ရခိုင် သတင်းများ အောက်တိုဘာ ၂၆ ၊ ၂၀၁၂
ရခိုင်ပြည်နယ် ပဋိပက္ခ ဆက်လက် ကူးစက်
ရခိုင်ပြည်တွင်းရှိ ဒေသခံ ရခိုင်တိုင်းရင်းသားများနှင့် မွတ်စလင်တို့အကြား ဖြစ်ပွားနေသည့် ပဋိပက္ခသည် ယခုအခါ ရခိုင်ပြည်နယ်တခုလုံးနီးပါး ကူးစက်ပြန်နှံ့နေကြောင်း၊ နှစ်ဖက်အကြား အပြန်အလှန် တိုက်ခိုက်မှု၊ မီးရှို့မှုများ ဖြစ်ပွားကာ လူသေဆုံးမှု၊ ထိခိုက်ဒဏ်ရာရမှုလည်း အများအပြားရှိကြောင်း၊ လူနေအိမ် ထောင်ချီ၍ မီးလောင်ကျွမ်းသွားသည့်အတွက် နှစ်ဘက်စလုံး၌ ဒုက္ခသည် ထောင်ချီရှိကြောင်း ဒေသခံများက ပြောသည်။
ရခိုင်ဒေသတွင်း ပဋိပက္ခများကြောင့် ရခိုင်တိုင်းရင်းသားများနှင့် မွတ်စလင်တို့အကြား အပြန်အလှန်တိုက်ခိုက်၍ သေဆုံးခြင်း၊ စစ်တပ်မှ ပစ်ခတ်လူစုခွဲရာတွင် သေနတ်ထိမှန် သေဆုံးခြင်းနှင့် ထိခိုက် ဒဏ်ရာရသူ အများအပြား နှစ်ဖက်စလုံးတွင် ရှိကြောင်း သိရသော်လည်း အရေအတွက်ကို အတည်ပြုနိုင်ခြင်း မရှိသေးပေ။
ရသေ့တောင်မြို့နယ်၊ ညောင်ပင်ကြီး ကျေးရွာ၌ ဖြစ်ပွားသော ပဋိပက္ခကို ထိုဒေသ၌ အခြေစိုက်ထားသည့် ခြေမြန်တပ်ရင်း (၅၃၆) မှ ပစ်ခတ် လူစုခွဲရာ၌ ဦးအောင်ဇံဝေနှင့် ဦးသိန်းလှမောင်တို့ သေနတ် ဒဏ်ရာဖြင့် သေဆုံးသွားပြီး ၈ ဦး ဒဏ်ရာရ ရှိသွားကြောင်း၊ မွတ်စလင်များဘက်တွင်လည်း သေဆုံးမှု၊ ထိခိုက်မှုရှိကြောင်း ထို့အတူ ကျောက်တော်မြို့နယ်၊ ပိုက်သည်ကျေးရွာ၌ ယနေ့ နံနက်တွင် ဖြစ်ပွားသည့် ပဋိပက္ခကိုလည်း စစ်တပ်က ပစ်ခတ် လူစုခွဲရာ ဦးကျော်သိန်း၊ ဦးဇော်ဝင်း၊ ဦးထွန်းအောင်သာ တို့ ၃ ဦး သေဆုံးသွားကာ ထိခိုက်ဒဏ်ရာ ရသူများကို စစ်တွေ ဆေးရုံကြီးသို့ ပို့ဆောင်ရန် စီစဉ်နေကြောင်း သိရသည်။
ပဋိပက္ခများ ပြန့်ပွားလာခြင်းသည် မမျှော်လင့်ဘဲ ဖြစ်ပွားလာရခြင်း ဖြစ်ကြောင်း၊ ပဋိပက္ခများ ဆက်လက် မပြန့်ပွားရေးအတွက် ပြည်နယ်အစိုးရက အလေးထား ဆောင်ရွက်နေကြောင်း၊ သို့သော် စစ်တပ်အင်အား ထပ်မံတိုးချပေးရန် မရှိကြောင်း၊ စစ်တပ် တိုးချပါက နိုင်ငံတကာမှ ပြောဆိုလာမည်ဖြစ်ကြောင်း ရခိုင်ပြည်နယ် အစိုးရအဖွဲ့၏ ပြန်ကြားရေးတာဝန် ခံ ဦးဝင်းမြိုင်က ပြောသည်။
“ရခိုင်မှာ ရှိတဲ့စစ်တပ်တွေနဲ့ပဲ ထိန်းပေးဖို့၊ လုံခြုံရေး တာဝန်ယူပေးသွားမှာပါ။ ပြည်ထောင်စုအစိုးရ အကူအညီနဲ့ တခြားဒေသက စစ်တပ်တွေကို ထပ်မံ ခေါ်ယူဖို့ အစီအစဉ် မရှိပါဘူး၊ စစ်တပ်ကိုလည်း ပစ်မိန့် ပေးထားတာ မရှိဘူး” ဟု ၎င်းက ဆိုသည်။
သို့သော် ရခိုင်ဒေသတွင်း ကြီးထွားလာသည့် ပဋိပက္ခများ၊ အကြမ်းဖက်မှုများကြောင့် ဒေသတွင်းရှိ စစ်တပ်နှင့် လုံထိန်း တပ်ဖွဲ့ဝင်များကို ပဋိပက္ခဖြစ်ရာ ဒေသများ၌ အင်အားတိုး ချပေးနေကာ အခြေအနေပေါ် မူတည်၍ ဥပဒေအရ လုပ်ဆောင်သွားရန် စစ်တပ်ကို တာဝန်ပေးထားကြောင်းလည်း ပြည်နယ်အစိုးရအဖွဲ့က ဆိုထားသည်။ရခိုင်ဒေသတွင်း ပဋိပက္ခ ကြီးထွားလာရခြင်းသည် ဗဟိုအစိုးရနှင့် ဒေသဆိုင်ရာ အာဏာပိုင်တို့၏ အချိန်မီ ထိန်းသိမ်းမှု မရှိခြင်း၊ တာဝန်ယူမှု အားနည်းခြင်းကြောင့်ဟု ဒေသခံများက ဆိုသည်။ လက်ရှိ ပဋိပက္ခကို တာဝန်ယူ ထိန်းသိမ်းပေးနေသည့် စစ်တပ်သည်လည်း လိုအပ်သည်ထက် ပိုမိုပစ်ခတ်မှုကြောင့် လူသေဆုံးမှု၊ ဒဏ်ရာရသူ အများအပြား ရှိကြောင်းလည်း ဒေသခံတို့က ဆိုသည်။
