ဒီမိုကရက်တစ် မြန်မာ့အသံ ညွှန်ကြားရေးမှူး ဦးအေးချမ်းနိုင်

နော်ဝေအခြေစိုက် ဒီမိုကရက်တစ် မြန်မာ့အသံ အသံလွှင့်ဌာန ညွှန်ကြားရေးမှူး ဦးအေးချမ်းနိုင်ဟာ သတင်းထောက်ဗီဇာနဲ့ ရန်ကုန်နဲ့ ကြပ်ပြေးနေပြည်တော်ကို လေ့လာရေးခရီးစဉ်အဖြစ် ဖေဖော်ဝါရီလ (၂၇) ရက်မှစပြီး (၅) ရက်ကြာ သွားရောက်ခဲ့ပါတယ်။ ဒီမိုကရက်တစ် မြန်မာ့အသံ တာဝန်ရှိသူတဦးအနေနဲ့ မြန်မာပြည်ကို ဘာ့ကြောင့် သွားရောက်ခဲ့တယ်၊ ဒီမိုကရက်တစ် မြန်မာ့အသံရဲ့ လုပ်ငန်းစဉ်အပေါ် ဘယ်လို အကျိုးသက်ရောက်မှု ရှိနိုင်သလဲ၊ နောက်တခါ ဒီမိုကရက်တစ် မြန်မာ့အသံက ငွေကြေး အလွဲသုံးစားမှုနဲ့ ဆက်နွယ်တဲ့ မြန်မာပြည်တွင်းက ဒီမိုကရက်တစ် မြန်မာ့အသံ သတင်းထောက်များရဲ့ သဘောထား၊ ဒီမိုကရက်တစ် မြန်မာ့အသံရဲ့ ရှေ့လုပ်ငန်းစဉ် စသည်ဖြင့် ဦးအေးချမ်းနိုင်ရဲ့ မြန်မာပြည် ခရီးစဉ်နဲ့ ပတ်သက်တဲ့အကြောင်းအရာများကို နော်ဝေနိုင်ငံကို ပြန်လည်ရောက်ရှိနေတဲ့ ဦးအေးချမ်းနိုင်အား ယနေ့မြန်မာသတင်းဌာန အယ်ဒီတာ ကိုညိုက တွေ့ဆုံ မေးမြန်းခဲ့ပါတယ်။ အခု ဖော်ပြထားချက်များကတော့ ထို တွေ့ဆုံ မေးမြန်းချက် ပထမပိုင်း ဖြစ်ပါတယ်။
မေး။ ။ ဦးအေးချမ်းနိုင်တို့အနေနဲ့ ဘယ်လို စိတ်ကူးအစီအစဉ်တွေကနေ ဒီခရီးစဉ် ဖြစ်ပေါ်လာတာပါလဲ ခင်ဗျ။
ဖြေ။ ။ ဟုတ်ကဲ့။ အပြင်မှာရှိတဲ့ သတင်းမီဒီယာတွေ အကုန်လုံးကလည်း ဗမာပြည် သွားခဲ့ပြီးပါပြီ။ ဒီမိုကရက်တစ် မြန်မာ့အသံအနေနဲ့ကလည်း အခု ပြည်တွင်းမှာ ပြောင်းလဲနေတဲ့အပြောင်းအလဲတွေ၊ အထူးသဖြင့်တော့ ပြည်တွင်းမီဒီယာ လုပ်ပိုင်ခွင့်ပေါ့ လေ။ အဲဒါတွေနဲ့ပတ်သက်ပြီး ကျနော်တို့ ပြည်တွင်းမီဒီယာတွေနဲ့ တွေ့မယ်။ နိုင်ငံရေးအဖွဲ့တွေ၊ နိုင်ငံရေးလှုပ်ရှားသူတွေနဲ့ တွေ့ပြီးတော့ အပြောင်းအလဲကို ကျနော်တို့ လေ့လာချင်တာပါ။ နောက် မီဒီယာအသိုင်းအ၀ိုင်းတွေကြားမှာရော ဒီ အပြောင်းအလဲတွေအပေါ် ဘယ်လိုမြင်လဲ၊ ဘယ်လို ယူဆသလဲ၊ ဘယ်လောက် လုပ်ပိုင်ခွင့်တွေ ရှိလာပြီလဲ၊ အဲဒါတွေ လေ့လာချင်လို့ သွားခဲ့တာပါ။ ဒုတိယတခုက ပြန်ကြားရေးဝန်ကြီးဌာန၀န်ကြီး ဦးကျော်ဆန်းနဲ့တွေ့ပြီးတော့ ကျနော်တို့ ဒီမိုကရက်တစ် မြန်မာ့အသံရဲ့ လုပ်ငန်းတွေ ပြည်တွင်းမှာ ဘယ်လောက် လုပ်နိုင်မလဲ သွားရောက် ဆွေးနွေးတာ ဖြစ်ပါတယ်။
မေး။ ။ ဟုတ်ကဲ့၊ အာဏာပိုင်တွေနဲ့ ဘယ်လို လုပ်ငန်းတွေအတွက် ဆွေးနွေး ဖြစ်ခဲ့ပါသလဲ။
ဖြေ။ ။ ကျနော်တို့ အခု ပထမဆုံး ညှိခဲ့တာကတော့ ပြင်ပမှာရှိတဲ့ ဒီမိုကရက်တစ် မြန်မာ့အသံ သတင်းထောက်တွေ ပြည်တွင်းမှာ ပြန်လာပြီး သတင်းရယူခွင့်တွေ ပါ။ အဲဒါကို ၀န်ကြီးကလည်း လက်ခံမယ်လို့ ပြောပါတယ်။ နောက် တခြား ကျနော်တို့ ညှိနှိုင်းခဲ့တာတွေလည်း ရှိပါတယ်။ ဥပမာ - ပြည်တွင်းမှာရှိတဲ့ ဒီမိုကရက်တစ် မြန်မာ့အသံသတင်းထောက်တွေကို တရားဝင် အသိမှတ်ပြုပြီး တရားဝင် သတင်းလုပ်ငန်း လုပ်ပိုင်ခွင့်တွေ၊ နောက်တခုက ဒီမိုကရက်တစ် မြန်မာ့အသံရုံးခွဲ ပြည်တွင်းမှာ တရားဝင်ဖွင့်လှစ်နိုင်ရေးကို ဆွေးနွေးခဲ့ပါတယ်။
မေး။ ။ ဆွေးနွေးမှုရလဒ် အခြေအနေ သိခွင့်ရပါရစေ။
ဖြေ။ ။ မြန်မာပြည်တွင်းက သတင်းထောက်တွေကို အသိအမှတ်ပြုဘို့ကိစ္စရော၊ ရုံးခွဲဖွင့်ဘို့ကိစ္စရော ကျနော်တို့ ထပ်ပြီး ဆွေးနွေးရအုံးမှာပါ။ လောလောဆယ် အပြင်က သတင်းထောက်တွေ အထဲဝင်ပြီး သတင်းရယူခွင့်ပဲ သဘောတူနိုင်ခဲ့ပါတယ်။
မေး။ ။ အဲဒီသဘောတူချက်မှာရော ဘယ်လို အကန့်အသတ်တွေ ရှိလဲဗျ။ အကြောင်းအရာ တိတိကျကျ ဆွေးနွေးတာမျိုးတွေရော ရှိခဲ့ပါသလား။
ဖြေ။ ။ အကန့်အသတ်ဆိုတာကတော့၊ ဘယ်သတင်းဌာနမဆို သတင်းထောက်ဗီဇာရမယ်ဆို လွတ်လွတ်လပ်လပ် သတင်းလုပ်ပိုင်ခွင့်တော့ ရှိရမှာပေါ့လေ။ အခု ကျနော်သွားတဲ့ခရီးစဉ်မှာလည်း သတင်းထောက်ဗီဇာ ထုတ်ပေးပါတယ်။ ကျနော် သွားချင်တဲ့နေရာ၊ တွေ့ချင်တဲ့ပုဂ္ဂိုလ်နဲ့ တွေ့ခွင့်ရပါတယ်။ လွတ်လွတ်လပ်လပ်ပါပဲ။ ဆိုတော့ အဲဒီလိုသဘောပါပဲ။ အပြင်က သတင်းထောက်တွေသွားရင်လဲ လွတ်လွတ်လပ်လပ် လုပ်ပိုင်ခွင့် ရမှာပါ။
