ကမ္ဘာ့သတင်းများ 01/05/2012
နိုင်ငံတကာသတင်း
လူအခွင့်ရေးလှုပ်ရှားသူကိစ္စ ၀န်ကြီးကလင်တန် တရုတ်ကို သွားမည်
တရုတ်နိုင်ငံကို သွားရောက်ပြီး အဆင့်မြင့် ဆွေးနွေးမှုတွေ လုပ်ဆောင်ဖို့ ရှိနေတဲ့ အမေရိကန် နိုင်ငံခြားရေး ၀န်ကြီး ဟီလာရီ ကလင်တန် ရဲ့ ခရီးစဉ်မှာ နေအိမ်အကျယ်ချုပ်ကနေ ထွက်ပြေး လွတ်မြောက်ပြီး အမေရိကန် ရဲ့ အကာအကွယ်အောက်မှာ ရောက်နေတယ်လို့ သတင်းတွေ ထွက်နေတဲ့ တရုတ်မျက်မမြင် လူ့အခွင့်အရေး လှုပ်ရှားသူရဲ့ အရေးက လွှမ်းမိုးနေမယ့် အလားအလာ တွေ ရှိနေပါတယ်။
တနင်္လာနေ့နှောင်းပိုင်း ၀ါရှင်တန်က ထွက်ခွာချိန်မှာတော့ တရုတ် တက်ကြွ လှုပ်ရှားသူ Chen Guangcheng ကိစ္စနဲ့ ပတ်သက်လို့ ၀န်ကြီး ကလင်တန် က တစုံတရာ မှတ်ချက်ပေး ပြောဆိုတာမျိုး မရှိခဲ့ပါဘူး။ ဒါပေမဲ့ လည်း တရုတ်အစိုးရ တာဝန်ရှိသူတွေနဲ့ ဆွေးနွေးမှုတွေအတွင်း လူ့အခွင့်အရေး ကိစ္စ ဆွေးနွေးမှုတွေ ပါဝင်မယ်လို့တော့ ပြောဆိုခဲ့တာပါ။ တရုတ်မျက်မမြင် လှုပ်ရှားသူဟာ ဘေဂျင်းမြို့တော်မှာရှိတဲ့ အမေရိကန် သံရုံးကို ထွက်ပြေးသွားတယ် လို့ သတင်းတွေ ထွက်နေတာကြောင့် ဘယ်မှာရှိမလဲဆိုပြီး တနင်္လာနေ့မှာ တုန်းကလည်း သတင်းထောက်တွေရဲ့ အမေးကို သမ္မတ ဘရက်ခ် အိုဘားမား က ဖြေကြား မသွားပါဘူး။
အမေရိကန် နိုင်ငံခြားရေး ၀န်ကြီးဌာနရဲ့ အရှေ့အာရှနဲ့ ပစိဖိတ်ရေးရာ လက်ထောက် နိုင်ငံခြားရေး ၀န်ကြီး Kurt Campbell ကတော့ တနင်္ဂနွေနေ့ကတည်းက ဘေဂျင်းမြို့တော်ကို ရောက်နေပြီး၊ ကြာသပတေးနေ့မှာ စတင်မယ့် မဟာဗျူဟာနဲ့ စီးပွားရေးဆိုင်ရာ နှစ်စဉ် ဆွေးနွေးပွဲ မတိုင်မီ တက်ကြွ လှုပ်ရှားသူ Chen ကိစ္စကို တရုတ်အာဏာပိုင်တွေနဲ့ ပြောဆိုလိမ့်မယ်လို့လည်း မျှော်လင့်ရပါတယ်။
တရုတ် မျက်မမြင် လူ့အခွင့်အရေးလှုပ်ရှားသူ ကံကြမ္မာမရေရာ
ဘေဂျင်းမှာရှိတဲ့ အမေရိကန် သံရုံးထဲကို မစ္စတာ ချန် ထွက်ပြေး သွားခဲ့တယ်ဆိုတဲ့ အတည်မပြုနိုင်တဲ့ သတင်းတွေနေချိန်မှာပဲ မစ္စတာ ချန်ရဲ့ ကံကြမ္မာအတွက် စိုးရိမ်ပူပန်တဲ့အကြောင်း အမေရိကန် အစိုးရ အရာရှိတွေက ပြောခဲ့ကြပေမဲ့ ချန် ဘယ်မှာရှိနေသလဲ ဆိုတာနဲ့ပတ်သက်လို့တော့ တစုံတရာ မှတ်ချက်ပေးဖို့ သူတို့က ငြင်းဆိုပါတယ်။ အခု အခြေအနေနဲ့ပတ်သက်လို့ သတင်းတွေမှာ ဖော်ပြနေကြတာကို သူ သိရှိထားတဲ့အကြောင်းနဲ့ အမေရိကန်အနေနဲ့ တရုတ်နဲ့ ဆက်ဆံတိုင်းမှာ လူ့အခွင့်အရေး ကိစ္စက ပေါ်လာစမြဲပဲလို့ သမ္မတ အိုဘားမားက ပြောပါတယ်။
