မြန်မာ ဒု-သမ္မတ သီဟသူရ ဦးတင်အောင်မြင့်ဦး နှုတ်ထွက်စာတင်သွင်းတဲ့ကိစ္စ အပါအ၀င် အစိုးရ၀န်ကြီးအဖွဲ့ အပြောင်းအလဲတွေနဲ့ ပတ်သက်ပြီး နိုင်ငံတော်သမ္မတရုံးမှာ ဒီနေ့ တနင်္လာနေ့မှာ အစည်းအဝေးတရပ် ကျင်းပပြီး သတင်းထုတ်ပြန်ပေးဖွယ် ရှိတယ်လို့ နိုင်ငံတော်သမ္မတရုံးနဲ့ နီးစပ်တဲ့အသိုင်းအ၀ိုင်းက ပြောကြောင်း ဦးတင်အောင်မြင့်ဦးဟာ ပြုပြင် ပြောင်းလဲရေး မလိုလားသူ၊ သဘောထားတင်းမာသူ၊ စီးပွားရေးလုပ်ငန်းတွေမှာ လက်သင့်ရာဦးစားပေးသူ အဖြစ် နံမည်ကြီးပြီး၊ သူ့ရဲ့ နှုတ်ထွက်မှုဟာ မြန်မာအစိုးရအတွက် ထူးကဲတဲ့ဖြစ်စဉ်တရပ် ဖြစ်တယ်ဆိုတဲ့ ရန်ကုန်သံတမန် သတင်းရပ်ကွက်ကို ကိုးကားပြီး မေလ ၆ ရက်နေ့ထုတ် Financial Times သတင်းစာမှာလည်း ဖော်ပြထားကြောင်း ဒုတိယ သမ္မတ သီဟသူရ ဦးတင်အောင်မြင့်ဦး ရာထူးကနေ နှုတ်ထွက်ဖို့ စာတင်ထားတဲ့ သတင်းကို ဗွီအိုအေ မြန်မာပိုင်းက မနေ့က ထုတ်လွင့်ခဲ့ပြီး ဖြစ်ပါကြောင်း ဒီသတင်းနဲ့ပတ်သက်ပြီး စုံစမ်း သိရှိရသမျှတွေကို တင်ပြပေးထားပါကြောင်း
မကြာခင်ရက်ပိုင်းကမှ စင်ကာပူနိုင်ငံမှာ ဆေးကုသမှုခံယူပြီး မြန်မာပြည်ကို ပြန်ရောက်လာတဲ့ ဒုတိယ သမ္မတ ဦးတင်အောင်မြင့်ဦးဟာ လက်ရှိရာထူးကနေ နှုတ်ထွက်ဖို့ စာကို မေလ ၃ ရက်နေ့မှာ သမ္မတဆီ စာတင်ခဲ့တာ ဖြစ်တယ်လို့ အစိုးရနဲ့ နီးစပ်သူတွေက ပြောကြောင်း ဒီသတင်းကိုလည်း ဗွီအိုအေ မြန်မာပိုင်းက စနေနေ့ညပိုင်း အစီအစဉ်မှာ ထုတ်လွင့်ခဲ့ပြီး ဖြစ်ပါကြောင်း

ဒီကနေ့ ထပ်မံ စုံစမ်းသိရသလောက်ကတော့ နှုတ်ထွက်စာထဲမှာ ကျန်းမာရေးကြောင့် မပါဘူးလို့ ပြောပါတယ်။ ဒါပေမဲ့ လက်ရှိမှာ ကျန်းမာရေးလည်း သိပ်မကောင်းသလို့ လည်ချောင်းမှာ ကင်ဆာလို၊ အဖုအကြိတ်မျိူး စစ်ဆေး တွေ့ရှိခဲ့တာကြောင့် ရာထူးကနေ အနားယူဖို့ နှုတ်ထွက်စာ တင်ထားတာ ဖြစ်တယ်လို့ အမည် မဖော်လိုသူ အစိုးရအဖွဲ့နဲ့ နီးစပ်သူတွေက ပြောကြောင်း သူရဲ့ နှုတ်ထွက်စာကို လက်ခံမယ် လက်မခံဘူး ဆိုတာကတော့ သမ္မတ ဦးသိန်းစိန်အပေါ်မှာ မူတည်တယ် လို့လည်း ပြောကြောင်း ဦးတင်အောင်မြင့်ဦးဟာ အခု မှော်ဘီက ဘုန်းကြီးကျောင်းတကျောင်းမှာ ရဟန်းခံထားတယ်လို့လည်း ပြောဆိုမှုတွေ ရှိနေကြောင်း