ပြည်နယ်အစိုးရ ပြောခွင့်ရသူ ဦးဝင်းမြိုင်ကမူ စစ်တပ်ပစ်မှုကြောင့် သေဆုံးသူစာရင်း ၎င်းတို့ထံ မရောက်သေးကြောင်း၊ သို့သော် လူစုခွဲရာ၌ မတော်တဆ ထိခိုက်သေဆုံးမှု ရှိနိုင်ကြောင်း ပြောဆိုသည်။မင်းပြားမြို့နယ်၌ အောက်တိုဘာလ ၂၂ ရက်နေ့က စတင်ခဲ့သော ပဋိပက္ခသည် မြောက်ဦး၊ ကျောက်ဖြူ၊ မြေပုံ၊ ရသေ့တောင်၊ ကျောက်တော် စသည့်မြို့များအထိ ပြန့်နှံ့ ဖြစ်ပွားနေကာ နေအိမ်များ မီးလောင်ကျွမ်းသွားသည့် မြို့နယ်အားလုံးတွင် ဒုက္ခသည်များ ရှိနေသည့်အတွက် အရေးပေါ်အကူအညီများ လိုအပ်နေကြောင်း ဒေသခံများက ပြောသည်။
အလားတူ မွတ်စလင်များနှင့် နီးစပ်သည့် ရခိုင်နှင့်တခြား တိုင်းရင်းသား ကျေးရွာများကလည်း မြို့ပေါ်ရှိ ဘုန်းကြီးကျောင်းများတွင် လာရောက် ခိုလှုံနေကြကြောင်း သိရသည်။ ထို့အတူ နေအိမ် မီးလောင်သွားသည့် မွတ်စလင်များကလည်း မွတ်စလင် ဦးရေများပြားသည့် ကျေးရွာများသို့ ပြောင်းရွှေ့ခြင်း၊ ထွက်ပြေးခြင်း၊ ကျောက်ဖြူ မြို့မှ မွတ်စလင်များသည်လည်း စက်လှေများဖြင့် စစ်တွေဒေသသို့ ပြောင်းရွှေ့သွားကြောင်း ကျောက်ဖြူမြို့ခံများက ပြောသည်။ကျောက်ဖြူ ပဋိပက္ခကြောင့် ထိုဒေသမှ မွတ်စလင်များသည် စက်လှေစီးရေ ၄၀ ၀န်းကျင်ဖြင့် စစ်တွေမြို့ သဲချောင်းကျေးရွာသို့ ယမန်နေ့က ရောက်ရှိလာကြောင်း၊ တချို့သောသူများသည် ပုဏ္ဏားကျွန်း ဒေသသို့ ရောက်ရှိနေကြောင်း စစ်တွေမြို့ခံများက ပြောသည်။မီးဘေးဒုက္ခသည် အရေအတွက်ကို မြို့နယ်အလိုက် စိစစ်နေဆဲ ဖြစ်ကြောင်း၊ ဒုက္ခသည်များကို နေရာချထားပေးရေးနှင့်စားသောက်ရန် ရိက္ခာများကို မြို့နယ်အလိုက် ပေးဆောင်သွားမည်ကြောင်း ရိက္ခာ အလုံလောက်ရှိကြောင်း ဦးဝင်းမြိုင်က ဆိုသည်။
မြောက်ဦးမြို့နှင့် မင်းပြားမြို့နယ်တို့တွင် အောက်တိုဘာ ၂၁ နှင့်၂၃ တို့တွင်ဖြစ်ပွားခဲ့သည့် ပဋိပက္ခတွင်လည်း အမျိုးသားတဦးနှင့် အမျိုးသမီးတဦး သေဆုံးကာ အိမ်ခြေစုစုပေါင်း ၁၀၃၉ အိမ် မီးလောင်ဆုံးရှုံးသွားကြောင်း အစိုးရ သတင်းစာများက ရေးသားထားသည်။ကျောက်ဖြူမြို့တွင်လည်း အောက်တိုဘာလ ၂၃ ရက်နေ့တွင် ဖြစ်ပွားခဲ့သော ပဋိပက္ခကြောင့် အိမ်ခြေ ၇၀၀ ကျော် မီးလောင်သွားပြီး၊ လူတဦး သေဆုံး၍ လူ ၂၀ ကျော် ဒဏ်ရာရကြောင်း ယနေ့ထုတ် အစိုးရ သတင်းစာများက ရေးသားထားသည်။
အကြမ်းဖက်မှုတွေ ကျောက်တော် နဲ့ ရသေ့တောင်အထိ ကူးစက်
