ကာကွယ်ရေးဦးစီးချုပ် ဒုတိယဗိုလ်ချုပ်မှူးကြီး မင်းအောင်လှိုင်က မြန်မာနိုင်ငံအတွင်း အဓမ္မစေခိုင်းမှုတွေ ပပျောက်အောင် ဆောင်ရွက်ဖို့ တပ်မတော်ကို ညွှန်ကြားမယ်လို့ မြန်မာနိုင်ငံကို ခေတ္တရောက်နေတဲ့ ILO အုပ်ချုပ်ရေးအဖွဲ့ ဥက္ကဋ္ဌ Mr. Greg Vines ကို ကတိပေး ပြောဆိုလိုက်ကြောင်း သတင်းရရှိပါတယ်။
ဒါ့အပြင် လာမယ့် ၂၀၁၅ ခုနှစ်မှာ မြန်မာနိုင်ငံက အဓမ္မခိုင်းစေမှုတွေ လုံးဝ ပပျောက်အောင် ဆောင်ရွက်ဖို့ မြန်မာအစိုးရနဲ့ ILO ကြားမှာ သဘောတူခဲ့တယ်လို့လည်း သိရပါတယ်။
ဒါကြောင့် အဲဒီသဘောတူညီချက်အတိုင်း အပြည့်အဝ ဖြစ်မလာဘဲ ၂၀၁၅ အလွန်မှာ အဓမ္မခိုင်းစေမှုတွေ ဆက်လက်ရှိနေမယ်ဆိုရင် ILO အနေနဲ့ ဘယ်လိုဆောင်ရွက်မလဲလို့ ဦးသက်ဝေက မေးတဲ့အခါ ILO ရဲ့ လုပ်ထုံးလုပ်နည်း ဥပဒေဘောင်အတိုင်း အရေးယူမယ်လို့ ပြန်လည်ပြောဆိုကြောင်း ဦးသက်ဝေက ပြောပါတယ်။အလုပ်သမား၊ လယ်သမားအရေး ဆောင်ရွက်သူ မစုစုနွေးကတော့ ILO အုပ်ချုပ်ရေးအဖွဲ့ ဥက္ကဋ္ဌနဲ့ သီးခြားတွေ့ဆုံမှာဖြစ်ပြီး အဲဒီလိုတွေ့ဆုံတဲ့အခါ အဓမ္မခိုင်းစေမှုတွေ ပပျောက်ရေးအတွက် ပညာပေးအစီအစဉ်တွေကို မြန်မာ့ရုပ်မြင်သံကြားနဲ့ နိုင်ငံပိုင် မီဒီယာတွေကနေ အမြဲထုတ်လွှင့်ပေးအောင် ILO က မြန်မာအစိုးရကို တိုက်တွန်းဖို့ တင်ပြမယ်လို့ Mr. Vines နဲ့ မတွေ့ခင် မိနစ်ပိုင်းမှာ ပြောပါတယ်။
ILO အုပ်ချုပ်ရေးအဖွဲ့ ဥက္ကဋ္ဌ Mr. Greg Vines ဟာ မနေ့ကနဲ့ ဒီနေ့ နှစ်ရက်အတွင်း အလုပ်သမားအရေး ဆောင်ရွက်နေတဲ့ အဖွဲ့တွေ၊ လူပုဂ္ဂိုလ်တွေကို ရန်ကုန်မြို့ ထရိတ်ဒါးဟော်တယ်မှာ တွေ့ဆုံခဲ့ပါတယ်လို့သိရပါတယ်။