တခါ ဒီသတင်းနဲ့ ပတ်သက်လို့ သမ္မတ အကြံပေး တဦးဖြစ်တဲ့ ဦးကိုကိုလှိုင်ကိုလည်း ကျမ ဆက်သွယ် မေးကြည့်တော့ လက်ရှိ ဒီကနေ့ထိတော့ ဦးတင်အောင်မြင့်ဦး ရာထူးကနေ နုတ်ထွက်မယ် ဆိုတဲ့ သတင်းနဲ့ပတ်သက်လို့ ဘာမှမသိရသေးဘူးလို့ ဖြေကြောင်း

"ကျနော်တို့တော့ ဘာမှ မသိသေးပါဘူးခင်ဗျ။ ကျနော်တို့လည်း နေပြည်တော်က မေလ ၁ ရက်နေ့က ပြန်လာတာပေါ့လေ။ အဲဒီအချိန်ထိတော့ ဘာမှ မကြားခဲ့ပါဘူး။ ကျန်းမာရေးနဲ့ ပတ်သက်ပြီးတော့လည်းပဲ ဘာမှတော့ ပြောသံ ဆိုသံ မကြားမိပါဘူး။ ဒီလိုပဲ ၀က်ဘ်ဆိုက်တွေမှာရော၊ တခြား နေရာတွေမှာရော သတင်းတွေကတော့ ပြန့်နေတာပါပဲ။ ဒါမျိုး သတင်းတွေလည်း ပေါ်ပေါ်လာတတ်တာ ရှိတယ်။ ဟို . . . အတည်ပြုလို့လည်း မရဘူးပေါ့နော်။ ဒါပေမဲ့လည်း ကျနော်တို့ ဘာမှတော့ ရေရေရာရာ မသိပါဘူး။"

တကယ်တော့ မြန်မာနိုင်ငံမှာ ဒီလို သတင်းမျိူးတွေကို အတည်ပြုချက်ရဖို့ အတော် ခက်ခဲပါတယ်။ နိုင်ငံတော်သမ္မတရုံးတွေ၊ အစိုးရအဖွဲ့ရုံးက တာဝန်ရှိသူတွေဆီ ဆက်သွယ်ပေမဲ့လည်း အတည်ပြုချက် မရသလို ဘာမှ မသိရသေးဘူးလို့သာ ဖြေကြပါတယ်၊။ ဒီလို သတင်းမျိူးတွေကိုလည်း အုပ်ချုပ်သူ အစိုးရဘက်က ကြိုတင်အသိပေး ထုတ်ပြန်တဲ့ အစဉ်အလာလည်းမရှိခဲ့ပါဘူး။

ဒုသမ္မတ သီဟသူရ ဦးတင်အောင်မြင့်ဦးဟာ အခု အစိုးရအဖွဲ့ထဲမှာ သဘောထား တင်းမာသူ တဦး ဖြစ်တယ်လို့ အများသုံးသပ်ထားတာမို့ ဒီသတင်းကို အတော်များများက စိတ်ဝင်စားနေကြတာလည်း ဖြစ်ကြောင်း ဦးတင်အောင်မြင့်ဦးနဲ့ တပ်မမှူး၊ တိုင်းမှူးဘ၀မှာ ဆုံခဲ့ဖူးသူ တဦးဖြစ်တဲ့ အမေရိကန်နိုင်ငံမှာနေတဲ့ စစ်သံမှူးဟောင်း ဦးအောင်လင်းထွဋ်ကတော့ သူသိတဲ့ ဦးတင်အောင်မြင့်ဦးရဲ့ စိတ်နေ သဘောထားတွေကို အခုလို ပြောပြကြောင်း

"သီဟသူရ ဦးတင်အောင်မြင့်ဦး အနေနဲ့ ဒီအစိုးရထဲမှာတော့ နံပါတ်တစ် သဘောထား တင်းမာဆုံးလို့ ပြောရပါမယ်။ သူဟာစစ်တပ်ထဲမှာ နေစဉ်တုန်းကလည်း အင်မတန်မှ သဘောထား တင်းမာတဲ့သူ။ ကျနော်တို့ စစ်တပ်ထဲမှာတော့ အပြောအဆိုလည်း ကြမ်းတယ်။ အခုလည်း ကင်ဆာဖြစ်တယ်လို့ ကြားတာပဲ။ အခု ဒေါ်အောင်ဆန်းစုကြည် လွှတ်တော်ထဲ ၀င်ဖို့ မ၀င်ဖို့ ကိစ္စတွေ၊ နောက် ၂၀၀၉ ခုနှစ်က ဖြစ်ခဲ့တဲ့ ဒေါ်အောင်ဆန်းစုကြည်ကို လွှတ်ဖို့ မလွှတ်ဖို့ကိစ္စ၊ နောက် မစ္စတာယက်တောနဲ့ ပြန်ဖမ်းတဲ့ ကိစ္စတွေ ရှိတယ်ဗျာ၊ နောက် ၂၀၁၀ ရွေးကောက်ပွဲအပြီး တပတ်အကြာမှ ဒေါ်အောင်ဆန်းစုကြည်ကို ပြန်လွှတ်ပေးတာ ဒါတွေဟာ သူတို့ပယောဂတွေ မကင်းပါဘူး ခင်ဗျ။
၂၀၁၁ ခုနှစ်လောက်က ကျနော် သိရသလောက်ပေါ့လေ အခု လက်ရှိသမ္မတကြီး ဦးသိန်းစိန် ကိုယ်တိုင် တော်တော်လေး စိတ်ခံစားပြီးတော့မှ အစည်းအဝေး ခန်းကနေပြီးတော့မှ ဆွဲခေါ် ထုတ်သွားခဲ့ရတဲ့ အနေအထားမျိူးတွေ ရှိခဲ့တယ်ဆိုတဲ့ သတင်းမျိူးတွေ ကြားခဲ့ရပါတယ်။ အဲဒီချိန်ခါတုန်းကတော့ ဦးတင်အောင်မြင့်ဦးအနေနဲ့ ကျန်းမာရေး ကောင်းပြီးတော့မှ aggressive ဖြစ်တဲ့အချိန်ပေါ့လေ။ အထူးသဖြင့်တော့ မြစ်ဆုံ Dam (ဆည်) ကိစ္စတွေ ဖြစ်တဲ့အခါမှာ ဖြစ်ပါတယ်။"

ဒါကတော့ အမေရိကားမှာ နေတဲ့ စစ်သံမှူးဟောင်း ဦးအောင်လင်းထွဋ် ပြောပြခဲ့တာပါ။ ဦးတင်အောင်မြင့်ဦးဟာ DSA စစ်တက္ကသိုလ် အပတ်စဉ် (၁၂) ကျောင်းဆင်း တဦးဖြစ်ပြီး အရင်စစ်အစိုးရ လက်ထက်မှာတော့ အရှေ့မြောက်တိုင်း စစ်ဌာနချုပ် တိုင်းမှူးအဖြစ်နဲ့ တာဝန်ယူခဲ့သူ ဖြစ်ကြောင်း အခု အရပ်သားအစိုးရ တရပ် ဖွဲ့စည်းခဲ့တဲ့ အထဲမှာတော့ စစ်တပ်ရဲ့ ထောက်ခံမှု အပြည့်နဲ့ ဒုတိသမ္မတ ဖြစ်လာတာလို့လည်း ပြောဆိုကြတာတွေ ရှိကြောင်း သိရသည်။


ခေါင်းမာဂိုဏ်းသားဟု အများက ယူဆကြသည့် ဒုသမ္မတ သီဟသူရ ဦးတင်အောင်မြင့်ဦးသည် ကျန်းမာရေးအခြေအနေအရ မေလ ၃ ရက်နေ့တွင် ထွက်စာတင်လိုက်ကြောင်း သိရသည်။ VOA မြန်မာပိုင်း သတင်းကို ကိုးကား၍ Reuters သတင်းဌာက ဖော်ပြသော်လည်း အတည်ပြုချက် မရသေးဟု ရေးသားထားသည်။ စုံစမ်းသိရှိချက်အရ အသက် ၆၁ နှစ်အရွယ်ရှိ ဗိုလ်ချုပ်ကြီးဟောင်း ဦးတင်အောင်မြင့်ဦးသည် စင်ကာပူ၌ ဆေးစစ်ရာတွင် ကင်ဆာလက္ခဏာ တွေ့ရပြီး၊ မျက်လုံးအမြင်အာရုံလည်း ချွတ်ယွင်းနေကြောင်းသိရသည်။

