ကချင်ဒုက္ခသည်များကို မဖွယ်မရာ နှိပ်စက်သည့် ရဲများ တရားရုံးဆင့်ခေါ်မှုကို ဖီဆန်

ကချင် တိုင်းရင်းသား ဒုက္ခသည် ၂ ဦးကို ဖမ်းဆီးနှိပ်စက်ပြီး အမျိုးသား အချင်းချင်း အဓမ္မ လိင်ဆက်ဆံ ခိုင်းခဲ့သည်ဟူသော စွပ်စွဲချက်နှင့် ပတ်သက်၍ ကချင်ပြည်နယ် မြစ်ကြီးနားမြို့နယ် တရားရုံးမှ ရဲတပ်ဖွဲ့ဝင် ၇ ဦးကို စစ်ဆေးရန် ဆင့်ခေါ်ခဲ့ရာ လာရောက်ရန် ပျက်ကွက်ခဲ့ကြောင်း သိရသည်။
ရဲတပ်ဖွဲ့ဝင်များကို စက်တင်ဘာ ၂၆၊ စက်တင်ဘာ ၂၉ ရက်နေ့နှင့် အောက်တိုဘာလ ၃ ရက်နေ့တို့တွင် ၃ ကြိမ် ဆင့်ခေါ်ခဲ့ရာ ပျက်ကွက်ခဲ့ကြောင်း ယင်းအမှုကို လိုက်ပေးနေသည့် ရှေ့နေ ဦးမာခါးက ပြောသည်။
အဆိုပါ ကချင် တိုင်းရင်းသား ၂ ဦးကို ကချင်လွတ်လပ်ရေး တပ်မတော် (KIA) တပ်ဖွဲ့နှင့် ဆက်စပ်မှုရှိကြောင်း မသင်္ကာမှုဖြင့် မြစ်ကြီးနားမြို့နယ် တာလောကြီးကျေးရွာ အခြေစိုက် ခြေလျင်တပ်ရင်း အမှတ် (၃၇) တပ်ဖွဲ့ နှင့်ပူးပေါင်း၍ စစ်ဖက်ရေးရာ လုံခြုံရေး တပ်ဖွဲ့ (စရဖ) တို့က ဖမ်းဆီးခဲ့ခြင်း ဖြစ်သည်။
ဇွန်လအတွင်း၌ ၎င်းတို့ ၂ ဦးကို ကချင်သူပုန်ဟု စွပ်စွဲ၍ မြစ်ကြီးနားမြို့နယ် အမှတ် (၁) ရဲစခန်းသို့ ပို့ဆောင်ခဲ့ပြီး ချုပ်နှောင်ခံနေရစဉ်အတွင်း နှိပ်စက် စစ်ဆေးမှုများရှိကြောင်း၊ အချင်းချင်း အဓမ္မ လိင်ဆက်ဆံမှု ပြုခိုင်းကြောင်း၊ အ၀တ်ဗလာနှင့် ကချင်ရိုးရာအက ကပြရန် ခိုင်းစေခဲ့သည့်အပြင်၊ ၎င်းတို့ ယုံကြည်ကိုးကွယ်သည့် ခရစ်ယာန်ဘာသာကို စော်ကားသည့် လုပ်ရပ်များ လုပ်ဆောင်ခိုင်းကြောင်း သိရသည်။
တရားလိုပြ သက်သေများ ရောက်မလာသည့်အတွက် ဖမ်းဆီးခံထားရသူများ အနေနှင့် အချိန်ကြာမြင့်စွာ အချုပ်ခံနေရပြီး ယင်းကိစ္စကို ဥပဒေအရ အရေးယူဆောင်ရွက်နိုင်ကြောင်း ရှေ့နေ ဦးမာခါးက ဆိုသည်။
ရဲတပ်ဖွဲ့ဝင်များကို ရဲစခန်း စည်းကမ်းထိန်းသိမ်းရေး ဥပဒေအရ ဖြစ်မှု ထင်ရှားပါက ၂ နှစ်ခွဲခန့် ထောင်ဒဏ် ချနိုင်ကြောင်း၊ ယင်း အမှုကို ဆက်လက်ကူညီရန် စီစဉ်ထားကြောင်း ရှေ့နေ ဦးမာခါးက ရှင်းပြသည်။
“ဒီလို အဓမ္မ လိင်ကိစ္စလုပ်ခိုင်းတာကို သူတို့ အင်မတန်ရှက်တယ်၊ မိသားစုအတွက်လည်း ရှက်စရာကောင်းတယ်လို့ သူတို့က ပြောတယ်” ဟု ဦးမာခါးက ဆိုသည်။
“ဒါဟာ လူ့ဂုဏ်သိက္ခာကို ကျဆင်းစေတဲ့ လူ့အခွင့်အရေးကို ချိုးဖောက်တဲ့ ဥပမာပဲ။ လူတွေရဲ့ ယဉ်ကျေးမှုနဲ့ ဘာသာတရားကို စော်ကားတာပဲ” ဟု ဦးမာခါးက ဆက်ပြောသည်။
ကျူးလွန်သူများကို ပြစ်ဒဏ်ပေးရမည်ဖြစ်ကြောင်း၊ ယခု ၃ ကြိမ် ဆင့်ခေါ်သည့်တိုင် ရဲတပ်ဖွဲ့ဝင်များ တရာရုံးသို့ ရောက်လာခြင်း မရှိကြောင်းလည်း ၎င်းက ဆိုသည်။
ယခုအခါ အဆိုပါ ကချင်တိုင်းရင်းသား နှစ်ဦးကို တခြားရဲစခန်း တခုသို့ ပြောင်းရွှေ့ထားကြောင်း၊ ဖမ်းဆီးခံထားရသူ ၂ ဦး၏ မိသားစုဝင်များက ပြီးခဲ့သည့် သီတင်းနှစ်ပတ်ကျော်တွင် သမ္မတ ဦးသိန်းစိန်နှင့် ကုလသမဂ္ဂ လူ့အခွင့်အရေး အထူးကိုယ်စားလှယ် မစ္စတာ ကင်တားနားထံ တိုင်ကြားစာ ပေးပို့ထားကြောင်း သိရသည်။
