ကရင် နဲ့  ကချင် သတင်းများ  စက်တင်ဘာ ၀၄၂၀၁၂

KNU နဲ့ မြန်မာအစိုးရကြား ငြိမ်းချမ်းရေးဆွေးနွေး


ကေအန်ယူ ကရင့်အမျိုးသား အစည်းအရုံးနဲ့ မြန်မာအစိုးရ ငြိမ်းချမ်းရေး ကိုယ်စားလှယ်အဖွဲ့တို့ ဖားအံမြို့ ဇွဲကပင်ဟိုတယ် က အပစ်အခတ်ရပ်စဲရေး ဆွေးနွေးမှုမှာတော့ နှစ်ဘက် တပ်နေရာ ချထားရေး အတွက် အကျေအလည် ဆွေးနွေးခဲ့ကြ ပါတယ်။ ကေအန်ယူဘက်ကတော့ လူ့အခွင့်အရေး ကရင်ပြည်သူတွေရဲ့ လုံခြုံရေးနဲ့ တပ်နေရာချထားရေး ကိစ္စတွေကို အဓိကထား ဆွေးနွေးခဲ့တယ်လို့ လည်း ဆိုပါတယ်။ မြန်မာအစိုးရ ငြိမ်းချမ်းရေး အဖွဲ့ဘက်ကလည်း သဘောတူနိုင်တဲ့ အချက်တွေနဲ့ သဘောမတူနိုင်သေးတဲ့ အချက်တွေကို ပြည်ထောင်စုဝန်ကြီးတွေ ဦးဆောင်ဆွေးနွေးခဲ့ကြပါ တယ်။ ကေအန်ယူနဲ့ မြန်မာ အစိုးရတို့ရဲ့ တတိယအကြိမ် ငြိမ်းချမ်းရေး ဆွေးနွေးပွဲကိုတော့ စက်တင်ဘာလ ၃ ရက်နဲ့ ၄ ရက် နေ့တွေမှာ ပြုလုပ်မှာ ဖြစ်ပါတယ်။

မြန်မာအစိုးရနဲ့ နှစ်ပေါင်း ၆၀ ကျော် သဘောကွဲလွဲနေတဲ့ တိုင်းရင်းသား လက်နက်ကိုင်အဖွဲ့ ကရင့် အမျိုးသား အစည်း အရုံး ကေအန်ယူနဲ့ မြန်မာအစိုးရ ငြိမ်းချမ်းရေး ကိုယ်စားလှယ်အဖွဲ့တို့ဟာ ဒီကနေ့ ကရင်ပြည်နယ် ဖားအံမြို့က ဇွဲကပင် ဟိုတယ်မှာ  ငြိမ်းချမ်းရေးအတွက် နှစ်ဘက်တပ်တွေ လိုက်နာ ရမယ့် အချက်အလက်တွေကို ဆွေးနွေးခဲ့ကြပါတယ်။ နှစ်ဘက် တပ်မှူးတပ်သားတွေ လိုက်နာရမယ့် စည်းကမ်း စုစုပေါင်း စာမျက်နှာ ၆၀ ကျော်ကို ဥပဒေပညာရှင်တွေနဲ့ပါ ညှိနှိုင်းကြတာ ဖြစ်တယ်လို့ ငြိမ်းချမ်းရေး အကျိုးဆောင်တဦးဖြစ်တဲ့ ဦးညိုအုန်းမြင့်က ပြောပါတယ်။