အလားတူပဲ ရသ့တောင်မြို့တောင်ဘက် ၈ မိုင်ခန့်အကွာမှာ ရှိတဲ့ ညောင်ပင်ကြီးကျေးရွာမှာလည်း လူမျိုးနှစ်ဘက်အကြား ပဋိပက္ခတွေဖြစ်ပွားခဲ့ပြီး နေအိမ်မီးရှို့အကြမ်းဖက်မှုတွေဖြစ်ပွားခဲ့ပါတယ်။ အဲဒီမှာ သေဆုံးသူ ၂ ဦးနဲ့ နေအိမ် ၃၀ ခန့် မီးလောင် ဆုံးရှုံးခဲ့တယ်လို့ ဒေသခံတွေကပြောပါတယ်။ အလားတူ ကျောက်တော်မြို့နားက ကျေးရွာတွေမှာလည်း မီးရှို့မှုတွေဖြစ်ခဲ့သလို စစ်တပ်က ပစ်ခတ်တာလည်း ရှိတယ်လို့ သိရှိရပါတယ်။အောက်တိုဘာလ ၂၅ ရက် ဒီကနေ့ ကျောက်ဖြူမြို့ပေါ်မှာ လုံခြုံရေး တင်းတင်းကျပ်ကျပ်ချထားတာ တွေ့ရကြောင်း မြို့ခံတွေက ပြောပါတယ်။ မနေ့က ဖြစ်ရပ်မှာ နေအိမ်တွေ ဆုံးရှုံးခဲ့ရတဲ့ မိသားစုတွေကို မြို့လယ်မှာ ရှိတဲ့ မြို့မ အားကစားကွင်းကို ကားကြီးတွေနဲ့ ရွှေ့ပြောင်းပေးနေတယ်လို့ ကျောက်ဖြူမြို့ခံတစ်ဦးက ပြောပါတယ်။ ကျောက်ဖြူမြို့ ပဋိပက္ခတွေကြောင့် ဒဏ်ရာရတဲ့ သူတွေကို ကျောက်ဖြူဆေးရုံနဲ့ မြို့နယ် စစ်တပ်ဆေးရုံတွေမှာ ဆေးကုသပေးနေတာတွေ ရှိတယ်လို့လည်း သိရပါတယ်။
မြေပုံမြို့ နဲ့ အနီးတ၀ိုက်မှာတော့ ပြီးခဲ့တဲ့ အောက်တိုဘာ ၂၃ ရက်နေ့ ညနေပိုင်းက စတင်ဖြစ်ပွားခဲ့တဲ့ အကြမ်းဖက်မှုတွေကြောင့် ဒီနေ့ အချိန်ထိ အခြေအနေတွေ တင်းမာနေဆဲဖြစ်တယ်လို့ သိရပါတယ်။ ပဋိပက္ခတွေအတွင်း သေဆုံးတဲ့သူ ၁ ဦးနဲ့ ဒဏ်ရာရသူ ၆၀ လောက်ရှိတယ်လို့ သိရပါတယ်။ မနေ့က အောက်တိုဘာလ ၂၄ ရက် နေ့မှာတော့ ည ၇ နာရီကနေ မနက် ၅ နာရီအထိ ညမထွက်ရအမိန့် ပုဒ်မ ၁၄၄ ထုတ်ပြန်ခဲ့တယ်လို့ မြေပုံမြို့နယ် ပြည်နယ်လွှတ်တော်ကိုယ်စားလှယ် ဦးအောင်ဝင်းက ပြောပါတယ်။
ရခိုင်ပဋိပက္ခတွင် အစိုးရက ပိုမိုထိရောက်စွာ ကိုင်တွယ်ရန် NLD တိုက်တွန်း
ပုဒ်မ
၁၄၄ ထုတ်ပြန်ထားသည့် ပဋိပက္ခများ ဖြစ်ပွားရာ ရခိုင်ပြည်နယ် ဒေသတချို့တွင် ပဋိပက္ခထိန်းသိမ်းရေးနှင့်
တည်ငြိမ်အေချမ်းမှု ရရှိရေးအတွက် အစိုးရနှင့် လုံခြုံရေး တာဝန်ရှိသူများအနေဖြင့် ပိုမိုဝီရိယ
စိုက်ထုတ်ဆောင်ရွက်ရန် လိုအပ်ကြောင်း အမျိုးသားဒီမိုကရေစီ အဖွဲ့ချုပ် (NLD) က ယနေ့တွင်
ကြေညာချက် ထုတ်ပြန် တိုက်တွန်းလိုက်သည်။ ပိုမိုထိရောက်သော လုပ်ဆောင်မှုများ အမြန်ဆုံးဆောင်ရွက်
ရန်လည်း ကြေညာချက်တွင် ဖော်ပြထားသည်။
ရခိုင်ပြည်နယ်အတွင်း ဖြစ်ပွားခဲ့သည့်
ပဋိပက္ခများနောက်ကွယ်တွင် ကြိုးကိုင်လှုပ်ရှားနေသည့် လူပုဂ္ဂိုလ်နှင့် အဖွဲ့အစည်းများ
ရှိနေကြောင်း နိုင်ငံတော်သမ္မတရုံးမှ အောက်တိုဘာလ ၂၅ ရက်နေ့ ည ၈ နာရီတွင်
နိုင်ငံပိုင်ရုပ်မြင်သံကြားမှ ထုတ်ပြန်သည့် ၁/၂၀၁၂ သတင်း
ကြေညာချက်တွင်ဖော်ပြပါရှိခဲ့သည်။
ပြည်ထောင်စုသမ္မတ မြန်မာနိုင်ငံတော်
သမ္မတရုံးမှ သတင်းထုတ်ပြန်ချက်တွင် အချက် ၆ ချက်ပါဝင်ပြီး အဆိုပါအချက်များမှာ
အောက်ပါအတိုင်းဖြစ်ပါသည်။
၂၀၁၂ ခုနှစ် မေလနှင့်ဇွန်လတို့တွင်
ဖြစ်ပွားခဲ့သော ရာဇ၀တ်မှုများကို အကြောင်းပြု၍ လူအုပ်စုအချင်းချင်း ဒေါသအလျောက်
အကြမ်းဖက် တိုက်ခိုက်မှု၊ မီးရှို့ဖျက်ဆီးမှုများ ဖြစ်ပွားခဲ့ရာ ဇွန်လ ၁၄ ရက်နေ့အထိ
သေဆုံးသူ ၅၀ ဦး၊ ဒဏ်ရာရရှိသူ ၅၄ ဦးရှိခဲ့၍ လူနေအိမ် ၂၂၃၀ အိမ်နှင့်
