မြန်မာ သတင်းများ  စက်တင်ဘာ   ၂၇ ၊ ၂၀၁၂

သမ္မတ ဦးသိန်းစိန်နှင့် အမေရိကန်နိုင်ငံခြားရေးဝန်ကြီး တွေ့ဆုံဆွေးနွေး

မြန်မာနိုင်ငံကနေ အမေရိကန်နိုင်ငံကို ကုန်ပစ္စည်း တင်သွင်းခွင့် ပိတ်ပင်ထားမှုတွေကို လျော့ပေါ့ပေးဖို့ ဆောင်ရွက်သွားမှာ ဖြစ်တယ်လို့ အမေရိကန် နိုင်ငံခြားရေးဝန်ကြီး ဟီလာရီ ကလင်တန်က ပြီးခဲ့တဲ့ နာရီပိုင်းအတွင်းကပဲ ပြောကြားလိုက်ပါတယ်။
အမေရိကန်ပြည်ထောင်စု နယူးယောက်မြို့မှာ ကျင်းပနေတဲ့ ၆၇ ကြိမ်မြောက် ကုလသမဂ္ဂ အထွေထွေညီလာခံကို တက်ရောက်ဖို့ ရောက်ရှိနေတဲ့ သမ္မတ ဦးသိန်းစိန်နဲ့ အမေရိကန် နိုင်ငံခြားရေးဝန်ကြီး ဟီလာရီ ကလင်တန်တို့ ပြီးခဲ့တဲ့ နာရီပိုင်းအတွင်းက သမ္မတ တည်းခိုနေတဲ့ New York မြို့ ၇၇ လမ်းပေါ်က The Mark Hotel မှာ တစ်နာရီကြာ တွေ့ဆုံဆွေးနွေးပြီးတဲ့နောက် မစ္စ ဟီလာရီ ကလင်တန်က အခုလို ပြောကြားလိုက်တာ ဖြစ်ပါတယ်။
သမ္မတ ဦးသိန်းစိန်ဟာ ဟီလာရီ ကလင်တန်နဲ့ မတွေ့ဆုံခင် နေ့လည်ပိုင်းက အမေရိကန် သမ္မတဟောင်း ဘီလ်ကလင်တန်နဲ့ The Mark Hotel မှာ တစ်နာရီနီးပါးခန့် တွေ့ဆုံဆွေးနွေးခဲ့ပါတယ်။
သမ္မတဟာ အမေရိကန်သမ္မတဟောင်းနဲ့ တွေ့ဆုံအပြီးမှာ အမေရိကန်နိုင်ငံကို ရောက်ရှိနေတဲ့ ထိုင်းဝန်ကြီးချုပ် ယင်လပ်ရှင်နာဝပ်ထရာ၊ အမေရိကန် နိုင်ငံခြားရေးဝန်ကြီးဟောင်း ဟင်နရီ ကစ်ဆင်ဂျားတို့နဲ့ တွေ့ဆုံခဲ့ပြီး ညနေ ၆ နာရီမှာတော့ အမေရိကန် နိုင်ငံခြားရေးဝန်ကြီး ဟီလာရီ ကလင်တန်နဲ့ တွေ့ဆုံခဲ့တာ ဖြစ်ပါတယ်။
သမ္မတ ဦးသိန်းစိန်ဟာ မနက်ဖြန်မနက်ပိုင်းမှာ ၆၇ ကြိမ်မြောက် ကုလသမဂ္ဂ အထွေထွေညီလာခံမှာ မိန့်ခွန်းပြောမှာဖြစ်ပြီး နေ့လည်ပိုင်းမှာတော့ အမေရိကန် အာဆီယံ စီးပွားကောင်စီနဲ့ တွေ့ဆုံဆွေးနွေးမှာ ဖြစ်ပါတယ်။
ညနေပိုင်းမှာတော့ သမ္မတဟာ Asia Society မှာ ကျင်းပမယ့် ဆွေးနွေးပွဲကို တက်ရောက်မှာ ဖြစ်ပါတယ်။ စက်တင်ဘာလ ၂၉ ရက်နေ့ ည ၇ နာရီမှာ သမ္မတ ဦးသိန်းစိန်ဟာ နယူးယောက်မြို့ကနေ မြန်မာနိုင်ငံကို ပြန်လည်ထွက်ခွာမှာ ဖြစ်ပါတယ်။

မြန်မာ့ပို့ကုန်ပိတ်ပင်မှု အမေရိကန် ရုပ်သိမ်းမည်

ကုလသမဂ္ဂအထွေထွေညီလာခံမှာ မိန့်ခွန်းပြောဖို့အတွက် နယူးယောက်မြို့မှာ ရောက်ရှိနေတဲ့ သမ္မတ ဦးသိန်းစိန်ဟာ မကြာခင်အချိန်ပိုင်းကပဲ အမေရိကန်နိုင်ငံခြားရေးဝန်ကြီး ဟီလာရီကလင်တန်နဲ့ တွေ့ ဆုံခဲ့ပါတယ်။ ဗုဒ္ဓဟူးနေ့ အစောပိုင်းတုန်းကလည်း သမ္မတဦးသိန်းစိန်ဟာ ကမ္ဘာတဝှမ်း ပရဟိတ လုပ်ငန်းတွေလုပ်နေတဲ့ Clinton Global Initaitive အဖွဲ့ဥက္ကဋ္ဌ အမေရိကန် သမ္မတဟောင်း ဘီလ်၊ ကလင်တန်၊ အမေရိကန် နိုင်ငံခြားရေးဝန်ကြီးဟောင်း ဟင်နရီ ကစ်ဆင်ဂျာ၊ ထိုင်းဝန်ကြီးချုပ် ယင်းလပ် ရှင်နာဝပ်တို့နဲ့ တွေ့ဆုံဆွေးနွေးခဲ့ပါတယ်။ အခုလို တွေ့ဆုံခဲ့ရာ သမ္မတဦးသိန်းစိန် တည်းခိုတဲ့ ဟိုတယ်လ်မှာပဲ ဗွီအိုအေ မြန်မာပိုင်းက သွားရောက်ပြီးတော့ သတင်းယူနေတဲ့ ဦးရော်နီညိမ်းကို မေးမြန်းတင်ပြထားပါတယ်။

မေး။ ။ ဦးရော်နီရေ့- သမ္မတဦးသိန်းစိန်နဲ့ တွေ့ဆုံမှုကို ဦးရော်နီမြင်ရ သိရတာတွေ ပြောပြပေးပါ အုံးရှင်။