“တပ်မှူးတပ်သားတွေ လိုက်နာရမယ့် စည်းကမ်းတွေမှာ ဘာမှ အခက်အခဲ ဖြစ်တာမျိုး မဖြစ်ပါဘူး။ ဘာဖြစ်လို့လဲဆိုတော့ ဥပဒေတွေက များလွန်းလို့ ခင်ဗျ။ နောက်တခါ ဒီ ကေအန်ယူဘက်ကတော့ လူ့အခွင့်အရေး ဆိုင်ရာရှုထောင့်နဲ့ နောက်တခါ ကရင်ပြည်သူတွေရဲ့ လုံခြုံရေးအတွက်ကို ၁၀၀ % ရအောင်ဆိုတဲ့  အနေအထားဘက်က ချဉ်းကပ်တာကိုလည်း ကျနော်တို့ တွေ့ရပါတယ်။ ဒီအပေါ် မှာလည်း အစိုးရဘက်က တစုံတရာ ငြင်းဆိုတာ မရှိပါဘူး။ တပ်ခွဲခြားရေး- တချို့တပ်တွေရဲ့ နေရာ အနေအထား ပေါ်မှာပေါ့နော်- တယောက်နဲ့တယောက် သံသယရှိမှုအပေါ်မှာ အခြေခံပြီးတော့ ခုနကပြောတဲ့ တပ်ပြောင်း သွားတဲ့ကိစ္စကို မသိလိုက်တဲ့ကိစ္စမျိုး၊ နောက်တခါ တချို့တွေမှာ မှားယွင်း မှုတွေ ကြုံတွေ့နေရတဲ့ အခက်အခဲတွေကို ဖြေရှင်း နေကြတယ်။ တယောက်နဲ့ တယောက် အပြန်အလှန် ဆွေးနွေးနေတာတွေ ရှိပါတယ်။”

ကေအန်ယူဘက်ကတော့ လူ့အခွင့်အရေး၊ ကရင်ပြည်သူတွေရဲ့ လုံခြုံရေးနဲ့ တပ်နေရာချထားရေး ကိစ္စတွေကို အဓိက ထား ဆွေးနွေးခဲ့ကြပြီး အစိုးရအဖွဲ့ဝင် ပြည်ထောင်စုဝန်ကြီးတွေကလည်း သဘောတူနိုင်တယ်၊ မတူနိုင်ဘူးဆိုတာကို ပြတ်ပြတ်သားသား ဆုံးဖြတ်ပေးရတဲ့ အနေအထားမှာ ရှိနေတယ်လို့လည်း ဦးညိုအုန်းမြင့်က ဆိုပါတယ်။

“တကယ် အပစ်အခတ် ရပ်စဲတယ်ဆိုတာ ဥပမာ ပြောရရင် စာရွက်ပေါ်မှာ ရေးပေမယ့်လည်း တကယ် လိုက်နာရမယ့် စည်းကမ်းတွေ၊ နောက်တခါ ဒါကို စောင့်ကြည့်မှုတွေ၊ ဒီယန္တရားကို ဘယ်လို ဖြည့် ဆည်းမလဲဆိုတဲ့ဟာက ထူးခြားတယ်လို့ ပြောလို့ ရပါတယ်။ ကေအန်ယူဘက်က တချို့ကိစ္စတွေမှာ စိုးရိမ်မှု ရှိတယ်ဆိုတာ တွေ့ရတယ်။ သူတို့ရဲ့ စိုးရိမ်ချက်က ဥပမာ ဒီ Code of Conduct မရှိဘဲနဲ့ အပစ်အခတ်ရပ်စဲလိုက်တယ်ဆိုတာက ရှင်းရှင်းပြောရရင် အထဲမှာ လိုအပ်တဲ့ အချက် အလက်တွေ၊ နောက်တခါ ပြည်သူတွေ၊ နောက်တခါ ထပ်ပြီးတော့ တယောက်နဲ့တယောက် စစ်ပွဲတွေ မဖြစ်အောင် ဆိုတဲ့အပေါ်မှာ ဒါတွေကို ပိုပြီးသေချာချင်တယ်ဆိုတဲ့ အချက်က အကောင်းဘက်က စိုးရိမ်တယ်လို့ ကျနော် ထင်ပါတယ် ဗျ။”