မြန်မာလွှတ်တော် ကိုယ်စားလှယ်များ ဂျာမဏီ လေ့လာရေးခရီး စတင်

ဂျာမဏီနိုင်ငံက လွှတ်တော်အစည်းအဝေးတွေကို တက်ရောက်လေ့လာဖို့ မြန်မာ လွှတ်တော်ကိုယ်စားလှယ်အဖွဲ့ဟာ ဒီကနေ့ မနက်ပိုင်းက ရန်ကုန် မင်္ဂလာဒုံလေဆိပ်ကနေ ထွက်ခွာသွားပါတယ်။
မြန်မာလွှတ်တော် ကိုယ်စားလှယ်တွေအတွက် ပထမဆုံး ဥရောပခရီးစဉ် ဖြစ်ပါတယ်။ ဒီအစီစဉ်ကို ဂျာမဏီနိုင်ငံက အဓိက နိုင်ငံရေးပါတီကြီး တခုဖြစ်တဲ့ LDP ပါတီနဲ့ နီးစပ်တဲ့ Friedrich Naumann Foundation က ဖိတ်ခေါ်ခဲ့တာ ဖြစ်တယ်လို့ ခရီးစဉ်မှာ လိုက်ပါသွားတဲ့ ရခိုင် တိုင်းရင်းသားများ တိုးတက်ရေးပါတီ ဥက္ကဋ္ဌ အမျိုးသားလွှတ်တော် ကိုယ်စားလှယ် ဒေါက်တာ အေးမောင်က အခုလို ပြောပါတယ်။
" ဒီခရီးစဉ်ကတော့ FNF ကဖိတ်တာ၊ Friedrich Naumann Foundation ကဖိတ်တာ၊ အဲဒီဖိတ်စာလေးပြပြီးတော့မှ ခွင့်ပြုချက်နဲ့ သွားကြတာပါ။ ဂျာမန်ပါလီမန် ကျင်းပတဲ့ကာလလို့ ပြောတယ်ဗျ။ အဲဒီမှာ လေ့လာဖို့ရှိတယ်။ နောက် ခရီးသွား ဆက်ဆံရေးနဲ့ ပတ်သက်တဲ့ ဝန်ကြီးဌာန သူတို့လိုက်ပြတဲ့ နေရာလေးတွေကို လိုက်လေ့လာကြမှာပါ"
ဒေါက်တာအေးမောင်နဲ့အတူ ရှမ်းတိုင်းရင်းသားများ ဒီမိုကရေစီပါတီ SNDP က ဦးစိုင်းအိုက်ပေါင်း၊ ပြည်ခိုင်ဖြိုးပါတီက ဦးဝင်းဦး၊ ဦးဝင်းသန်း၊ ဦးအေးမောက်၊ အမျိုးသားဒီမိုကရေစီ အဖွဲ့ချုပ် NLD ပါတီက ဦးမင်းဦးနဲ့ ဒေါက်တာလှမြတ်ဒွေးတို့ ပါဝင်ကြမှာ ဖြစ်ပါတယ်။
မြန်မာလွှတ်တော် ကိုယ်စားလှယ်တွေရဲ့ ဂျာမဏီခရီးစဉ်ဟာ သီတင်းတစ်ပတ် ကြာမြင့်မှာ ဖြစ်တယ်လို့ ဒေါက်တာအေးမောင်က ပြောပါတယ်။

ကမ္ဘာ့ အမျိုးသမီးရေးဆိုင်ရာ အမေရိကန်သံအမတ်ကြီး Melanne Verveer မြန်မာနိုင်ငံကို သွားမည်