ဖြေ။ ။ ဟုတ်ကဲ့။ အခု နောက်ဆုံးတွေ့ဆုံမှုကတော့ အရေးအကြီးဆုံးပဲပေါ့နော်။ အဲဒီကနေပဲ စပြော လိုက်ပါမယ်။ အခု မိနစ်ပိုင်းကလေးကပဲ နိုင်ငံခြားရေးဝန်ကြီး ဟီလာရီကလင်တန် ပြန်လည် ထွက်ခွာ သွားခဲ့ပါပြီ။ သူက ဝန်ကြီးလေးဦးပါဝင်တဲ့ သမ္မတဦးသိန်းစိန်အဖွဲ့နဲ့ မိနစ် လေးဆယ်လောက် ဆွေးနွေး သွားပါတယ်။ အဲဒီတော့ ပြီးလို့ရှိရင် ဘာတွေ ပြောလဲဆိုတာ အကျဉ်းချုပ်ပြောပြမယ်ဆိုပြီး သံ အမတ်ကြီး ဦးသန်းဆွေက ပြောခဲ့တဲ့အတိုင်းပဲ ပြန်ပြောပြပါတယ်။

သူ ပြောတဲ့ အဓိက နှစ်ချက်က မြန်မာနိုင်ငံမှာ ပြုပြင်ပြောင်းလဲရေးတွေ လုပ်နေတာတွေကို အသိ အမှတ်ပြု ချီးကျူးတယ်၊ နောက်တခုက လူ့အခွင့်အရေးတိုးတက်မှု ရှိလာတာတွေလည်း အသိ အမှတ်ပြု ချီးကျူးတယ်။ ပြီးတော့ လူ့အခွင့်အရေးနဲ့ ပတ်သက်တဲ့ Workshop ကြီးတခုကို အမေရိကန် အစိုးရကနေပြီးတော့မှ ကမကထပြုပြီး မြန်မာနိုင်ငံမှာ လာကျင်းပပေးချင်တယ် ဆိုတာကို ပြောတယ် ဆိုပြီးတော့ သံအမတ်ကြီး ဦးသန်းဆွေက ကျနော်တို့ကို ပြန်ရှင်းပြခဲ့ပါတယ်။

ဒါပေမဲ့လည်း ဝန်ကြီးဟီလာရီကလင်တန်နဲ့အတူ လိုက်ပါလာတဲ့ နိုင်ငံခြားသတင်း ဌာ နတွေ ပြန် ပြောပြတာကတော့ အရေးအကြီးဆုံးအချက်ပေါ့နော်။ မြန်မာနိုင်ငံကနေပြီးတော့ အမေရိ ကန် ပြည်ထောင်စုကို ရောင်းချဖို့ ပိတ်ပင်ထားတဲ့ ပို့ကုန်တွေ ပိတ်ပင်ထားမှုကို ရုပ်သိမ်း လိုက်တော့ မယ် ဆိုတာကို နိုင်ငံခြားသတင်းထောက်တွေဆီကနေ တဆင့် ပြန်သိရပါတယ်။ အဲဒါ ကတော့ ကျနော်တို့ မြန်မာအစိုးရအဖွဲ့ ဝန်ကြီးတွေနဲ့ သံအမတ်ကြီးတို့ကတော့ ကျနော်တို့ကို မပြော သွားပါဘူး။ အဲဒါကတော့ အကြောင်းရှိပါလိမ့်မယ်။ ဒါပေမဲ့ ရိုက်တာအပါအဝင် တခြားသတင်းဌာနတွေ ကတော့ ပြောသွားပါပြီ။

မေး။ ။ ဟုတ်ပါပြီ။ ဦးရော်နီ-

ဖြေ။ ။ အဲဒါကတော့ ဟီလာရီကလင်တန်နဲ့ပတ်သက်ပြီး သိရတဲ့ ကိစ္စပါ။

မေး။ ။ ဟုတ်ပါပြီ၊ ဦးရော်နီ။ အဲဒီတော့ ဟီလာရီကလင်တန်နဲ့တွေ့တဲ့အခါမှာ ဒီလိုမျိုး တိုးတက်မှုတွေ ကိုတော့ သိရပြီပေါ့လေ။ ဒီကနေ့ကတော့ အမေရိကန်မှာ အခုလောလောဆယ်က ဗုဒ္ဓဟူးနေ့ပဲ ရှိသေး တယ်။ ဒီနေ့ ဗုဒ္ဓဟူးနေ့မှာ သမ္မတဦးသိန်းစိန်နဲ့ တွေ့တဲ့သူတွေထဲမှာ အခုနက ဦးရော်နီညိမ်း ပြောသွား သလိုပဲ အမေရိကန်နိုင်ငံခြားရေးဝန်ကြီး ဟီလာရီကလင်တန်ပါတယ်၊ တခါ ထိုင်းဝန်ကြီးချုပ်တို့နဲ့ လည်း တွေ့တယ်…..

ဖြေ။ ။ အဲဒီမတိုင်ခင်မှာ ပထမဆုံးပေါ့နော်- နေ့လည်နှစ်နာရီမှာ သမ္မတဟောင်း ဘီလ် ကလင် တန် ရောက်လာပါတယ်။ သမ္မတဟောင်း ဘီလ်ကလင်တန်ဟာ ဦးသိန်းစိန်နဲ့ တနာရီ နီးပါး တွေ့ ဆုံဆွေးနွေး သွားပါတယ်။ ဘာတွေ ဆွေးနွေးသွားတယ်ဆိုတာတော့  ကျနော်တို့ မသိရပါဘူး၊ နောက် တခါ နေ့လည် သုံးနာရီလောက်မှာ နိုင်ငံခြားရေး ဝန်ကြီးဟောင်း…

မေး။ ။ ဟင်နရီ ကစ်ဆင်းဂျားနဲ့….