ဘာသာရေးအဆောက်အအုံ ၁၄ ခု မီးလောင်ဆုံးရှုံးခဲ့ပြီး ဒေသခံပြည်သူ ၆၁၄၆၂ ဦးတို့
အိုးမဲ့အိမ်မဲ့ဖြစ်ကာ ဒုက္ခသည်စခန်းများသို့ ရောက်ခဲ့ကြကြောင်း ဖော်ပြပါရှိသည်။
အဆိုပါပဋိပက္ခ
ဖြစ်ပွားနေခြင်းများနှင့် ပတ်သက်၍ အလျင်အမြန် အေးငြိမ်းသွားစေရန်
ရခိုင်ပြည်နယ်အစိုးရအဖွဲ့က မြို့နယ်အချို့တွင် ပြစ်မှုဆိုင်ရာကျင့်ထုံး ဥပဒေပုဒ်မ
၁၄၄ ထုတ်ပြန်ခဲ့ကြောင်း၊ နိုင်ငံတော်သမ္မတက ဖွဲ့စည်းပုံ အခြေခံဥပဒေနှင့်အညီ
ဥပဒေကဲ့သို့အာဏာတည်သည့် အမိန့်ကို ထုတ်ပြန်ပြီး အရေးပေါ် အခြေအနေ ကြေညာခဲ့ကြောင်း၊
မြန်မာနိုင်ငံရဲတပ်ဖွဲ့နှင့် တပ်မတော် အပါအ၀င် ဒေသခံပြည်သူများနှင့် ပူးပေါင်း၍
ဥပဒေစိုးမိုးရေးနှင့် ရပ်ရွာတည်ငြိမ်အေးချမ်းရေးအတွက်
ကြိုးပမ်းဆောင်ရွက်ခဲ့သောကြောင့် အချိန်တိုအတွင်း တည်ငြိမ်အေးချမ်းမှုကို
ပြန်လည်ရရှိခဲ့ကြောင်း၊ အရေးပေါ်အခြေအနေ ထုတ်ပြန်ဆောင်ရွက်မှုကိုလည်း ဥပဒေနှင့်အညီ
ပြည်ထောင်စုလွှတ်တော်၏ အတည်ပြုချက်ရယူ ဆောင်ရွက်ခဲ့ကြောင်း
သတင်းထုတ်ပြန်မှုတွင်ပါရှိခဲ့သည်။
ယင်းဖြစ်စဉ်အပေါ်
နိုင်ငံတကာအဖွဲ့အစည်းအချို့တို့မှ မြန်မာနိုင်ငံအား
လူ့အခွင့်အရေးချိုးဖောက်မှုအဖြစ် ပုံဖော်ပြီး ပြစ်တင်ဝေဖန်မှုများ
ပြုလုပ်ခဲ့သည့်အပြင် ကမ္ဘာ့ကုလသမဂ္ဂအဖွဲ့ကြီးသို့ပင် တင်ပြခဲ့သည့်အတွက်
နိုင်ငံတော်အစိုးရ အနေဖြင့် အဆိုပါပြစ်တင်ဝေဖန်မှုများကို နည်းလမ်းမျိုးစုံဖြင့်
ကြိုးပမ်းချေဖျက်ခဲ့ရကြောင်း၊ တစ်ချိန်တည်းမှာပင် ဒုက္ခသည်များအတွက်
ယာယီနေရာချထားရေး၊ စားနပ်ရိက္ခာထောက်ပံ့ရေး၊ ကျန်းမာရေးစောင့်ရှောက်မှု ပြည့်စုံရေးနှင့်
ပြန်လည်ထူထောင်ရေးတို့အတွက် လူသားချင်း စာနာထောက်ထားသည့်
ထောက်ပံ့ကူညီမှုများရရှိအောင် ကြိုးပမ်းဆောင်ရွက်ခဲ့ရသည်ဟုလည်း ဖော်ပြပါရှိသည်။
ယခုအခါ ရခိုင်ပြည်နယ် ကျောက်ဖြူမြို့နယ်၊ မင်းပြားမြို့နယ်၊
မြေပုံမြို့နယ်နှင့် မြောက်ဦးမြို့နယ်တို့တွင် မမျှော်လင့်ဘဲ ဆူပူအကြမ်းဖက်မှုများ
ထပ်မံဖြစ်ပွားခဲ့ရာ ၂၀၁၂ ခုနှစ် အောက်တိုဘာလ ၂၄ ရက်နေ့အထိ သေဆုံးသူ ၁၂ ဦး၊
ဒဏ်ရာရရှိသူ ၅၀ ဦးရှိပြီး၊ လူနေအိမ် ၁၉၄၈ လုံး၊ဘာသာရေး အဆောက်အအုံ ၈ ခု
မီးလောင်ပျက်စီးဆုံးရှုံးကာ လူအများအပြား အိုးမဲ့အိမ်မဲ့ ဖြစ်ခဲ့သည်ဟူ၍ ပါရှိသည်။
လက်ရှိအခြေအနေသည်
ဒီမိုကရေစီဖော်ဆောင်သော ပြုပြင်ပြောင်းလဲမှုများကို အချိန်တိုအတွင်း ညင်သာစွာအသွင်
ကူးပြောင်းနိုင်ခဲ့ခြင်းနှင့် စပ်လျဉ်း၍ မြန်မာနိုင်ငံအပေါ် နိုင်ငံတကာ
အသိုင်းအ၀ိုင်းမှ အသိအမှတ်ပြု ထောက်ခံလျက်ရှိသကဲ့သို့၊ ဆက်လက်တိုးတက်
ဖြစ်ပေါ်လာမည့် အခြေအနေများကို စိတ်ဝင်စားစွာ စောင့်ကြည့်နေကြသည့် အချိန်ကာလလည်း
ဖြစ်ပါကြောင်း ထည့်သွင်းထုတ်ပြန်ခဲ့သည်။
အဆိုပါကဲ့သို့သော အခြေအနေတွင်
တစ်ကျော့ပြန်ဖြစ်ပွားလာသော ဆူပူအကြမ်းဖက်မှုများသည် နိုင်ငံတော်၊ နိုင်ငံသားတို့၏