ဇွန်လကလည်း မြစ်ကြီးနားမြို့နယ် အစိုးရထိန်းချုပ်မှုအောက်ရှိ ဂျန်မိုင်ကောင် စစ်ပြေးဒုက္ခသည်စခန်းတွင် ခိုလှုံနေသည့် ဦးဘရန်ရှောင်ကို ကချင်လွတ်မြောက်ရေးအဖွဲ့ (KIO) နှင့် ဆက်စပ်သူဖြစ်ပြီး ဖောက်ခွဲရေးသမားဟု စွပ်စွဲဖမ်းဆီးကာ စရဖအဖွဲ့က မြစ်ကြီးနားမြို့နယ် တရားရုံးတွင် တရားစွဲဆိုခဲ့သည်။
ယင်းသို့ စွပ်စွဲဖမ်းဆီးထားသည့် ဦးဘရန်ရှောင်ကို ခြွင်းချက်မရှိ လွှတ်ပေးရန်၊ စစ်ဘေးခိုလှုံသူ ဒုက္ခသည်များ အဓမ္မဖမ်းဆီး နှိပ်စက်ခြင်း မပြုရန်နှင့် တရားရုံး ခွင့်ပြုမိန့်မရဘဲ လူတဦးကို ၂၄ နာရီ ကျော်လွန်၍ ဖမ်းဆီးထားခြင်း မပြုရန် စသည့်အချက်များကို ခရစ်ယာန် ဘာသာရေး ခေါင်းဆောင်များ အပါအ၀င် ဒုက္ခသည် ၅၀၀ ကျော်နှင့် မြို့ခံ ၁၀၀၀ ကျော်တို့က မြစ်ကြီးနားမြို့ပေါ်ရှိ အစိုးရရုံးများနှင့် မြို့တွင်းလမ်းမများတွင် ဆန္ဒပြ တောင်းဆိုမှုများ ပြုလုပ်ခဲ့ကြသည်။
ရှေ့နေ ဦးမာခါး ပြောပြချက်အရ ကချင်ပြည်နယ် အတွင်း၌ KIO နှင့် ဆက်နွယ်သည်ဟု ဆိုကာ မတရားအသင်း ဆက်သွယ် မှုပုဒ်မ ၁၇/၁ ဖြင့် ဖမ်းဆီးခံထားရသူ ၇၀ ခန့်ရှိပြီး ရှမ်းပြည်နယ် မြောက်ပိုင်းတွင် ယင်းကဲ့သို့ စွပ်စွဲချက်ဖြင့် ဒေသခံ ၂၀ ကျော် အဖမ်းခံထားရကြောင်း သိရသည်။

ဦးဘရန်ရှောင်အမှု လျှောက်လဲချက် ပေးတော့မည်

ကချင်ပြည်နယ် မြစ်ကြီးနားမြို့နယ် ဒူကထောင် စစ်ပြေးဒုက္ခသည်စခန်းမှ ဦးလထော် ဘရန်ရှောင်အား ကချင်လွတ်လပ်ရေး တပ်မတော် (KIA) နှင့် ပတ်သက်သည်ဟု စွပ်စွဲဖမ်းဆီးထားသည့်အမူ စွဲချက်တင်သင့် မတင်သင့်ကို အောက်တိုဘာလ ၁၂ ရက်နေ့တွင် ဆုံးဖြတ်မည်ဖြစ်ကြောင်း သိရသည်။
“နှစ်ဖက်က လျှောက်လဲချက်ပေးကြမှာပါ။ ဟိုဘက်က ဥပဒေအရာရှိက စွဲချက်တင်သင့်ကြောင်း လျှောက်လဲမယ်။ ကျနော်က မတင်သင့်ဘူးလို့ ပြန်ပြီးလျှောက်လဲပါမယ်။ လျှောက်လဲပြီး နောက်တပတ်မှာဆိုရင် တင်သင့် မတင်သင့် အမိန့်ချပါမယ်။ ဒီမှာ စွဲချက် မတင်သင့်ဘူးလို့ ဆုံးဖြတ်ချက်ချမယ်ဆိုရင် ဒီအမှုက ပြီးသွားပါပြီ၊ ဆိုရင်တော့ အပြစ်မရှိဘူးပေါ့” ဟု ဦးဘရန်ရှောင် အမူတွင် ရှေ့နေအဖြစ် ဆောင်ရွက်နေသူ ဦးမာခါးက ပြောသည်။
လတ်တလောတွင် ဦးဘရန်ရှောင်သည် ထပ်မံ နှိပ်စက်ခံရသည့် လက္ခဏာ မတွေ့ရကြောင်း ဦးမာခါးက ပြောသည်။
ဦးဘရန်ရှာင်ကို ဇွန်လ ၁၇ ရက်နေ့ နံနက် ၉ နာရီတွင် မြစ်ကြီးနားမြို့ အမှတ် (၁) ရဲစခန်းမှ စခန်းမှူးနှင့် စစ်ဖက်ရေးရာ လုံခြုံရေးအဖွဲ့ (စရဖ) တို့က ဖောက်ခွဲရေးဆိုင်ရာ ပုဒ်မ ပေါက်ကွဲ ၃ ဖြင့် ဒုက္ခသည်စခန်းအတွင်းမှ လာရောက် ဖမ်းဆီးသွားပြီး ရုံးတင်သည့်အခါတွင် မတရားအသင်းနှင့် ဆက်သွယ်မှု ၁၇/၁ ဖြင့် ပြောင်းလဲ စွဲဆိုခဲ့သည်။