အမျိုးသမီးရေးရာ အမေရိကန် သံအမတ်ကြီးနဲ့ ဒေါ်အောင်ဆန်းစုကြည် တွေ့ဆုံဆွေးနွေး

မြန်မာနိုင်ငံကို ရောက်ရှိနေတဲ့ အမေရိကန်အစိုးရရဲ့ ကမ္ဘာ့အမျိုးသမီးရေးရာ သံအမတ်ကြီး Melanne Verveer ဟာ အမျိုးသားဒီမိုကရေစီ အဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်နဲ့ ဒီကနေ့ ညနေမှာ တွေ့ဆုံပြီး အမျိုးသမီးရေး ကိစ္စတွေ အပါဝင် မြန်မာနိုင်ငံက တိုင်းရင်းသား အမျိုးသမီးတွေနဲ့ ပတ်သက်ပြီး ဆွေးနွေးကြောင်း သိရပါတယ်။
ဒေါ်အောင်ဆန်းစုကြည်နဲ့ သံအမတ်ကြီး Melanne Verveer တို့ တွေ့ဆုံအပြီး သတင်းစာရှင်းလင်းပွဲလုပ်ချိန်မှာ ကချင်ပြည်နယ်က အမျိုးသမီး စစ်ပြေးဒုက္ခသည်တွေနဲ့ ပတ်သက်တဲ့အကြောင်းတွေကို အလေးထားပြောဆိုတယ်လို့ ဒေါ်အောင်ဆန်းစုကြည်ရဲ့ ရုံးအဖွဲ့ဝင် ဦးထင်ကျော်က အခုလိုပြောပါတယ်။
"သံအမတ်ကြီး Melanne Verveer ဆိုတာ၊ Ambassador-at-Large for Global Women's Issues ဆိုတာ ဒေါ်အောင်ဆန်းစုကြည်ကိုလာတွေ့တာပါ။ သူနဲ့ အဖွဲ့ဝင် ၉ ယောက်လောက် ပါပါတယ်။ သူတို့အချင်းချင်း ဆွေးနွေးတာပါ။ ဒါအမျိုးသမီး ရေးရာကိစ္စတွေပါ။ ကျန်တဲ့ဟာကတော့ သတင်းထောက်တွေ မေးပါတယ်။ ဒီအမျိုးသမီးရေးရာ ကိစ္စတွေကိုပဲ သူပြောပါတယ်။ ကချင်ပြည်နယ်မှာ။ အဲဒီကိစ္စ အမျိုးသမီး တစ်ယောက်က မေးပါတယ်။ အဲဒီမှာ အမျိုးသမီးနဲ့ ခလေးတွေ အများဆုံးပဲ။ အဲဒီကိစ္စကို ဘယ်လိုသဘောထားပါသလဲ။ အဲဒီလိုမျိုးမေးတယ်။ သူဖြေပါတယ်"
အမေရိကန်အစိုးရ သံအမတ်ကြီး Melanne Verveer ဟာ မြန်မာ့အမျိုးသမီးတွေရဲ့ ငြိမ်းချမ်းရေးနဲ့ ဖွံ့ဖြိုးတိုးတက်ရေးကို လေ့လာဖို့ မြန်မာနိုင်ငံကို ရောက်လာတာလို့ သိရပါတယ်။နောက်နေ့တွေမှာတော့ မြန်မာအစိုးရ တာဝန်ရှိသူတွေနဲ့ တွေ့ဆုံမှာဖြစ်ပြီး အမျိုးသမီးထု ကျန်းမာရေး၊ ပညာရေးနဲ့ စီးပွားရေးကဏ္ဍတွေကို ဆွေးနွေးမှာဖြစ်သလို အမျိုးသမီး အခွင့်အရေး ကာကွယ်စောင့်ရှောက်ရေးဆိုင်ရာ ကိစ္စတွေကိုလည်း ဆွေးနွေးသွားဖို့ ရှိကြောင်း အမေရိကန် နိုင်ငံခြားရေးဌာနရဲ့ ကြေညာချက်မှာ ဖော်ပြထားပါတယ်။သံအမတ်ကြီး Melanne Verveer ရဲ့ ခရီးစဉ်ဟာ မေလ ၆ ရက်နေ့ ကနေ ၁၁ ရက်နေ့ထိ ကြာမြင့်မှာဖြစ်ပြီး ထိုင်းနိုင်ငံ အခြေစိုက်တဲ့ ရှမ်းတိုင်းရင်းသူ အမျိုးသမီး အဖွဲ့အစည်းတွေနဲ့လည်း တွေ့ဆုံဖို့ ရှိပါတယ်။