ဖြေ။ ။ ဟင်နရီကစ်ဆင်ဂျာ မလာခင်မှာ ထိုင်းဝန်ကြီးချုပ် ယင်းလပ် ရှင်နာဝပ် အရင်လာပါတယ်။ ထိုင်းဝန်ကြီးချုပ် ယင်းလပ် ရှင်နာဝပ်လာတဲ့အခါမှာ သူကလည်း သမ္မတဦးသိန်းစိန်နဲ့ မိနစ် သုံး ဆယ် လောက် ဆွေးနွေးသွားပါတယ်။ နောက်ပြီးတော့မှ တတိယမြောက် ရောက်လာတဲ့ ပုဂ္ဂိုလ် ကတော့ ဟီလာရီကလင်တန်မတိုင်ခင် ရောက်လာတဲ့ ပုဂ္ဂိုလ်ကတော့ နိုင်ငံခြားရေး ဝန်ကြီးဟောင်း ဟင်နရီ ကစ်ဆင်ဂျာပါ။ သူကတော့ အသက်အရွယ် ထောက်နေပြီဆိုတော့ တုတ်ကောက်လေး တချောင်းနဲ့ ရောက်လာပါတယ်။ အဲဒီတော့ ဒီကနေ့မှာ သမိုင်းဝင် ပုဂ္ဂိုလ်တွေပေါ့နော်- အပါအဝင် လက်ရှိ တာဝန် ထမ်းဆောင်နေတဲ့ နိုင်ငံ့ခေါင်းဆောင် နှစ်ယောက် လို့ ပြောရမယ့် မစ္စ်ရှင်နာဝပ်နဲ့ မစ္စက် ကလင်တန် အပါအဝင် ဟင်နရီကစ်ဆင်ဂျာတို့၊ ဘီလ်ကလင်တန် တို့နဲ့ သမ္မတဦးသိန်းစိန် အစိုးရအဖွဲ့နဲ့ တွေ့ဆုံပြီးတော့ ဒီဟိုတယ်လ်က အစည်းအဝေး ခန်းမထဲမှာ ဆွေးနွေးကြပါတယ်။

မေး။ ။ ဟုတ်ပါပြီ ဦးရော်နီ။ အဲဒီတော့ တွေ့ဆုံတာက နည်းနည်း စိတ်ဝင်စားဖို့ ကောင်းတာက ဟီလာရီ ကလင်တန်တို့၊ ယင်းလပ်တို့ဆိုတာကတော့ လက်ရှိ တာဝန်ယူထားတဲ့ နိုင်ငံခြားရေး ဝန်ကြီးတွေ၊ ဝန်ကြီးချုပ်တွေပေါ့လေ။ ဒါပေမဲ့ ဘီလ် ကလင်တန်တို့၊ ဟင်နရီကစ်ဆင်းဂျာတို့ကတော့ လက်ရှိ တာဝန်ယူသူတွေ မဟုတ်တော့ သူတို့နဲ့တွေ့တာကရော ဘယ်လိုကြောင့်လို့ ဦးရော်နီ အနေနဲ့ သိရပါလဲရှင့်။

ဖြေ။ ။ ဘီလ် ကလင်တန်တို့၊ ဟင်နရီကစ်ဆင်ဂျာတို့ကျတော့ သူတို့လက်ရှိ အစိုးရတာဝန်တွေ ထမ်းဆောင်နေသူတွေ မဟုတ်ပေမဲ့လည်း အမေရိကန်အစိုးရရဲ့ မူဝါဒတွေကို အထောက်အကူပြုတဲ့ လုပ်ငန်းတွေဖြစ်တဲ့ ဖောင်ဒေးရှင်းတွေ ရှိတယ်။ ကလင်တန်ဆိုလည်း ကလင်တန်ဖောင်ဒေးရှင်း၊ ကစ်ဆင်ဂျာရဲ့ Think Tank လို အဖွဲ့တွေ ရှိတယ်။ အဲဒီကိစ္စတွေနဲ့ ပတ်သက်ပြီးတော့ ဆွေးနွေးကြ ဖွယ်ရှိတယ် လို့ မှန်းဆရပါတယ်။ အဲလိုလည်း ဖြစ်နိုင်တယ်လို့ အရိပ်အမြွတ် သိရပါတယ်။

မေး။ ။ ဟုတ်ပါပြီ ဦးရော်နီ။ နောက်ဆုံးသိချင်တာကတော့ မနက်ဖြန် အမေရိကန်ရဲ့ ကြာသာ ပတေးနေ့မှာ သမ္မတဦးသိန်းစိန်ရဲ့ ခရီးစဉ်အကြောင်း ဦးရော်နီသိထားတာ ပြောပြပေးပါအုံးရှင့်။

ဖြေ။ ။ ဟုတ်ကဲ့။ မနက်ရှစ်နာရီခွဲရင် ကုလသမဂ္ဂ အထွေထွေညီလာခံကြီးမှာ သမ္မတဦးသိန်းစိန် က မြန်မာနိုင်ငံခေါင်းဆောင်အနေနဲ့ မိန့်ခွန်းစကား ပြောကြားမှာ ဖြစ်ပါတယ်။ ညနေ လေး နာရီ ကျရင်တော့ Asia Society က ကျင်းပတဲ့ ဟောပြောပွဲမှာ သမ္မတဦးသိန်းစိန် မြန်မာနိုင်ငံဆိုင်ရာ အကြောင်းတွေကို တက်ရောက် ဟောပြောပြီးတော့ သူ့ကိုလည်း တက်ရောက်လာတဲ့ ပရိသတ် က မေးခွန်းမေးတာ၊ သူက ပြန်လည်ဖြေကြားမှာဖြစ်ပါတယ်။

မေး။ ။ ဟုတ်ပါပြီ ဦးရော်နီရေ၊ အခုလိုမျိုး ဟိုတယ်လ်မှာတင် စောင့်ကြည့်နေပြီး သတင်းပေးပို့တဲ့ အတွက် ကျေးဇူးတင်ပါတယ်။


ပြည်သူ့လွှတ်တော်ဥက္ကဋ္ဌ သူရဦးရွှေမန်းနှင့် လွှတ်တော်အမတ်အချို့ သြစတြေးလျနှင့် စင်ကာပူသို့ သွားရောက်