မေး။ ။ ဟုတ်ကဲ့၊ အစိုးရပိုင်းအပြင် အခြား တွေ့ဆုံခဲ့သူများ ရှိပါသလား။ တွေ့ဆုံခဲ့သူများရဲ့ တုန့်ပြန်မှုက ဘယ်လို ရှိပါသလဲ၊ သိပါရစေ။
ဖြေ။ ။ လွတ်လွတ်လပ်လပ်နဲ့ အတော်များများကို တွေ့ခဲ့ပါတယ်။ ဥပမာ - နိုင်ငံရေး အဖွဲ့အစည်းဆိုရင်၊ တိုင်းရင်းသားအဖွဲ့အစည်းတွေ၊ အမျိုးသား ဒီမိုကရေစီ တပ်ပေါင်းစု ပါတီ၊ ၈၈ မျိုးဆက် ကျောင်းသားခေါင်းဆောင်တွေဖြစ်တဲ့ ကိုမင်းကိုနိုင်တို့ အားလုံး၊ အမျိုးသား ဒီမိုကရေစီ အဖွဲ့ချုပ်ကဆိုရင် ဦးတင်ဦးတို့၊ ဦးဝင်းတင်တို့၊ ဒေါ်ဖြူဖြူသင်းတို့၊ လူမှုရေးအပိုင်းကဆိုရင် ကိုကျော်သူတို့နဲ့ရော တွေ့ပါတယ်။ စာနယ်ဇင်းအပိုင်းကဆိုရင်လည်း ဆရာကြီးလူထုဦးစိန်ဝင်းတို့၊ တခြားမဂ္ဂဇင်းဂျာနယ်ကပုဂ္ဂိုလ်တွေ၊ အယ်ဒီတာတွေ၊ စာရေးဆရာ၊ စာနယ်ဇင်းသမားတွေနဲ့လည်း တွေ့ပါတယ်။ အားလုံးကတော့ ဒီမိုကရက်တစ် မြန်မာ့အသံနဲ့ ပတ်သက်ပြီး ကျေနပ်အားရကြောင်း ပြောကြပါတယ်။ အထူးသဖြင့် ဒီမိုကရက်တစ် မြန်မာ့အသံရုပ်မြင်သံကြားကို သဘောကျကြတယ်။ ဆက်လုပ်သွားဘို့ အားပေးကြတယ်။
မေး။ ။ဟုတ်ကဲ့၊ အခု ဒီမိုကရက်တစ် မြန်မာ့အသံရဲ့ ပြည်တွင်းလုပ်ငန်းအပိုင်းမှာက နှစ်ပိုင်း ကွဲနေတယ် လေ။ လောလောဆယ် ဒီမိုကရက်တစ် မြန်မာ့အသံအတွက် လုပ်နေတဲ့ သတင်းထောက်တွေရယ်၊ ဘားမားဗီဂျေ (Burma VJ) ဆိုပြီး သီးခြားမီဒီယာအဖွဲ့တခုရယ် ပေါ့။ ဒီတော့ အဲဒီသတင်းသမားတွေနဲ့ရော ဆုံဖြစ်လား။ ပြန်လည် စုစည်းနိုင်ခဲ့ပါလား။