ကိုဖြိုးဝေအောင်အမှု တရားစီရင်ရေး လွဲမှားနေကြောင်း AHRC ဝေဖန်

၂၀၁၀ သင်္ကြန်ဗုံးခွဲမှုနဲ့ စွပ်စွဲခံထားရတဲ့ ကိုဖြိုးဝေအောင်ကို လာမယ့် မေလ ၈ ရက်နေ့မှာ စီရင်ချက်ချတော့မှာ ဖြစ်ကြောင်းနဲ့၊ တရားစီရင်ရေးမှာ လွဲမှားမှုတွေရှိနေကြောင်း အာရှလူ့အခွင့်ရေး ကော်မရှင်က ဒီကနေ့ ပြောဆိုလိုက်ပါတယ်။
ကိုဖြိုးဝေအောင်အမှုမှာ တရားမ၀င်ဖမ်းဆီးမှု၊ မမှန်မကန် သက်သေအထောက်အထား ရယူမှုတွေ ရှိနေတဲ့အတွက် တရားရုံးအနေနဲ့ ပြန်လည်သုံးသပ် စီရင်နိုင်ဖို့ ဒီကနေ့ ကြေညာချက် တစ်စောင်ထုတ်ပြန် တိုက်တွန်းရတာ ဖြစ်တဲ့အကြောင်း အာရှလူ့အခွင့်ရေးကော်မရှင်က ရှေ့နေ ဦးမင်းလွင်ဦးက အခုလိုပြောပြပါတယ်။
 ဥပဒေနဲ့အညီ လုပ်ဆောင်ထားတဲ့ လုပ်ဆောင်ချက်တွေ မရှိဘူးဆိုတာကို ကျွန်တော်တို့ အချက်အလက် တော်တော်များများ တွေ့ရတယ်။ ဥပမာ ဖမ်းဆီးစစ်ဆေးတာ၊ နှိပ်စက်ညှဉ်းပန်းတာ၊ သက်သေထွက်ချက်တွေ မတရား ရယူတာ၊ မတရားဝန်ခံခိုင်းတာ၊ အမှုစစ်ဆေး စီရင်ခြင်းမပြုသေးမီမှာလည်း ရဲချုပ်ခင်ရီက သတင်းစာရှင်းလင်းပွဲမှာ အပြစ်ရှိတယ်ဆိုတဲ့ သဘောမျိုးအနေနဲ့ ထုတ်ဖော်ပြောဆိုတဲ့ ကိစ္စရပ်တွေ၊ နောက်ပြီးတော့တခါ သက်သေအဖြစ် သတင်းစာတွေမှာ ထုတ်ဖော်တင်ပြထားတဲ့ အချက်အလက်တွေနဲ့ အမှုစစ်ဆေးတဲ့အခါမှာ သက်သေတွေရဲ့ထွက်ဆိုချက်တွေ ကွဲလွှဲနေတာ အများကြီး ကျွန်တော်တို့ တွေ့ရတယ်။ ဒါတွေကိုလည်း တရားရုံးကနေပြီးတော့ အမှုမှာ သက်သေခံ အဖြစ် တင်သွင်းခဲ့တာ ကျွန်တော်တို့ တွေ့ရတယ်
ဒီကနေ့ တိုင်းပြည်မှာ ပြုပြင်ပြောင်းလဲရေးတွေ လုပ်နေတာနဲ့အညီ တရားစီရင်ရေး မဏ္ဌိုင်ကိုလည်း ပြုပြင်ပြောင်းလဲသင့်ကြောင်း၊ ယခင်စစ်အစိုးရ လက်ထက်ကလို အာဏာပိုင်တွေ လက်အောက်က တရားစီရင်ရေးမှုမဟုတ်ဘဲ လွတ်လပ်တရားမျှတဲ့ တရားစီရင်ရေးမျိုးဖြစ်အောင် တရားသူကြီးတွေ အနေနဲ့လည်း သတိထား ဆောင်ရွက်သင့်တယ်လို့ အာရှလူ့အခွင့်ရေး ကော်မရှင်က ပြောဆိုထားပါတယ်။
မှန်ကန်တဲ့ တရားစီရင်ရေးသာဖြစ်ခဲ့ရင် ကိုဖြိုးဝေအောင်ဟာ ကွင်းလုံးကျွတ် လွတ်ဖို့ ရှိကြောင်းနဲ့၊ ကိုဖြိုးဝေအောင်ရဲ့ လက်ရှိကျန်းမာရေးဟာ အတော်လေးဆိုးဝါးနေကြောင်း ဇနီးဖြစ်သူ မဌေးဌေးက
" ကျန်းမာရေးကတော့ လုံးဝမကောင်းဘူး။ သူက အသည်းရောဂါ ဖြစ်နေတယ်။ အထူးကု ကုမှ ရတော့မဲ့ အချိန်မှာ သူ့ကို အထူးကုခေါ်ပြီး ကုပေးခြင်းလည်း မရှိဘူး။ ဒီအကိုက်အခဲ ပျောက်ဆေးတွေတိုက်တာ များလွန်းတဲ့အတွက် သူအစာအိမ်ရောင်ပြီး ဆေးရုံ ၅ ရက် တက်ရတယ်ရှင့်။ တခါ အခု ၃၀ ရက်နေ့ ညပိုင်းတုန်းကလည်း အဲဒီလို မခံမရပ်နိုင် တအားအောင့်ပြီးတော့ အရေးပေါ်ဆေးရုံတင်ထားရတယ်။ အခုလက်ရှိလည်း ဆေးရုံပေါ်မှာပဲ"
ကိုဖြိုးဝေအောင်ကို ၂၀၁၀ သင်္ကြန်မှာ ရန်ကုန်က H2O မဏ္ဍပ် ဗုံးပေါက်ကွဲမှုမှာ ပါဝင်ပတ်သက်တယ်ဆိုတဲ့ စွပ်စွဲချက်နဲ့ ဖမ်းဆီးပြီး စစ်အစိုးရက တရားစွဲဆိုထားတာဖြစ်ပါတယ်။