ငြိမ်းချမ်းရေးနဲ့ တိုးတက်ဖွံ့ဖြိုးရေးအတွက် မြန်မာ့အမျိုးသမီးတွေရဲ့အခန်းကဏ္ဍကို လေ့လာဖို့ အမေရိကန်အစိုးရရဲ့ ကမ္ဘာ့ အမျိုးသမီးရေးရာ သံအမတ်ကြီး Melanne Verveer ဟာ လာမယ့် သီတင်းပတ်အတွင်း မြန်မာနိုင်ငံကို သွားရောက်မှာ ဖြစ်ပါတယ်။
သူ့ခရီးစဉ်အတွင်း အမျိုးသားဒီမိုကရေစီ အဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည် အပါအ၀င် အမျိုးသမီးရေး လှုပ်ရှားနေသူတွေ၊ တိုင်းရင်းသား အမျိုးသမီးအဖွဲ့အစည်းတွေနဲ့ တွေ့ဆုံဖို့ ရှိပါတယ်။
ဒါအပြင် နေပြည်တော်မှာ ရုံးစိုက်တဲ့ မြန်မာအစိုးရ တာဝန်ရှိသူတွေနဲ့ တွေ့ဆုံပြီး အမျိုးသမီးထု ကျန်းမာရေး၊ ပညာရေးနဲ့ စီးပွားရေးကဏ္ဍတွေ ဆွေးနွေးမှာဖြစ်သလို အမျိုးသမီး အခွင့်အရေးဆိုင်ရာတွေကိုလည်း ထည့်သွင်းဆွေးနွေးမှာ ဖြစ်တယ်လို့ မနေ့က ထုတ်ပြန်တဲ့ အမေရိကန် နိုင်ငံခြားရေးဌာနရဲ့ကြေညာချက်မှာ ဖော်ပြထားပါတယ်။
သံအမတ်ကြီး Melanne Verveer ရဲ့ ခရီးစဉ်ဟာ မေလ ၆ ရက်နေ့ ကနေ ၁၁ ရက်နေ့ထိ ကြာမြင့်မှာဖြစ်ပြီး ထိုင်းနိုင်ငံ ချင်းမိုင်မြို့မှာ အခြေစိုက်တဲ့ ရှမ်းတိုင်းရင်းသူ အမျိုးသမီးအဖွဲ့အစည်းတွေနဲ့လည်း တွေ့ဆုံဖို့ ရှိပါတယ်။

ဒီကေဘီအေ ခေါင်းဆောင်ကို လွဲပြောင်းပေးဖို့ မြန်မာအစိုးရကို ထိုင်း တောင်းဆို

တိုးတက်သော ဗုဒ္ဓဘာသာ ကရင်အမျိုးသားတပ်မတော် ( DKBA ) ခေါင်းဆောင် ဗိုလ်နှုတ်ခမ်းမွှေး ခေါ် ဗိုလ်မှူးချုပ် စောလားပွယ်ကို မူးယစ်ဆေးဝါးမှုနဲ့ ထိုင်းနိုင်ငံမှာ တရားရင်ဆိုင်ရေးအတွက် လွဲပြောင်းပေးဖို့ ထိုင်း ဒုတိယ ၀န်ကြီးချုပ်က မြန်မာအစိုးရကို တောင်းဆိုလိုက်ကြောင်း The Nation သတင်းစာက ဖော်ပြပါတယ်။
ပြီးခဲ့တဲ့လက ထိုင်းအစိုးရက မူးယစ်ရာဇာ ၂၅ ဦးကို အလိုရှိသူစာရင်း ထုတ်ပြန်လိုက်ပြီး ဆုငွေ ဘတ် (၁၀) သိန်း ပေးမယ်လို့ ကြေညာခဲ့ရာမှာ ဒီကေဘီအေ ခေါင်းဆောင် ဗိုလ်မှူးချုပ် စောလားပွယ်ရဲ့အမည်လည်း ပါဝင်ခဲ့ပါတယ်။
ဒါပေမဲ့ သက်သေအထောက်အထား မပြည့်စုံရင် ထိုင်းတရားရုံးက လက်ခံမှာမဟုတ်လို့ အခုလို ဆင့်ခေါ်ရတာ ဖြစ်ကြောင်း ထိုင်း ဒု ၀န်ကြီးချုပ် Chalerm Yoobam-rung က မနေ့က ပြောဆိုခဲ့ပါတယ်။
ဗိုလ်မှူးချုပ် စောလားပွယ်ကလည်း သက်သေအထောက်အထား အမှန်သိရအောင် မိမိတို့ဆီကို ထိုင်း ကိုယ်စားလှယ်အဖွဲ့စေလွှတ်ဖို့နဲ့ သက်သေမခိုင်လုံရင် မိမိအမည်ကို စာရင်းထဲက ပယ်ဖျက်ဖို့ တုံ့ပြန်ပြောဆိုခဲ့ပါတယ်။ ဒါပေမဲ့ ထိုင်း ဒု ၀န်ကြီးချုပ်က နာမည်ပယ်ဖျက်ဖို့အတွက် ထိုင်းရုံးတော်မှာ ဗိုလ်နှုတ်ခမ်းမွှေးကိုယ်တိုင် လာရောက်ရှင်းလင်းရမယ့် ကိစ္စဖြစ်ကြောင်း၊ ဘာကြောင့်လည်းဆိုတော့ လွန်ခဲ့တဲ့ ၉ နှစ်က ထိုင်းနိုင်ငံထဲမှာ မူးယစ်ဆေး ရာဇ၀တ်မှု ကျူးလွန်ခဲ့လို့ ဖြစ်ကြောင်း ပြောဆိုပါတယ်။
အခုအခါ ထိုင်း မြန်မာနယ်စပ်ဂိတ် ၁၂ ခုကို ဒီကေဘီအေက ပိတ်ဆို့ထားလိုက်ပြီး တချို့နေရာတွေမှာ မြန်မာဈေးသည်တွေက်ို ထိုင်းဘက်အ၀င်မခံဘူးလို့ ဆိုပါတယ်။ ထိုင်း နိုင်ငံခြားရေးဌာနကတော့ ထိုင်း မြန်မာ နယ်စပ်ကုန်သွယ်ရေးဟာ ပုံမှန်အခြေအနေမှာရှိနေပြီး ဗိုလ်နှုတ်ခမ်းမွှေးကိစ္စဟာ နယ်စပ်ကုန်သွယ်ရေးအပေါ် မထိခိုက်ဘူးလို့ ဆိုပါတယ်။
နယ်စပ်ဂိတ် ပိတ်တယ်ဆိုတာဟာလည်း အစိုးရတစ်ရပ်ကသာ တရားဝင် ပိတ်နိုင်တာ ဖြစ်ပါတယ်လို့လည်း ကြေညာချက်မှာ ဖော်ပြပါတယ်။ ဒီအတွင်း မြန်မာနိုင်ငံဘက်ကို မသွားရောက်ကြဖို့ နယ်စပ်ဒေသခံတွေကို ထိုင်းစစ်တပ်က သတိပေးထားပါတယ်။