ဂုဏ်သိက္ခာနှင့် အကျိုးစီးပွားကို ထိခိုက်နစ်နာစေနိုင်သဖြင့် မြန်မာနိုင်ငံရဲတပ်ဖွဲ့၊
တပ်မတော်နှင့် ဒေသခံ ပြည်သူများ၏ ပူးပေါင်းပါဝင်မှုဖြင့် ဥပဒေစိုးမိုးရေးနှင့်
ရပ်ရွာတည်ငြိမ် အေးချမ်းရေးကို ထိထိရောက်ရောက် ဆောင်ရွက်သွားမည် ဖြစ်ပါကြောင်း၊
ထို့ပြင် ရခိုင်ပြည်နယ် ပဋိပက္ခတွင် နောက်ကွယ်မှကြိုးကိုင်လှုပ်ရှားနေသော
လူပုဂ္ဂိုလ်နှင့်အဖွဲ့အစည်းများလည်း ရှိနေကြောင်း သိရှိရသဖြင့် ၎င်းတို့ကိုဖော်ထုတ်၍
ဥပဒေနှင့်အညီ ထိရောက်စွာအရေးယူသွားမည် ဖြစ်ကြောင်း ထုတ်ပြန်ကြေညာသွားခဲ့သည်။
“အပြစ်မဲ့ ပြည်သူတွေ သေနေတာ ဝမ်းနည်းဖို့ ကောင်းတယ်”
လက်ရှိ ရခိုင်ပြည်နယ် မင်းပြား၊ ကျောက်တော်၊ မြောက်ဦး အစရှိသည့် ဒေသများတွင် ဖြစ်ပေါ်နေသော ပဋိပက္ခများ ဆက်လက် ကြီးထွားနေသည်။ ထိုအချိန်တွင် အစ္စလမ်ဘာသာရေး ခေါင်းဆောင်များက လာမည့် စနေနေ့ အောက်တိုဘာ ၂၇ ရက်နေ့တွင် ကျရောက်မည့် ကိုရ်ဘာနီ အိဒ်ပွဲတော် မကျင်းပရန် ဆုံးဖြတ်လိုက်ကြသည်။
ထို့အပြင် အစ္စလမ်နိုင်ငံများ ပူးပေါင်းဆောင်ရွက်ရေး အဖွဲ့ (OIC) မြန်မာနိုင်ငံတွင် ရုံးလာဆိုက်မည်ဆိုသည့် သတင်းနှင့် ပတ်သက်၍ မြန်မာနိုင်ငံ နေရာဒေသ အသီးသီးတွင် ပြည်သူများ လက်သင့်မခံရေး ဆန္ဒထုတ်ဖော်မှုများလည်း ဖြစ်ပေါ်ခဲ့သည်။
ထို့ကြောင့် အိဒ်ပွဲတော် မကျင်းပဖြစ်သည့် ကိစ္စနှင့် OIC အပေါ် မြန်မာမွတ်စလင်များ မည်သို့ မျှော်လင့်ထားသည်၊ မည်သို့ သဘောထားသည်ကို သိရှိနိုင်ရန် မြန်မာနိုင်ငံ အစ္စလမ် သာသနာ ရေးရာ ကောင်စီတွင် ကာလကြာရှည်စွာ အဖွဲ့ဝင်ဖြစ်ခဲ့သူ၊ ၂၀၁၀ ပြည့်နှစ် အောက်တိုဘာမှ စတင်ကာ တွဲဘက် အတွင်းရေးမှူးချုပ် အဖြစ် တာဝန်ယူ၍ မြန်မာနိုင်ငံအတွင်းရှိ အစ္စလမ်ဘာသာဝင်များ၏ ရေးရာ ကိစ္စရပ်များကို ဆောင်ရွက် နေသည့် ဦးဝဏ္ဏရွှေနှင့် ဧရာဝတီသတင်းထောက် ဇွဲထက်က တွေ့ဆုံ မေးမြန်းထားပါသည်။
မေး။ ။ ဒီနှစ် ကိုရ်ဘာနီ အိဒ်ပွဲ မလုပ်တော့ဘူးလို့ ဆုံးဖြတ်လိုက်တဲ့ ကိစ္စက ရခိုင်ပြည်နယ်က လက်ရှိ ပဋိပက္ခ အရေးကိစ္စတွေကြောင့်လား။
ဖြေ။ ။ မင်းပြားတို့၊ ကျောက်ဖြူတို့မှာ ဖြစ်နေတဲ့ ကိစ္စက အိဒ် မလုပ်ရလို့ ဖြစ်တာ မဟုတ်ဘူး။ ကျောက်ဖြူတို့ မင်းပြားတို့ အပါအ၀င် အခုဖြစ်နေတဲ့ ပဋိပက္ခတွေကတော့ အိဒ် မလုပ်ဖြစ်တဲ့ အထဲမှာ အချက်တချက် အနေနဲ့ ပါဝင်နေတယ်။
မေး။ ။ အိဒ် မလုပ်နိုင်တဲ့အတွက် ဘာသာရေးနဲ့ ပတ်သက်လို့ ထိခိုက်မှု မရှိနိုင်ဘူးလား။
ဖြေ။ ။ အိဒ် မလုပ်နိုင်တဲ့ အပေါ်မှတော့ လူမျိုးတိုင်း ဘာသာတိုင်းပါပဲ၊ ကိုယ့်ဘာသာရေး နှစ်စဉ် တနှစ်တခါ လုပ်ရတဲ့ အခမ်းအနား မကျင်းပဖြစ်ဘူးဆိုရင် အတိုင်းမသိ ၀မ်းနည်းရတာ ပေါ့နော်။ ဒါပေမယ့် အပြစ်မဲ့တဲ့ ပြည်သူတွေ ဒုက္ခရောက်မှု
နဲ့ ယှဉ်လိုက်မယ်ဆိုရင် ဘာသာရေးအရ ပြုမူချက် တခုကို မလုပ်လိုက်ရလို့ ၀မ်းနည်းတာထက် အပြစ်မဲ့ ပြည်သူတွေ သေနေတာက ပိုဝမ်းနည်းဖို့ ကောင်းပါတယ်။