မြန်မာအစိုးရရဲ့ ငြိမ်းချမ်းရေး ကိုယ်စားလှယ်အဖွဲ့မှာတော့ သမ္မတရုံး ၀န်ကြီးတွေဖြစ်တဲ့ ၀န်ကြီး ဦးအောင်မင်း၊ ဦးစိုးသိန်း တို့ အပါအ၀င် လူဝင်မှု ကြီးကြပ်ရေး ၀န်ကြီးဦးခင်ရီ၊ သစ်တောဝန်ကြီး ဦးဝင်းထွန်းတို့ ဦးဆောင်ဆွေးနွေးနေကြပါတယ်။ ကရင့်အမျိုးသား အစည်းအရုံးဘက်ကတော့ အထွေထွေ အတွင်းရေးမှူး နော်စီဖိုးရာစိန်နဲ့ ဖဒိုအားတိုတို့ ဦးဆောင် ဆွေးနွေးနေကြပါတယ်။ အပစ်အခတ် ရပ်စဲရေးအတွက် တိတိကျကျ သတ်မှတ်နိုင်ဖို့ နှစ်ဘက် လိုက်နာရမယ့် အချက် အလက်တွေကို ဆွေးနွေးနေကြတာဖြစ်လို့ ငြိမ်းချမ်းရေးအတွက် ရှေ့တိုးခြေလှမ်းတခု ဖြစ်လာမယ် လို့လည်း ငြိမ်းချမ်းရေး အကျိုးဆောင်တဦးဖြစ်တဲ့ ဦးလှမောင်ရွှေက ဆိုပါတယ်။

“ငြိမ်းချမ်းရေး ဖြစ်စဉ်ဆိုတာကတော့ အဆင့်တွေ အများကြီး သွားရဦးမှာပေါ့နော်။ ဒီအဆင့် မှာတော့ နှစ်ဘက်လုံး လနဲ့ချီ ၂ လလောက် ပြင်ဆင်ထားတာ ဖြစ်လို့ တော်တော် များများကတော့ နီးနီးစပ်စပ် သဘောတူလို့ ရမှာပါ။ နောက် နှစ်ဘက်လုံး အတွက် အကျိုးလည်း ရှိမှာပါ။”

ကေအန်ယူနဲ့ မြန်မာအစိုးရ ငြိမ်းချမ်းရေးအဖွဲ့တို့ကြား အခု ဆွေးနွေးပွဲဟာ တတိယ အကြိမ်မြောက် ဖြစ်ပြီး အရင်နှစ်ကြိမ် ဆွေးနွေးမှုတွေအပြီးမှာတော့ နှစ်ဘက် ဆက်ဆံရေး ရုံးတွေ ဖွင့်လှစ်နိုင်ခဲ့ပါတယ်။ တတိယအကြိမ် ဆွေးနွေးပွဲတွေကို ပြီးခဲ့တဲ့ သြဂုတ်လ ၂၇ ရက်နေ့က ဆွေးနွေး ဖို့ ရှိနေတာကို မြန်မာအစိုးရဘက်က အဆင်သင့် မဖြစ်တာကြောင့် ရွှေ့ဆိုင်းခဲ့ပြီး ဒီကနေ့မှ ကျင်းပနိုင် တာလည်း ဖြစ်ပါတယ်။ နှစ်ရက်ကြာမြင့်မယ့် အခုတခေါက် ဆွေးနွေးမှုကတော့ အပစ်အခတ် ရပ်စဲရေး နဲ့ ငြိမ်းချမ်းရေးအတွက် နှစ်ဘက်လုံးက လိုက်နာရမယ့် အချက်အလက်တွေနဲ့ တပ်နယ်မြေ သတ်မှတ်ရေး ကိစ္စတွေကို ဆွေးနွေးနေကြတာပါ။ ရလဒ်ကောင်းတွေ ထွက်လာဖို့လည်း နှစ်ဘက်လုံး က မျှော်လင့်နေကြတာ ဖြစ်ပါတယ်။



ကချင်မှာ အစိုးရတပ် အင်အားတိုး တိုက်ပွဲကြီးမှာကို စိုးရိမ်ကြပြီ

ကချင်ပြည်နယ် ဖားကန့်မြို့နယ်အတွင်းသို့ မြန်မာအစိုးရတပ်ဖွဲ့အင်အား နေ့စဉ် တိုးမြင့်ချလာ သဖြင့် ငြိမ်းချမ်းရေးဆွေးနွေးမလိုလို ဖြစ်နေမှုမှသည် တိုက်ပွဲကြီးများ ပြန်လည် ဖြစ်ပွားလာမည်ကို ဒေသခံများ စိုးရိမ်လာနေကြသည်။