အထက်ဗမာပြည် ဗကသများအဖွဲ့ချုပ် ဖြစ်မြောက်ရေး ကော်မတီ ရန်ပုံငွေဈေးရောင်းပွဲ ကျင်းပ

ကျောင်းသားသမဂ္ဂအဖွဲ့ခွဲတွေ တည်ထောင်ဖို့ ရည်ရွယ်ပြီး အထက်ဗမာပြည် ဗကသများအဖွဲ့ချုပ် ဖြစ်မြောက်ရေး ကော်မတီက မန္တလေးမြို့ မန္တလေး တက္ကသိုလ်အနီး ဗောဓိကုန်းဘုရားက ကဆုန်ညောင်ရေသွန်းပွဲမှာ ရန်ပုံငွေဈေးရောင်းပွဲ တစ်ရပ် ကျင်းပခဲ့ပါတယ်။အဲဒီမှာ အစားအသောက်နဲ့ ဗကသများအဖွဲ့ချုပ် တံဆိပ်ပုံပါ တီရှပ်တွေ ရောင်းချခဲ့တယ်လို့ ပြန်ကြားရေးတာဝန်ခံ ကိုအောင်ကျော်မိုးက အခုလိုပြောပါတယ်။
" ဒီမန္တလေး ဗောဓိကုန်းဘုရားမှာ နှစ်တိုင်းညောင်ရေသွန်းပွဲ ရှိတယ်။ အဲဒီပွဲမှာ အစားအသောက်နဲ့ ဗကသအင်္ကျီပေါ့နော်။ အဲတာကို ကျွန်တော်တို့က လက်မှတ်တစ်စောင်ကို ၅၀၀ နဲ့ရောင်းတယ်။ အမြတ်အစွန်းကတော့ ကျွန်တော်တို့ နှစ်သိန်း လောက်တော့ရမယ်လို့ ထင်ပါတယ်။ ဒီမနက်ကတည်းကနေ စပြီးတော့ ကျောင်းသားသမဂ္ဂ သီချင်းတွေဖွင့်ထားပါတယ်"
အဲဒီ ဈေးရောင်းပွဲက ရတဲ့ ရန်ပုံငွေကို ကျောင်းသားသမဂ္ဂ အဖွဲ့ခွဲတွေ တည်ထောင်ဖို့ ဆောင်ရွက်တဲ့အခါ အသုံးပြုမှာဖြစ်သလို လာမယ့် ဇူလိုင်လ ၇ ရက်နေ့ နှစ်ပတ်လည် အခမ်းအနား ကျင်းပတဲ့အခါမှာလည်း အသုံးပြုဖို့ ရည်ရွယ်ထားတယ်လို့ ပြောပါတယ်။