လူသားတွေဟာ ကိုးကွယ်ယုံကြည်မှု အရေးကြီးသလို၊ အသက်ရှင်ဖို့ လုံခြုံမှုရှိရေးက အရေးအကြီးဆုံးလို့ ထင်တယ်။ ဘာမှ အပြစ်မရှိဘဲနဲ့ သက်ကြီးရွယ်အိုတွေ၊ အမျိုးသမီးတွေ၊ ကလေးငယ် လူမမယ်တွေ ဒုက္ခရောက်နေတဲ့ ဒီအနေအထား အခြေအနေဆိုးကြီးက မအိပ်နိုင် မစားနိုင် ဖြစ်နေတယ်။ ဘယ်သူ့ကိုမှ မဖြစ်စေချင်ဘူး။
မေး။ ။ အိဒ် လုပ်ဖြစ်၊ မလုပ်ဖြစ်ဆိုတဲ့ ကိစ္စနဲ့ ပတ်သက်ပြီး အစ္စလမ် ဘာသာဝင်အချင်းချင်း သဘောထား ကွဲလွဲမှုတွေ ဖြစ်ခဲ့တဲ့အပေါ် ဘာပြောချင်ပါသလဲ။
ဖြေ။ ။ ကျနော်တို့ကို အစိုးရကနေပြီးတော့ အိဒ် မလုပ်နဲ့လို့ မပြောဘူး၊ မတားဘူး၊ အစိုးရက ကျနော်တို့ကို မတားသလို ကျနော်တို့ ကလည်း မွတ်စလင် လူထုကို အိဒ် မလုပ်ရဘူးလို့ အမိန့်ပေး တားဆီးတာ မဟုတ်ဘူး။ အစ္စလမ် ဘာသာရေးအဖွဲ့ အစည်းတွေက တဘက်မှာ အစ္စလမ် တရားဓမ္မ သက်သက်ကို ကိုယ်းကွယ်ယုံကြည်သူတွေ ရှိသလို တဘက်မှာ လက်ရှိ ဖြစ်နေတဲ့ အခြေအနေကို သုံးသပ် ပြီးတော့ နိုင်ငံတော်အတွက်ရော၊ ကျနော်တို့ ဘာသာဝင်တွေ အတွက်ပါ ကြည့်တဲ့သူတွေ ရှိပါတယ်။
ဒီနိုင်ငံမှာ နှစ်ပေါင်း ၅၀ လောက် အတွင်း ဘာသာတခုနဲ့ တခု နားလည်မှုက တော်တော်ကို အထိခိုက် မခံနိုင်ဆုံး အခြေအနေမှာ ရောက်နေတယ်။ ရခိုင်ပဋိပက္ခကို အကြောင်းပြုပြီးတော့ ဘာသာတခုနဲ့ တခုအကြား နားလည်မှုတွေ ပျက်နေတယ်။ အဲဒီလို အခြေအနေမျိုးမှာ ငါတို့ဘာသာ တရားအရ ဘာသာရေး အခမ်းအနားပဲ၊ ငါတို့လုပ်မှာပဲ ဆိုပြီးတော့ ထည့်သွင်း မသုံးသပ်ဘဲနဲ့ လုပ်လိုက်ရင် နောင်မှာ ပြင်နိုင်ခဲတဲ့ အခြေအနေမျိုးတွေ ကြုံလာမှာကို စိုးရိမ်တယ်။ ဒီတနှစ်ကို ကျနော်တို့က အနစ်နာခံလိုက်တယ်၊ စွန့်လွှတ်လိုက်တယ်။ နောက်ဆုတ်လိုက်ခြင်း အားဖြင့် တသက်လုံး ကျနော်တို့ တသက်လုံး ဒီနိုင်ငံမှာ အေးအေးချမ်ချမ်းနဲ့ ဒီပွဲတော်ကိုကျင်းပ သွားနိုင်မယ်လို့ ယူဆပြီး ဆောင်ရွက်တာ ဖြစ်တယ်။
မေး။ ။ မြန်မာနိုင်ငံ အစ္စလမ် သာသနာရေးရာကောင်စီ အနေနဲ့ OIC ရုံး မြန်မာပြည်မှာ ဖွင့်သင့်တယ်လို့ ယူဆပါသလား။
ဖြေ။ ။ OIC တင်မဟုတ်ဘူး မြန်မာနိုင်ငံက ဒုက္ခရောက်နေတဲ့ ပြည်သူ လူမျိုးမရွေး၊ ဘာသာမရွေး အကူအညီပေးမယ် ဆိုရင် ဘယ်အဖွဲ့အစည်းကို မဆို ကြိုဆိုတယ်။ ကျနော်တို့ နိုင်ငံမှာ ရှိနေတဲ့ လူမျိုးပေါင်းစုံ၊ ဘာသာပေါင်းစုံ ချစ်ကြည်မှုကိုတော့ အနှောက်အယှက် မဖြစ်စေရဘူးပေါ့။ အကူအညီတွေ လိုနေတာအမှန်ပဲ။ ဒုက္ခရောက်နေတဲ့ ပြည်သူတွေအတွက် အစ္စလမ် သာသနာရေးရာ ကောင်စီအဖွဲ့တွေအနေနဲ့ တက်နိုင်သလောက် ရှာဖွေတယ်၊ လိုအပ်ချက်နဲ့ ရှာဖွေနိုင်တဲ့ အတိုင်းအတာနဲ့က မကာမိဘူး။ အကူအညီအများကြီး လိုနေတယ်။ သို့သော် ရှိနေတဲ့ အခြေအနေ ပျက်ယွင်းသွားမယ် ဘာသာတခုနဲ့ တခု၊ လူမျိုး တခုနဲ့တခု ကြားမှာ နားလည်မှု ပျက်ပြားသွားမယ် ဆိုရင်တော့ ဒီဟာကိုတော့ အထိခိုက် မခံလိုပါဘူး။