ဖမ်းဆီးသွားသည့် ဇွန်လ ၁၇ ရက်နေ့မှ ရုံးထုတ်သည့် ၂၈ ရက်နေ့အထိ မည်သူနှင့်မျှ မတွေ့ရဘဲ ရုံးထုတ်သည့် အချိန်တွင် မျက်နှာ၊ ရင်ဘတ်တို့တွင် ဒဏ်ရာများ ရရှိထားပြီး ခန္ဓာကိုယ်တွင် တွဲချည်ထားသည့် အသံဖမ်းစက်တို့ကြောင့် တရားစစ်ဆေးမှုကို ရပ်နားခဲ့သည်။
ဦးဘရန်ရှောင်သည် KIA မဟုတ်ကြောင်း ကချင်နှစ်ခြင်း ခရစ်ယာန်အသင်းချုပ်မှ သာသနာပိုင်ဆရာ ၄၈ ဦးက ဇွန်လ ၂၂ ရက်နေ့တွင် စာရေးသား လက်မှတ်ထိုးကာ ကချင်ပြည်နယ်ဝန်ကြီးချုပ်နှင့် သမ္မတတို့ထံ တင်ပြထားခဲ့သည်။
ရွှေစက်ဘုရားကျောင်း ဒုက္ခသည်စခန်းသို့ လာရောက်ခိုလှုံသူ နှစ်ဦးကိုလည်း KIA စစ်သားအဖြစ် စွပ်စွဲဖမ်းဆီးထားသဖြင့် အကူအညီပေးပါရန် သမ္မတ ဦးသိန်းစိန်ထံသို့ စက်တင်ဘာလ ၂၀ ရက်နေ့က ပေးပို့ခဲ့သေးကြောင်း သိရသည်။
“ရွေစက်က အမျိုးသားနှစ်ယောက်ကို စရဖက နှိပ်စက်ဝန်ခံခိုင်းတဲ့အကြောင်းကို သမ္မတအပါအ၀င် အဖွဲ့အစည်း တော်တော် များများဆီ ပို့ထားပါတယ်။ ၁၀ ရက်ကျော်တဲ့အထိ အကြောင်းတုန့်ပြန်တာမျိုး မရှိသေးပါဘူး ” ဟု ဦးမာခါးက ပြောသည်။

ဖက်ဒရယ် ပြည်ထောင်စု စနစ် ဒီမို ၁၀ ပါတီ ကြိုးပမ်းမည်

မြန်မာနိုင်ငံရှိ ပြည်နယ်နှင့်တိုင်း ၁၄ ခုကို တပြေးညီ ဖြစ်ရန် အတွက် ၁၄ ပြည်နယ် စနစ်ဖြင့် တည်ဆောက်နိုင်ရေး ဒီမိုကရေစီ မိတ်ဆွေ ၁၀ ပါတီ က ကြိုးပမ်းသွားမည်ဟု သိရသည်။
စစ်မှန်သည့် ဖက်ဒရယ်ပြည်ထောင်စု စနစ်ပေါ်ထွန်းရေး အတွက် ပြည်နယ်(သို့) တိုင်းဒေသ ကိုယ်စားပြုသော စာတမ်း တစောင် ရေးဆွဲနေပြီ ဖြစ်ကြောင်း၊၊ ထိုစာတမ်းအား နိုင်ငံတော် သမ္မတနှင့်လွှတ်တော်သို့ တင်ပြသွားရန် ဒီမိုကရေစီ မိတ်ဆွေ ၁၀ ပါတီ က ယမန်နေ့တွင် ပြုလုပ်သည့် အစည်းအဝေး၌ သဘောတူညီခဲ့ကြကြောင်း ဒီမိုကရက်တစ်ပါတီ(မြန်မာ) ၏ ဥက္ကဋ္ဌ ဦးသုဝေ က ပြောသည်။
“ပြည်နယ်နဲ့ဆိုရင် ၁၄ ပြည်နယ်ပေါ့၊ တိုင်း ဆိုရင်လည်းပဲ ၁၄ တိုင်းပေါ့၊ အားလုံးကို ဖက်ဒရယ်ပြည်ထောင်စု စနစ်အရ အာဏာကို တတန်းတည်း ခွဲဝေလိုက်တဲ့သဘောပါပဲ၊ အမေရိကန် ပြည်ထောင်စုလို ပုံစံနဲ့သွားကြဖို့ပါ”ဟု ၎င်းက ဆိုသည်။
ဖက်ဒရယ်ပြည်ထောင်စုသည် ခွဲထွက်ရေးမူဝါဒသာ ဖြစ်ကြောင်း ဦးနေ၀င်းအစိုးရ လက်ထက်မှစတင် ၀ါဒဖြန့်ထားသည့် အတွက် ပြည်မရှိ လူများစု ဗမာတိုင်းရင်းသားများက လက်မခံကြကြောင်း၊ ယခုအခါ ဖက်ဒရယ် စနစ်သည် စစ်မှန်သည့် ဒီမိုကရေစီ စနစ်သာ ဖြစ်သည်ဟု ဗမာတိုင်းရင်းသားအများစုက လက်ခံလာပြီ ဖြစ်၍ အားတက်မိကြောင်း ရှမ်းတိုင်းရင်းသားများ ဒီမိုကရက်တစ် ပါတီ (SNDP) ခေါ် ကျားဖြူ ပါတီ၏ ပြောခွင့်ရသူ ဦးစောသန်းမြင့် ကလည်း ပြောဆိုသည်။
“ဖက်ဒရယ်ဆိုတာနဲ့ တိုင်းရင်းသားတွေ ခွဲထွက်ဖို့ကြိုးစားနေပြီလို့ အစိုးရ အဆက်ဆက်က ၀ါဒဖြန့်ထားတယ်၊ ဒီတော့ ဗမာ ပြည် သူတွေကလည်း ဖက်ဒရယ်ကို ခွဲထွက်ရေးမူလို့ပဲ ထင်နေကြတာ၊ အခုလို ပြည်မက ဗမာနိုင်ငံရေးပါတီတွေကလည်း ဖက် ဒရယ် ကိစ္စ ထောက်ခံလာတော့ ပိုအားရှိတာပေါ့”ဟု ၎င်း က ဧရာဝတီ ကို ပြောသည်။