အမေရိကန်နဲ့ တရုတ်နိုင်ငံတို့ ဘေဂျင်းမြို့မှာ နှစ်နိုင်ငံ နှစ်ပတ်လည် ဆွေးနွေးမှုမတိုင်ခင် ရက်ပိုင်းအလိုမှာပဲ မစ္စတာ အိုဘားမားရဲ့ အခုလို ပြောဆိုလိုက်တာ ဖြစ်ပါတယ်။ ဆွေးနွေးမှုအတွင်း အမေရိကန် ကိုယ်စားလှယ် အဖွဲ့ကို နိုင်ငံခြားရေးဝန်ကြီး ကလင်တန် နဲ့ ဘဏ္ဍာရေးဝန်ကြီး တင်မိုသီ ဂိုက်သနာ (Timothy Geithner) တို့က ဦးဆောင်မှာ ဖြစ်ပါတယ်။ အရှေ့ အာရှဆိုင်ရာ အမေရိကန် ထိပ်တန်းသံတမန်တဦးဖြစ်တဲ့ ကဒ် ကမ့်ဘဲလ် (Kurt Campbell) ဟာ တနင်္ဂနွေနေ့က ဘေဂျင်းမြို့ကို ရောက်ရှိလာခဲ့ပြီး မစ္စတာ ချန်ရဲ့ကိစ္စနဲ့ပတ်သက်လို့ တရုတ်အစိုးရ အရာရှိတွေနဲ့ ဆွေးနွေးလိမ့်မယ်လို့ မျှော်လင့်ရပါတယ်။
အမေရိကန် အခြေစိုက် တရုတ် လူ့အခွင့်အရေး လှုပ်ရှားမှုအဖွဲ့တခုကတော့ မစ္စတာ ချန်ဟာ အမေရိကန်ရဲ့ ကာကွယ်စောင့်ရှောက်မှုအောက်မှာ ရှိနေပြီး ဒီကိစ္စနဲ့ပတ်သက်လို့ အမေရိကန်နဲ့ တရုတ်အစိုးရ အရာရှိတွေကြား ဆွေးနွေးနေတုန်းပဲလို့ ဆိုပါတယ်။
ဆီးရီးယား အကြမ်းဖက်မှု လူ ၂၀ သေ
ဆီးရီးယားအစိုး ရရဲ့ ဆာနား (SANA) သတင်းဌာနကလည်း အသေခံဗုံးခွဲအကြမ်းဘက်သမားတွေက လူအများအပြားသေဆုံးစေဖို့ ရည်ရွယ်ခဲ့ပေမယ့်၊ အနည်းဆုံး လူ (၉) ဦး သေဆုံးခဲ့ရ ပြီး လူ (၁၀၀) ကျော် ဒဏ်ရာတွေရရှိခဲ့တယ်လို့ ကြေညာပါတယ်။ ဒမတ်(စ်)ကပ်(စ်) (Damascus) မြို့တော်ကို ရောက်ရှိနေတဲ့ ကုလသမဂ္ဂရဲ့ စောင့်ကြည့် လေ့လာရေးအဖွဲ့တွေက ပျက်စီးသွားတဲ့ အဆောက်အအုံတွေကို လှည်လည်ကြည့်ရှု စစ်ဆေးခဲ့တယ်လို့လည်း ဆာနSANA သတင်းဌာနက ဆိုပါတယ်။ ဆီးရီးယား ဗဟိုဘဏ်ကိုလည်း RPG လောင်ချာဗုံးသီးတွေနဲ့ ပစ်ခတ် တိုက်ခိုက်ခဲ့ပေမယ့် အဆောက်အအုံသာ အနည်းငယ် ပျက်စီးခဲ့ပေမယ့်၊ လူအထိအခိုက် မရှိဘူးလို့ လည်း၊ SANA သတင်းဌာနက ဆိုပါတယ်။
ကင်းလှည့်နေတဲ့ ရဲတပ်ဖွဲ့ဝင်တွေကိုလည်း အကြမ်းဖက်သမားတွေက RPG လောင်ချာနဲ့ ပစ်ခတ်ခဲ့တဲ့ အတွက် ရဲလေးဦး ဒဏ်ရာတွေ ရရှိသွားခဲ့ တယ်လို့ ဆာနား (SANA) သတင်းဌာနက ထပ်ပြီးပြောခဲ့ပါတယ်။ မနေ့က ဧပြီ (၂၉)ရက်နေ့မှာ ဆီးရီးယားကို ရောက်ရှိလာတဲ့ ကုလ သမဂ္ဂရဲ့ စောင့်ကြည့်လေ့လာရေး