ဖြေ။ ။ အထဲက သတင်းထောက်တချို့ကလည်း ကျနော့်ကို မေးပါတယ်။ ဒီမိုကရက်တစ် မြန်မာ့အသံ ငွေကြေးအရှုတ်တော်ပုံ တို့၊ စီမံချက်ကိစ္စ တို့၊ ကျနော်က ရှင်းပြပါတယ်။ ဒီကိစ္စတွေမှာ နားလည်မှု လွဲနေတာတွေ ရှိတယ်။ အခု ဖြစ်ပျက်ခဲ့တာတွေက ဒီမိုကရက်တစ် မြန်မာ့အသံ ငွေကြေး အရှုပ်တော်ပုံလည်း မဟုတ်ဘူး။ ဒီမိုကရက်တစ် မြန်မာ့အသံ အကွဲအပြဲလည်း မဟုတ်ဘူး။ ဒီမိုကရက်တစ် မြန်မာ့အသံထဲကို တာဝန်ခံပြီး ပြည်တွင်းအတွက် လုပ်နေတဲ့ တယောက်၊ နှစ်ယောက်လောက်က အလွဲသုံးစားလုပ်တဲ့ကိစ္စ၊ ဒါပေမဲ့ တချို့လူတွေက ခိုးတဲ့လူတွေ ၀ါဒဖြန့်တာကို သွားယုံနေကြတယ်။ နောက် ဗီဂျေ (VJ) ဆိုတာကလည်း တကယ်တမ်း ပြောရရင် ဒီမိုကရက်တစ် မြန်မာ့အသံဝန်ထမ်းတွေအကြောင်း ရိုက်ထားတဲ့ ရုပ်ရှင်၊ ဗီဂျေ (VJ) ဆိုတာ အသင်းအဖွဲ့တခုလည်း မဟုတ်ဘူး။ ကျနော် အဲဒါတွေ သိတ်များများလည်း မပြောတော့ဘူး။ ကျနော်တို့ကတော့ အလိမ်ခံရပြီးပြီ။ ကျန်နေတဲ့သူတွေဆက်ပြီး အလိမ်ခံချင်တယ်ဆိုလည်း ဆက် ခံကြပေါ့။
မေး။ ။ ခွဲထွက်သွားတဲ့ ဗီဂျေ (VJ) အဖွဲ့တွေနဲ့ရော တွေ့ဖြစ်ခဲ့ပါသလား။
ဖြေ။ ။ သတင်းထောက်တွေနဲ့တော့ တွေ့ဖြစ်ပါတယ်၊ ကျနော်တို့ ပြည်တွင်းသတင်းကွန်ရက်ကို လျှို့ဝှက်ပြီး တည်ဆောက်ထားတာဆိုတော့ အမှန်အတိုင်းပြောရရင် သတင်းထောက်တွေအကုန်လုံးကို ကျနော်တို့ကိုယ်တိုင်လည်း မသိဘူး။ သိတဲ့လူလည်း ရှိတယ်၊ မသိတဲ့လူလည်း ရှိတယ် ပေါ့။ တရားဝင်လည်း ကျနော်တို့ ပြောထား၊ ကြေငြာထားပြီးပြီ။ ပြည်တွင်းမှာ ရှိတဲ့ သတင်းထောက်အားလုံး ပူးပေါင်းပြီး ပြန် လုပ်ကြဖို့ ပေါ့။ တချို့လည်း ဆက်သွယ်ပြီး ပြန် လုပ်နေတာ ရှိတယ်၊။ ကျနော်တို့က စ ဖွဲ့ကတည်းက လုံခြုံရေးကြောင့် နှစ်ယောက် စ၊ သုံးယောက်စနဲ့ အစုအဖွဲ့တွေ ဖွဲ့လုပ်ကြတော့ တချို့ကြတော့လည်း နီးစပ်မှုအရ၊ ယုံကြည်မှုအရ တဖက်က ပြောတာကိုပဲ လက်ခံသူတွေလည်း ရှိမှာပေါ့။ ဘာဘဲပြောပြော ကျနော်တို့ကတော့ ဒီမိုကရက်တစ် မြန်မာ့အသံမှာ လုပ်ခဲ့တဲ့သူတွေအပေါ် တာဝန်ယူပါတယ်၊ ဆက် လုပ်သွားမှာပါ။

ဒုတိယပိုင်းကို ဆက်လက် ဖော်ပြပါမယ်။ ကိုညို၊ မတ် ၈ ရက်၊ ၂၀၁၂