ဆင်ဘိုအနီး ဧရာဝတီကျွန်းပေါ် ရွှေတူးမှာကို ဒေသခံတွေ မကျေနပ်

ကချင်ပြည် ဆင်ဘိုမြို့အနီး ဧရာဝတီမြစ်ပေါ်က ကျွန်းတကျွန်းမှာ အငြိမ်းစား စစ်အရာရှိဟောင်းတဦးက ရွှေတူးဖော်ဖို့ ပြင်နေတယ်လို့ ဒေသခံတွေက ပြောပါတယ်။
ဆင်ဘိုမြို့နဲ့ ၂ မိုင်လောက်သာဝေးတဲ့ ဧရာဝတီမြစ်လယ်က ကျွန်းမှာ ပြီးခဲ့တဲ့ ၂ ရက်လောက်က စလို့ ရွှေတူးစက်တွေ ရောက်လာပြီး ဒီကနေ့မှာ ရွှေတူးမယ့်ဖောင် စုစုပေါင်း ၅၀ ကျော်လောက် ထပ်ပြီးရောက်လာတယ်လို့ ဆင်ဘိုဒေသခံ တစ်ယောက်က ပြောပါတယ်။
"ဆင်ဘိုနဲ့ မဝေးတဲ့နေရာ ကျွန်းဦးဆိုတဲ့ ကျွန်းရှိတယ်။ ဗန်းမော်ဘက်ကနေ တက်လာတာ။ သူတို့က အငြိမ်းစားဗိုလ်မှူး ဦးလှထွန်း၊ သူတို့အဖွဲ့အားလုံး ရွှေဖောင်က ၃၀ ကျော် ၄၀ လောက်ရှိတယ်။ အဲဒါလာလုပ်မယ် ဆိုတဲ့အခါကျတော့ အထက်ရဲ့ ခွင့်ပြုချက်တော့ မဟုတ်ဘူး။ ဆင်ဘိုဒေသ အာဏာပိုင်တွေနဲ့ပဲ သူကလှုပ်ရှားမှာ၊ အဲဒါကို ရွှေကူဒေသခံတွေက စိုးရိမ်မကင်းဖြစ်နေတယ်။ အခုက သူတို့က ကုမ္ပဏီနံမည်ကို မခံဘူး။ ဖက်စပ်ပုံစံမျိုးပေါ့ဗျာ။ အငြိမ်းစားဗိုလ်မှူး ဦးလှထွန်းကနေ ဦးဆောင်လာတဲ့သဘောပဲ။ ဒီဥစ္စာ အုပ်ချုပ်ရေးရုံးတွေလည်း ပါတာပဲ။ စရဖ တွေလည်း ပါတာပဲ။ ရွှေဖောင်တွေက ရောက်လာပြီ"
ဒီနေ့ဆိုရင် ရွှေဖောင်စုစုပေါင်း ၅၀ ကျော်လောက် ထပ်ရောက်လာတယ်လို့ သိရပါတယ်။ အဲဒီနေရာမှာ ရွှေတူးရင် မြစ်ရဲ့အောက်ပိုင်းမှာ ရှိတဲ့လူတွေအတွက် ကျန်းမာရေးအရ ထိခိုက်နိုင်သလို ပျက်စီးဆုံးရှုံးမှာတွေလည်း ရှိတာကြောင့် ဒေသခံတွေ မကျေနပ်ကြဘူးလို့လည်း အဲဒီဒေသခံက ပြောပါတယ်။
ဒီကိစ္စတွေနဲ့ ပတ်သက်လို့ ဆင်ဘိုမြို့ အုပ်ချုပ်ရေးဌာနကို RFA က ကြိုးစားဆက်သွယ်ပေမဲ့ အဆက်သွယ်မရခဲ့ပါဘူး။ အလားတူပဲ ဗန်းမော်မြို့ အနီးရှိ ဧရာဝတီမြစ်လယ်ကျွန်း မန်တဲရွာမှာလည်း ပြီးခဲ့တဲ့လကစပြီး ရွှေတူးဖော်နေကြလို့ ရွာရွှေ့ပြောင်းရမဲ့ အခြေအနေနဲ့ ရင်ဆိုင်နေရတယ်လို့ သိရပါတယ်။