သုံးခွမြို့နယ် ရွာ ၆၀ ကျော် သောက်သုံးရေ စိုးရိမ်ဖွယ် ရှားပါး

ရန်ကုန်တောင်ပိုင်းခရိုင်၊ သုံးခွမြို့နယ် မုတ္တမပင်လယ်ကွေ့အနီးက ကျေးရွာပေါင်း ၆၀ ကျော်မှာ သောက်သုံးရေ ရှားပါးခက်ခဲနေတာ တစ်လကျော် ကြာသွားပြီဖြစ်ပေမဲ့ အခုထိ အကူအညီ အလုံအလောက် မရရှိဘဲ ဖြစ်နေပါတယ်။

ထိုင်းစက်ရုံမှ မြန်မာအလုပ်သမားများ ယာယီနိုင်ငံကူးလက်မှတ်ကိစ္စ ဆန္ဒပြနေ

ထိုင်းနိုင်ငံအလယ်ပိုင်း၊ အယုဒ္ဓယခရိုင်၊ ဝမ်းနွဲ့ဒေသရှိ လယ်ယာစက်မှု ပစ္စည်းထုတ်လုပ်တဲ့ Fly Star စက်ရုံမှာရှိတဲ့ မြန်မာရွှေ့ပြောင်း အလုပ်သမား (၂၂) ဦးဟာ သူတို့ရဲ့ ယာယီပတ်စပို့ဖိုးအတွက် လုပ်အားခထဲက ဖြတ်တောက်ခဲ့တာ ကြေသွားပြီဖြစ်ပေမယ့် သူတို့ပိုင်ဆိုင်တဲ့ ပတ်စပို့ကို လုပ်ငန်းရှင်ဖြစ်သူက ပြန်ထုတ်မပေးတဲ့အတွက် အလုပ်မဆင်းဘဲ ဆန္ဒပြနေတယ်လို့ သိရပါတယ်။နှစ်နိုင်ငံ နားလည်မှုစာချွန်လွှာ MOU နဲ့ လာရောက်အလုပ်လုပ်ကိုင်နေတဲ့ ဒီအလုပ်သမားတွေဟာ သူတို့ရဲ့ ယာယီပတ်စပို့ဖိုး ကုန်ကျငွေကို လုပ်အားခထဲကနေ တလ ၄၀၀၀ ဖြတ်ခဲ့တာမှာ ပြည့်ပြီးခဲ့ပေမယ့် အခုအချိန်အထိ ပတ်စ်ပို့ကို လုပ်ငန်းရှင်က ထုတ်မပေးပဲ နေတာဖြစ်ပါတယ်။ ဒါကြောင့် အပြင်ထွက်တဲ့အခါ ရဲကစစ်လို့ ပတ်စပို့ မိတ္တူပဲ ပြနိုင်တဲ့အတွက် တခါဖမ်းရင် ဘတ်ငွေ (၅၀၀) ပေးရနေရတာကြောင့် မနေ့ကတည်းကစပြီး အလုပ်မဆင်းဘဲ ဆန္ဒပြနေကြတာ ဖြစ်ပါတယ်လို့ အလုပ်သမားတဦးဖြစ်တဲ့ ကိုတင်လင်းစိုးက အခုလိုပြောပါတယ်။
“စာချုပ်ထဲက အတိုင်းလည်း မဖြတ်ဘူး။ ကျွန်တော်တို့ကို ဒီမှာ သူတို့တောင်းတဲ့အတိုင်း ပေးလိုက်တယ်။ တလ ၄၀၀၀ နူန်း ပေးလိုက်တယ်။ သူဌေးကပြောတယ်ခင်ဗျ။ ပတ်စပို့ဖိုး ၁၂၅၀၀ ဖြတ်မယ်။ ၄ လနဲ့ အကြေဖြတ်မယ်။ ၁၅ ရက် တပတ်ကို ၂၀၀၀ ပေါ့။ သူကအဲလို ပတ်စပို့ပေးကိုင်မယ်။ သူကိုယ်တိုင်က ပြောခဲ့တာ။ ကျွန်တော်တို့လည်း ကြိုးစားပြီး လုပ်ခဲ့တယ်ပေါ့နော်။ ပတ်စပို့ ရမှာဆိုတော့ တအားပျော်တယ်ပေါ့နော်။ ဒါပေမယ့်လို့ သူက သူပြောတဲ့ ကတိအတိုင်းလည်း ဖြစ်မလာဘူး ပတ်စပို့လည်း ပေးမကိုင်တော့ဘူး ”