ပြည်သူ့လွှတ်တော်ဥက္ကဋ္ဌသူရဦးရွှေမန်းနှင့်အမတ်အချို့သြစတြေးလျနိုင်ငံနှင့်စင်ကာပူနိုင်ငံသို့သွားရောက်လည်ပတ်ခဲ့ကြောင်း ခရီးစဉ်ကို စက်တင်ဘာလ ၁၇ ရက်နေ့က စတင်ခဲ့ပြီး စက်တင်ဘာလ ၂၆ ရက်အထိ ကြာမြင့်ခဲ့ကြောင်း သိရသည်။
သူရဦးရွှေမန်းသည် သြစတြေးလျနိုင်ငံ၏ ဆီးနိတ်ဥက္ကဋ္ဌနှင့် စင်ကာပူနိုင်ငံ၏ လွှတ်တော်ဥက္ကဋ္ဌ မိုက်ကယ်ပါလ်မာ၏ ဖိတ်ကြားချက်အရ သွားရောက်လည်ပတ်ခဲ့ခြင်းဖြစ်သည်။ပြည်သူ့လွှတ်တော်ဥက္ကဋ္ဌ သူရဦးရွှေမန်းသည် သြစတြေးလျနိုင်ငံ ခရီးစဉ်တွင် သြစတြေးလျပါလီမန် အလုပ်လုပ်ပုံနှင့်ပါလီမန်ကော်မတီများ၏ အလုပ်လုပ်ပုံအကြောင်းကို လေ့လာရန်ကင်ဘာရာမြို့သို့ သွားရောက်ခဲ့ကြောင်းလည်း သိရသည်။
စင်ကာပူနိုင်ငံ ခရီးစဉ်တွင် စင်ကာပူနိုင်ငံ၏ ၀ါရင့်ဝန်ကြီး ဂိုချောက်ထောင်နှင့် တွေ့ဆုံကာ နှစ်နိုင်ငံ ချစ်ကြည်ရင်းနှီးမှုကို ပိုမိုခိုင်မြဲစေခဲ့ကြောင်း Channel News Asia ၏ ဖော်ပြချက်အရ သိရသည်။သူရဦးရွှေမန်းနှင့်အတူ လွှတ်တော်အမတ်ငါးဦးနှင့် အစိုးရအရာရှိများ၊ စီးပွားရေးကိုယ်စားလှယ်အချို့လည်း လိုက်ပါခဲ့ကြောင်း သိရသည်။
ခရီးစဉ်အတွင်းတွင် စင်ကာပူနိုင်ငံ၏ လက်ရှိသမ္မတ J Y Pillay၊ ၀န်ကြီးချုပ် လီရှန်လွန်းတို့နှင့်လည်း တွေ့ဆုံခဲ့သလို စင်ကာပူနိုင်ငံ၏ လွှတ်တော်သို့လည်း သွားရောက်ခဲ့ကြောင်း သိရသည်။စင်ကာပူနိုင်ငံသည် မြန်မာနိုင်ငံနှင့် စတုတ္ထမြောက် အကြီးဆုံးကုန်သွယ်ဖက်နိုင်ငံဖြစ်ပြီး ယမန်နှစ်က နှစ်နိုင်ငံကုန်သွယ်မှုမှာ ၁ ဒသမ ၆ ဘီလျံဒေါ်လာ ရှိသည်။


စာနယ်ဇင်းကောင်စီ (ယာယီ) ပထမအကြိမ် အစည်းအဝေးပြုလုပ်ပြီး ကော်မတီလေးခု ဖွဲ့စည်း


စာနယ်ဇင်းကောင်စီ (ယာယီ)၏ ပထမအကြိမ် အစည်းအဝေးကို စက်တင်ဘာလ ၂၆ ရက်နေ့က ရန်ကုန်မြို့၊ ၈ မိုင်ရှိ ကုန်းမြင့်သာ စားသောက်ဆိုင်တွင် ပြုလုပ်ခဲ့ပြီး ယင်းအစည်းအဝေးက ကော်မတီလေးခု ဖွဲ့စည်းအတည်ပြုခဲ့ကြောင်း သိရသည်။
ယင်းကော်မတီလေးခုမှာ စီမံရေးနှင့် ဘဏ္ဍာရေးကော်မတီ၊ ကျင့်ဝတ်နှင့် ဥပဒေရေးဆွဲရေးကော်မတီ၊ အငြင်းပွားမှုနှင့် တိုင်ကြားမှုများ ညှိနှိုင်းဖြေရှင်းရေးကော်မတီနှင့် ပြန်ကြားရေးနှင့် ဆက်ဆံရေးကော်မတီများ ဖြစ်သည်။ကျင့်ဝတ်နှင့်ဥပဒေရေးရာ ကော်မတီတာဝန်ခံအဖြစ် စာနယ်ဇင်းကောင်စီ အတွင်းရေးမှူး ဦးကျော်မင်းဆွေကို ခန့်အပ်ခဲ့ပြီး ကောင်စီအဖွဲ့ဝင်များအားလုံးက ကော်မတီဝင်အဖြစ် ပါဝင်ခဲ့သည်။ ကျန်ကော်မတီသုံးခုကို တာဝန်ခံတစ်ဦး နှင့် အဖွဲ့ဝင်ရှစ်ဦးစီဖြင့် ဖွဲ့စည်းခဲ့ပြီး တာဝန်ခံများအဖြစ် စီမံရေးနှင့် ဘဏ္ဍာရေးကော်မတီတွင် ဦးသောင်းစုငြိမ်း၊ အငြင်းပွားမှုနှင့် တိုင်ကြားမှုများ ညှိနှိုင်းဖြေရှင်းရေးကော်မတီတွင် ဦးကိုကိုကြီး (ဟန်ဂေရီ)နှင့် ပြန်ကြားရေးနှင့် ဆက်ဆံရေး ကော်မတီတွင် တွဲဖက်အတွင်းရေးမှူး ဒေါ်နန်းကလျာဝင်းတို့ကို ခန့်အပ်ခဲ့သည်။
အစည်းအဝေးတွင် စာနယ်ဇင်းကောင်စီ(ယာယီ)၏ လုပ်ငန်းစဉ်များအတွက် ငွေကြေးလှူဒါန်းမှုများလည်း ပြုလုပ်ခဲ့ပြီး Eleven Media Group မှ ကျပ် ၂၅ သိန်း၊ 7 Days News Journal မှ ကျပ်၂၅ သိန်း၊ ပေါ်ပြူလာဂျာနယ်မှ ကျပ် ၂၅ သိန်း၊ စွယ်စုံမီဒီယာမှ ကျပ် ၁၅ သိန်းနှင့် Forever Group  မှ ကျပ် ၁၀ သိန်းတို့ကို လှူဒါန်းခဲ့သည်။


လက်ပံတောင်းတောင် စီမံကိန်းနှင့် ပတ်သက်ပြီး ဒေသခံများနှင့် အတတ်နိုင်ဆုံး အဆင်ပြေစေရန် ညှိနှိုင်းဆောင်ရွက်မည်ဟု မြန်မာ့စီးပွားရေး ဦးပိုင်လီမီတက် ပြောကြား