အဖွဲ့ခေါင်းဆောင် နော်ဝေနိုင်ငံက ဗိုလ်ချုပ် ရောဘတ်မုဒ် (Major General Robert Mood) က အစိုးရတပ်တွေနဲ့ အတိုက် အခံတပ်တွေ တိုက်ခိုက် နေကြတာတွေကို နှစ်ဘက်လုံးရပ်ဆိုင်းပြီး အပစ်အခတ်ရပ်စဲရေး တည်တံ့နေအောင်လုပ်ဆောင်ကြဖို့၊ နှစ်ဘက်လုံးကို တောင်းဆိုခဲ့ ပြီး နောက်တစ်နေ့ မှာပဲ ဆီးရီးယားမှာ အကြမ်းဘက်တိုက်ခိုက်မှုအသစ်တွေ ဖြစ်ပေါ်ခဲ့တာပါ။
အိန္ဒိယသင်္ဘောနစ်မြုပ် လူ ၁၀၀ ကျော်သေ
အိန္ဒိယနိုင်ငံက အကြီးဆုံး မြစ်တစင်းဖြစ်တဲ့ ဗြဟ္မပုတ္တရမြစ်ထဲမှာ လူတွေကျပ်သိပ်ပြီး လိုက်ပါလာတဲ့ ကူးတို့သင်္ဘောတစင်း တိမ်းမှောက်ရာက ပျောက်ဆုံးနေသူ ၁၀၀ ကျော်ကို အရေးပေါ် ကယ်ဆယ်ရေး တွေ၊ ရေငုပ်သမားတွေက ရှာဖွေရေး လုပ်ငန်းတွေ ပြန်လည်စတင်လိုက်ပါတယ်။
အိန္ဒိယနိုင်ငံ အရှေ့မြောက်ဘက် ဒေသက ဗြဟ္မပုတ္တရမြစ်အတွင်း တနင်္လာနေ့မှာ ၂ ထပ် ကူးတို့ သင်္ဘော တိမ်းမှောက်ပြီး ထက်ပိုင်းကျိုးသွားရာက လူပေါင်း ၁၀၃ ယောက်ထက်မနည်း ရေနစ် သေဆုံးခဲ့ကြတာပါ။ သင်္ဘောနစ်မြုပ်စဉ် ဘင်္ဂလားဒေ့ရှ် နယ်စပ်အနီးမှာရှိတဲ့ Dhubri ခရိုင်မှာ ကိုယ့်ဘာသာ ရေကူးလွတ်မြောက်လာသူတွေနဲ့ ကယ်ဆယ်နိုင်သူ ခရီးသည် ၁၀၀ လောက် ရှိတယ်လို့ အာသံပြည်နယ် ရဲမှူးကြီးက ပြောပါတယ်။
နစ်မြုပ်သွားတဲ့ သင်္ဘောပေါ်မှာတော့ ခရီးသည် ၃၀၀ လောက်အပြင် ဆန်အိတ်တွေနဲ့ တခြား ကုန်တွေ အလွန်အကျွံ တင်ဆောင်လာခဲ့တာပါ။ ဒါပေမဲ့လည်း အသက်ကယ်လှေနဲ့ အကျီင်္တွေတော့ သင်္ဘော ပေါ်မှာ ပါမလာခဲ့ပါဘူး။ ဒီဒေသမှာ သိရလောက် မတော်တဆမှု ကြုံရတဲ့အထဲ အခု သင်္ဘော တိမ်းမှောက်မှု ဟာ အဆိုးရွားဆုံးလည်း ဖြစ်ပါတယ်။
မုတ်သုန်ရာသီအကြို မိုးရွာသွန်းမှုတွေနဲ့ လေပြင်း တိုက်ခတ်မှုတွေကြောင့် အရေးပေါ် ကယ်ဆယ်ရေး လုပ်ငန်းတွေမှာလည်း အဟန့်အတားတွေ ကြုံနေရတာပါ။ အိမ်နီးချင်း ဘင်္ဂလားဒေ့ရှ် နိုင်ငံတာဝန်ရှိသူ တွေကို ဆက်သွယ်ပြီး အသက်ရှင် ကျန်ရစ်သူတွေ ရှာဖွေနိုင်ရေး အကူအညီပေးဖို့ တောင်းဆိုထား တယ် လို့ အိန္ဒိယအာဏာပိုင်တွေက ပြောပါတယ်။
အိန္ဒိယ၀န်ကြီးချုပ် Manmohan Singh က အဖြစ်အပျက်ကြောင့် တုန်လှုပ် ခြောက်ခြား မိတဲ့ အကြောင်း ပြောဆိုခဲ့ပါတယ်။
LWIN PWIN
NLABR
Web-site: www.nlabr.com
Subscribe to:
Post Comments (Atom)
0 comments:
Post a Comment