အလုပ်သမားတွေကို ပတ်စပို့်ဖိုး ဘတ်ငွေ ၁၂၅၀၀ ကုန်ကျမယ်ဆိုပြီး ကော့သောင်းမြို့မှာ ပြီးခဲ့တဲ့နှစ် ဇူလိုင် ၂၁ ရက်ကတည်းက စာချုပ်ချုပ် ခေါ်ဆောင်လာခဲ့တာ ဖြစ်ပါတယ်။ ဒါကြောင့် အလုပ်သမားတွေဟာ ၁၅ ရက် တပတ်အတွက် ဘတ်ငွေ ၂၀၀၀ စီကို ကျေအောင်ပေးခဲ့ပြီး ဖြစ်ပါတယ်။
မနေ့ကတော့ ဖူးချွေကမ်းလို့ခေါ်တဲ့ မန်နေဂျာ ရောက်လာပြီး ပတ်စပို့လိုချင်ရင် ပိုက်ဆံထပ်ပေးရမယ်လို့ ပြောဆိုခဲ့ပြီး ဒီကနေ့မှာတော့ အလုပ်ကြပ်တယောက်က အလုပ်မဆင်းရင် ရဲနဲ့ဖမ်းခိုင်းမယ်လို့ အလုပ်ရှင်က ပြောခိုင်းကြောင်း အလုပ်သမားတဦးဖြစ်တဲ့ ကိုကျော်ဇင်ကိုက အခုလိုပြောပါတယ်။
“မနေ့က ဖူးချွေကမ်းက လာပြန်ပြောတယ်။ ပတ်စပို့လိုချင်ရင် ပိုက်ဆံနောက်ထပ် ၆၇၆၀ ထပ်ပေးရမယ်တဲ့။ အဲဒါဆို ပတ်စပို့ပေးမယ်တဲ့။ ကျွန်တော်တို့က ဖမ်းရင်တော့ တအုပ်လုံး လိုက်သွားမှာပဲ။ လိုက်သွားပြီးတော့ ဖြစ်ပျက်သမျှကိစ္စ အဲဒီမှာပဲ ထပ်ရှင်းရမှာပဲ”
စာချုပ်ပါအတိုင်း အလုပ်သမားတွေရဲ့ နစ်နာကြေးလည်း မပေးကြောင်း သူတို့ လုပ်ဖော်ကိုင်ဘက်တယောက် ကြုံတွေ့ရပုံကိုလည်း ကိုကျော်ဇင်ကိုက အခုလိုပြောပါတယ်။
“လူတယောက် လက်တွေ ခြေထောက်တွေ ထိခိုက်ဒဏ်ရာရလို့ရှိရင် စာချုပ်ထဲမှာ လျှော်ကြေးရမယ်။ လက်တဆစ်ဆို ၁သိန်းရမယ်။ အခုကျွန်တော်တို့ထဲက ဗမာထဲက လူတယောက်က လက် ၃ ချောင်း ပြတ်ထားတယ်။ လျှော်ကြေးတခုမှ မရဘူး။ သူတို့ လျစ်လျူရှုထားတယ်”
အလုပ်မဆင်းတဲ့ရက်ဆိုရင် (၂) ရက်စာ လုပ်အားခ ဖြတ်တောက်ခံရတယ်လို့လည်း အလုပ်သမားတွေက ပြောဆိုကြပါတယ်။