမ်စီ ကုမ္ပဏီဟာ မြန်မာ့စီးပွားရေး ဦးပိုင်လိမိတက်နဲ့ ကြေးနီ ထုတ်လုပ်ရေး ဖက်စပ်လုပ်ကိုင်နေတာ ဖြစ်ပါတယ်။

ဂျပန် ငါးလုပ်ငန်း မြန်မာကို စိတ်ဝင်စား


အခုအခါ ဂျပန် ပင်လယ်စာ သွင်းကုန်လုပ်ငန်းရှင်တွေ အတော်များများ မြန်မာနိုင်ငံဘက်ကို စိတ်ဝင်စားနေကြတယ်လို့ ဂျပန် ငါးလုပ်ငန်းဆိုင်ရာ သတင်းဌာနတစ်ခုက ဖော်ပြပါတယ်။

နာရေးအသင်း ဥက္ကဋ္ဌ ဦးကျော်သူ ပြည်သူ့ဂုဏ်ရည်ပွဲ တက်ရောက်မည်


မေလ (၂၇) ရက်နေ့ အမေရိကန်ပြည်ထောင်စု နယူးယောက်မြို့မှာ ကျင်းပမယ့် ပြည်သူ့ဂုဏ်ရည်ဆု ချီးမြှင့်ပွဲအခမ်းအနားကို မြန်မာနိုင်ငံက နာရေးကူညီမှုအသင်း ဥက္ကဋ္ဌ ဦးကျော်သူ တက်ရောက်မှာ ဖြစ်တယ်လိုို့ ပြည်သူ့ဂုဏ်ရည်အသင်းက မနေ့က အတည်ပြု ပြောဆိုပါတယ်။ 

LWIN PWIN
NLABR
Web-site:                   www.nlabr.com
Blog:                         http://wanna23-23.blogspot.com/

0 comments:

Post a Comment