မြန်မာနိုင်ငံအား ပြည်ထောင်စု မြန်မာနိုင်ငံဟု ၂၀၀၈ ဖွဲ့စည်းပုံ အခြေခံ ဥပဒေတွင် ရေးဆွဲထားသကဲ့သို့ ဦးသိန်းစိန် အစိုးရက လည်း နိုင်ငံတကာ၌ ကြွေးကြော် ပြောဆိုနေကြောင်း၊ သို့သော် လက်တွေ့တွင် ဗဟိုမှ ချုပ်ကိုင်သည့် တပြည်ထောင် စနစ်ကို သာ ကျင့်သုံးနေကြောင်းလည်း ဦးစောသန်းမြင့် က ဆက်ပြောသည်။
ဖက်ဒရယ် စနစ်သည် ကိုယ့်ဒေသ ကိုယ်အုပ်ချုပ်ရေး၊ ကိုယ်ပိုင်ပြဌာန်းခွင့်၊ စီမံပိုင်ခွင့် စသည်တို့ကို မိမိဒေသအလိုက် ဗဟိုအ ဆင့်မှ အောက်ခြေအဆင့်အထိ လုပ်ပိုင်ခွင့် ရရေးသာဖြစ်ကြောင်း၊ ထိုကိစ္စသည် တနိုင်ငံလုံးရှိ တိုင်းရင်းသား အားလုံးနှင့်သက်ဆိုင်ကြောင်း၊ ၂၀၀၈ ဖွဲ့စည်းပုံ၌ ပြည်နယ်၊ တိုင်းဒေသများ အတွက် လုပ်ပိုင်ခွင့် တချို့ရေးဆွဲထားသော်လည်း လုပ်ပိုင်ခွင့် လုံးဝ မရှိကြဟု ပါတီခေါင်းဆောင်များက ပြောဆိုကြသည်။
“လာမယ့် ၂၀၁၅ နဲ့ ၂၀၂၀ အတွင်းမှာ ဖက်ဒရယ်စနစ် လုံးဝဖြစ်အောင် ကြိုးစားဖို့ ကျနော်တို့ ဆုံးဖြတ်ထားတယ်”ဟု SNDP ပါတီ ပြောခွင့်ရသူက ဆိုသည်။
မြန်မာနိုင်ငံ၌ စစ်မှန်သည့် ဖက်ဒရယ်ပြည်ထောင်စု ပေါ်ပေါက်ရေးအတွက် တိုင်းရင်းသားများက မြန်မာ အစိုးရ အဖွဲ့များနှင့် ဆယ်စုနှစ်ချီ၍ ဆွေးနွေးညှိနှိုင်းခဲ့သော်လည်း ယနေ့အထိ အောင်မြင်မှု မရရှိသေးပေ။ စစ်မှန်သည့် ဖက်ဒရယ်ပြည်ထောင်စု ဖော်ဆောင်မည် ဆိုပါက ၂၀၀၈ ဖွဲ့စည်းပုံ ဥပဒေကို ပြင်ဆင်ဖြည့်စွက်ရမည် ဖြစ်သည်။
၂၀၀၈ ဖွဲ့စည်းပုံ ပြင်ဆင်ရေး အတွက် ကြိုးပမ်းသွားမည် ဖြစ်ကြောင်း၊ အမျိုးသား ဒီမိုကရေစီ အဖွဲ့ချုပ် (NLD) ပါတီ ဥက္ကဋ္ဌ ဒေါ်အောင်ဆန်းစုကြည် ကလည်း ဖွဲ့စည်းပုံ ပြင်ဆင်ရေးကိစ္စပြောဆိုထား၍ အားလုံးပူးပေါင်းလျှင် အောင်မြင်နိုင်မည်ဟု ပါတီ ခေါင်း ဆောင်များ က ဆိုသည်။
၂၀၀၈ ဖွဲ့စည်းပုံ ပြင်ဆင်မည်ဆိုပါက ပြည်ထောင်စု လွှတ်တော် ကိုယ်စားလှယ်အားလုံး၏ ၇၅ ရာခိုင်နှုန်းကျော်က သဘောတူ လက်ခံပြီးနောက် ပြည်လုံးကျွတ် ဆန္ဒခံယူပွဲ လုပ်ဆောင်ပြီးမှသာ ပြင်ဆင်ခွင့်ရမည်ဟု ဖွဲ့စည်းပုံ၏ ပုဒ်မ ၄၃၆ တွင် ပြဌာန်း ထား သည်။
မြန်မာနိုင်ငံသည် လွတ်လပ်ရေး ရရှိထားသည်မှာ နှစ်ပေါင်း ၆၀ ကျော်ပြီ ဖြစ်သော်လည်း ပြည်တွင်း ငြိမ်းချမ်းရေး မရရှိခြင်းမှာ စစ်မှန်သည့် ပြည်ထောင်စု စနစ် မရှိသေး၍ ဖြစ်ကြောင်း၊ ထို့ကြောင့် တိုင်းရင်းသားအားလုံး တန်းတူရေး၊ ကိုယ်ပိုင်ပြဌာန်းခွင့် ရရှိရေးတို့ အတွက် စစ်မှန်သည့် ပြည်ထောင်စုကြီး ပေါ်ပေါက်ရေးကို ရခိုင်တိုင်းရင်းသားများ တိုးတက်ရေး ပါတီ(RNDP) က လည်း မေလတွင် ကျင်းပခဲ့သော ပါတီညီလာခံ က တောင်းဆိုထားသည်။
ပြည်ထောင်စုကြီးအား မြန်မာနိုင်ငံ၏ လက်ရှိတိုင်းရင်းသား ပြည်နယ် ၇ ခု အပြင်၊ ဗမာတိုင်းရင်းသား အများစုနေထိုင်သည့် တိုင်းဒေသကြီးများကို ပြည်နယ်ကြီး တခု ပုံစံဖြင့်တည်ဆောက်၍ ထိုပြည်နယ် အစိုးရ၏ အုပ်ချုပ်မှု အောက်တွင် ထားရှိရန်နှင့်