ယခုလ ၁ ရက် နေ့မှစတင်၍ အစိုးရတပ်အင်အား မြစ်ကြီးနား၊ ဖားကန့်ကားလမ်းအတိုင်း အရပ်ဝတ်ဖြင့် လာရောက်ဖြည့်တင်းနေပြီး ဖားကန့်၊ ဆိုင်းတောင်၊ လောန်ခန် စသည့်နေရာများ အပါအဝင် နေရာအနှံ့ အနည်းဆုံး စစ်သား ၅ဝ မှ ၂ဝဝ ကြား ရှိနေသည်ဟု KIA စစ်ဘက်သတင်းရပ်ကွက်က ပြောသည်။

“တရက်နေ့ နှစ်နာရီကနေ အစိုးရတပ် ၆ဝ လောက် ကားနှစ်စီးနံ့ မိုးကောင်းဘက်ကနေ ဖားကန့်ကို တက်လာတယ်။ ဘယ်တပ်ရင်းဆိုတာ မသိသေးဘူး။ အားလုံးအင်အား ဘယ်လောက်ဆိုတာ ခန့်မှန်းရခက်တယ်။ တနေရာမှာ ၅ဝ ကနေ ၂ဝဝ ကြားရှိတယ်။ သူတို့က အရပ်ဝတ်နဲ့ ဒေသခံတွေနဲ့ရောပြီး တက်လာတာ”ဟု KIA တပ်သားတဦးက ပြော သည်။

ယမန်နေ့ကလည်း ရဟတ်ယာဉ်များဖြင့် အစိုးရတပ်ဖွဲ့ အင်အား ၂ဝဝ ထက်မနည်း လက်နက်ကြီးများနှင့် အတူဖြည့်တင်းထားသည်ဟု သိရသည်။

KIA ဘက်မှလည်း မိုးကောင်းမြို့နယ် အထက်ပိုင်းမှ ဖားကန့်၊ လောန်ခန် စသည့် လမ်းတလျှောက်တွင် KIA တပ်သားများ နေရာယူထားပြီး ဖြစ်ပြီး အသင့်အနေအထား တပ်လှန့်ထားသည်ဟု ဆိုသည်။

သြဂုတ်လ ၂၉ ရက်နေ့က နှစ်ဘက်တိုက်ပွဲကြောင့် ဝေအောင်ကမ္ဘာ ကုမ္ပဏီ၏ လောင်စာဆီသိုလောင်ရုံထဲ လက်နက် ကျသဖြင့် ပေါက်ကွဲမှုတခု ဖြစ်ပွားစဉ် အစိုးရဘက်မှ အကျအဆုံး အနည်းဆုံး ၅ဝ ခန့် သေဆုံးနိုင်သည်ဟု KIA ဘက်မှ ခန့်မှန်း ပြောဆိုသည်။

ထို့ကြောင့် အစိုးရတပ်ဖွဲ့နှင့် KIA တိုက်ပွဲ ကြီးထွားလာမည်ကို စိုးရိမ်သဖြင့် ဖားကန့်မြို့ပေါ်ရှိ စစ်ပြေးဒုက္ခသည်အချို့မြစ်ကြီးနား၊ မိုးကောင်း စသည့် နီးစပ်ရာ မိတ်ဆွေများထံ ထွက်ပြေး တိမ်းရှောင်မှုများ ရှိနေသည်ဟု ဒုက္ခသည်များကို ကြည့်ရှုစောင့်ရှောက်နေသော ကချင်နှစ်ခြင်းအသင်းတော်မှ ဆရာတူးဂျာက ပြောသည်။