ကရင်နိုင်ငံရေး အကျဉ်းသား ၂ ဦး မိသားစုကို နိုင်ကျဉ်းဟောင်းများ သွားရောက်တွေ့ဆုံ

နိုင်ငံရေး အကျဉ်းသားဟောင်းများ အဖွဲ့ က အကျဉ်းထောင် အသီးသီးမှာ ကျန်နေသေးတဲ့ နိုင်ငံရေး အကျဉ်းသားတွေရဲ့ မိသားစုတွေရှိရာကို သွားရောက် အားပေးနေရာမှာ နိုင်ငံရေးအကျဉ်းသား စောဝီလျံနဲ့ စောဖရန်စစ်တို့ရဲ့ မိသားစုတွေဆီကို ဒီကနေ့ သွားရောက် အားပေးခဲ့တယ်လို့ သိရပါတယ်။ပဲခူး ဗုံးဖောက်ခွဲမှုနဲ့ ဆက်စပ်မှုရှိတယ်ဆိုပြီး ဖမ်းဆီးထောင်ချခဲ့တဲ့ အမှုတွဲမှာ ၁၂ ဦး ပါဝင်ပါတယ်။ အဲဒီအထဲက စောဖရန်စစ်က ပုဒ်မ ၁၇-၁၊ ၁၃-၁ နဲ့  ထောင်ဒဏ် ၅ နှစ်၊ စောဝီလျံ ကတော့ ၁၃-၁ နဲ့  ထောင်ဒဏ် ၃ နှစ် အသီးသီးနဲ့ အင်းစိန်ထောင်မှာ ကျခံနေရပါတယ်။
သူတို့ မိသားစုတွေကို မှော်ဘီမှာ သွားရောက်တွေ့ဆုံ အားပေးခဲ့တယ်လို့ နိုင်ငံရေး အကျဉ်းသားဟောင်းများ အဖွဲ့ဝင် ကိုထွန်းကြည်က အခုလိုပြောပါတယ်။
"သူတို့မိသားစုတွေက ဗမာလိုတောင် သိတ်မရည်လည်ကြပါဘူး။ ကရင်တိုင်းရင်းသားတွေ အလွန်ရိုးပါတယ်။ စောဝီလျံက အဖေမရှိတော့ပါဘူး။ အမေက အသက် ၆၅ နှစ်ရှိပါပြီ။ စောဝီလျံက လူပျိုပါ။ စောဖရန်စစ်က အဖေမရှိတော့ပါဘူး။ မိခင်အိုကြီးက အသက် ၇၅ နှစ်ရှိပါပြီ။ တော်တော်လေး ဆင်းရဲပါတယ်။ စောဖရန်စစ်ကတော့ ခလေး ၃ ယောက်ရှိပါတယ်။ ဇနီးသည် မအေးမာက သူ့မိဘတွေဆီ သူပြန်ပြီးတော့ လုပ်ကိုင်စားသောက်နေပါတယ်။ သူတို့ကို စာအုပ်တို့၊ ပန်ကန်ပြားတို့၊ ဇလုံတို့၊ ခေါက်ဆွဲခြောက်တို့၊ နို့မှုန့်အစားအသောက်လောက်ပဲ ကျွန်တော်တို့ပေးနိုင်ပါတယ်"
နိုင်ငံရေး အကျဉ်းသားဟောင်းများအဖွဲ့ဟာ နိုင်ငံရေးအကျဉ်းသား မိသားစုတွေကို အပတ်စဉ်တိုင်း သွားရောက်အားပေးတဲ့ လှုပ်ရှားမှုအပြီးမှာ အခြေခံဥပဒေပါ အချက်အလက်တွေကို စုပေါင်း လေ့လာဆွေးနွေး ကြတယ်လို့ ပြောပါတယ်။
ဒါ့အပြင် နိုင်ငံရေး အကျဉ်းသားဟောင်းများ အပါအ၀င် စိတ်ဝင်စားသူ လူငယ်တွေကို တက်ကြွလှုပ်ရှားသူ နိုင်ငံသား များရဲ့တာဝန်၊ ဥပဒေရေးရာစတဲ့ အကြောင်းအရာ ဗဟုသုတဖြန့်ဝေတဲ့ သင်တန်းတွေကို လာမဲ့ ၂၀ ရက်နေ့ကစပြီး ပုံမှန် ပို့ချသွားမယ်လို့  ပြောပါတယ်။