ပြည်နယ်များဖြင့် ဖွဲ့စည်းထားသည့် ပြည်ထောင်စု နိုင်ငံဖြစ်စေလိုကြောင်း ကိုလည်း RNDP ပါတီ ဥက္ကဋ္ဌ ဒေါက်တာ အေးမောင် က ပါတီလာခံ၌ တင်သွင်းသည့် အစီရင်ခံစာတွင် ထည့်သွင်းထားသည်။
စစ်မှန်သည့် ဖက်ဒရယ် ပြည်ထောင်စု ပေါ်ထွန်းရေး၊ ၂၀၁၅ ရွေးကောက်ပွဲ ပုံစံပြောင်းလဲရေး၊ ဒီမိုကရေစီ စနစ်ပီပြင်ရေး စ သည့် ကိစ္စများကို သမ္မတနှင့်မကြာမီ တွေ့ဆုံ ဆွေးနွေးနိုင်ရန် မိတ်ဆွေ ၁၀ ပါတီက စီစဉ်နေကြောင်း သိရသည်။ ထိုပါတီ များသည် သမ္မတနှင့် ဇူလိုင်လ ကလည်း တွေ့ဆုံခဲ့ကြသေးသည်။
မဟာမိတ် ၁၀ ပါတီမှာ မွန်ဒေသလုံး ဆိုင်ရာ ဒီမိုကရေစီ ပါတီ(AMDP)၊ အမျိုးသား ဒီမိုကရေစီ အင်အားစု(NDF)၊ ရခိုင် တိုင်း ရင်းသားများ တိုးတက်ရေး ပါတီ(RNDP)၊ ရှမ်း တိုင်းရင်းသားများ ဒီမိုကရေစီ ပါတီ(SNDP)၊ ချင်း အမျိုးသား ပါတီ၊ ဒီမိုကရေစီ နှင့် ငြိ်မ်းချမ်းရေး ပါတီ၊ ဒီမိုကရက်တစ် ပါတီ(မြန်မာ)၊ ဖလုံ-စဝေါ် ကရင် ပါတီ၊ ပြည်ထောင်စု ဒီမိုကရေစီ ပါတီ၊ ညီညွတ်ရေးနှင့်ငြိမ်းချမ်းရေး ပါတီ တို့ဖြစ်သည်။
၁၀ ပါတီမဟာမိတ် အဖွဲ့ကို ၂၀၁၀ ရွေးကောက်ပွဲ မတိုင်ခင် ဖွဲ့စည်းခဲ့ပြီး ထိုအဖွဲ့ မှ တိုင်းရင်းသား ပါတီ ၆ ခု ကလည်း ညီနောင် ပါတီများအဖွဲ့ အဖြစ် ဖွဲ့စည်းထားကြသည်။

ရခိုင် သတင်းများ  အောက်တိုဘာ ၁၀ ၊ ၂၀၁၂

OIC ဆန့်ကျင်ရေး ရခိုင်အမျိုးသမီးများ ဆန္ဒပြ

ရခိုင်ပြည်နယ်နှင့် မြန်မာပြည်တွင် OIC ရုံးဖွင့်ခြင်းကို မလိုလားသည့် အတွက် စစ်တွေ ဒေသခံ အမျိုးသမီးများ ထောင်ချီ၍  ယနေ့ဆန္ဒထုတ်ဖော်ခဲ့ကြောင်း သိရသည်။
စစ်တွေဒေသခံ ရခိုင်အမျိုးသမီးများဦးဆောင်ပြီး လူဦးရေထောင်ချီ၍ စစ်တွေမြို့  ဦးဥတ္တမ ပန်းခြံမှ မြို့တွင်းလှည့်လည်ကာ ဘင်္ဂလားဒေ့ရှ် ကောင်စစ်ဝန်ရုံးသို့ ချီတက်ပြီး OIC အလိုမရှိ၊ အမျိုးသမီးတို့၏ ဘ၀လုံခြုံရေး၊ ၁၉၈၂ ခုနှစ် နိုင်ငံသားဖြစ်မှု ဥပဒေကိုလေးစား လိုက်နာရေး စသည့်အချက် ၆ ချက်ကို ဆန္ဒထုတ် ဖော် ခဲ့ကြောင်း ဦးဆောင်သူ ဒေါ်ညိုအေး က ပြောသည်။
“Get Out OIC” ဆိုသည့် အချက်နှင့် တချို့သော အချက်များကို ထုတ်ပြန်ကြေညာချက်တွင် အာဏာပိုင်တို့က ပယ်ဖျက်လိုက်ကြောင်း၊ သို့သော်ထိုစာတမ်းပါ တီရှပ်အကျီများကို ၀တ်ဆင်၍ မိုးရေထဲ၌ လမ်းလျှောက်ခဲ့ကြကြောင်း၊ အမျိုးသမီးများ အပြင် မြို့ခံအများအပြား ပါဝင်ပူးပေါင်းကြောင်း ၎င်း က ဆိုသည်။
ဆန္ဒထုတ်ဖော်ရခြင်း ရည်ရွယ်ချက်၌ ရခိုင်ပြည်တွင်းရှိ ရခိုင်နှင့်တခြား တိုင်းရင်းသားလူမျိုးများနှင့် မွတ် စလင်များ အကြားအတူတကွ နေထိုင်ရန် လက်ရှိအခြေအနေအရ လုံးဝ မဖြစ်နိုင်ကြောင်း၊ ၎င်းတို့ရှိနေသမျှကာလတွင် ရခိုင်ပြည် တွင်းနေ ထိုင်သော မြန်မာအမျိုးသမီးတို့၏ ဘ၀ လုံခြုံမှုအတွက် စိတ်မချရသည့်အတွက် ဆန္ဒထုတ်ဖော်ရခြင်းဟု ဆိုသည်။