မေး။ ။ အစ္စလမ်နိုင်ငံ ၅၇ နိုင်ငံ ပူးပေါင်းဖွဲ့စည်းထားတဲ့ OIC အဖွဲ့နဲ့ မြန်မာနိုင်ငံက မြန်မာမွတ်စလင်တွေ၊ ဘာသာရေး ခေါင်းဆောင်တွေ အဆက်အသွယ် ရှိပါသလား။
ဖြေ။ ။ OICဆိုတာ အစ္စလမ်အများစု နေထိုင်တဲ့ နိုင်ငံ အစိုးရတွေ ဖွဲ့ထားတာ၊ အစိုးရ အချင်းချင်း ဖွဲ့စည်းထားတဲ့ အဖွဲ့အစည်း ဖြစ်တယ်။ ဒီနိုင်ငံမှာ အစ္စလမ်က အများစု မဟုတ်တဲ့အတွက် OIC အဖွဲ့ဝင်အဖြစ် မပါဘူး။ မပါတဲ့အတွက် OIC နဲ့မြန်မာမွတ်စလင်တွေ၊ ဘာသာရေးခေါင်းဆောင်တွေ တခါမှ အထိအတွေ့ အဆက်အဆံ မရှိခဲ့ဘူး။ OIC နဲ့ ထိတွေ့ ဆက်ဆံတာက နိုင်ငံတော်အစိုးရပဲ ဖြစ်တယ်။ သူတို့ ဘာတွေ သဘောတူကြလဲ ဆိုတာ အသေးစိတ်မသိဘူး။
မေး။ ။ OIC ရုံး မြန်မာပြည်မှာ လာဖွင့်မယ်ဆိုရင် မြန်မာမွတ်စလင်တွေ အနေနဲ့ ကောင်းကျိုး ဆိုးကျိုး ဘာတွေ ရှိနိုင်မယ်လို့ ယူဆပါသလဲ။
ဖြေ။ ။ ကမ္ဘာမှာရှိတဲ့ မွတ်စလင်နိုင်ငံ ၅၇ နိုင်ငံ ဆိုတာ အကြမ်းဖက်မှုကို ဆောင်ရွက်နေတဲ့ နိုင်ငံတွေမဟုတ်ဘူး။ ကုလသမဂ္ဂ အဖွဲ့ဝင် နိုင်ငံတွေပဲ။ တချို့နိုင်ငံတွေက မြန်မာနိုင်ငံနဲ့ အဆက်အသွယ်ရှိတယ်၊ စီးပွားရေး၊ ယဉ်ကျေးမှုစတဲ့ လုပ်ငန်းတွေမှာ ပူးပေါင်းဆောင်ရွက်တာ ရှိတယ်။ တခါမှ အကျိုးယုတ်ခဲ့တာတော့ မတွေ့ဘူး။ OIC နဲ့ ဆက်သွယ် ဆောင်ရွက်ချင်းအားဖြင့် မြန်မာနိုင်ငံအတွက် တစုံတရာ အကျိုးနစ်နာမယ်လို့ အခုချိန်အထိ မမြင်ပါဘူး။
မေး။ ။ မွတ်စလင် မဟုတ်တဲ့ တခြားဘာသာဝင်တွေက ကန့်ကွက်တဲ့ OIC အဖွဲ့က မြန်မာနိုင်ငံရဲ့ အမျိုးသားရေးကို တကယ်ပဲ ထိခိုက်နိုင်တယ်လို့ ထင်ပါ သလား။
ဖြေ။ ။ OIC နဲ့ စပြီးတော့ မြန်မာနိုင်ငံနဲ့ ဘာတွေဆောင်ရွက်တယ်၊ ဘယ်လိုဆောင်ရွက်တယ်ဆိုတာ ရှင်းရှင်းလင်းလင်း အစကတည်းက သိထားရင် ပြည်သူအများစုက ဒီလိုမြင်မှာ မဟုတ်ဘူး။ OIC နဲ့ ဘယ်လို ကဏ္ဍတွေမှာ ပူးပေါင်းဆောင်ရွက်
မယ်၊ ဘာတွေလုပ်မယ်၊ ဘာတွေကူညီမယ်ဆိုတာ ထင်သာမြင်သာ ရှိခဲ့ရင် ဒီလိုမဖြစ်ဘူး။
နိုင်ငံတော်က ဒီလိုကိစ္စတွေမှာ ဆောင်ရွက်တယ်ဆိုရင် နဂိုကတည်းက ထင်သာမြင်သာရှိအောင် လုပ်ရမယ်။ အစ္စလမ်နဲ့ ပတ်သက်တယ်ဆိုရင် အစ္စလမ် ဘာသာရေး အဖွဲ့အစည်းတွေလည်း သိနေရမယ်။ နိုင်ငံသားတိုင်းနဲ့ ပတ်သက်တဲ့ကိစ္စ၊ နိုင်ငံတော် အကျိုးစီးပွားနဲ့ ပတ်သက်တဲ့ ကိစ္စဆိုရင်လည်း နိုင်ငံသားတိုင်းဟာ အသေးစိတ် သိရှိနေမယ်ဆိုရင် မလိုလားအပ်တဲ့
စကားချဲ့ကားမှုတွေ လျော့နည်းသွားမယ်လို့ ယူဆပါတယ်။
OIC မရှိခင်ကလည်း မြန်မာနိုင်ငံမှာ အစ္စလမ် သာသနာ ရှိခဲ့တာပဲ။ ဒီဟာက မြန်မာ မွတ်စလင်တွေ အကျိုးအတွက် မဟုတ်ဘူး။ ရခိုင်ဒေသမှာနေတဲ့ ဒုက္ခရောက်နေတဲ့ ပြည်သူတွေအတွက် အကျိုးပဲ။
မေး။ ။ OIC အနေနဲ့ မြန်မာနိုင်ငံမှာ လာပြီးကူညီမယ်ဆိုရင် ဘယ်လို ကူညီလိမ့်မယ်လို့ ထင်လဲ။