မြန်မာ့စီးပွားရေးဦးပိုင်လီမီတက်မှ တာဝန်ရှိသူများက ရန်ကုန်မှ ပြည်တွင်းပြည်ပ မီဒီယာသမားများကို မုံရွာခရိုင် ဆားလင်းကြီးမြို့နယ် လက်ပံတောင်းတောင် ကြေးနီစီမံကိန်းရှိ စီးပွားရေးဦးပိုင် လီမီတက်ရုံးခန်းသို့ ခေါ်ယူ၍ စက်တင်ဘာလ ၂၆ ရက်နေ့ မွန်းလွဲပိုင်းက တွေ့ဆုံရှင်းလင်းပွဲတစ်ခု ကျင်းပပြုလုပ်ခဲ့ပါသည်။
ယင်းတွေ့ဆုံရှင်းလင်းပွဲတွင် လက်ပံတောင်းတောင်ကြေးနီစီမံကိန်းနှင့် ပတ်သက်သည်များကို ရှင်းလင်းခဲ့ပြီး အဆိုပါပွဲသို့ မြန်မာ့စီးပွားရေးဦးပိုင်လီမီတက်မှ စီမံကိန်းဌာနဒါရိုက်တာ ဦးမောင်မောင်တင့်၊ မုံရွာစီမံကိန်းတာဝန်ခံ ဦးမြင့်အောင်၊ သတ္ထုတွင်းအင်ဂျီနီယာ ဦးကိုမြင့်၊ မြန်မာဝမ်ဘို Mining Copper လီမီတက်မှ မန်နေဂျင်းဒါရိုက်တာ Gengyi တို့နှင့် ဖိတ်ကြားထားသော မီဒီယာသမားများ တက်ရောက်ခဲ့သည်။
လက်ပံတောင်းတောင် ကြေးနီစီမံကိန်းသည် နိုင်ငံတော်အဆင့်စီ မံကိန်းတစ်ခုဖြစ်သောကြောင့် ရပ်နားမည်မဟုတ်ကြောင်း၊  ဒေသခံများနှင့် အတက်နိုင်ဆုံး အဆင်ပြေစေရန် နှစ်ဦးနှစ်ဖက် ညှိနှိုင်းဆောင်ရွက် သွားမည်ဖြစ်ကြောင်း၊ ဒေသခံများ နစ်နာ မှုများကို တရားဝင်စာတင်၍ တောင်းဆိုနိုင်ကြောင်း၊ မိမိတို့ဘက်မှ ဖြစ်သင့်ဖြစ်ထိုက်သည်များကို ဆောင်ရွက်ပေးမည်ဖြစ်ကြောင်း၊ တရုတ်ကုမ္ပဏီအား သတ္ထုတွင်းအတွင်း ၀င်ရောက်လုပ်ကိုင်ခွင့်သာ ပေးခြင်းဖြစ်ပြီး မိုင်းပါမစ်ကိုမူ မပေးဘဲ စီးပွားရေးဦးပိုင်လီမီတက်က ကိုင်ထားကြောင်း၊ ဤလုပ်ငန်းသည်ရပ်တန့်၍ မရဘဲဆက်ပြီး ဆောင်ရွက်ရမည့်လုပ်ငန်းဖြစ်ကြောင်း၊ ညှိနှိုင်းစရာများရှိပါက သက်ဆိုင်ရာ တိုင်းဒေသကြီးအစိုးရ၏ လမ်းညွှန်မှုနှင့် ဆောင်ရွက်သွားမည်ဖြစ်ကြောင်း၊ အကျိုးအမြတ် အသေးစိတ် အတိအကျကို မိမိအနေဖြင့် မပြောနိုင်သော်လည်း အကြမ်းဖျင်းအားဖြင့် နိုင်ငံတော်က တော်တော်များများရကြောင်း၊ အခွန်အခများနှင့် ပေါင်းပါက နိုင်ငံတော် အကျိုးအမြတ်ကများကြောင်း၊ ကျွန်တော်တို့ ဦးပိုင် အနေဖြင့်လည်းရကြောင်း၊ တရုတ်က အကျိုးအမြတ် ရမှုအနည်းဆုံးဖြစ်ပါကြောင်း၊ သဘာဝပတ်ဝန်းကျင် ထိခိုက်မှု ရှိ မရှိနှင့်ပတ်သက်၍ လာရောက်စစ်ဆေးလိုပါက ပြည်တွင်းပြည်ပ ပညာရှင်များ လာရောက်လေ့လာနိုင်ကြောင်း၊ ကြိုဆိုပါကြောင်း မြန်မာ့စီးပွားရေး ဦးပိုင်လီမီတက်မှ စီမံကိန်းဌာန ဒါရိုက်တာဦးမောင်မောင်တင့်က ရှင်းလင်းပွဲတွင် ပြောကြားခဲ့ပါသည်။
မြန်မာ့စီးပွားရေးဦးပိုင်လီမီတက်သည် လက်ပံတောင်းတောင် ကြေးနီးသတ္ထုတွင်းလုပ်ငန်းအား တရုတ်ပြည်သူ့သမ္မတနိုင်ငံ ၀မ်ဘို Mining Copper လီမီတက်မှ မြန်မာနိုင်ငံတွင် တည်ထောင်ထားသည့် မြန်မာဝမ်ဘို Mining Copper လီမီတက်နှင့် Production, Sharing ,Contract စနစ်ဖြင့် ပူးပေါင်းဆောင်ရွက်နေကြောင်း၊ မြန်မာဝမ်ဘို Mining Copper လီမီတက်မှ လက်ပံတောင်း တောင်ကြေးနီသတ္ထုတွင်းအတွက် 997 Million, USD ကို ရာနှုန်းပြည့် ရင်းနှီးမြုပ်နှံဆောင်ရွက်သွားမည်ဟု ရှင်းလင်းပွဲမှ သိရသည်။
လက်ပံတောင်းတောင်ကြေးနီ သတ္ထုတွင်းတွင် လုပ်သားဖွဲ့စည်းအင်အား ၂၀၀၀ ဦးရေနှင့် နေ့စား ၀န်ထမ်းခန့်မှန်းခြေ ၁၅၀၀ ဦးရေခန့် ရှိကြောင်း၊ လက်ပံတောင်းတောင် ကြေးနီသတ္ထုတွင်းနှင့်ပတ်သက်၍ ခွင့်ပြုသည့်ရက်စွဲမှာ သတ္ထုအကြီး စားတူးဖော်ထုတ်လုပ်မှုအတွက် ခွင့်ပြုမိန့် ၅/၃/၂၀၁၀နှင့် နိုင်ငံသား ရင်းနီးမြုပ်နှံမှုဆိုင်ရာ ခွင့်ပြုမိန့်မှာ ၅/၅/၂၀၁၀ ဖြစ်ပြီး သက်တမ်းကာလမှာ ၂၈ နှစ်ဖြစ်ကြောင်း၊ ခွင့်ပြုသည့်ဧရိယာမှာ ၇၈၆၇၇၈ ဧကဖြစ်ကြောင်းလည်း သိရသည်။