“ရခိုင်ဒေသမှာ ဖြစ်သွားတဲ့ ကိစ္စတွေကြောင့် အဓိက ခံစားရသူတွေက အမျိုးသမီးတွေပါ၊ သူတို့တွေရဲ့ ဦးတည်ချက်တွေက လည်းပဲ အမျိုးသမီးတွေကိုပဲ ပစ်မှတ်ထားတယ်၊ ပြီးရင် အမျိုးဘာသာ၊ သာသနာကို ပစ်မှတ်ထားတဲ့အတွက် အခုလို ဆန္ဒဖော် ထုတ်ရတာပါ”ဟု ဆန္ဒထုတ်ဖော်ရာတွင် ဦးဆောင်ပါဝင်သူ မမာမာကျော်ဇော က ပြောသည်။
ရခိုင်ပြည်နယ်၊ အစိုးရအဖွဲ့၏ သတင်းပြန်ကြားရေးအဖွဲ့တာဝန်ခံ ဦးဝင်းမြိုင်က ပြောဆိုရာတွင် ၎င်းတို့အနေဖြင့် ကန့်သတ်မှု မ ရှိကြောင်း၊ သို့သော် မသင့်တော်ဟု ယူဆရသော စာသားတချို့ကို ပယ်ဖျက်လိုက်ကြောင်း ဧရာဝတီ ကိုပြော သည်။
“စစ်တွေမှာ OIC ရုံးဖွင့်မယ်ဆိုတာနဲ့ ပတ်သက်ပြီး ပြည်နယ်အစိုးရက ဘာမှမသိသေးပါဘူး၊ ဒီကိစ္စကလည်းပဲ ပြည်သူတွေရဲ့ ဆန္ဒမပါရင်လုပ်လို့မရပါဘူး၊ အားလုံးနဲ့ညှိနှိုင်းပြီးမှ လုပ်လို့ရမယ့်ကိစ္စပါ”ဟု ၎င်း က ဆိုသည်။
မြန်မာနိုင်ငံတွင်း OIC ၀င်ရောက် ရုံးဖွင့်မည်ဟု သတင်းများထွက်ပေါ်နေခြင်းသည် ပြည်ထောင်စု အစိုးရ၏ နယ်စပ်ဝန်ကြီးနှင့် OIC တို့အကြား သဘောတူညီမှုသာ ဖြစ်ကြောင်း၊ ရခိုင်ပြည်နယ် အစိုးရအဖွဲ့ အနေဖြင့် မည်သည့် အကြောင်းအရာကိုမှ မ သိရှိသေးဟု လည်း ဦးဝင်းမြိုင် ကဆိုသည်။
အစ္စလာမ်မစ် ပူးပေါင်း ဆောင်ရွက်ရေးအသင်း OIC အဖွဲ့သည် အစ္စလာမ်နိုင်ငံ ၅၇ ခုအား ကိုယ်စားပြုဖွဲ့သည့် အဖွဲ့တခုဖြစ် သည်။
ဆော်ဒီအာရေဗျ နိုင်ငံအခြေစိုက် OIC အတွင်းရေးမှူးချုပ်သည် ရခိုင်ဒေသတွင်း ပဋိပက္ခများ ဖြစ်ပွားပြီး နောက် ရခိုင်ပြည်သို့ သွားရောက် ခဲ့ပြီး မြန်မာ-OIC ပူးပေါင်းရေး ကိစ္စအား နယ်စပ် ၀န်ကြီး ဒု ဗိုလ်ချုပ်ကြီး သိန်းဌေးနှင့်နားလည်မှု စာချွန် လွှာကို စက်တင်ဘာလ ၁၁ ရက်နေ့တွင် လက်မှတ်ရေးထိုးထားကြောင်း ဘီဘီစီ မြန်မာပိုင်းတွင် ရေးသားထားသည်။
OIC ရုံးချုပ်ကို ရန်ကုန်တွင် ထားရှိမည်ဖြစ်ပြီး၊ ကူညီထောက်ပံ့ရေးနှင့်တခြား ကိစ္စများအတွက် ရုံးခွဲတခုကို စစ်တွေမြို့တွင် ထားရှိမည်ဖြစ်ကြောင်း၊ ထိုရုံးများကို မကြာမီ ဖွင့်လှစ်သွားရန် ရှိကြောင်း OIC အဖွဲ့ဝင် တဦးကို ကိုးကား၍ ဘီဘီစီ က ရေး သားထားသည်။
ထိုကိစ္စနှင့်ပတ်သက်၍ နိုင်ငံတော်သမ္မတ ရုံးသို့ ဧရာဝတီ က ဆက်သွယ်မေးမြန်းခဲ့သော်လည်း ဖြေဆိုခြင်း မရှိပေ။
OIC ရုံးဖွင့်လှစ်ရေး ကိစ္စအပြင် ဘင်္ဂလားဒေ့ရှ် နိုင်ငံအတွင်းနေထိုင်ကြသည့် ဗုဒ္ဓဘာသာဝင်များအား ကာကွယ်ပေးရေး၊ ငြိမ်းချမ်းစွာ ယှဉ်တွဲနေထိုင်နိုင်ရေးအတွက် စစ်တွေမြို့မှ မွတ်စလင်အများစု နေထိုင်သည့် အင်ဘာလာ (အောင်မင်္ဂလာ) ရပ်ကွက်အား မြို့ပြင် ပြောင်းရွှေ့ပေးရေး၊ ရခိုင်ဒေသရှိ ဘင်္ဂါလီများနှင့် ပတ်သက်၍ သမ္မတ ပြောဆိုချက်အား ထောက်ခံကြောင်း စသည့် အချက် ၅ ချက်ကို သံဃာတော်များက စစ်တွေမြို့၌ ယမန်နေ့က တောင်းဆိုခဲ့ကြသည်။