ဖြေ။ ။ OIC ဆိုတာ ကမ္ဘာ့နိုင်ငံတွေနဲ့ ဖွဲ့တာ၊ အကြီးကြီး။ မြန်မာနိုင်ငံထဲမှာ ရှိနေတဲ့ အစ္စလမ် အဖွဲ့တွေတောင်မှ ကူညီတဲ့အခါမှာ အစ္စလမ် ဘာသာဝင်တွေကိုလည်း ကူညီတယ်၊ တခြားဘာသာဝင် ဒုက္ခရောက်နေတဲ့ သူတွေကိုလည်း အလျဉ်းသင့်သလို ကူညီတယ်။ ဒုက္ခရောက်နေတယ် ဆိုရင် ဘာသာ မခွဲတော့ဘူး၊ အားလုံးလူသားပဲ မြင်တယ်။ OIC ဘယ်လို အစိုးရနဲ့ သဘောတူ ထားလဲဆိုတာ အသေးစိတ်မသိဘူး။ တဘက်နဲ့ တဘက် နားလည်မှုလွဲပြီး ဒုက္ခရောက်နေတဲ့ အခြေအနေမျိုးတွေမှာ ပိုလိုတယ်။ ကူညီတဲ့အခါမှာ ဒုက္ခရောက်နေတဲ့ ပြည်သူ အားလုံးကို ကူညီလိုက်မယ်ဆိုရင် ဒီဒုက္ခကလည်း လွန်မြောက်သွားမယ်။ ဒီပြည်သူတွေ ကြားမှာလည်း ချစ်ကြည်မှုက ပြန်လည် ဖြစ်လာမယ်လို့ ယူဆတယ်။
မေး။ ။ OIC ကန့်ကွက်မှုကြောင့် သမ္မတ ဦးသိန်းစိန် နိုဘဲလ်ဆုနဲ့ လွဲခဲ့တယ်လို့ ထင်ပါသလား။
ဖြေ။ ။ အဲဒီလိုတော့ မမြင်ဘူး။ နိုဘဲလ်ဆု ဆိုတာလည်း တော်တော် ခဲရခဲဆစ် ရခဲတဲ့ဟာလေ။ ဆောင်ရွက်ချက်တွေ ကောင်းတိုင်းလည်း မဟုတ်သေးဘူး။ သူ့နဖူးစာ ပါမှရတာလေ။ ကျနော်တို့ နိုင်ငံက သမ္မတ အနေနဲ့ ဘာပဲပြောပြော နိုဘဲလ်ဆု လျာထား စာရင်းမှာ ပါတယ်ဆိုတာကို သဘောကျပါတယ်၊ ၀မ်းသာပါတယ်။
မေး။ ။ ရိုဟင်ဂျာ အရေးကိစ္စက အမျိုးသား အရေးလို့ ယူဆလား၊ ဘာသာရေးလို့ ယူဆပါသလား။
ဖြေ။ ။ အခု ရခိုင်ပြည်နယ်မှာ ဖြစ်တဲ့ ကိစ္စက အဓိက တရားဥပဒေ စိုးမိုးရေးပဲ။ ရခိုင်ဒေသမှာ ဖြစ်တဲ့ ဒီပဋိပက္ခ ပြဿနာ မပေါ်ပေါက်ခင် ကတည်းက အဲဒီဒေသမှာ ရှိတဲ့ တည်ဆဲ ဥပဒေတွေနဲ့အညီ မဆောင်ရွက်ခဲ့ဘူး။ နှစ်ပေါင်းများစွာ ကြာလာတော့ အခုဖြစ်တာ။ ဘာသာရေး အရတော့ ဘာမှမပြောလိုဘူး၊ ဒါနိုင်ငံရေးအရ ဖြေရှင်းရမယ့် အရာ။မေတ္တာရပ်ခံ လိုတာက အဲဒီဒေသမှာ ရှိနေတဲ့ ပုဂ္ဂိုလ်တွေက နိုင်ငံသားတွေ ဖြစ်နေရင်၊ နိုင်ငံသား အခွင့်အရေး မရဘူးဆိုရင် ဒါ နစ်နာတယ်။ပုဂ္ဂလိက တဦးချင်း နစ်နာသလို နိုင်ငံတော်အတွက်လည်း နစ်နာတယ်။ နိုင်ငံသားမဟုတ်တဲ့ သူကို နိုင်ငံသားပေးရင် နိုင်ငံတော်အတွက် နစ်နာသလို နိုင်ငံသား ဖြစ်ထိုက်ပါလျက်နဲ့ နိုင်ငံသား မရဘူးဆိုရင်လည်း နစ်နာတယ်။ ဒါတွေအားလုံးကို ငြိမ်းချမ်းတဲ့ နည်းနဲ့ အေးအေးဆေးဆေး ဖြေရှင်းသွားမယ်၊ ဥပဒေနဲ့ ဆောင်ရွက်သွားမယ် ဆိုရင် ငြိမ်းချမ်းသွားမယ်။
ရခိုင်ဒေသမှာရှိတဲ့ နှစ်ဘက်သော ပြည်သူများ အလွန် ဒုက္ခရောက်ပါတယ်။ အထောက်အကူ ဖြစ်စေတဲ့ လုပ်ငန်းများကိုပဲ အားလုံး ဒီအချိန်မှာ အာရုံထားပြီးတော့ လက်တွဲ ဆောင်ရွက်ကြပါလို့ တတ်နိုင်သမျှ အားလုံးကို ဖိတ်ခေါ်ပါတယ်။ ဒီအခက်အခဲ အကျပ်အတည်းမှာ ဒုက္ခရောက်နေတဲ့ ပြည်သူတွေကို အရင်ဆုံး သူတို့ဘ၀လေး ပုံမှန်ဖြစ်အောင် ဆောင်ရွက်ပြီးတော့မှ ကျန်တဲ့ ပြဿနာတွေကို အေးချမ်းစွာ ဆက်လက်ပြီး ဥပဒေနဲ့အညီ ဖြေရှင်းကြပါလို့ မေတ္တာရပ်ခံ လိုပါတယ်။ OIC နဲ့ ကမ္ဘာ့ နိုင်ငံကြီးများ ဘယ်လိုသဘောထားလဲ၊ ကုလသမဂ္ဂ အဖွဲ့အစည်းနဲ့ ဘယ်လို သဘောထားလဲ၊ ဒီဟာတွေအပေါ်မှာ လေ့လာပြီး ပြောတဲ့သဘောပါ။
LWIN PWIN
NLABR
Web-site: www.nlabr.com
Subscribe to:
Post Comments (Atom)
0 comments:
Post a Comment