ကချင်စစ်ပြေးဒုက္ခသည်တွေ အကူအညီ အထူးလိုအပ်နေ

မိုးရာသီနီးလာတာနဲ့အမျှ ကချင်စစ်ပြေး ဒုက္ခသည်တွေအတွက် အကူအညီ ပိုလိုနေတယ်လို့ အဖြူရောင်တွဲလက်များ အဖွဲ့နဲ့ လိုက်ပါသွားပြီး ကချင်ပြည်နယ်နဲ့ တရုတ်နယ်စပ်က ဒုက္ခသည်စခန်းတွေကို ရောက်ခဲ့တဲ့ မဇင်မာအောင်က ပြောပါတယ်။ ကျန်းမာရေး စောင့်ရှောက်မှုတွေ အထူးလိုအပ်နေတာလို့ သူကပြောပါတယ်။
" မိုးရာသီရောက်တော့မယ်။ နေစရာထိုင်စရာတွေက ပိုပြီးတော့ အခက်အခဲဖြစ်နေပြီ။ ကျန်းမာရေး အခြေအနေရော၊ လူနေထူထပ်တာရော၊ ခလေးတွေကျောင်းနေဖို့ ကိစ္စက အရေးတကြီး လိုအပ်ချက်ဖြစ်နေတယ်။ နောက်ပြီး တရုတ်ပြည် ဘက်အခြမ်းမှာ၊ တရုတ်ပြည်နယ်စပ်ပေါ့နော်။ အဲဒီက ဖာသာတွေရဲ့ ပြောပြချက်အရ ကုလသမဂ္ဂတို့ ဘယ်တို့က အကူအညီတွေရောက်နေပြီ၊ သတင်းတွေပါပြီးတဲ့ အခါကျတော့ လူတွေက ရနေပြီပဲ၊ မလိုတော့ဘူးပဲလို့ ထင်သွားပုံရပါတယ်တဲ့။ မလာကြ တော့ဘူးပေါ့နော်။ အကူအညီတွေက အမှန်တကယ်တော့ အရမ်းကို လိုအပ်နေဆဲပါ။ စစ်ပွဲတွေပြီးသွားလို့ ရှိရင်တောင်မှ ဒီလိုမျိုး လူမှုကူညီရေးကိစ္စတွေက ပြီးဦးမှာ မဟုတ်သေးဘူးပေါ့နော်။ အခုစစ်ပွဲတွေ ဖြိုးဖြိုးဖြောက်ဖြောက် ဖြစ်နေတဲ့ အချိန်မှာ ဒုက္ခသည်တွေ ထပ်တိုးလာဖို့ပဲ ရှိတယ်" လို့ မဇင်မာအောင်က ပြောပါတယ်။
လူသူအရောက်နည်းတဲ့ စခန်းတွေကိုလည်း သွားရောက်ပြီး အ၀တ်အထည်နဲ့ငွေကြေး လှူဒါန်းခဲ့တဲ့အကြောင်း၊ အဓိကအားဖြင့် စိတ်ပိုင်းဆိုင်ရာအရ အားပေးတာ ဖြစ်တဲ့အကြောင်းနဲ့ တောင်ပေါ်သား ကချင်ပြည်သူတွေနဲ့အတူ မြေပြန့်က လူထုကလည်း ဒုက္ခကို မျှဝေခံစားပြီး သူတို့နဲ့အတူ ရပ်တည်တဲ့အကြောင်း ပြသတဲ့အနေနဲ့ သွားရောက်ကူညီတာလို့လည်း ပြောပါတယ်။

သြစတြေးလျအကူအညီ ထိရောက်ကြောင်း NLD လွှတ်တော်ကိုယ်စားလှယ် ပြောဆို

မြန်မာပြည်ရဲ့ဒီမိုကရေစီ အသွင်ကူးပြောင်းရေးမှာ သြစတြေးလျနိုင်ငံက ကူညီဆောင်ရွက်မှုတွေဟာ အကျိုးထိရောက်မှုရှိကြောင်း သြစတြေးလျကို ပြီးခဲ့တဲ့ သီတင်းပတ်က ရောက်ရှိနေတဲ့ အမျိုးသား ဒီမိုကရေစီအဖွဲ့ချုပ် NLD လွှတ်တော်ကိုယ်စားလှယ် ဦးဖြိုးမင်းသိန်းက မနေ့က ပြောဆိုပါတယ်။