ကြေးနီ ၃၃၈ တန်အလွဲသုံးမှု တံခါးပိတ် စစ်ဆေး

မုံရွာ ကြေးစင်တောင်စီမံကိန်းမှ ကြေးနီ ၃၃၈ တန် အလွဲသုံးစားလုပ်သည်ဟုဆိုကာ ဖမ်းဆီးခံထားရသူ ဒု ထုတ်လုပ်ရေးမှူး ဦးအောင်လောဟာနှင့် ဦးကျော်ဆွေတို့ကို ယနေ့နေ့လည်က စစ်ကိုင်းတိုင်း ဆားလင်းကြီးမြို့နယ် တရားရုံးတွင် ပထမဆုံးအကြိမ် ရုံးထုတ်စစ်ဆေးရာ ပြည်သူများရှေ့မှောက်တွင် မဟုတ်ဘဲ တံခါးပိတ် စစ်ဆေးကြောင်း သတင်းရသည်။ ယင်းကြေးနီများမှာ အမှတ် (၁) သတ္တုတွင်းနှင့် ကနေဒါအခြေစိုက် အိုင်ဗင်ဟို ကုမ္ပဏီတို့ ပူးပေါင်းထုတ်လုပ်နေသည့် စီမံကိန်းမှဖြစ်ပြီး ယခုနှစ်ဆန်းပိုင်းတွင် မြန်မာနိုင်ငံမှ အိုင်ဗင်ဟို ကုမ္ပဏီ ရတ်သိမ်းသွားစဉ် တရုတ်ကုမ္ပဏီသစ် ယန်စီကော့ပါးသို့ ရှယ်ယာနှင့် စာရင်းများ လွှဲပြောင်းချိန်တွင် ပျောက်ဆုံးသွားခြင်းဖြစ်သည်။

ရွှေဝါရောင်တော်လှန်ရေး (၅) နှစ်ပြည့်အခမ်းအနား မန္တလေးတွင်ကျင်းပ

 

မန္တလေး၊ ပြည်ကြီးတံခွန်မြို့နယ်၊ ၆၂ လမ်းမှာရှိတဲ့ မြ၀တီမင်းကြီး ကျောင်းတိုက်မှာ ရွှေဝါရောင် တော်လှန်ရေး (၅) နှစ်ပြည့် အခမ်းအနားအဖြစ် ဆွမ်းကျွေးရေစက်ချ အခမ်းအနားနဲ့ ဟောပြောပွဲ အခမ်းအနားကို အပိုင်းနှစ်ပိုင်းခွဲ ကျင်းပခဲ့တယ်လို့သိရပါတယ်။

ရွှေဝါရောင်တော်လှန်ရေးနေ့ ငါးနှစ်ပြည့်အခမ်းအနားကျင်းပ

ရွှေဝါရောင်တော်လှန်ရေးနေ့ ငါးနှစ်ပြည့်အခမ်းအနားကို ရန်ကုန်တိုင်း ဒဂုံမြို့သစ်အရှေ့ပိုင်းက NLD ပါတီဝင်တွေ၊ နိုင်ငံရေး အကျဉ်းသားဟောင်းတွေနဲ့ ၈၈ မျုိုးဆက်ကျောင်းသားတွေ စုပေါင်းပြီး ရန်ကုန်မြို့ အရှေ့ဒဂုံမြို့နယ်မှာရှိတဲ့ မကွေးပရိယတ္တိ စာသင်တိုက်မှာ မနေ့ကမနက်ပိုင်း (၉) နာရီက ကျင်းပခဲ့ပါတယ်။

လာဘ်ပေးလာဘ်ယူမှု ပြည်သူ့လွှတ်တော်တင်ပြ အရေးယူမည်

တရားရုံးတွေမှာ လာဘ်ပေး လာဘ်ယူမှုတွေ ဆက်လက် ဖြစ်ပေါ်နေပါက ပြည်သူ့လွှတ်တော် တရားဥပဒေ စိုးမိုးရေးနှင့် တည်ငြိမ်အေးချမ်းရေး ကော်မတီအနေနဲ့ လွှတ်တော်ဥက္ကဋ္ဌထံ တင်ပြပြီး သက်ဆိုင်ရာ တရားရုံးတွေကို အရေးယူ အပြစ်ပေးနိုင်အောင် ဆောင်ရွက်သွားမှာ ဖြစ်တယ်လို့ ကော်မတီဝင် တစ်ဦးဖြစ်တဲ့ သင်္ကန်းကျွန်းမြို့နယ် ပြည်သူ့လွှတ်တော် ကိုယ်စားလှယ် ဦးသိန်းညွန့်က မနေ့ကပြောကြားလိုက်ပါတယ်။

တောင်သူလယ်သမားများအတွက် ဥပဒေရေးရာ သင်တန်းပို့ချ

 

လယ်သမား အခွင့်အရေးလှုပ်ရှားသူ မစုစုနွေး ဦးဆောင် ဖွဲ့စည်းထားတဲ့ တောင်သူလယ်သမား သမဂ္ဂ ဖွဲ့စည်းရေး ကော်မတီက နယ်မြို့တွေမှာရှိတဲ့ တောင်သူ လယ်သမား သမဂ္ဂ ခေါင်းဆောင်တွေကို ပထမဦးဆုံးအကြိမ်အဖြစ် ဥပဒေရေးရာသင်တန်း မနေ့ကစတင်ပို့ချကြောင်း သိရပါတယ်။

တောင်သူလယ်သမားများအတွက် ဥပဒေရေးရာ သင်တန်းပို့ချ

 

လယ်သမား အခွင့်အရေးလှုပ်ရှားသူ မစုစုနွေး ဦးဆောင် ဖွဲ့စည်းထားတဲ့ တောင်သူလယ်သမား သမဂ္ဂ ဖွဲ့စည်းရေး ကော်မတီက နယ်မြို့တွေမှာရှိတဲ့ တောင်သူ လယ်သမား သမဂ္ဂ ခေါင်းဆောင်တွေကို ပထမဦးဆုံးအကြိမ်အဖြစ် ဥပဒေရေးရာသင်တန်း မနေ့ကစတင်ပို့ချကြောင်း သိရပါတယ်။

NLD ပါတီ လူငယ်ဖွံ့ဖြိုးရေးသင်တန်း ပို့ချ

NLD ပါတီဝင်လူငယ်တွေ အရည်အချင်း မြှင့်တင်နိုင်ရေးအတွက် ဖွဲ့စည်းပုံ အခြေခံဥပဒေ၊ နိုင်ငံရေး၊ စီးပွားရေး၊ ကျန်းမာရေးဆိုင်ရာ ပညာပေးရေး ဒုတိယ အကြိမ်မြောက် သင်တန်းကို ရန်ကုန် ရွှေဂုံတိုင်ရှိ NLD ပါတီရုံးချုပ်မှာ မနေ့က စတင်ပို့ချကြောင်း သိရပါတယ်။