ထိုကချင်နှစ်ခြင်း အသင်းတော်တွင် ပြီးခဲ့သည့် ပတ်က စစ်ပြေးဒုက္ခသည် ၈၈၆ ဦးရှိရာမှ မြစ်ကြီးနား၊ မိုးကောင်း စသည့် မိမိတို့၏ နီးစပ်ရာ မိတ်ဆွေများထံသို့ ထွက်ပြေးတိမ်းရှောင်သွားဖြင့် ယခု ၇၇၆ ဦးသာ ကျန်တော့သည်ဟု သူက ပြောသည်။

“သူ့နေရာသူတော့ အသင့်အနေအထား ဖြစ်နေတယ်။ ဒေသခံတွေက မှော်တွေမှာ သွားလာလို့ မရတော့ဘူး။ ဘာမှ လုပ်ကိုင်စားသောက်လို့ မရတော့ဘူး။ ကျနော်တို့ဘုရားကျောင်းက မိုးကြီးလာရင်တော့ ပြောင်းရွှေ့ဖို့ ခက်လာမယ်။ ခုတော့ ရေတော့ မကြီးသေးဘူး။ မိုးရွာလည်း ရေ ခုတော့ ပြန်ပြန်ကျသွားတယ်”ဟု သူက ပြောသည်။

ထို့ပြင် လက်ရှိ နှစ်ဖက် တိုက်ပွဲ မဖြစ်သော်လည်း အသင့်အနေအထားရှိနေသဖြင့် ဖားကန့်မြို့ပေါ်ရှိ မှော်များမှ စစ်ပြေး ဒုက္ခသည်များ အစိုးရဘက်မှ တပ်အင်အားပိုမိုတိုးချဲ့လာ သတင်းများအရ သိရကြောင်း NLD ပါတီရုံး တာဝန်ခံ ဦးခင်မောင်ချင်းက ပြောသည်။

“စစ်ရေးကတော့ အင်အားတိုးလာတယ်လို့ဘဲ ကြားတယ်။ မြို့ပေါ် မှော်က လူတွေကတော့ စိုးရိမ်ကြတော့ မြို့ပေါ် စခန်းတွေထဲ ဆင်းလာတော့တာ။ ခုတော့ ဘာမှ လုပ်လို့ မရသေးပါဘူး။ အခုချိန်မှာတော့ မိုးတွင်းလည်း ဖြစ်၊ စစ်ရေးနေရာ ဖြစ်နေတော့ ဘာမှ လုပ်လို့မရပါဘူး”ဟု သူက ပြောသည်။

နှစ်ဖက် စစ်ရေးပဋိပက္ခကြောင့် လက်ရှိ ဖားကန့်မြို့ပေါ်တွင် ဒုက္ခသည်စခန်း ၃၄ နေရာမှ စစ်ပြေးဒုက္ခသည်  ၁၂,ဝဝဝ ကျော်ရှိနေပြီ ဖြစ်ကြောင်း အမျိုးသားဒီမိုကရေစီအဖွဲ့ချုပ် ပြောသည်။
NLD လူမှုအဖွဲ့အစည်းများ ပူးပေါင်း၍ ယခု ခုနှစ်ရက် တပတ်အတွင်း ဆန်၊ ဆီ၊ ဆား စသည့် စားသောက်ကုန်များ အပါအဝင် ငွေကျပ်သိန်းပေါင်း ၃၈ဝ ကျော် လှူဒါန်းပြီး ဖြစ်ကြောင်း သူကို ပြောသည်။