ဆရာတော်၊ သံဃာတော်များနှင့်အတူ ထောင်ချီသည့် စစ်တွေဒေသခံများ ကလည်း ပါဝင်ပူးပေါင်း၍ ဘင်္ဂလားဒေ့ရှ် ကောင်စစ် ၀န်ရုံးသို့ ချီတက်လမ်းလျှောက်ကာ တောင်းဆိုချက်များကို ဆန္ဒထုတ်ဖော်ခဲ့ကြသည်။ လုံခြုံရေးများ ထူထပ်စွာ ချထားခဲ့သော် လည်း တစုံတရာ နှောင့်ယှက် ဟန့်တားမှု မရှိဟု သိရသည်။

စစ်တွေမှာ လူ ၃,၀၀၀ ကျော် ဆန္ဒပြ

ရခိုင်ပြည်နယ်၊ စစ်တွေမြို့မှာ OIC လို့ခေါ်တဲ့ အစ္စလာမ်ကိုးကွယ်တဲ့ နိုင်ငံများအဖွဲ့ရဲ့ ရုံးခွဲ လာရောက် ဖွင့်လှစ်မယ့် အစီအစဉ်နဲ့ ဘင်္ဂလားဒေ့ရ်ှနိုင်ငံ အတွင်းမှာရှိတဲ့ ဗုဒ္ဓဘာသာဝင်တွေကို အကြမ်းဖက် တိုက်ခိုက်မှုတွေကို ကန့်ကွက်တဲ့အနေနဲ့ မနေ့က နေ့လည်က စစ်တွေမြို့မှာရှိတဲ့ ဘင်္ဂလားဒေ့ ရှ် ကောင်စစ်ဝန်ရုံးရှေ့မှာ သံဃာတော်တွေနဲ့ မြို့မိ မြို့ဖတွေပေါင်းပြီး ချီတက် ဆန္ဒပြခဲ့ကြပါတယ်။ ဒီဆန္ဒပြပွဲကို စစ်တွေမြို့ စည်းကမ်းထိန်းသိမ်းရေးနဲ့ ကူညီစောင့်ရှောက်ရေး သံဃာတော်များအဖွဲ့က ဦးဆောင် ကျင်းပတာဖြစ်ပေမယ့် တခြား မြို့မိ မြို့ဖတွေလည်း ထောင်နဲ့ချီ ပူးပေါင်း ပါဝင်ခဲ့တယ်လို့ ဦးဆောင်ကျင်းပသူ သံဃာတော်တွေက ပြောပါတယ်။

ဘင်္ဂလားဒေ့ရှ် သံအမတ်ကြီးက ရခိုင်အမျိုးသား ကွန်ရက်နှင့် တွေ့ဆုံလိုဟု ဆို

မြန်မာနိုင်ငံဆိုင်ရာ ဘင်္ဂလားဒေ့ရှ် သံအမတ်ကြီးက ရန်ကုန်အခြေစိုက် ရခိုင်အမျိုးသားကွန်ရက်နှင့် တွေ့ဆုံ စကားပြောလိုသည်ဟု အလွတ်သဘော ကမ်းလှမ်းကြောင်း သတင်းရရှိသည်။
ဘင်္ဂလားဒေ့ရ်ှနိုင်ငံတွင် ဗုဒ္ဓဘာသာ ဘုန်းတော်ကြီးကျောင်းများ ဖျက်ဆီးခံရမှုနှင့် ပတ်သက်ပြီး ရန်ကုန်အခြေစိုက် ဘင်္ဂလားဒေ့ရ်ှသံရုံးရှေ့တွင် သံဃာတော်များ ဦးဆောင် ဆန္ဒပြပွဲများ ဆက်တိုက် ဖြစ်ပွားနေသည့် ကိစ္စနှင့်ပတ်သက်၍ မြန်မာနိုင်ငံဆိုင်ရာ ဘင်္ဂလားဒေ့ရှ် သံအမတ်ကြီးက ရခိုင်အမျိုးသား ကွန်ရက်နှင့် တွေ့ဆုံစကားပြောလိုသည်ဟု သံရုံးဝန်ထမ်းတဦးမှတဆင့် ကမ်းလှမ်းခဲ့ကြောင်း အဆိုပါ ကွန်ရက် ဥက္ကဋ္ဌ ကိုတင်ထူးအောင်က ပြောသည်။
ယင်းဘုန်းကြီးကျောင်းများ မီးရှို့ဖျက်ဆီးခံရသည့် အရေးကိစ္စတွင် ဘင်္ဂလားဒေ့ရှ် အစိုးရအနေဖြင့် အချိန်မီ ဖြေရှင်းပေးနိုင်စွမ်း အားနည်းခဲ့ခြင်းနှင့်ပတ်သက်၍ ဝေဖန်ထားသည့် ရခိုင်အမျိုးသား ကွန်ရက်၏ သဘောထားထုတ်ပြန်ချက်အား သံရုံးသို့ သွားပို့ခဲ့သည့် ယခုလ ၆ ရက်နေ့တွင် အဆိုပါသံရုံးဝန်ထမ်းမှတဆင့် ကမ်းလှမ်းခဲ့သည်ဟု သိရသည်။
“တရားဝင် သံရုံးကနေ စာပို့ပြီး ကမ်းလှမ်းတာ မဟုတ်ဘဲ ၀န်ထမ်းက ပါးစပ်အပြောလေးနဲ့ ပြောလိုက်တာဖြစ်လို့ ကျနော်တို့က မတွေ့နိုင်ပါဘူး၊ ဒီကိစ္စကိုလည်း ကုလသမဂ္ဂဆီ တိုင်စာပို့ထားပါတယ်” ဟု ကိုတင်ထူးအောင်က ဆိုသည်။