နိုင်ငံရေးအကျဉ်းသား ၃၀၀ ကျော် လွတ်ရန် ကျန်သေး

မြန်မာနိုင်ငံတ၀န်း အကျဉ်းထောင်များ အတွင်း၌ နိုင်ငံရေးအကျဉ်းသား ၃၁၁ ဦး လွတ်မြောက်ရန် ကျန်ရှိနေသေးကြောင်း နိုင်ငံရေး အကျဉ်းသားများ ကူညီစောင့်ရှောက်ရေး အသင်း(AAPP)က စက်တင်ဘာ ၂၀ ရက်က ထုတ်ပြန်ထားသည်။ ယင်း လွတ်မြောက်ရန် ကျန်ရှိ နိုင်ငံရေးအကျဉ်းသား စာရင်း၌ သံဃာတော်များ၊ NLD အဖွဲ့ဝင်များ၊ လူ့အခွင့်အရေး လှုပ်ရှားသူများ ၊ ABSDF အဖွဲ့ဝင်များ၊ တိုင်းရင်းသား လက်နက်ကိုင် အဖွဲ့ဝင်များ အစရှိသည်တို့ပါဝင်ကြောင်း တွေ့ရသည်။ စက်တင်ဘာ ၁၇ ရက်က သမ္မတ ဦးသိန်းစိန် ၏ လွတ်ငြိမ်း ချမ်းသာခွင့်ဖြင့် လွှတ်ပေးသည့် အကျဉ်းသား ၅၁၄ ဦးတွင် နိုင်ငံရေး အကျဉ်းသား ၈၈ ဦးပါဝင်ကြောင်းလည်း AAPP က ထုတ်ပြန် ထားသည်။