လက်ရှိ စစ်ပြေးဒုက္ခသည်များ သောက်သုံးရန်အတွက် ချိန်စီတီးနှင့် လပ်ကီးစတား သောက်ရေသန့်စက်ရုံမှ အခမဲ့ လှူဒါန်းပေးနေပြီး ကျန်းမာရေးအတွက် မြို့နယ် ဆရာဝန်ကြီးနှင့်အတူ အဖွဲ့များ ဖွဲ့စည်း၍ ဒုက္ခသည်စခန်းအတွင်းနေ့စဉ် လာရောက် ကြည့်ရှုပေးနေသဖြင့် ကျန်းမာရေး ကောင်းမွန်နေသည်ဟု ဆိုသည်။ လက်ရှိ ဖားကန့်-မြစ်ကြီးနား ကားလမ်းတွင် မြစ်ကြီးနားသို့ အဆင်းလိုင်းကားများ ပုံမှန်သွားလာနေသော်လည်း အတက်လိုင်းကားများအား စစ်ဆေးမှုများသဖြင့် ဖားကန့်မြို့ပေါ် တက်မည့် လိုင်းကားများ သွားလာမှု နည်းပါးသွား သည်။ထို့ပြင် ပြီးခဲ့သည့် ရက်သတ္တပတ်တွင် ကချင်ပြည်နယ် အစိုးရအဖွဲ့မှ စစ်ပြေးဒုက္ခသည်များအတွက် ကျပ်သိန်း ၅ဝ လှူဒါန်းခဲ့သဖြင့် အဆိုပါ ဖားကန့်နှစ်ချင်းအသင်းတော်ရှိ စစ်ပြေဒုက္ခသည်များအတွက် ငွေသား ကျပ် သုံးသိန်းကျော် လက်ခံ ရရှိခဲ့သည်ဟု ဆရာဦးတူးဂျာက ပြောသည်။
လက်ရှိ စစ်ပြေးဒုက္ခသည်များအား ဖားကန့်မြို့ပေါ်ရှိ ဘာသာရေးအသင်းအဖွဲ့၊ လူမှုအသင်းအဖွဲ့များ၊ ဗုဒဂေါပကအဖွဲ့၊ NLD ပါတီ၊ မန္တလေးကျော်ဝိုင်း စသည့် လူမှုအဖွဲ့များ လာရောက်လှူဒါန်းနေသည်ဟု သိရသည်။

 