ဘင်္ဂလားဒေ့ရှ် နိုင်ငံတွင်း နေထိုင်ကြသော ဗုဒ္ဓဘာသာဝင်များ လုံခြုံဘေးကင်းရေးကို ဘင်္ဂလားဒေ့ရှ် အစိုးရက အပြည့်အ၀ ကာကွယ်ပေးရန် တောင်းဆိုထားသည့်စာအား ဘင်္ဂလားဒေ့ရ်ှနိုင်ငံ သံအမတ်ကြီးထံ ပေးခဲ့ကြောင်း၊ ဘုန်းတော်ကြီးများနှင့် ရခိုင် တိုင်းရင်းသား အဖွဲ့အစည်းတချို့ ပူးပေါင်းကာ ရန်ကုန် အင်းလျားလမ်းရှိ ဘင်္ဂလားဒေ့ရှ် သံရုံးရှေ့တွင် ယမန်နေ့ နေ့လယ် ၁ နာရီခန့်က လူအင်အား ရာချီ၍ ဒုတိယအကြိမ် ဆန္ဒထုတ်ဖော်ခဲ့ကြကြောင်း သိရသည်။
“ရခိုင်-ရိုဟင်ဂျာ အရေးက ပြည်တွင်းမှာပဲ ဖြစ်တာပါ၊ ပြည်တွင်း ပြဿနာကို ပြည်တွင်းကလူတွေနဲ့ပဲ ပြီးအောင် ရှင်းတာကို လိုချင်တာပါ။ ဒါကို အပြင်က မွတ်စလင် နိုင်ငံတွေမှာပါ အခုလို ဖြေရှင်းကြတာမျိုး လုံးဝ မလိုချင်ပါဘူး။ အတွင်းမှာပဲ ပြေလည်အောင် ဖြေရှင်းစေချင်ပါတယ်” ဟု ဆန္ဒထုတ်ဖော်ပွဲတွင် ဦးဆောင်ပါဝင်သည့် သာဓုကျောင်းတိုက်မှ ဆရာတော် ဦးပညာနန္ဒက ပြောသည်။
ရခိုင်ပြည်နယ်နှင့် မြန်မာနိုင်ငံတွင် အစ္စလမ်မစ် ပူးပေါင်းဆောင်ရွက်ရေးအသင်း (OIC) ရုံးများ ဖွင့်လှစ်ရန်ကိစ္စကို လက်မခံနိုင်ကြောင်း၊ ဘင်္ဂလားဒေ့ရှ် နိုင်ငံတွင် ဖျက်ဆီးခံခဲ့ရသော သာသနိက အဆောက်အဦးများနှင့် ဗုဒ္ဓ ဆင်းတုတော်များအား ရှေးမူ လက်ရာအတိုင်း ပြန်လည်တည်ဆောက်ပေးစေချင်ကြောင်းနှင့် ဖျက်ဆီးသူများကိုလည်း ယင်းနိုင်ငံဥပဒေ၊ နိုင်ငံတကာ ဥပဒေနှင့်အညီ အရေးယူ ဆောင်ရွက်ပေးရန်လိုကြောင်း စသည့် အချက်များ ပါဝင်သည့် တောင်းဆိုချက် ၁၄ ချက်ကို ဘင်္ဂလားဒေ့ရှ် သံရုံးရှေ့တွင် တောင်းဆိုခဲ့ကြသည်။
အဆိုပါ ဆန္ဒထုတ်ဖော်သည့် အဖွဲ့သည် ဘင်္ဂလားဒေ့ရ်ှသံရုံးမှတဆင့် အမေရိကန်သံရုံးသို့ သွားရောက်ခဲ့ကြပြီး လစ်ဗျား နိုင်ငံတွင် အကြမ်းဖက်သမားများကြောင့် သေဆုံးသွားခဲ့သော အမေရိကန် သံအမတ်ကြီး Mr. Christopher Steven အတွက် လွမ်းသူ့ပန်းခြင်း သွားချခဲ့သည်။
ဘင်္ဂလားဒေ့ရ်ှနိုင်ငံတွင်း ဖြစ်ပွားခဲ့သည့်ဖြစ်ရပ်ကို ကန့်ကွက်သည့် အနေဖြင့် ယခုလ ၄ ရက်နေ့က ပထမအကြိမ်အဖြစ် ရန်ကုန်မြို့ ဒဂုံမြို့သစ်အရှေ့ပိုင်း မကွေးပရိယတ္တိ စာသင်တိုက်မှ ဆရာတော်၊ သံဃာတော် အပါး ၂၀၀ ခန့်က ဆန္ဒ ထုတ်ဖော်ခဲ့ကြပြီး ၅ ရက်နေ့ကလည်း ဘင်္ဂလားဒေ့ရှ် သံရုံးရှေ့တွင် ယင်းပြဿနာများအား ဖြေရှင်းပေးရန် သွားရောက် တောင်းဆိုခဲ့ကြသည်။
အစ္စလမ်ဘာသာဝင်တို့၏ ကိုရမ်ကျမ်းအား စော်ကားသည့် အဓိပ္ပာယ် သက်ရောက်သည့် ဓာတ်ပုံကို ဗုဒ္ဓဘာသာဝင် မရမာ လူငယ်တဦးက ၎င်း၏ Facebook စာမျက်နှာပေါ် တင်လိုက်ရာမှ စတင်၍ မကျေနပ်မှုများ ဖြစ်ပေါ်ခဲ့ကာ စက်တင်ဘာ ၃၀ ရက်နေ့တွင် ဘင်္ဂလားဒေ့ရ်ှနိုင်ငံ ပန်းဝါဒေသမှ ဗုဒ္ဓဘာသာဝင် ဘုန်းတော်ကြီးကျောင်းများ၊ လူနေအိမ်များအား အစ္စလမ် အစွန်းရောက်များက ဖျက်ဆီးခဲ့သည်။
ရခိုင်အမျိုးသား ကွန်ရက်အနေဖြင့် ဘင်္ဂလားဒေ့ရ်ှနိင်ငံ၏ ဖြေရှင်းချက်များအား စောင့်ကြည့်နေဆဲ ဖြစ်သောကြောင့် လက်ရှိအချိန်တွင် သံအမတ်ကြီး၏ ကမ်းလှမ်းချက်ကို လက်မခံလိုသေးကြောင်း ကိုတင်ထူးအောင်က ဆိုသည်။