အမေရိကန်-မြန်မာ နှစ်နိုင်ငံအစိုးရ တွေ့ဖို့ပြင်

မြန်မာ့ ဒီမိုကရေစီအရေး အောင်မြင်ပြီလို့ နိုင်ငံတကာ မိသားစုက မကြေညာနိုင်သေးဘဲ အာဏာ ဘယ်သူပဲရရ ပြုပြင်ပြောင်းလဲရေးတွေကို ဆက်လက်ဆောင်ရွက်သွားဖို့ မျှော်လင့်တဲ့အပြင် သမိုင်းတွင်မယ့် မြန်မာ့အပြောင်းအလဲဟာ “စိန်ခေါ်မှုမဲ့” မဟုတ်ဘူးလို့ အရှေ့အာရှနှင့် ပစိဖိတ်ရေးရာ အမေရိကန် လက်ထောက်နိုင်ငံခြားရေးဝန်ကြီး ကာ့တ်ကမ်းဘဲလ်က ပြောဆိုလိုက်ပါတယ်။
နယူးယောက် ကုလသမဂ္ဂ ညီလာခံမှာ မြန်မာသမ္မတ ဦးသိန်းစိန်နဲ့ အမေရိကန် နိုင်ငံခြားရေးဝန်ကြီး ဟီလာရီ ကလင်တန်တို့ မနက်ဖြန် တွေ့ကြဖို့ရှိနေတုန်းမှာ အိုဘားမား အစိုးရအနေနဲ့ စီးပွားရေး ပိတ်ဆို့မှု လျှော့ချမှု၊ အမေရိကန်-မြန်မာ တရားဝင် ဆွေးနွေးရေး လမ်းကြောင်း ပုံမှန်တည်ဆောက်ရေး၊ စစ်ရေးဆက်ဆံမှု စတင်ရေးနဲ့ အမေရိကန်ရဲ့ ရင်းနှီးမြှုပ်နှံမှုသစ်များအကြောင်း ဆွေးနွေးမှာဖြစ်တယ်လို့ ယမန်နေ့က ဝါရှင်တန်မှာလုပ်တဲ့ မဟာဗျူဟာနှင့် နိုင်ငံတကာ လေ့လာရေးဌာန (Center for Strategic and International Studies – CSIS) ရဲ့ ကွန်ဖရင့်မှာ ကာ့တ်ကမ်းဘဲလ်က ပြောတာပါ။
တပြိုင်နက်တည်းမှာ လူ့အခွင့်အရေး ချိုးဖောက်မှုတွေ၊ နိုင်ငံရေးအကျဉ်းသားတွေ ဆက်ထိန်းသိမ်းထားတာ၊ တိုင်းရင်းသားဒေသတွေမှာ စစ်ဆက်ဖြစ်နေတာတွေနဲ့ ပတ်သက်ပြီး အမေရိကန်အစိုးရက မြန်မာအစိုးရကို ဖိအားဆက်ပေးသွားမယ်လို့လည်း ဆိုပါတယ်။ ဒါပေမယ့် စီးပွားရေး ဒဏ်ခတ်ပိတ်ဆို့တာ ရုတ်သိမ်းဖို့ ဒေါ်အောင်ဆန်းစုကြည် ပြောဆိုတာကို အပြည့်အဝ ထောက်ခံပံ့ပိုးသွားမယ်လို့ ကာ့တ်ကမ်းဘဲလ်က ပြောပါတယ်။
“ခင်ဗျားတို့အားလုံး သိပြီးဖြစ်တဲ့အတိုင်း ဒေါ်အောင်ဆန်းစုကြည် ပြီးခဲ့တဲ့အပတ်က စလို့ ဒီရောက်လာပြီးနောက်ပိုင်း ချက်ခြင်းဆိုသလို မူဝါဒအပြောင်းအလဲတချို့ ပေါ်ထွက်လာခဲ့တယ်။ ကွန်ဂရက်ကလည်း သူ့တင်ပြချက်တွေကို တလေးတစားနဲ့ တုန့်ပြန်ခဲ့တယ်။ ကျနော်တို့ အစိုးရအဖွဲ့ကလည်း နောက်အဆင့်တွေအတွက် ကက်ပီတိုလ်ဟေးနဲ့ ပူးပေါင်း လုပ်ဆောင်သွားနိုင်မယ်လို့ ကျနော် မျှော်လင့်ပါတယ်” လို့ ကာ့တ်ကမ်းဘဲလ်က ဆိုပါတယ်။
မြန်မာပြည်မှာ အမေရိကန်တွေ စီးပွားရေးလုပ်ဖို့ကတော့ စောလွန်းနေနိုင်တယ်လို့လည်း ပြောပြီး ဒီကိစ္စ အမေရိကန်ဘက်က ကနဦး အသေးစိတ် တင်ပြချက်ကို ဟီလာရီနဲ့ ဦးသိန်းစိန် တွေ့ရာမှာ ထပ်ဆွေးနွေးမယ်၊ မြန်မာသမ္မတအနေနဲ့လည်း အမေရိကန်တွေ တင်ပြချက်ကို စိတ်ဝင်တစား ရှိနေတယ်လို့လည်း ဆိုပါတယ်။
လတ်တလော ကွန်ဂရက်က အတည်ပြုပေးခဲ့တဲ့ ငွေကြေးလွှဲပြောင်းမှု ပိတ်ဆို့ရေး သမ္မတအိုဘားမားရဲ့ လုပ်ပိုင်ခွင့်နဲ့ ဖယ်ရှားရေးကို ထောက်ပြပြီး “အသေအချာ မလုပ်မဖြစ်လုပ်မှာက မြန်မာပြည်တွင်းမှာ လိုအပ်နေတဲ့ အခြေခံ အဆောက်အအုံတွေ၊ ကျန်းမာရေး၊ ပညာရေး အစီအစဉ်တွေ စအကောင်အထည်ဖော်ဖို့ နိုင်ငံတကာ ငွေကြေးအင်စတီကျူးရှင်းတွေ၊ ဖွံ့ဖြိုးရေးဘဏ်တွေနဲ့ ဖြစ်ပါတယ်” လို့ ကာ့တ်ကမ်းဘဲလ်က ပြောပါတယ်။
တိုင်းရင်းသားအရေးနဲ့ ပတ်သက်လို့ ဒါဟာ မြန်မာပြည် လက်ရှိကြုံနေရသမျှ အရေးတွေထဲမှာ “ခလုတ်ကန်သင်း အများဆုံး၊ စိန်အခေါ်ခံရဆုံး” ဖြစ်တယ်လို့လည်း ပြောသွားပါတယ်။ ဒါပေမယ့် တချိန်တုန်းက မြန်မာ စစ်အစိုးရဟာ ဒီအရေးကို ပြည်ပက ဝင်ရောက်စွက်ဖက်တာ လက်မခံခဲ့ပေမယ့် အခုအခါမှာ ပြည်ပကကူညီမှာကို သူတို့ တံခါးဖွင့် လက်ခံနေတယ်လို့ ဆိုလိုက်ပြီး အမေရိကန်က ဘယ်လိုအကူအညီကိုမဆို ပေးသွားဖို့ အဆင်သင့်ပဲလို့ ပြောပါတယ်။
ဒီနေရာမှာ အစိုးရနဲ့ချည်းပဲ ထိတွေ့ဆွေးနွေးလို့ မဖြစ်ဘဲ တိုင်းရင်းသား အင်အားစုတွေနဲ့လည်းပဲ ဆွေးနွေးဖို့ လိုအပ်တယ်။ တိုင်းရင်းသားခေါင်းဆောင်တွေနဲ့ ဆွေးနွေးရမယ်။ သူတို့လိုချင်တဲ့ အဓွန့်ရှည်ကြာတဲ့ ငြိမ်းချမ်းရေးကို ဘယ်လို တည်ဆောက်နိုင်မလဲ၊ သူတို့လိုချင်တဲ့ ကိုယ်ပိုင်အုပ်ချုပ်ရေးပုံသဏ္ဍန်က ဘယ်လိုလဲဆိုတာကအစ သူတို့ သိရှိအောင် လေ့လာရမယ်လို့ ကာ့တ်ကမ်းဘဲလ်က ဆိုပါတယ်။
ဆက်ပြီး အခုအချိန်ဟာ အမေရိကန်-မြန်မာအကြား တရားဝင် ပုံမှန် ဆွေးနွေးရေး လမ်းကြောင်းတွေ တည်ဆောက်ဖို့ လိုပြီလို့ ပြောဆိုပြီး မြန်မာ့တပ်မတော်နဲ့ ထိတွေ့ဆွေးနွေးနိုင်ရေး အလားအလာတွေကို ရှာဖွေနေကြောင်းလည်း ပြောပါတယ်။ “တွေ့ဆုံဆွေးနွေးရေးတွေမှာ အကြီးအကျယ် ပျက်ကွက်နေတာက စစ်တပ်ပါ။ အခုအထိ မြန်မာပြည်တွင်းမှာ လွှမ်းမိုး အရေးပါတုန်းပါ။ ပြုပြင်ပြောင်းလဲရေးအပေါ် သူတို့ရဲ့ သဘောထားဆက်ဆံရေး၊ တိုင်းရင်းသားဒေသတွေက အကြမ်းဖက် ရက်စက်မှုတွေ၊ တိုက်ပွဲတွေမှာ သူတို့ပါဝင်ပတ်သက်မှုတွေက ဘယ်လိုရှိတယ်ဆိုတာ သိပ်မရေရာလှဘူး” လို့ ကာ့တ်ကမ်းဘဲလ်က ဆိုပါတယ်။
စက်တင်ဘာ ၂၅ ရက်မှာ နယူးယောက်ကို ဆိုက်ရောက်ခဲ့တဲ့ သမ္မတ ဦးသိန်းစိန်ဟာ ဟီလာရီနဲ့ တွေ့ဖို့ရှိတဲ့အပြင် ဦးသိန်းစိန် အရင် အမေရိကန် ကြိုရောက်နှင့်ပြီး မြန်မာ့အပြောင်းအလဲကို အင်တိုက်အားတိုက် ထောက်ခံနေတဲ့ အတိုက်အခံခေါင်းဆောင် ဒေါ်အောင်ဆန်းစုကြည်လိုပဲ အာရှလူ့အဖွဲ့အစည်း (Asia Society) မှာ “အကူးအပြောင်းထဲက မြန်မာ – အခွင့်အလမ်းများနှင့် စိန်ခေါ်မှုများ” ခေါင်းစဉ်နဲ့ လူထုပရိသတ်ကို မိန့်ခွန်းပေးပါလိမ့်မယ်။ ပရိသတ်နဲ့ အမေးအဖြေလည်း လုပ်ပါမယ်။
အမေရိကန်သမ္မတ အိုဘားမားနဲ့ ဦးသိန်းစိန်တွေ့ဆုံဖို့ မသေချာသေးပေမယ့် နှစ်နိုင်ငံ ဆက်ဆံရေး ပြန်လည်ကောင်းမွန်လာပြီး ဒီမိုကရေစီရေး အတိုက်အခံ ခေါင်းဆောင်ကပါ ပူးပေါင်းဆောင်ရွက်ဖို့ ကတိပြုထားတဲ့ မြန်မာ့အပြောင်းအလဲကို အမေရိကန်က အလေးအနက် ထောက်ခံပံ့ပိုးမယ့် သမိုင်းဝင်ကြေညာချက်ကို အိမ်ဖြူတော်မှာ ဒေါ်အောင်ဆန်းစုကြည်၊ ဦးသိန်းစိန်တို့နဲ့ သမ္မတ အိုဘားမား၊ ဟီလာရီတို့ ပူးတွဲ ကြေညာနိုင်မလားဆိုတဲ့ မျှော်လင့်ချက်တွေက မြင့်မားနေကြောင်းပါ။