မြစ်ကြီးနားတွင် သဘာဝပတ်ဝန်းကျင် ထိန်းသိမ်းရေး ဟောပြောပွဲ ကျင်းပမည်


မြန်မာနိုင်ငံမြောက်ပိုင်း ကချင်ပြည်နယ်၊ မြစ်ကြီးနားမြို့မှာ ပထမဦးဆုံးအကြိမ် သဘာဝ ပတ်ဝန်းကျင် ထိန်းသိမ်းရေးဆိုင်ရာ အသိပညာပေး ဟောပြောပွဲကို အခုလ ၁၄ ရက်နဲ့ ၁၅ ရက်တွေမှာ ကျင်းပဖို့ရှိပြီး ရန်ကုန်မြို့က ထင်ရှားတဲ့ သဘာဝ ပတ်ဝန်းကျင်အရေး ကျွမ်းကျင်သူတွေ လာရောက် ဟောပြောကြမယ်လို့ သတင်းရရှိပါတယ်။
ဒီဟောပြောပွဲကို မြစ်ကြီးနားမြို့ပေါ်မှာရှိတဲ့ ရပ်မိ ရပ်ဖတွေနဲ့ ကချင်အမျိုးသမီးအဖွဲ့ (Kachin Women Union) က ဦးစီးပြီး မြစ်ကြီးနားမြို့၊ စီတာပူ မနောကွင်း၊ မဂျွယ်ခန်းမဆောင်မှာ ကျင်းပမှာ ဖြစ်ပြီး သဘာဝ သယံဇာတတွေ ထုတ်ယူသုံးစွဲမှုများတဲ့ ကချင်ပြည်နယ်အတွက် အင်မတန် အကျိုးများမယ့် ဟောပြောပွဲ ဖြစ်တယ်လို့ ပွဲဖြစ်မြောက်ရေး စီစဉ်သူ ဒေါ်ဂျာဆိုင်းခေါန် က ပြောပါတယ်။
"ဒီသဘာဝ ပတ်ဝန်းကျင် ထိန်းသိမ်းရေးဆိုတာက အခုအင်မတန်မှ အရေးကြီးတဲ့ အကြောင်းအရာ တစ်ရပ်ဖြစ်လာပြီလို့ ကျွန်မတို့အနေနဲ့ ယူဆတယ်။ လွန်ခဲ့တဲ့ အချိန်တွေမှာ ကျွန်မတို့ ပြည်သူတွေ ကျယ်ကျယ်ပြန့်ပြန့် ဒီလောက်မသိဘူး။ အထူးသဖြင့် ကျွန်မတို့ ကချင်ပြည်နယ်မှာ သဘာဝ အရင်းအမြစ်တွေ ပေါများတယ်ဆိုတော့ ကျွန်မတို့အနေနဲ့ ဒီသဘာဝ အရင်းအမြစ်တွေကို ထုတ်ယူသုံးစွဲလို့ မကုန်ခန်းနိုင်ဘူးလို့ အားလုံးရဲ့ အသိထဲမှာ အဲလိုပဲ ယူဆထားကြတယ်။ ပြီးတော့ တကယ်တမ်း ဒါတွေကို ဘယ်လို ထိန်းသိမ်းရမယ်။ ပြီးတော့ ဒါတွေ ကုန်ခန်းလာခြင်းအားဖြင့် ကျွန်မတို့ဆီမှာ နောက်ဆက်တွဲ ဘယ်လို ဆိုးကျိုးတွေ ဖြစ်လာနိုင်တယ်ဆိုတာကို ပြည်သူတွေက ကျယ်ကျယ်ပြန့်ပြန့် မသိသေးဘူး။ မသိသေးတဲ့ အခါကျတော့ အခု သူများဆီမှာ ဖြစ်ပျက်နေတဲ့ အကြောင်းအရာတွေကိုလည်း ပြောပြချင်တယ်။ အဲဒီအကြာင်းအရာတွေ ကတော့ ရန်ကုန်ကနေလာတဲ့ ပညာရှင်တွေက သူတို့ဆီမှာ အချက်အလက်တွေ ပိုပြီးရှိတဲ့အတွက် အဆင့်ဆင့် ဘယ်လိုဆိုးကျိုးတွေ ဖြစ်လာနိုင်တယ်ဆိုတာ သူတို့အနေနဲ့ ပြောပြမှာ ဖြစ်တယ်"
ဒီဟောပြောပွဲကို သဘာဝ ပတ်ဝန်းကျင် ထိန်းသိမ်းရေး ပညာရှင်တွေဖြစ်တဲ့ FREDA အဖွဲ့က ဦးအုန်း၊ မိုးလေဝသနဲ့ ဇလဗေဒပညာရှင် ဒေါက်တာဦးထွန်းလွင်၊ ဒေါ်ဒေဝီသန့်စင်၊ Eco Dev မှ ဦးဝင်းမျိုးသူ၊ ဦးဝင်းကျော်၊ ကာတွန်းဆရာ အော်ပီကျယ်၊ စာရေးဆရာမ ဂျူးနဲ့ ဆရာ စိုးဝင်းငြိမ်းတို့ လာရောက် ဟောပြောမှာဖြစ်ပြီး ဒေသခံအချို့လည်း ပါဝင်ဆွေးနွေးမယ်လို့ သိရပါတယ်။
လောလောဆယ် ကချင်ပြည်နယ် အတွင်းမှာရှိတဲ့ သဘာဝ ပတ်ဝန်းကျင်အရေး စိတ်ဝင်စားသူတွေ အပါအ၀င် ပရိသတ် ၁၀၀၀ ဝန်းကျင် ဖိတ်ကြားဖို့ စီစဉ်ထားပြီး စိတ်ပါဝင်စားသူ မည်သူမဆို တက်ရောက်နိုင်တယ်လို့ ဒေါ်ဂျာဆိုင်းခေါန် ကပြောပါတယ်။အခုလို ကျင်းပနိုင်ဖို့ အတွက် မြစ်ကြီးနား မြို့နယ်အုပ်ချုပ်ရေးရုံးကိုလည်း ပြီးခဲ့တဲ့ သြဂုတ်လ ၃၁ ရက်နေ့က စာတင်ထားတယ်လို့လည်း သိရပါတယ်။

LWIN PWIN
NLABR
Web-site:                   www.nlabr.com
Blog:                         http://wanna23-23.blogspot.com/
Facebook:                   Sa Maung

0 comments:

Post a Comment